1 aTimoti 2 - Izere New Testament

Itabak natoon kuya Adakunom iben

¹ Ni ime̱se̱ng'e, mi tá nye akusuk ye, a ra yiir iya kasho̱o̱n be kunye izong, ne a nye aduwa, ne a tonong riye̱ rikan be Adakunom kamok ánerawe cice̱r.

² A ra yiir i nye anong kamok ágwo̱m cice̱r ne áya a tà be agbang itsik cice̱r, nong tà sor yir caang be kameneng riye̱ kaye̱e̱r inyim Adakunom ne i sor yir zhe̱l'e kaye̱e̱r koakye kuse.

³ Anong se gye̱r, Adakunom a ta nye Aner Kashesh yir fok kusas anong dide̱ng.

⁴ Wu shim ánerawe cice̱r ta se̱ kashesh ne á ren iren katsak.

⁵ Kamok Adakunom se azining, aner aya a ta no̱ natite Adakunom be ánerawe se azining, aner'e nye aYeso Kiristi.

⁶ Wu ne a no̱o̱k rice wu nong a tá sheshek ánerawe cice̱r, ike̱ng ife Adakunom ta tak kazatse nizen i tá se gye̱r'ong.

⁷ Kamok ike̱re̱ iyong ne a ti kasa nong a ta te amanzo ne aner awazi. Mi te aner aya i ta bo̱so̱p áner aya a ta nye áner aYahuda baꞌ, itak kuno̱o̱k katsak ne katsak. Katsak ne mi fe̱ be wan sang abo̱o̱s baꞌ.

⁸ Mi shim koake̱, atek ra kok ibo̱k ba naza nong á ta nye aduwa dar riye̱ kubeseng ka be nanaan baꞌ.

⁹ Ányining gip, á ra nye izem iya i ta se gye̱r be ba, sang be ares áya a tana sak átek tana ka kuus ba baꞌ, sang awan abar ka kutes ares afe a ta nye be izinariya ka ike̱re̱ i ta gye̱se̱m ka ares aya a ta be itso̱m dide̱ng tsek baꞌ,

¹⁰ Amma á ra nye kunye kutek, kamok i se gye̱r be ányining aya a ta fe̱ ye ba fok inyim Adakunom.

¹¹ Aner abining ra shan kubo̱so̱p kaye̱e̱r awhiwhe̱ ne a mees rice wu gye̱r.

¹² Mi no̱o̱k iren nong aner abining ta bo̱so̱p aner amitek'e ka a tin nye rigwo̱m natoon wu baꞌ. A ra foos gbik.

¹³ Mi fe̱ anong kamok Adakunom nye Adamu ni ime̱se̱ng'e, nizham a tá ra nye Iwa.

¹⁴ Sang Adamu ne a tú ku wo̱ro̱k ni ime̱se̱ng'e baꞌ, amma abining'e ne a tú ku wo̱ro̱k ma rine̱n no̱.

¹⁵ Gip be anong, aner abining ta se̱ kashesh kamok a tes inoon ke a ya kasho̱o̱n kaye̱e̱r kuno̱o̱k katsak be kushim kuse zhe̱l ne a yiir rice wu.