1 aTasalonika 4 - Izere New Testament

Kuri kusor kuya Adakunom ta shim

¹ Ni igang'e ároneng, yir ta nye yin izong ne i bun i ka no̱o̱k yin itabak kaye̱e̱r riyerek Agwo̱m Ágwo̱m yir ye, sor yin kuri kusor kuya Adakunom tana fok kusas'e kyo̱ndi yir tá ka bo̱so̱p yin'e. Yin sor yin kusor kutek gye̱rtatan, amma nibarang yin kunye anong.

² Yin ren yin kuri ike̱re̱ yir tá fe̱ yir be yin be agbang kuto̱ kamok kukyem Agwo̱m Ágwo̱m yir aYeso.

³ Kushim Adakunom se ye: yin ra sor yin zhe̱l; won yin kunye rikuna.

⁴ Koangan yin ra ren kuri iren wu tana kyem a fek kuro̱m wu, nong a ta se zhe̱l ne a se yiik.

⁵ Sang be rinyisi rikan baꞌ, kyo̱ndi áfe a ta se nurin áfe sang á ta ren Adakunom baꞌ.

⁶ Kyo̱ndi yir tá tsang i fe̱ yir, ne i bun i ka zhe̱she̱k yin ye, sang akak tu beseng afudang riye̱ baꞌ, ka a tu ku nye ike̱ng ikak imaan'e baꞌ, kamok Agwo̱m Ágwo̱m yir ne a ta to̱ áner kuri ayong amok.

⁷ Kamok sang Adakunom ti yis yir nong tá won dar i sor yir zhe̱l baꞌ, amma nong ta sor yir zhe̱l.

⁸ Kamok anong ke aner aya ne a gaar rife̱ na, sang a gaar anerawe baꞌ, amma a gaar Adakunom, aya a ta ka no̱o̱k yin Kabik wu Kazhe̱l'e.

⁹ Kyo̱o̱rna, natoon kushim áronyining yin áfikuus, yir be yir ike̱ng ikak i tana ka zibir yin'e natoon iyong baꞌ, kamok yin be rice yin, Adakunom ne a tá ka bo̱so̱p yin'e ye yin ra naka shim yin.

¹⁰ Katsak'e, yin shim yin áronyining yin áfikuus á ta se niben aMakidoniya cice̱r, gip be anong ároneng, yir shim yin tin barang yin kunye anong dide̱ng.

¹¹ Be yin ifeng kusor kutek ne i ni sak yin riye̱ ninye ike̱re̱ yin ne i nye yin itomong be ibo̱k yin.

¹² Nong ase̱ kuse yin ta se̱ kuyiik nufe áya sang a ta nye áfikuus baꞌ, ne i bun i se̱ yin ike̱re̱ ife rice yin fan i bin fereng yin na akak.

Kube̱ aYeso

¹³ Amma kikyo̱o̱r name ároneng, yir shim yin tu sor yin dar kuren natoon áya a tá mereng ida kaye̱e̱r aYeso baꞌ, nong yin ta nye yin riye̱ riwe kyo̱ndi ribir ánerawe áya sang á ta be ike̱ng iya ba ta min te riye̱ baꞌ.

¹⁴ Yir ti no̱o̱k yir katsak ye, aYeso ku, a tá bun a dorok be kutser, anong ne áya a tá mereng ida kaye̱e̱r Agwo̱m Ágwo̱m yir. Adakunom tà be̱ be ba mak be aYeso katuk igang'e.

¹⁵ Ike̱ng Agwo̱m Ágwo̱m yir tá fe̱ be rice wu'ong ne yir ta taas yin kyo̱o̱rna'me yir áya i ta rusek yir be kutser. Nizen wu tana be̱, yir tà tsang yir áya a tan mereng ida kaye̱e̱r aYeso baꞌ.

¹⁶ Katuk kayong, Agwo̱m Ágwo̱m yir tà tiik kaben be rice wu, ne a yis be agap, be kuto̱ agbang amaleka ne a fe̱e̱p rigba Adakunom. Áya a tan tsang á kus kaye̱e̱r aKiristi baꞌ, ne á ta san kudorok.

¹⁷ Nama anong, yir áya i ta rusek yir be kutser tà dorok yir naza nong tà nyim yir mak be ba kaye̱e̱r ane̱n naza nong tà sor yir be Agwo̱m Ágwo̱m yir ma izen izen.

¹⁸ Kamok anong na tsesek yin be rife̱ na.