1 aTasalonika 1 - Izere New Testament

Ashou

¹ Mi aBulus be aSila ne aTimoti i ta nye yin ashou yin áfikuus aTasalonika ashou, yin áya i ta nye yin áfe Adakunom a ta nye Ada yir ne Agwo̱m Ágwo̱m yir aYeso Kiristi. Ritek be kameneng riye̱ se mak be yin.

Kusor áner aTasalonika

² Yir tonong yir Adakunom riye̱ rikan yir ye̱rye̱r kamok yin cice̱r, nizen iya yir ta sen nye yir aduwa.

³ Yir yiir i yiring yir be itomong yin iya i ta tonong kuno̱o̱k katsak yin nasho̱o̱n Adakunom yir ne Ada yir, be kuri kucan yin ta can yin kamok kushim ne kute riye̱ yin ta min te yin natoon Agwo̱m Ágwo̱m yir aYeso Kiristi dide̱ng.

⁴ Ároneng, áya Adakunom ta shim, yir ren yir ye wu ne a tá ka kasa yin,

⁵ kamok sang yir be̱ yir be Rife̱ Ritek'e be rife̱ kanu tsek baꞌ, amma rife̱'me be̱ be kukyem ne Kabik Kazhe̱l'e sang be agak riye̱ baꞌ amma be katsak cice̱r. Yin ren yin kuri kusor kuya yir tá sor yir be yin nong tá ka tobok yin.

⁶ Yin kuus yin ane̱e̱ yir ne afe Agwo̱m Ágwo̱m yir, yin so̱ yin risam gye̱rtatan, amma yin shan yin rife̱ Adakunom'me be riye̱ rikan riya Kabik Kazhe̱l'e tá ka no̱o̱k yin.

⁷ Kunye anong sak yin sor yin ike̱ng kumaas nufe áfikuus cice̱r áya a ta se niben aMakidoniya ne Akaya.

⁸ Yin sak yin rife̱ Agwo̱m Ágwo̱m tá no̱ koake̱ sang kaye̱e̱r iben aMakidoniya ne Akaya tsek baꞌ, amma koake̱ ren kuri kuno̱o̱k katsak yin ta be yin kaye̱e̱r Adakunom sang ma yir ba bun i fe̱ yir ike̱ng ikak natoon'e baꞌ.

⁹ Ba be rice ba fe̱ itak kushan niren afe yin tin shan yir, nizen iya yir tá be̱ yir nufe yin, ne kuwon kukuus itsi yin tá won yin nong i tu ku bun yin Adakunom afe kutser ne afe katsak itomong,

¹⁰ ne i tor yin izen kube̱ Igon wu a tana ne naza. Adakunom tú ku dorok be kutser, wu ne a nye aYeso aya a tanin shesh yir kaye̱e̱r riye̱ kubeseng ri tà saase.