1 aKoranti 5 - Izere New Testament

Rikuna sas kaye̱e̱r áfikuus baꞌ

¹ Mi fok ye yin nye yin rikuna, kuri kuya áfurin gip ta nye baꞌ. Anerawe ko̱s be abining atek wu,

² ne yin ni iya yin kuka. Gye̱r ke i ka daam yin, ne i tun yin aner aya a tá nye ike̱ng kuri iyong kaye̱e̱r yin aꞌa?

³ Mi se mak be yin kyo̱o̱rna baꞌ gye̱rtatan, amma mi se mak be yin kaye̱e̱r kabik. Mi n wor n te̱n amok natoon aner aya a ta nye ike̱ng kuri iyong nakuruk kyo̱ndi mi se azong.

⁴ Izen iya yin nyim yin kaye̱e̱r riyerek Agwo̱m Ágwo̱m yir aYeso, mi se be yin kaye̱e̱r kabik ne kukyem Agwo̱m Ágwo̱m yir aYeso,

⁵ won yin aner ayong nubo̱k Ishetan nong a tà fok risam nong ase̱ a ta shishing kuse wu ne a se̱ kashesh katuk kube̱ Agwo̱m Ágwo̱m yir aYeso.

⁶ Kuka yin nye kutek baꞌ. Aser, yin ren yin ye ayisti cie̱k ne a sak nakan'e kusum ta dorok aꞌa?

⁷ Kam yin be ayisti azen nong ta te yin kyo̱ndi nakan nafas na ta se dar ayisti, kyo̱ndi yin ta se yin kyo̱o̱rna'me, kamok a min nye asidaka be aYeso a ta nye aturuk aPasova yir.

⁸ Kamok anong, ti nye yir riye̱ rikan'e amma be ayisti azen aya a ta nye ayisti amaan'e ka akardak'e baꞌ. Sor yin kyo̱ndi abiredi a ta se dar ayisti, abiredi'me se kyo̱ndi aner a ta be katsak ne a se zhe̱l.

⁹ Mi tá zibir yin'e kaye̱e̱r kufumung'i ye sang tu gung yin rice be áner aya a ta nye rikuna baꞌ.

¹⁰ Sang mi ti fe̱ natoon aya á ta nye afurin a ta nye rikuna baꞌ, ka áya a ta ye̱re̱k, ka áya a ta be itsang, ka áya a ta kuus ike̱re̱ itsi. Ke i se anong, i nye ye ma yin ta won yin kazatse'me.

¹¹ Kyo̱o̱rna, mi sen ka zibir yin'e ye sang tu gung yin rice be koangan a ta yis rice wu ye afikuus ne a nye rikuna, ka a di ike̱ng ka a kuus itsi ka kukas naro̱, ka a so̱ amaan ike̱re̱, ka akpatang baꞌ. Sang tu ya yin naya mak be áner kuri ayong baꞌ.

¹² Akye̱ ti gung be áfurin a tana ku to̱ ba amok e̱? Áya á ta nye áfikuus ne yin tu ku to̱ yin ba amok aꞌa?

¹³ Adakunom ne a tà to̱ áfurin amok. “Tun yin aner a ta nye amaan'e kaye̱e̱r yin.”