1 aKoranti 4 - Izere New Testament

Ámanzo aYeso

¹ Kamok anong ni sok yir kyo̱ndi ásam aKiristi, áya Adakunom tú ku won ba ike̱re̱ wu iya i ta se nune̱re̱ng nubo̱k.

² Kamok anong ne a shim aner aya a tu ku won ba amana, a ra sor aner aya a tana yiir ike̱ng'e kyo̱ndi a ta shim.

³ I nye ike̱ng kudaam nunaan dide̱ng baꞌ ke yin ti to̱ yin amok, ka a ti to̱'me naro̱ a ta to̱ ánerawe amok. Mi gip mi to̱ rice mi amok baꞌ.

⁴ Riye̱ mi se rizining, iyong ra tonong ye mi dun rine̱n baꞌ. Adakunom ne a ta kyem a fe̱ natoon'i.

⁵ Kamok anong tu te̱n yin akak amok kum ne izen'e ruresek baꞌ. Won yin ma Agwo̱m Ágwo̱m yir aYeso be̱. Wu ne a tà be̱ te̱s ike̱re̱ i ta se nawhi ne a tonong ike̱re̱ i ta se kaye̱e̱r aye̱ ánerawe. Nizen iyong ne koangan tà shan nakerek wu nufe Adakunom.

⁶ Ároneng, mi ti maas rife̱ na natoon Apolos be mi kamok yin, nong ase̱ yin tin ye̱re̱k yir ta se̱ yin rikpa rife̱ a ta fe̱ ye, “Sang tu shorop rife̱ a tan zibir baꞌ,” Fan yin bin nye yin kuka natoon akak kaye̱e̱r yir ne i nar yin.

⁷ Angan ta sak wan ta nar akak e̱? Akye̱ ne wan be a ta won dar a ka no̱o̱k e̱? Ke i nye ye a tá no̱o̱k koakye ike̱ng iya wan ta be, to̱, akye̱ sak wan ta ya kuka kyo̱ndi a tá no̱o̱k baꞌ e̱?

⁸ Kyo̱o̱rna'me yin be yin koakye yin ta shim yin, yin n te yin árum nakuruk. Yin n te yin ágwo̱m dar yir. Akye̱ fa sak yin n te yin ágwo̱m katsak'e nong ase̱ yir gip tà te yir ágwo̱m mak be yin.

⁹ Mi di ye Adakunom min sak yir ta te yir ámanzo nong a ta nye be yir fe̱re̱, kyo̱ndi áner aya a tà ma ka te̱n ba amok riku. Yir n te yir ike̱ng kuye̱re̱k nasho̱o̱n kazatse na kusum, be nasho̱o̱n ámaleka ne ánerawe gip.

¹⁰ Yir te yir afunam'e kamok aKiristi, yin di yin ye yin be yin ritseng kamok aKiristi. Yir yo̱mo̱ng yir, yin be yin agap. Ánerawe ta ka tiyiik yin, ne á ni zhe̱e̱sh yir.

¹¹ Kyo̱o̱rna'me yir sor yir be izong ne kuto̱ kukoor, yir tes yir agye̱e̱r ares, á ti tsosok yir, yir be yir karo̱ kuko̱s baꞌ.

¹² Yir nye yir itomong dide̱ng be ibo̱k yir. Ke akak ti kas yir, ne yir te yir aner'e ritek. Ke a ti tabak yir, ne yir naka tsesek yir.

¹³ Ke ánerawe fe̱ rimaan'e natoon yir, ne yir fe̱ yir tatan be ba. Kyo̱o̱rna'me yir n te yir kyo̱ndi awha kazatse na aya ánerawe ta di kye̱re̱, n te yir kubutong kazatse na.

¹⁴ Sang mi ta zibir yin ike̱re̱ na nong ase̱ ta ka te yin nisum baꞌ, mi ta zibir yin'e nong ase̱ ta ka ko̱ro̱k yin kuto kamok yin nye yin inoon mi naya mi ta shim.

¹⁵ Yin be yin áner á ta ka bo̱so̱p yin'e kaye̱e̱r aKiristi whe̱re̱ gye̱rtatan, amma yin be yin áda whe̱re̱ baꞌ, kamok kaye̱e̱r aYeso Kiristi, mi sor ada yin nizen mi tá ka taas yin Rife̱ Ritek

¹⁶ Mi ta nye yin akusuk, bo̱so̱p yin kuse mi.

¹⁷ Kamok anong, mi tà ka tom yin aTimoti, igon mi kaya mi ta shim, aya a ta be katsak nikuus aYeso. Wu tà ka yiring yin kuri kutseng mi ni ikuus aYeso aKiristi, kuya ku ta se tite̱re̱ be ike̱ng iya mi tá bo̱so̱p áfikuus'e koake̱ ne mi tseng naro̱ kuya Adakunom iben.

¹⁸ Ákak yin kok rice naza kyo̱ndi mi ta ba be̱ nufe yin baꞌ.

¹⁹ Ke Adakunom shim mi m be̱ barak ta be̱ nufe yin. Mi ta be̱ fok kuri rife̱ áfe a ta kok rice naza'ong tá fe̱ tsek baꞌ, amma mi tà be̱ di kuri kukyem kuya ba ta be.

²⁰ Kamok rigwo̱m Adakunom nye ike̱ng kufe̱ nanu tsek baꞌ, ri nye rife̱ kukyem.

²¹ Akye̱ ne yin shim ne i nar yin e̱? I be̱ nufe yin be awhereng, ka be kushim ne kuse tatan e̱?