1 aKoranti 3 - Izere New Testament

Ásam Adakunom

¹ Katsak'e ároneng, mi kyem i fe̱ be yin kyo̱ndi áner aya a tan kyem ánerawe nabik baꞌ, mi fe̱ be yin kyo̱ndi áner aya a ta be kuto̱ro̱ng rinerawe, kyo̱ndi inoon nazhizhe̱k'e kaye̱e̱r aKiristi.

² Mi tá no̱o̱k yin nabasang sang naya na ta se kpakarak baꞌ, kamok yin tsang i kyem yin baꞌ. Kyo̱o̱rna gip yin n kyem yin baꞌ.

³ Yin ru be yin kuto̱ro̱ng rinerawe kamok yin ru be yin rishishim ne i ko̱ro̱ng yin. Aser, iyong tonong ye yin ru be yin kuto̱ro̱ng rinerawe aꞌa? Kunye kuyong nye kuse rinerawe aꞌa?

⁴ Ke i nye ye akak fe̱ ye, “Mi nye afe aBulus,” ne akak fe̱ ye, “Mi nye afe Apolos.” Aser, iyong tonong ye yin ru be yin kuse kuri rife rinerawe aꞌa?

⁵ Angan ne a nye Apolos nigaan'e e̱? aBulus nye angan kuruk e̱? Yir nye yir ásam Adakunom tsek, áya a ta sak yin tin no̱o̱k yin katsak, kamok Adakunom no̱o̱k koangan itomong a tana kunye'me.

⁶ Mi tuus ne Apolos ni tes ashi, amma Adakunom ne a sak i tá rasak.

⁷ Kamok anong aner aya a tá tuus be aya a tin tes ashi nye ike̱ng ikak baꞌ, Adakunom tsek ne a sak ike̱ng'e ta rasak.

⁸ Kuto̱ro̱ng aner aya a ta tuus be aya a tin tes ashi se kuzining, koangan ba tà se̱ ishorong wu nanu itomong wu tá nye.

⁹ Yir nye yir itomong Adakunom mak, ne yin nye yin riko̱ Adakunom be rino̱k wu.

¹⁰ Mi ti nye itomong be ritek Adakunom tin no̱o̱k ne i ni barak ribor kyo̱ndi aner aya ta ren rino̱k dide̱ng. Iyong ákak sen nino̱k natoon'e. Koangan a ta sen nino̱k natoon'e rin sak riye̱ be iren iya wu ta sen no̱k'e.

¹¹ Sang akak ta ba kyem a barak ribor rikak ze̱e̱r be riya a tan barak baꞌ, kamok ribor'e nye aYeso Kiristi.

¹² Aner aya a ta no̱k natoon ribor na be izinariya ka be azurfa, ka be ata aya a ta sas, ka be ikon, ka be agam ka be akanyo̱o̱r ayi,

¹³ a tà di kuri itomong koangan ta nye kanang kamok katuk Adakunom tana to̱ kazatse amok a tà tun koakye de̱s. Kamok katuk kayong a tà te̱s itomong koangan tá nye be kuro̱ng, kuro̱ng'e ne ku ta tonong itomong koangan.

¹⁴ Ke itomong wu tá nye'me nyeseng, a ta se̱ ishorong wu.

¹⁵ Ke kuro̱ng ya itomong'e, i nye ye risam wu be nashi, a tà se̱ kashesh gye̱rtatan. Amma kashesh wu tà ra se kyo̱ndi aner a ta gor kaye̱e̱r rigyem kuro̱ng.

¹⁶ Aser, yin ren yin ye yin nye yin karo̱ Adakunom tu ku sor aꞌa? Yin ren yin ye Kabik Adakunom sor kaye̱e̱r yin aꞌa?

¹⁷ Koangan ne a beseng karo̱ Adakunom tu ku sor, Adakunom tú ku beseng gip; kamok karo̱ Adakunom tu ku sor se zhe̱l. Yin ne i nye yin karo̱ Adakunom tu ku sor.

¹⁸ Sang tu naka wo̱ro̱k yin baꞌ. Ke akak di ye wu be ritseng kaye̱e̱r yin nizam iyu, a ra sok rice wu kyo̱ndi wu be ritseng baꞌ, nong ase̱ a ta kpa ritseng.

¹⁹ Kamok kukyem kazatse na nye rifunam nasho̱o̱n Adakunom kyo̱ndi i ta se ni izibir ye, “Adakunom yising áya a ta se tse̱ng tse̱ng kaye̱e̱r ritse̱ng ba'me.”

²⁰ I se ni izibir gbak ye, “Agwo̱m Ágwo̱m ren ye kuto̱ro̱ng áner ritseng nye kukpe̱de̱ng'e.”

²¹ Kamok anong, akak tin ya kuka natoon anerawe baꞌ. Koakye ike̱ng nye ife yin,

²² ko aBulus ko Apolos ko aKefas ko kazatse na, ko riku ko kutser ko ike̱re̱ a kyo̱o̱rna ko iya i tana be̱, i nye ife yin cei,

²³ Yin nye yin áfe aKiristi, aKiristi nye afe Adakunom.