1 aKoranti 2 - Izere New Testament

Rife̱ natoon aKiristi a tu ku tigak

¹ Ároneng, nizen iya mi tá be̱ nufe yin i tá ka taas yin katsak Adakunom kaya ka ta se nune̱re̱ng, sang mi be̱ be kuren kanu ka be kutonong kukyem baꞌ.

² Katsak'e, mi shim be riye̱ mi nong i tá wobok koakye ike̱ng mi tá ren nizen mi ta se mak be yin, ma ke itak natoon aYeso Kiristi be ku kutigak tsek.

³ Nizen iya mi ta se mak be yin, mi be agap riye̱ baꞌ ne i be inyim ne ikap kutiim dide̱ng.

⁴ Iren iya mi ta ka taas yin ne ike̱re̱ iya mi ta ka taas yin se be ritseng ka be rife̱ re̱m re̱m baꞌ, i se natoon kukyem Kabik Adakunom tá tonong,

⁵ fan kuno̱o̱k katsak yin bu se natoon kukyem kuri rife anerawe baꞌ. Amma kaye̱e̱r kukyem Adakunom.

Kukyem Adakunom

⁶ Gip be anong, yir fe̱ yir rife̱ riya ri ta nye rife kukyem kuri rife áner á tan kyem ánerawe nabik sang kuri rife ágwo̱m kazatse ka kuri kufe áner izam na áya a tana wei baꞌ.

⁷ Wayo, yir fe̱ yir itak kukyem Adakunom kuya ku ta se nune̱re̱ng, kuya anerawe ta ren baꞌ, kuya Adakunom tá tsang a sak kum ni ime̱se̱ng'e nong ase̱ yir tin se̱ yir kuyiik.

⁸ Akak kaye̱e̱r ágwo̱m izam iyu kyem a ren kukyem'me baꞌ, ke á fa fe̱ ye ba ren ke ba tigak Agwo̱m Ágwo̱m yir a ta se yiik baꞌ.

⁹ Kyo̱ndi i ta se ni izibir ye, “Akak kun di baꞌ, akak kun fok baꞌ, akak kun to̱ riye̱ wu ike̱ng iya Adakunom ta nye kanye̱k'e kamok áfe a tu ku shim baꞌ.”

¹⁰ Amma Adakunom be Kabik wu ne a ti tonong yir ike̱re̱ na. Kabik'e ne ka ye̱re̱k koakye, be ike̱re̱ ife Adakunom i ta se tsik gip.

¹¹ Angan ta kyem a ren kuto̱ro̱ng ku ta se kaye̱e̱r riye̱ akak sang ke kabik aner'e baꞌ e̱? Anong gip, akak ta kyem a ren kuto̱ro̱ng ku ta se kaye̱e̱r riye̱ Adakunom baꞌ, ma ke Kabik Adakunom'me tsek.

¹² Yir n shan yir Kabik kaya ka tá ne̱ nufe Adakunom, sang kafe kazatse na baꞌ, nong ase̱ ta ren yir ike̱re̱ Adakunom tin no̱o̱k yir na awarak.

¹³ Yir ta taas yin ike̱re̱ na sang be irem ife a tin bo̱so̱p yir'e be kukyem rinerawe baꞌ, amma yir fe̱ yir ike̱ng ife Kabik tin bo̱so̱p yir'e, ne i fe̱ yir natoon ike̱re̱ iya i ta nye ife kabik ife katsak be áya a ta nye áfe kabik.

¹⁴ Aner aya a be Kabik Adakunom baꞌ, a ta shim ike̱re̱ i ta nye ife Kabik baꞌ kamok ike̱re̱ Kabik'e sor rifunam nufu. A ta kyem a ren ike̱ng Kabik'e tin fe̱ baꞌ, kamok aner aya a ta be kabik tsek ne a ta kyem a ren.

¹⁵ Aner aya a ta nye afe kabik to̱ natoon koakye, akak ra ren riye̱ wu baꞌ.

¹⁶ Rife̱ Adakunom fe̱ ye, “Angan ren kuto̱ro̱ng Adakunom, a tana ku no̱o̱k itabak e̱?” Amma yir be yir kuto̱ro̱ng kyo̱ndi kufe aKiristi.