1 aKoranti 16 - Izere New Testament

Itso̱m a ta tusung kamok áner Adakunom

¹ Kyo̱o̱rna natoon kutusung ike̱ng kamok áner Adakunom: Nye yin ike̱ng iya mi tá fe̱ be áfikuus aGalati ye á ra nye.

² Koakye kunom ime̱se̱ng'e na asate, koangan yin ra sak itso̱m íkak nukim, tite̱re̱e̱ be ike̱ng iya wu tá se̱s, nong ta sak yin, nong ase̱ ke mi be̱, sang yin tà ba tusung yin ike̱ng ikak baba baꞌ.

³ Ke mi be̱, mi tà tom áner aya yin ta shim yin ye á se gye̱r be kufumung nikum á tá ka ren ba, nong á tá tseng be ike̱ng iya yin tá nyesek yin na aUshalima.

⁴ Ke mi di ye i tin nar ta tseng gip, ne ba ni tsaa.

⁵ Nama mi tsang i tseng niben aMakidoniya, mi tà be̱ nufe yin, kamok mi n te riye̱ mi ye mi tà gor na aMakidoniya nizham.

⁶ Kashim mi tà sor be yin inom cie̱k ka tà sor be yin ma izen kuwun ayi, nong ase̱ yin tin se̱ yin mo kaye̱e̱r kanye̱k kutseng'i, koake̱ ne mi tà tseng.

⁷ Mi ta kyem i gor nufe yin kyo̱o̱rna baꞌ, kamok mi sen gor i wesek. Mi shim ke mi bo̱ inom gaan be yin, ke Adakunom shim.

⁸ Amma mi ta sor gak aze na Afisa ma katuk riye̱ rikan aPentakos,

⁹ kamok a min i karak iren dide̱ng aze ne itomong'e ya kasho̱o̱n dide̱ng, ne ákak kuse á ta nye amudo̱n'i ni itomong'e whe̱r aze.

¹⁰ Ke aTimoti be̱ nufe yin, ku sak yin a ta sor ne̱k, kamok wu nye itomong Adakunom kyo̱ndi mi ta sen nye'me.

¹¹ Kamok anong, akak tu ku zhe̱e̱sh baꞌ. Ku te yin niren caang nong ase̱ a ta bun a be̱ nunaan, kamok mi sen tor kube̱ wu mak be ároneng ákak.

¹² Natoon aronyining yir Apolos, mi n so̱ ku kunye akusuk ye a ra be̱ nufe yin mak be ribir ároneng yir ákak. Riye̱ wu mak ri shim a ta be̱ kyo̱o̱rna nizham baꞌ, amma nizen iya a ta se̱ karo̱ a tà be̱.

¹³ Sor yin be kanye̱k, nyeseng yin gye̱r kaye̱e̱r kuno̱o̱k katsak yin, Sor yin áner ku naka tsesek, nyeseng yin be agap.

¹⁴ Nye yin koakye kaye̱e̱r kushim.

¹⁵ Yin ren yin ye áfekasa Itifanus ne a te afikuus na Akaya ni ime̱se̱ng'e, an no̱o̱k rice ba nong á ta nye áner Adakunom azhe̱l'e itomong. Mi ta nye yin akusuk, ároneng, ye

¹⁶ i ra fok yin áner ayong kuto, cei be áya i ta nye yir itomong mak ne i can yir mak.

¹⁷ Mi fok kusas ku be̱ Itifanus be aFatunatus ne Akaikus kamok ba ti no̱o̱k ike̱ng iya mi ta se̱ nufe yin baꞌ.

¹⁸ Á ti kare̱p riye̱ ne a ka kare̱p yin'e gip. Áner kuri ayong se gye̱r ke a ku tiyiik ba.

Atato̱

¹⁹ Áfikuus á ta se niben Asiya ta nye yin ashou. Akila be aBiriskila ne áfikuus á ta nyiis kari ba ta nye yin ashou dide̱ng kaye̱e̱r riyerek Agwo̱m Ágwo̱m.

²⁰ Cice̱r ároneng aze ta nye yin ashou. Naka nye shou yin ashou be ku na ka kur kuzhe̱l'e.

²¹ Mi, aBulus, ne i ta zibir ashou na be kubo̱k'i.

²² Aner aya a ta shim Agwo̱m Ágwo̱m baꞌ, Riman'e tu ku kuus. Be̱ aYeso, Agwo̱m Ágwo̱m.

²³ Ritek Agwo̱m Ágwo̱m yir aYeso Kiristi se mak be yin.

²⁴ Mi ta shim yin cice̱r yin áya i ta se yin kaye̱e̱r aYeso Kiristi.