1 aKoranti 11 - Izere New Testament

¹ Kuus yin ane̱e̱ mi kyo̱ndi mi ta kuus afe Kiristi.

Ányining ra kis ace ba

² Mi be riye̱ rikan be yin kamok yin yiring yin be mi kaye̱e̱r koakye ne i kuus yin ike̱ng iya mi tá ka bo̱so̱p yin'e gye̱r kyo̱ndi mi ta ka bo̱so̱p yin'e.

³ Mi shim yin tu ren yin ye aner amitek ne a nye atekasa natoon abining wu, aKiristi ne a nye atekasa natoon aner amitek, Adakunom ne a nye atekasa natoon aKiristi.

⁴ Aner amitek aya a ta kis rice wu nizen iya a ta sen nye aduwa ka kuzarap ayi, a te fe̱re̱ be aKiristi, a ta nye atekasa wu.

⁵ Aner abining a ta nye aduwa ka kuzarap ayi be rice kuye̱, a te fe̱re̱ be atekasa wu. I se kyo̱ndi a kor rice wu.

⁶ Ke aner abining gaar kukis rice wu, to̱ a ra kor. Amma ke i nye ye i nye ike̱ng isum aner abining tana kor rice wu to̱, a ra kis.

⁷ I se gye̱r aner amitek ta kis rice wu baꞌ, kamok wu ne a se nuse ne kuyiik Adakunom. Amma aner abining ne a nye kuyiik aner amitek.

⁸ Kamok aner amitek wuruk kaye̱e̱r kuro̱m aner abining ni ime̱se̱ng'e baꞌ, aner abining wuruk kaye̱e̱r aner amitek.

⁹ A nye aner amitek kamok aner abining baꞌ, amma aner abining kamok aner amitek.

¹⁰ Kamok anong i se gye̱r ke aner abining ta kis rice wu dim, nong i tà tonong ye a ti nye rigwo̱m natoon wu, ne kamok ámaleka gip.

¹¹ Gip be anong, kaye̱e̱r Agwo̱m Ágwo̱m aner abining ta kyem a sor dar aner amitek baꞌ, ka aner amitek ta kyem a sor dar aner abining baꞌ.

¹² Kyo̱ndi aner abining ta wuruk kaye̱e̱r kuro̱m aner amitek, anong ne aner abining tes aner amitek. Amma koakye ne nufe Adakunom.

¹³ Ye̱re̱k yin be rice yin ta di yin, yin di yin i se gye̱r aner abining tu nye aduwa dar kukis rice wu a?

¹⁴ Kaye̱e̱r kusor yin, yin di yin ye ke aner amitek won nakuyo̱ng wu naso̱p, i nye ike̱ng isum aꞌa?

¹⁵ Amma ke aner abining be nakuyo̱ng wu naso̱p, i nye kuyiik nufu. Kamok a tu nye nakuyo̱ng nong a tin kis rice wu.

¹⁶ Ke aner akak shim a tin ya nanaan natoon iyu, yir ren yir igo̱o̱n ikak ze̱e̱r be iyu baꞌ. Anong ne ribir áfikuus ákak ninaro̱ kuya Adakunom iben.

Kuya Azhibi Agwo̱m Ágwo̱m

¹⁷ Mi ta kyem i ka kerek yin natoon ike̱ng iya mi ta shim ta ka tonong yin kyo̱o̱rna baꞌ, kamok yin nye yin ike̱re̱ imaan'e kaye̱e̱r nayim yin ne i nar itek.

¹⁸ Ni igaan'e, mi fok ye ke yin nye yin kanyim kafe áfe kuya Azhibi, yin gung yin rice baꞌ, ma mi min no̱o̱k katsak rife̱'me rikak.

¹⁹ Anong gye̱r, nanan tin no̱ kaye̱e̱r yin nong ase̱ a ta ren áfe a ta nye áfe Adakunom be katsak.

²⁰ Ke yin nyim yin nong ta ya yin Azhibi Agwo̱m Ágwo̱m'e,

²¹ koangan ya kasho̱o̱n be kuya'me dar kutor afudang. Ákak sor be izong. Ákak so̱ ma a feng'e.

²² Yin be yin nasa tana yas yin ne i so̱ yin kaye̱e̱r'e aꞌa? Ka yin zhe̱e̱sh yin karo̱ kuya Adakunom iben ne i tes yin áfe rizor kaye̱e̱r isum e̱? To̱, akye̱ ne mi ta fe̱ be yin e̱? I ka nye yin adazha a? Wayo, i ta te anong cie̱k baꞌ.

Kuya Azhibi Agwo̱m Ágwo̱m

²³ Ike̱ng na mi ta ka no̱o̱k yin, mi shan nufe aYeso a ta nye Agwo̱m Ágwo̱m ye; Agwo̱m Ágwo̱m yir aYeso natuk a tú ku re̱p, a sok abiredi.

²⁴ Nama a tá tonong Adakunom riye̱ rikan'e ne a te̱se̱ng abiredi'me a tá fe̱ ye, “Iyuna nye kuro̱m mi kuya a ta no̱o̱k kamok yin. Yiir nye yin anong nong ta yiring yin be mi.”

²⁵ Anong gbak, nama azhibi'me yong a sok ako̱p a tá fe̱ ye, “Ako̱p na nye kushu kufas kaye̱e̱r naso̱k'i. Yiir nye yin anong nizen iya yin ta sen so̱ yin'e, nong ta yiring yin be mi.”

²⁶ Kamok koakye izen yin ta ya yin abiredi na ne i so̱ yin nako̱p name, yin taas yin itak riku Agwo̱m Ágwo̱m yir aYeso, ma nizen iya a tana be̱.

Kuya Azhibi Agwo̱m Ágwo̱m niren i ta se gye̱r baꞌ

²⁷ Kamok anong, koangan ne a ya abiredi na, ka a so̱ kaye̱e̱r ako̱p na afe Agwo̱m Ágwo̱m yir aYeso niren i ta se gye̱r baꞌ, a nye rine̱n kuzhe̱e̱sh kuro̱m ne naso̱k aYeso.

²⁸ To̱, koangan ra maas rice wu nizham a ta ra ya abiredi ne a so̱ kaye̱e̱r ako̱p na.

²⁹ Komok aner ne a ya abiredi na, ka a so̱ nako̱p na dar kuren kuyiik kuro̱m Agwo̱m Ágwo̱m yir aYeso, a yis amok Adakunom natoon rice wu.

³⁰ Ike̱ng i ta sak ákak whe̱r kaye̱e̱r yin tan te gbe̱re̱k be iro̱k ma ákak n kus.

³¹ Amma ke yir maas yir rice yir nizham, a tin to̱ yir amok baꞌ.

³² Izen iya Adakunom ti to̱ yir amok, i nye ye a sen ni ko̱ro̱k yir kuto fan a bin te̱n yir amok riku mak be áfe kazatse na.

³³ Kamok anong ároneng, izen iya yin nyim yin nong ta ya yin Azhibi Agwo̱m Ágwo̱m'me mak'e, na ka tor yin.

³⁴ Ke aner akak fok izong a ra ya naya kari nizham fan i bu yis yin amok Adakunom natoon rice yin. Ke mi be̱ mi ta ka taas yin ike̱ng iya yin tana nye yin natoon ribir ike̱re̱ íkak.