1 aKoranti 10 - Izere New Testament

A ko̱ro̱k kuto ánerawe ye sang á tu kuus Itsi baꞌ

¹ Ároneng, mi shim yin tu ren yin ye nizen iya átukop yir tá se be kutseng kaye̱e̱r katse, á tá tar agbang isho̱ng, kune̱n tú fek ba.

² I se kyo̱ndi a tú nye ba abatisma kaye̱e̱r kune̱n'e ne kaye̱e̱r agbang isho̱ng'e cice̱r nong a tá te afe ku kuus aMusa.

³ Cice̱r ba á ya naya kabik kuri kuzining,

⁴ ne á so̱ ashi kabik kuri kuzining. Á so̱ ashi a tá wuruk nuta kufe kabik'e kuya ku ta tseng mak be ba, kuta'ong nye aKiristi.

⁵ Gip be anong, Adakunom fok kusas ike̱ng iya ákak ba tá nye baꞌ, iyong ne i sak kukap ba tá kus kaye̱e̱r katse'me.

⁶ Ike̱re̱ na tá se̱ ba fan yir bu ni te yir aye̱ yir nike̱re̱ imaan'e kyo̱ndi ba tá nye.

⁷ Sang tu kuus yin itsi kyo̱ndi ákak ba tá nye baꞌ, kyo̱ndi i ta se ni izibir ye, “Ánerawe sosok a ta ya ne a so̱ ne a dorok a ta to nato áfurin.”

⁸ Sang tu nye yir rikuna kyo̱ndi ákak ba tá nye baꞌ, nizen iyong áner izungu iso̱k ifa be ataar kaye̱e̱r ba kus kaye̱e̱r kunom kuzining.

⁹ Sang tu bo̱mo̱ng yir Agwo̱m Ágwo̱m kyo̱ndi ákak ba tá nye ma íwhen tá ka fe̱s ba baꞌ.

¹⁰ Sang tu fe̱ yir anyinye̱m kyo̱ndi ákak ba tá nye ma amaleka riku tá ka fe̱s ba baꞌ.

¹¹ Ike̱re̱ na tá se̱ ba nong i tin tonong yir ike̱ng ikak. A zibir kaye̱e̱r kufumung rife̱ Adakunom nong a tin ko̱ro̱k yir kuto, a fe̱ ike̱re̱ na natoon yir i ta se yir nizen igang kazatse.

¹² Kamok anong, ke wan di ye wan n nyeseng be agap, to̱, nye tatan fan i bu kpa.

¹³ Kubo̱mo̱ng kukak kuse ku ta ka se̱ yin ku tan won dar kun se̱ akak baꞌ. Adakunom shishing ike̱ng wu ta fe̱ baꞌ, a tà ka won yin tà no̱ yin nubo̱mo̱ng kuya ku ta nar agap yin baꞌ. Ke yin no̱ yin nubo̱mo̱ng'e a tà ka nye yin iren ife yin tana kyem i tsesek yin kaye̱e̱r'e.

¹⁴ Kamok anong ároneng aya mi ta shim, sor yin gugo̱k be ike̱re̱ itsi.

¹⁵ Mi fe̱ be yin kamok yin be yin kuto̱ro̱ng kutek. Ye̱re̱k yin ta di yin ike̱ng mi tin fe̱ natoon'e.

¹⁶ Ke yir sen so̱ yir na ako̱p Azhibi, aya yir tin be yir riye̱ rikan be Adakunom, i nye ye yir te yir ázining kaye̱e̱r naso̱k aKiristi aꞌa? Ke yir ya yir abiredi azhibi Agwo̱m Ágwo̱m'me, i nye ye yir te yir azining kaye̱e̱r kuro̱m aKiristi aꞌa?

¹⁷ Agbang abiredi'me ta se azining, yir i ta se yir whe̱r, i ta ya yir abiredi azining'e, n te yir azining nuro̱m.

¹⁸ Ye̱re̱k yin áner Isarela ta di yin, áfe a tá ya naya asidaka Adakunom gung rice ba be asidaka'me a ta nye na abagadi aꞌa?

¹⁹ Sang mi fe̱ ye asidaka itsi nye ike̱ng itek baꞌ, ka itsi nye ike̱ng ikak baꞌ.

²⁰ Wayo, asidaka áfurin ta nye, a nye kamok ámaan nabik sang kamok Adakunom baꞌ. Mi shim yin ta gung yin rice be amaan nabik baꞌ.

²¹ Yin ta kyem i so̱ yin na ako̱p Agwo̱m Ágwo̱m ne i bun i so̱ yin na ako̱p amaan nabik baꞌ. Yin ta kyem i ya yin nakereng Agwo̱m Ágwo̱m ne i bun i ya yin nakereng amaan nabik baꞌ.

²² Ka yir shim ta ra yir Adakunom riye̱ nong a ta tonong rishishim wu a? Ka yir di yir ye yir tu nar yir agap e̱?

Koakye yin tu se kamok kuyiik Adakunom

²³ “Mi ta kyem i nye koakye mi ta shim,” sang koakye ne i se gye̱r baꞌ. “Mi ta kyem i nye koakye mi ta shim,” sang koakye ne i ta ra be̱e̱n kuya kasho̱o̱n baꞌ.

²⁴ Sang akak tu to̱ rice wu tsek baꞌ, koangan ra to̱ afudang gip.

²⁵ Ya yin koakye kuri rinam i ta shan yin naro̱ a ta re̱e̱s dar kurip fan riye̱ yin bu se gak.

²⁶ Kamok rife̱ Adakunom fe̱ ye, “Kazatse na be ike̱re̱ i ta se kaye̱e̱r'e cice̱r nye ife Adakunom.”

²⁷ Ke afurin akak fe̱ be wan ye i ra se yas yin mak, ke riye̱ wan shim ne i tseng nong ta ya koakye kuri naya a tana ka no̱o̱k dar kurip fan riye̱ wan bu se gak.

²⁸ Amma ke akak fe̱ be wan ye, “Naya na nye nafe itsi.” To̱, tu ya baꞌ, fan aner a tá ka tak'e bu daam ne riye̱ se gak gip.

²⁹ Mi ti fe̱ natoon kuto̱ro̱ng kufuan baꞌ, amma kufu. Akak ta kyem a fe̱ ye, “To̱, akye̱ tin roon kunye ike̱ng iya riye̱ mi ta shim kamok riye̱ akak ta se gak e̱?”

³⁰ Ke mi tonong Adakunom riye̱ rikan natoon naya mi ta se̱, kamok akye̱ akak ta fe̱ ye awo̱ natoon naya mi tá min tonong Adakunom riye̱ rikan'e e̱?

³¹ Kamok anong koakye ne yin ta sen nye yin'e, kaye̱e̱r kuya ka kuso̱ yin ayi, nye yin koakye kamok ku tiyiik Adakunom.

³² Sang tu sak yin akak ta turuk kutak baꞌ, aner'e tu nye aner aYahuda ka aner aYahuda baꞌ, ka afikuus Adakunom ayi.

³³ Kyo̱ndi mi ta nye nong ta kare̱p koangan riye̱ kaye̱e̱r koakye iren. Mi to̱ rice mi tsek baꞌ, mi to̱ ákak gip nong ba ta se̱ kashesh.