1 aKoranti 1 - Izere New Testament

Ashou

¹ Mi, aBulus, aya a tin yis nong tà te amanzo aYeso Kiristi, kaye̱e̱r kushim Adakunom, i ta se yir mak be aronyining yir aSatanis ne i ta zibir yin kufumung na.

² Yin áfikuus Adakunom i ta se yin na aKoranti áya a tá te ázhe̱l'e, áya a tá ka yis ba nong á tà sor zhe̱l kaye̱e̱r aYeso aKiristi, mak be áner aya a ta se koake̱, á ta yis riyerek Agwo̱m Ágwo̱m yir aYeso Kiristi, a ta nye Agwo̱m Ágwo̱m ba, ne a nye Agwo̱m Ágwo̱m yir cice̱r.

³ Ritek ne kameneng riye̱ riya ri ta nes nufe Adakunom a ta nye Ada yir ne Agwo̱m Ágwo̱m aYeso Kiristi yir se mak be yin.

aBulus nye riye̱ rikan

⁴ Koakye izen mi tonong Adakunom riye̱ rikan kamok yin, kamok ritek wu a tá ka no̱o̱k yin kaye̱e̱r aYeso Kiristi.

⁵ Ka a tá no̱o̱k yin kurum na kaye̱e̱r koakye iren, ne kufe̱ kanu be kuren ike̱ng cei kamok yin nye yin áfu.

⁶ Kamok ike̱re̱ iya yir tá fe̱ yir natoon aKiristi, a di kaye̱e̱r kuse yin.

⁷ Kamok anong yin dun yin kunang kabik ta nyesek baꞌ, yin ta sen tor yin kube̱ Agwo̱m Ágwo̱m yir aYeso Kiristi be ifeng.

⁸ Wu tà ka berek yin ma nigang'e fan a ba ka se̱ yin be rine̱n katuk kube̱ Agwo̱m Ágwo̱m yir aYeso Kiristi.

⁹ Adakunom afe a tá ka yis yin, nong ta gung yin rice be igon wu aYeso Kiristi Agwo̱m Ágwo̱m yir, a nye aner aya a ta fe̱ ike̱ng ne a nye.

Kanu áfikuus tu se kazining

¹⁰ Ároneng, mi ta nye yin akusuk kaye̱e̱r riyerek Agwo̱m Ágwo̱m yir aYeso Kiristi ye, kanu yin tuse kazining. Sang tu naka kasap yin baꞌ, gung yin rice nong kuto̱ro̱ng tu sor kuzining.

¹¹ Ároneng, áner kasa aKaluwi ákak ti tak ye yin n kpaan yin nanan dide̱ng.

¹² Ike̱ng iya mi tin fe̱'me nye, koangan yin fe̱ ike̱ng ikak ze̱r, “Akak fe̱ ye, Mi kuus aBulus,” ne akak fe̱ ye, “Mi kuus Apolos,” ne akak fe̱ ye, “Mi kuus aKefas,” ne akak bun a fe̱ ye, “Mi kuus aKiristi.”

¹³ Aser, an kabak aKiristi nagwo̱m agwo̱m a? A tigak aBulus kamok yin a? A tá nye yin abatisma kaye̱e̱r riyerek aBulus a?

¹⁴ Mi be riye̱ rikan sang mi tá nye akak yin abatisma baꞌ, igak aKirispus ne aGayus tsek.

¹⁵ Kamok anong akak ta kyem a fe̱ ye a tá nye yin abatisma kaye̱e̱r riyerek'i baꞌ.

¹⁶ (Mi ne i nye áfekasa Itifanus abatisma tsek, nama ayong, mi ba ren akak ze̱e̱r afe mi tú ku nye abatisma baꞌ.)

¹⁷ aKiristi ti tom nong ta nye abatisma baꞌ. A ti tom nong ta taas Rife̱ Ritek sang be kukyem rinerawe baꞌ, nong fan riku aKiristi nukon bu te kpe̱de̱ng.

aKiristi ne a nye kukyem Adakunom

¹⁸ Rife̱ riku aKiristi nukon nye rifunam nufe áner aya a ta se niren kuwei, i nye kukyem Adakunom nufe yir aya i ta se̱ yir kashesh.

¹⁹ Kyo̱ndi i ta se ni izibir ye, “Mi tà beseng kukyem áfe ritseng, ne i shik kuren ike̱ng áner áfe a ta ren ike̱ng dide̱ng.”

²⁰ To̱, afe a ta fe̱ ye wu be kukyem se ake̱ e̱? Afe a ta ren ike̱ng se ake̱ e̱? Afe a ta ren kuya nanan afe izam iyu se ake̱ e̱? Adakunom n sak ritseng afe kukyem kazatse na sor rifunam tsek aꞌa?

²¹ Be kukyem Adakunom, ánerawe nazatse na kyem a tu ren be kukyem kufe rinerawe baꞌ. Adakunom di i tu se gye̱r a tà shesh aya a ti no̱o̱k katsak ni wu be iren kutaas Rife̱ Ritek riya a ta di kyo̱ndi rifunam.

²² Áner aYahuda shim ke á di itomong azhing, ne áner aHeleni shim ke á se̱ kukyem.

²³ Yir taas yir itak riku aYeso be kutigak wu, iyong sor ike̱ng áner aYahuda ta wor a shim kufok'e baꞌ, ne i sor rifunam nufe aner aya a ta nye aner aYahuda baꞌ.

²⁴ Rife̱ yir se ye, aKiristi nye agap be kukyem Adakunom nufe aner aya Adakunom ta yis ko aner'e tu nye aner aYahuda ka aner aHeleni.

²⁵ Kamok ike̱ng iya a ta di kyo̱ndi rifunam Adakunom i nar kukyem ánerawe, ne ike̱ng iya a di kyo̱ndi kuyo̱mo̱ng Adakunom i nar agap ánerawe ta be.

²⁶ Ároneng, yiring yin be kuri kuse yin tin se yin nizen iya Adakunom tá ka yis yin. Áfe a tá be ritseng kuri rife rinerawe kaye̱e̱r yin se whe̱re̱ baꞌ. Áfe a tá nye agbang aner kaye̱e̱r yin se whe̱r baꞌ, whe̱re̱ kaye̱e̱r yin nye áfekasa rigwo̱m baꞌ.

²⁷ Adakunom kasa ike̱re̱ iya ánerawe ta di ye i nye rifunam nong a tin te áfe a ta be ritse̱ng kuri rife̱ kazatse isum. Adakunom kasa ike̱re̱ kazatse na ta zhe̱e̱sh nong a tin te áfe a ta be agap isum.

²⁸ Adakunom kasa ike̱re̱ iya kazatse na ta di ye i nye ike̱ng ikak baꞌ, be ike̱re̱ kazatse ta zhe̱e̱sh, nong a ta teen be ike̱ng kazatse ta di ye i kyem ike̱ng,

²⁹ fan akak bu ya kuka nasho̱o̱n wu.

³⁰ Kamok wu ne yin se yin kaye̱e̱r aYeso Kiristi aya a ta sor kukyem Adakunom nufe yir, wu ne a ti sak yir i ta se yir gye̱r, ne i se yir zhe̱l, ne i se̱ yir kashesh.

³¹ Kamok anong kyo̱ndi i ta se ni izibir ye, “Won aner aya a ta shim kuka a ra nye kuka wu be Agwo̱m Ágwo̱m.”