1 aBitrus 5 - Izere New Testament

Itomong áko̱k kasho̱o̱n ikilisiya

¹ Mi ako̱k kasho̱o̱n ikilisiya, mi aya mi tá di kuri risam riya aKiristi tá so̱ be anyisi mi. Mi aya i tana se̱ ishorong'i nasho̱o̱n kaye̱e̱r kuyiik a tana tonong, mi nye áko̱k kasho̱o̱n ikilisiya áfudang'i a ta se kaye̱e̱r yin akusuk ye,

² yin rin sak yin riye̱ natoon ánerawe Adakunom áya a ta ma ka won yin'e amana'me nubo̱k. Ni sak yin riye̱ niba be riye̱ rizining kyo̱ndi Adakunom ta shim sang kaye̱e̱r riye̱ kubeseng baꞌ. Sang tu nye yin itomong kamok itso̱m tsek baꞌ, amma kamok ifeng yin ta be yin.

³ Tin nye yin rigwo̱m natoon ba be agap baꞌ, sor yin kusor kuri kuya ba tana kuus ane̱e̱ yin.

⁴ Nong ase̱ izen iya aKiristi aya a ta nye Agbang Afek ánerawe tana be̱, a ta ka no̱o̱k yin ribong rigwo̱m rife̱ kuyiik riya sang ri tana te rish baꞌ.

⁵ Anong ne yin ácam gip, kuus yin ike̱ng iya ako̱k kasho̱o̱n ikilisiya yin ta ka tak yin. Cice̱r yin, mees yin rice nong ta naka nye yin itomong kamok i se ni izibir ye, “Adakunom rawu áya a ta kok rice naza, amma a nyesek áya a ta mees rice ritek wu.”

⁶ Kamok anong, mees yin rice nubo̱k Adakunom ayiik'e nong a ta ka tiyiik yin nizen iya a ta shim.

⁷ Ku won yin kudaam yin cice̱r kamok wu ne a ti sak riye̱ ni yin.

⁸ Yiir yin rice yin ne i sak yin riye̱ kamok amudo̱n yin Ishetan tsang a kar kyo̱ndi azaki a tsang a muus kamok a tse̱r aner aya wu tana fe̱r.

⁹ Sang tu ku no̱o̱k yin iren baꞌ. Nyeseng yin be agap kaye̱e̱r kuno̱o̱k katsak yin kamok yin ren yin ye áfikuus afudang yin kaye̱e̱r kazatse cei sen so̱ kuri risam riyong gip.

¹⁰ Nama yin so̱ yin risam nizen cie̱k, Adakunom aya a ta be ritek cice̱r aya a tá ka yis yin nong ta se̱ yin kuyiik wu kufe izen izen kaye̱e̱r aKiristi be rice wu tà ka sak yin ta se yin gye̱r ne a ka tsesek yin ne a ka sak yin ta nyeseng yin be agap dide̱ng.

¹¹ Kukyem tu sor kufu ma izen izen. Anong.

Atato̱

¹² aSila aya mi tú ku sok kyo̱ndi aroneng aya mi ta di a be katsak ne a ti se̱ mo i tá ka zibir yin kaban kufumung na nong ase̱ ta ka tsesek yin ne i ka tak yin ye iyu na ne i nye ritek Adakunom rife̱ katsak. Nyeseng yin be agap natoon'e.

¹³ Áronyining yin áfikuus á ta se na aBabila aya Adakunom tá kasa kyo̱ndi yin gip ta nye yin ashou, anong ne igon mi aMarkus gip ta nye yin ashou.

¹⁴ Naka nye yin ashou be ku naka kur yin be kushim. Kameneng riye̱ Adakunom se mak be yin cice̱r, yin áya i ta se yin kaye̱e̱r aKiristi.