1 aBitrus 4 - Izere New Testament

Kuri kusor kuya Adakunom ta shim

¹ Kamok anong, kum aKiristi tá so̱ risam nuro̱m, to̱, yin gip nye yin kanye̱k kuso̱ risam kamok koangan aya ne a so̱ risam nuro̱m tonong ye wu n gang be rine̱n baꞌ.

² Kamok anong, yin ba bun a sor yin kusor kuri kufe kazatse na be kukuus amaan kushim riye̱ yin baꞌ, amma yin nye yin ike̱ng iya Adakunom ta shim.

³ Gbugbang, yin mak tsang i beseng yin izen dide̱ng ninye ike̱re̱ iya áfurin tá nye, ike̱re̱ kyo̱ndi kunye kpe̱de̱ng be kubi ne kufeng be kugbe̱re̱ ne kunye kyo̱ndi ágabu ne kukuus ike̱re̱ itsi.

⁴ Ike̱ng'e tá no̱o̱k ba azhing, ba ta di sang yin tá ba gung yin rice be ba nong ta nye yin akpe̱rde̱k kunye'ong be ba baꞌ. Iyong á ma ka barak yin ritok makong.

⁵ Amma ba tà taas aner aya a tana to̱ atser be ikom amok ike̱ng iya ba tá nye.

⁶ Kamok anong ne i sak a tá taas áya a tá tsang á kus Rife̱ Ritek'e gip, nong á tú ku to̱ ba amok nuro̱m kyo̱ndi ribir ánerawe, amma á sor kusor ba kaye̱e̱r kabik kyo̱ndi Adakunom.

⁷ Igang kazatse m be̱ bubarak. Kamok anong, sor yin be kanye̱k ne i yiir yin rice yin gye̱r nong ase̱ ta kyem i nye yin aduwa.

⁸ Ike̱ng iya i ta nye igbang'e cice̱r nye, naka shim yin dide̱ng, kamok kushim be̱e̱n kure̱ng rine̱n whe̱re̱.

⁹ Sang tu shashang yin átsen be anyinye̱m baꞌ.

¹⁰ Adakunom no̱o̱k koangan kunang nong a tin nye itomong. Kamok anong koangan ra nye itomong be katsak be kunang kufu nong tin tobok yir ákak yir kaye̱e̱r ritek Adakunom.

¹¹ Ke akak be kunang nye awazi Rife̱ Ritek, to̱, a ra taas kyo̱ndi Adakunom ne a sen taas'e nanu wu. Ke akak be kunang kutobok akak, to̱, a ra nye be agap Adakunom tú ku no̱o̱k nong ase̱ kaye̱e̱r koakye Adakunom ta se̱ nakerek kamok aYeso Kiristi. Kuyiik be kukyem nye kufu ma izen izen. Anong.

Kuso̱ risam kamok kute áfikuus

¹² Ároneng áya mi ta shim, sang tu te yin zhing be amaan risam riya yin ta sen so̱ yin'e kyo̱ndi ike̱ng ikak ifas ne i sen ka se̱s yin baꞌ.

¹³ Amma ban i nye yin riye̱ rikan, kamok yin ta gung yin rice be aKiristi kaye̱e̱r risam wu. Yin ta nye yin riye̱ rikan dide̱ng nizen iya a tana tonong kuyiik aKiristi'me.

¹⁴ Ke a ta ka kas yin ye kamok yin ta nye yin áfe aKiristi, sok yin ye i nye ike̱ng itek, kamok kuyiik ne kabik Adakunom se natoon yin.

¹⁵ Amma ke yin ta so̱ yin risam sang ri tu se kamok yin tá fe̱s yin ákak ka kamok i nye yin itsang ka ike̱ng ikak imaan'e, ka kamok yin tin no̱o̱s yin nike̱re̱ ánerawe baꞌ.

¹⁶ Ke ákak yin ta so̱ risam kamok yin nye yin áfikuus, sang tu fok yin isum baꞌ, ban i kerek yin Adakunom ingya kamok á ta ka yis yin be riyerek'ong.

¹⁷ Izen n nye a tana san kuto̱ ánerawe amok, a ta san'e be áfikuus Adakunom. To̱, ke a san'e be yir, i ta se ane̱ be áya a ta raba kukuus Rife̱ Ritek Adakunom e̱?

¹⁸ Kyo̱ndi a tá zibir ye, “Ke i ta ro̱ áner ta se gye̱r nasho̱o̱n Adakunom ta se̱ kashesh, to̱, i ta se ane̱ be áfe a ta fok inyim Adakunom baꞌ ne áfe rine̱n e̱?”

¹⁹ Kamok anong, cice̱r áya a ta so̱ risam kaye̱e̱r kushim Adakunom ra won rice ba nubo̱k Adakunom aya a tá ka nye ba. A ra ya kasho̱o̱n be kunye kutek.