1 aBitrus 3 - Izere New Testament

Kusor kuwe̱ne̱ng

¹ Yin ányining iwe̱ne̱ng, yin gip, kuus yin ike̱ng iya átek yin ta fe̱ be yin, nong ke ákak ba kuse áya sang á tá min no̱o̱k katsak rife̱ Adakunom baꞌ, kashim kuse ányining ba tà sak á tin no̱o̱k katsak sang ma akak fe̱ ike̱ng ikak be ba baꞌ.

² Á tà di kuse zhe̱l yin be kufok ato yin ne á shishing.

³ Izem yin ta nye yin tuse nuro̱m tsek baꞌ, kyo̱ndi kunye rice ne ike̱re̱ a tá nye be izinariya ne ares itso̱m.

⁴ Won izem yin tu ne kaye̱e̱r aye̱ yin ingya, izem i tana gang baꞌ kyo̱ndi kumees rice ne kuse tatan, iyong ne i nye iyiik'e dide̱ng nasho̱o̱n Adakunom.

⁵ Kamok ányining áya a tá nye ázhe̱l'e agbugbang ne á ni te riye̱ na Adakunom tsang á nye izem ba anong gip. Á kuus ike̱ng iya átek ba tá fe̱ be ba.

⁶ Kyo̱ndi aSaratu, aya a tá kuus ike̱ng iya amitek wu Ibrahim, tá fe̱ be wu ma a tú ku yis ye ada wu. Yin nye yin ángas wu ke yin nye yin ike̱re̱ iya i ta se gye̱r dar inyim ike̱ng ikak.

⁷ Yin átek gip, ren yin kuri kusor kuya yin tana sor yin be ányining yin. Ba be agap kyo̱ndi yin baꞌ. Ku tiyiik yin ba kamok yin be ba cice̱r, yin shan yin ayiik kutser Adakunom nawarak mak. Nye yin anong fan ike̱ng ikak bu te̱ne̱ng aduwa yin.

Risam kamok kunye kutek

⁸ Ni igang'e, won yin cice̱r kuto̱ro̱ng yin tu se kuzining. Be yin kuro̱ riye̱ ne i naka shim yin kyo̱ndi aner be aronyining, ne i se yin gye̱r ne i mees yin rice yin.

⁹ Sang tu ku karang yin imaan'e be rimaan'e baꞌ, ka ritok be ritok baꞌ. Amma ku karang yin be ritek kamok anong ne a tá ka yis mo yin nong yin tà ya yin kutse ritek Adakunom.

¹⁰ Kamok i se ni izibir ye, “Aner aya a ta shim a ta fok kusas kusor ne a shim a ta sor dide̱ng nazatse na, a ra won nyas be abo̱o̱s.

¹¹ A ra won kunye anyas nong a ta nye kunye kutek. A rin te iso̱r ni itse̱r kusor caang be ánerawe.

¹² Kamok anyisi Agwo̱m Ágwo̱m se natoon áner á ta se zhe̱l ne a wesek ato na aduwa ba. A rawu áya a ta be anyas.”

¹³ To̱, ke yin shim ku nye yin ike̱ng i ta se gye̱r, ko akak tà ka nye yin ike̱ng ikak baꞌ.

¹⁴ Amma ko yin fa so̱ yin risam kamok kunye kutek, yin ta se̱ yin ritek Adakunom. Kamok anong, sang tu fok yin inyim áya a tana ka no̱o̱k yin risam baꞌ, sang tu te yin febek baꞌ.

¹⁵ Amma won yin aKiristi tu te Agwo̱m Ágwo̱m kaye̱e̱r aye̱ yin. Koakye izen sor yin be kanye̱k nong ta kyem i tak yin koangan ike̱ng i ta sak yin tin te yin riye̱ nikuus aKiristi. Amma nye yin kaye̱e̱r awhiwhe̱ ne ku yiik,

¹⁶ sang be riye̱ gak baꞌ. Nye yin anong nong ase̱ áfe a ta fe̱ imaan'e natoon yin kamok kuse yin kutek kaye̱e̱r aKiristi ta fok isum rife̱ ba.

¹⁷ I nar, ke Adakunom ne a nye anong ye yin ra so̱ yin risam'me kamok yin ta nye yin ike̱ng iya i ta se gye̱r, be tana so̱ yin risam kamok kunye yin ta nye kumaan'e.

¹⁸ Kamok aKiristi so̱ risam ma a ku kamok rine̱n yir cice̱r kutak kuzining tsek, wu nye azhe̱l'e, amma a ku kamok áya sang á ta nye azhe̱l'e baꞌ nong a tà tseng be yir nufe Adakunom. A tú fe̱r nuro̱m amma Adakunom tú sak a dorok kaye̱e̱r kabik be kutser.

¹⁹ Kaye̱e̱r kabik'e ne aKiristi se taas nabik naya na tá se nitso̱m rife̱ Adakunom

²⁰ Nabik nayong'e nye naya á tá raba ku kuus rife̱ Adakunom gip be anong gbugbang nizen aNuhu. Á raba ku kuus ike̱ng iya Adakunom tá fe̱. Adakunom tsesek be ba nizen iya aNuhu tá nye Kukpara ashi'me. Nizen iyong'e ánerawe ikara tsek ne a whe̱r.

²¹ Ashi'ong sor kyo̱ndi abatisma aya yir ta nye yir, i tin se̱ yir kashesh. Sang nong tin tun yir narik kuro̱m baꞌ, amma kamok yir ta nye yir Adakunom izong be riye̱ rizining ne kamok aYeso Kiristi tá dorok nure̱k.

²² aKiristi tseng kaye̱e̱r kaza, a se nubo̱k riya Adakunom, ámaleka cice̱r ne ribir áya a tin nye rigwo̱m natoon kaza se nubo̱k wu.