1 aBitrus 1 - Izere New Testament

Ashou

¹ Mi, aBitrus, amanzo aYeso aKiristi yin áya i ta se yin kyo̱ndi átsen kaye̱e̱r kazatse, áya a ta ka kasa yin i ta te yin shaam koakye niben aPontus be aGalati ne aKapadokiya be Asiya ne niben aBitiniya.

² Yin áya Adakunom a ta nye Ada ne a tá ka kasa yin kaye̱e̱r kanye̱k wu gbugbang, a bun a tá ka sak yin nong yin ta te yin ázhe̱l'e kamok kukyem Kabik Kazhe̱l'e. Kunyek wu nye nong i tá fok yin aYeso Kiristi kuto ne kumis naso̱k wu. Ritek ne kameneng riye̱ Adakunom se mak be yin dide̱ng.

Adakunom ra ka no̱o̱k yin ike̱ng iya yin tanin te yin riye̱

³ Nakerek nye nafe Adakunom ne a nye Ada Agwo̱m Ágwo̱m yir aYeso Kiristi, wu ne a ro̱ riye̱ yir dide̱ng a ta bun a ti dorok yir be riku aYeso Kiristi nure̱k kute riye̱ kufe katsak kamok kudorok aKiristi nure̱k.

⁴ Be anong ne yir ti te yir riye̱ nong ta ya yir kutse kuya sang ku tana gang ka ku ta beseng ka ku tà te rish baꞌ, amma kuya a ta ka sak yin'e kaye̱e̱r kaza.

⁵ Yin aya kamok kuno̱o̱k katsak yin, Adakunom kaye̱e̱r agbang kukyem wu ta ka fek yin ma yin se̱ yin kashesh na a tana tun katuk igang'e nong koangan tà di.

⁶ Kamok anong, nye yin riye̱ rikan dide̱ng, katsak yin se yin kaye̱e̱r riye̱ riwe kyo̱o̱rna gye̱rtatan kamok iriri kubo̱mo̱ng kuya ku ta ka se̱s yin.

⁷ Ike̱re̱ iya i ta ka se̱s yin'ong se nong a ta ren kuri kuno̱o̱k katsak kuya yin ta be yin. Izinariya gip i tana beseng, a bo̱mo̱ng be kuro̱ng nong a ta di ka i nye itek e̱. Anong ne a ta bo̱mo̱ng kuno̱o̱k katsak yin gip, kuya ku ta nar izinariya yiik. Be anong ne ku tà ka be̱e̱n yin nakerek be kuyiik katuk kaya a tana tonong aYeso Kiristi.

⁸ Yin kun ku di yin baꞌ, gye̱rtatan amma yin tu shim yin. Yin tu ye̱re̱k yin kyo̱o̱rna baꞌ, gye̱rtatan amma yin ti no̱o̱k yin katsak ni wu ne i be yin agbang riye̱ rikan kuri riya sang a tana kyem a fe̱ baꞌ.

⁹ Kamok yin tana se̱ yin kashesh kutser yin iyong ne i sak yin tin no̱o̱k yin katsak.

¹⁰ Natoon kashesh'ong áner kuzarap áya a ta ka taas yin natoon ritek riya Adakunom ta fe̱ ye a ta ka no̱o̱k yin, ba ti nye kuye̱re̱k dide̱ng nong ase̱ a ta ren kashesh Adakunom kaya yir tin fe̱ yir na.

¹¹ Ba shim nong á ta ren izen'e be kuri iren kashesh'e Kabik aKiristi ka ta se kaye̱e̱r ba tu ku tak ba natoon'e nizen a tá fe̱ itak natoon risam aKiristi be kuyiik wu tana se̱ nama risam'me.

¹² Adakunom tú ku tak ba ye sang ba nye itomong rice ba baꞌ, amma á tá nye yin'e nizen ba tá nye kuzarap'ong cice̱r. Kyo̱o̱rna áya a tá ka taas yin Rife̱ Ritek na, á tá ka taas yin kyo̱ndi Kabik Kazhe̱l'e kaya Adakunom tá tom'e kaye̱e̱r kaza ta ka tees ba. Ámaleka gip á shim kuren ike̱re̱ na dide̱ng.

Se yin zhe̱l

¹³ Kamok anong, nye yin kanye̱k kaye̱e̱r aye̱ yin kamok itomong: yiir yin rice yin, ne i ni te yin riye̱ dide̱ng natoon ritek riya a tana ka no̱o̱k yin katuk kaya a tana tonong aYeso Kiristi.

¹⁴ Kyo̱o̱rna yin ta nye yin inoon naya na ta fok kuto, tu won yin ike̱re̱ iya yin tin be yin ife̱ng gbugbang ta sok aye̱ baꞌ. Nizen iyong yin se yin na awhi.

¹⁵ Amma wu Adakunom afa a tá ka yis yin se zhe̱l, yin gip ma sor yin zhe̱l kaye̱e̱r koakye.

¹⁶ Kamok i se ni izibir ye, “Sor yin zhe̱l, kamok mi se zhe̱l.”

¹⁷ Kum yin ta yis yin Adakunom ye “Ada”, nizen iya yin ta nye yin aduwa. To̱, sor yin be ikap kutiim ma katuk kaya yin tana gang yin ritsen yin kaye̱e̱r kazatse na. Kamok wu nye aner ku to̱ amok. Wu tin kasa baꞌ, nizen iya aya a ta sen bo̱so̱p itomong ánerawe wu baꞌ.

¹⁸ Kamok yin ren yin ye a tá ka shesh yin kaye̱e̱r akpe̱de̱ng igo̱o̱n iya átukop yin tá ka won yin'e. A tá ka shesh yin be ike̱re̱ iya i tana beseng kyo̱ndi azurfa be izinariya baꞌ.

¹⁹ Amma a tá ka she̱sh yin be naso̱k aKiristi na ta se yiik, aya ta se kyo̱ndi aturuk asidaka, a se zhe̱l dar rine̱n ka rizik ka inya ayi.

²⁰ Wu ne Adakunom tsang a ku kasa nizham a ta ra nye kazatse, amma kamok yin ne a tu tonong nizen igang'e na.

²¹ Kamok Adakunom tú ku dorok nure̱k a tú ku no̱o̱k kuyiik, iyong sak yir ti no̱o̱k yir katsak ne i ni te yir riye̱ na Adakunom'me.

²² Kyo̱o̱rna yin tan sak yin rice yin nong i tá te yin zhe̱l kamok yin tá kuus yin rife̱ Adakunom, shim yin áronyining yin be riye̱ rizining, naka shim yin anong be katsak.

²³ Kamok a bun a ma ka tes yin sang be ike̱ng iya i tana beseng ba, amma a ta ka tes yin be rife̱ Adakunom, rife kutser rife izen izen.

²⁴ Kyo̱ndi a ta zibir ye, “Ánerawe cice̱r se kyo̱ndi agam ne kusas ba cice̱r se kyo̱ndi afure katse. Agam koor ne afure suruk kaben,

²⁵ amma rife̱ Agwo̱m Ágwo̱m tà sor ma izen izen.” Rife̱ na ne rinye Rife̱ Ritek riya a tá ka nye yin awazi'me.