Sakaryas 5 - Ibatan

No Parmata Maynamot Do Somayasayapaw a Nahon a Pagbasāan

¹ Sinpangan na, tomnangay ako na minirwa, kan nakaboya ako so somayasayap a nahon a pagbasāan!

² Do dāwri, inyahes no anghilaw a machisisirin dyaken a kāna, “Āngo maboya mo?” Ki tinbay ko a kon ko, “Somayasayapaya nahon a pagbasāan a tatdo a poho a karapan so kanaro kan asa poho kan dadima a karapan so kawbong.”

³ Ki binata na dyaken a kāna, “Naitolas do dyaya pagbasāan iyaw abay a komayakayab do intīro a lōbong. Sigon do naitolas do bīt naya, ki mapaksyat sanchi a tabo manakanakaw do tanaya. As do bīt naya, ki naitolas a mapaksyat sanchi a tabo mangsaksi so bayataw.

⁴ Binata ni ĀPO a Manakabalin a kāna, ‘Toboyen konchiw nya abay a mohtot kan somdep do bahay no kāda manakanakaw, as kan do kāda bahay no tabo a mangsaksi so bayataw. Omyan anchi dyira kan rarayawen nanchiw bahabahay da.’”

No Parmata Maynamot Do Mabakesaw a Myan Do Irahem No Bakag

⁵ Do dāwri, iyaw anghilaw a machisisirin dyaken, naypantad kan binata na dyaken a kāna, “Tomangay ka, ta chiban mo ītwaya.”

⁶ Ki inyahes ko a kon ko, “Āngo nawri?” Ki tominbay a kāna, “Asa pagsokātan a bakag. No chakey na batahen, ki karahet no tawotawo do intīro a lōbong.”

⁷ Sinpangan na, nabwang tohong naw a boli, ki myan nachisdot a maydisna mabakes.

⁸ Ki binata no anghilaw a machisisirin dyaken a kāna, “Iyaw nyaw gatos.” Do dāwri, pinagmis na pinabidiw mabakesaw do irahemaw no bakag, as nakapagmis na so bolyaw a tohong na.

⁹ Sinpangan na, tomnangay ako a nanyideb, ki nakaboya ako so dadwa mababakes a somayap a komwan dyaken. Siraw panyid da saw, ki rarakoh kan mayit. Inhap daw bakagaw a insayap.

¹⁰ “Namna, dino ikwanan das bakagaya?” inyahes ko do anghilaw a machisisirin dyaken.

¹¹ Ki tinbay na yaken a kāna, “Iyangay dad Babilonya a pamarinan das timplo na. An mapatayoka dana, padisnahen danchi daw bakagaya a pagdaydayāwan dan tawotawo.”