Mikyas 3 - Ibatan

No Kapaydabdab Ni Mikyas Do Pangpangōlo Saw No Israel

¹ Sinpangan na, binata ko a kon ko, “Mangadngey kamo, inyo a pangpangōlo ni Jakob, inyo a magtotoray no nasyon a Israel! Rebbeng nabawri a chapatak nyo nainkalintegan?

² Basbāli a ipsok nyowayaw maganay, kan chadaw nyowayaw marahet. Lalāten nyowayaw kodit dan tawotawo ko saya sibibyay, as kalisalisay nyo so asi a myan do tohatohang da.

³ Akma kamo magparti a koman so asi dan tawotawo ko. Hathaten nyowayaw kodit da, kan potopototen nyo payaw tohatohang da. Sagsagen nyo saya akmay karni a mapangay do palyok, kan akmay asi a myan do kardiro.

⁴ Ītonchiw chimpo a tomanyis kamo a mapasidong di ĀPO, ki atbayen nabanchi inyo. Ikaskāso nabanchiw dasal nyo, ta marahet pinarin nyo.”

⁵ Iyaw nyaw binata ni ĀPO a kāna, “Siraw propīta saw a mapawaw siras tawotawo ko, an myan mamakan dyira, ikari daw talna dyira. An myan dya makaitoroh dyira so makan, nakasagāna sa machigobat dyira.

⁶ Dawa, īto danaw mahep a mangabong dyinyo, kan apabanchiw parmata nyo. On, sari danaw myan dyinyo, kan makapangipadto kamo paba. Somdep danaw araw dyirad dyaya propīta, kan no sedang, ki mayparin dana sari dyira.

⁷ Masnesneskan sanchiw mamadto, ta maparin sabanchiw ipadto da. Maiperreng dabanchiw ropa da, ta abanchiw atbay no Dyos dyira.”

⁸ Ki an yaken, napno ako so panakabalin do Ispirito ni ĀPO. Napno ako pa so nainkalintegan kan kabīleg a mangibahey so gatos no Israel.

⁹ Mangadngey kamo, inyo a kapotōtan ni Jakob, inyo a magtotoray do nasyon no Israel a mangipsok so nainkalintegan kan dyidohen nyo tabo a kosto.

¹⁰ Pinatnek nyo Sion do maraya a kapangdiman kan Jerosalem do kinakōsit.

¹¹ Inyo a pangpangōlo, mangokom kamo an myan pasoksok. Inyo a papādi, mangnanawo kamo an myan tangdan. Inyo a propīta, mangipadto kamo an myan kwarta. Ki alit na pachinareng nyo di ĀPO a kon nyo, “Ari abawri dyaten si ĀPO? Aryoriw mangay a didigra dyaten? Polos!”

¹² Dawa, maynamot dyinyo, maaradonchiw Sion a akmay tālon. Iyaw Jerosalem, mayparin anchi a bonton, as maysepesepet anchiw paytokonanaw a yanan timplo.