Mikyas 1 - Ibatan

¹ Nyaw minsāhi a inpakatoneng ni ĀPO di Mikyas a taga idi a Moreset a maynamot do kaokom no Samarya kan Jerosalem. Naboya naw nyaya do chimpwaw a nakapagāri da Jotam, Ahas, kan Hesekias do Joda.

No Dongdong-aw Para Do Samarya kan Jerosalem

² Mangadngey kamo, inyo a tabo a tawotawo. Adngeyen nyo nyaya, inyo a tabo a omyan do tanaya! Si ĀPO a Manakabalin mangsaksi so maibōsor dyinyo. Adngeyen nyo, ta maychirin a yapo do masantwan a timplo na.

³ Chiban nyo! Īto dana si ĀPO a yapo do masantwan a yanan na. Gomchin anchi kan lasagan na sanchiw matotohos saya a tokotokon do tanaya.

⁴ Siraw katokotokonan saya, ki malonag sa a akmas nadangdangaw a alid do apoy. Maloyo sanchi do payahosongan saya akmay ranom a gomtos do aphas.

⁵ Tabo nyaya, maparin anchi maynamot ta nagribīldi saw kapotōtan Jakob. On, maparin nya a maynamot ta naygatos saw kapotōtan Israel. Āngo iyaw gatos dan kapotōtan Jakob? Iyabawriw karahet dan tawotawo no Samarya? Dino sintro no pagdaydayāwan so didyosen do Joda? Do Jerosalem abawri?

⁶ Binata ni ĀPO a kāna, “Dawa, payparinen konchiw Samarya a bonton a yanan a paymohan so kaobāsan. Paychabadebadedehen konchiw bato na saw do payahosonganaw tan magparang saw pondasyon na.

⁷ Mapsapsa sanchiw didyosen na. Tabo mapapateg saw a nakpeh da do timplo, ki masosohan sanchi so apoy. Rarayawen ko sanchi a tabo bolto da saw. Maynamot ta nakpeh saw nya a yapo do tangdan daw no maglaklāko saw so asi, tangdan dananchi a mirwa no matarek a maglaklāko so asi do matarek a nasyon.”

⁸ Binata ni Mikyas a kāna, “Maynamot do dyaya, magāsog kan magdongdong-aw ako. Mayam ako a abos tokap kan silalābos. Maydawo ako a akmas bolawaw a chito kan maylilyak ako a akmay gokgok.

⁹ Mapya pabaw bigar no Samarya, kan nayadis dana do Joda. Nakarapit dana do rowanganaw no idi dan tawotawo ko a aran do Jerosalem a mismo.”

No Kasōngad Da No Kabosor Do Jerosalem

¹⁰ Ibahey nyo aba do kabōsor ta saya do idi a Gat iyaw nakaābak ta. Maychahoho kamo abas aran asa katedted. Inyo a tawotawo do idi a Beth-leapra, maydipodiporis kamo do ahbek do ladingit nyo.

¹¹ Inyo a tawotawo do idi a Sapir, maakaw kamonchi a mabahod, kan mayam kamonchi a silalābos a masnek so kayayan. Inyo a tawotawo do Saanan, makahtot kamo paba do idi nyo. Anchan madngey nyo kapagdongdong-aw da do idi a Bet-esel, matonngan nyonchi a abaw kamāngan daw.

¹² Siraw tawotawo do idi a Marot, manghahaw sa so kapakalong-aw da ta iyaw didigraya a yapo di ĀPO, ki narapit narana a manda do rowangan no Jerosalem.

¹³ Inyo a tawotawo do idi a Lakish, isagāna nyo kabalyo nyo do logan nyo a pachigobat. Inyo nangisongsong so Jerosalem a naygatos, ta tinahatahan nyo gatos daw no Israel.

¹⁴ Dawa, manoroh kamos sāgot a pamakāda do idi a Moreset-Gat. Iyaw idi a Aksib, ki inallilaw na saw āri saya no Israel.

¹⁵ Inyo a tawotawo do idi a Maresah, manoboy si ĀPO so mangsākop so idi nyo. Siraw pangpangōlo no Israel, mangay sanchi a tomayo do aschip no Adollam.

¹⁶ Inyo a tawotawo do Joda, chischisan nyo oho nyo do kapagmamayo nyo maynamot dyirad anak nyo saw a chadaw nyo. Chischisan nyo oho nyo a akmas oho naw no kangkang, maynamot ta maakaw saw anak nyo a sibabahod.