Ester 10 - Ibatan

No Kabīleg Da Āri Ekserses Kan Mardokeo

¹ Napagbwis si Āri Ekserses so inkapilītan dyirad tawotawo saw do intīro a pagāryan na a aran siraw omyanaw do payis no kanayan.

² Tābo mabibīleg kan makaskasdāaw saw a pinarin na kontodo kakomplito no pakasaritāan nakapatohos naw si Mardokeo do matohos a saad, ki naitolas do librwaw a pakasaritāan dan aāri daw do Persya kan Medya.

³ Si Mardokeo a Jodyo, iyaw somarono di Āri Ekserses so saad. Anyiben kan chadaw dan kapayngay na saw a Jodyo. Intarabāko naw kaganayan dan tawotawo na saw, kan iyaw paypaganayan da do masakbayan no tābo Jodyo.