Amos 9 - Ibatan

No Kapangokom Ni ĀPO

¹ Naboya ko si Āpo a mayteytēnek do bīt naw no altar. Inbilin naw nya a kāna, “Māswen mo totok saya no parey no Timplo tan magon-gon pondasyon na saya. Loyohen mo kan inolay mo a masday do oho dan tawotawo saya. Siraw nabidin saw a tawotawo, ki ipadiman ko sanchi do ispāda. Abanchiw makapayyayo, kan abanchiw makalības.

² Aran machikolkol sa do yanan no kadiman, alneten ko sanchi. Aran komayat sanchi do hanyit, pagchinen ko sanchi.

³ Aran tomayo sa do totok no Tokon a Karmel, chichwasen ko sanchi kan tiliwen ko sa. Aran taywan da yaken do irahem no tāw, bilinen konchiw rakohaw a boday a mangay a omsonyit dyira.

⁴ Aran ihtot da san kabōsor da a akawen, ibilin konchi a ipadiman da sa do ispāda. Nawrinchiw chichiban ko iyaw kararayaw da, iyabaw kasidong ko sira.”

⁵ Si Āpo a DYOS a Manakabalin do Tābo, saliden naw tanaya kan malonag, kan magdong-aw tabo a omyan daw. No tābo tanaya, ki magalloallon a akmas oksong a Nile do Egipto.

⁶ Mapatnek si ĀPO so bahay na do hanyit, kan pangayen naw pondasyon na do tanaya. Tawagan naw ranom do tāw, kan padohen na do hapotayan tana. Si ĀPO ngaran na.

⁷ Binata ni ĀPO a kāna, “Inyo a tawotawo do Israel, akma kamo siras taga Etiopyaw dyaken. Inihtot ko saw Pilisteo a yapo do Kreta kan siraw taga Siryaw a yapo do Kir a akmas nakaihtot kwaw dyinyo a yapo do Egipto.

⁸ Yaken si Āpo a DYOS, mangsipsipot so nya magagatosen a tawotawo do pagāryan no Israel. Rarayawen ko sanchi a abohen do hapotayan tana, ki rarayawen ko abanchi a tabo iyaw kapotōtan Jakob.

⁹ “Do mandar ko, yokoyoken konchiw tawotawo do Israel. On, yokoyoken ko sanchi a karāman dan tabo saya nasyon tan mapakaro tabo a abo so sirsirbi.

¹⁰ Tabo no magagatosen do tawotawo ko, ki madiman sanchi do ispāda. On, tabon makabata sya a kon da, ‘Abanchiw didigra a mangyoba mana makasngen dyaten.’”

No Kapakabangon a Mirwa No Israel

¹¹ Binata ni ĀPO a kāna, “Īto danaw araw a pirwahen ko na bangonen pagāryan ni Dabid a mayarig do asa nalasa a bahay. Paysonongen ko sanchiw ahad na, kan pabidyen konchiw plastar naw. Bangonen kan payparinen konchi a akmas sīgod a kayayan na.

¹² Tan komwan, sakōpen nanchi no tawotawo a Israel nabidin saw a tana no Edom kan tabo a nasyon a dyaken do nakarahan.” Komwan chirin ni ĀPO a mangparin anchi sira syay.

¹³ Binata ni ĀPO a kāna, “Īto dana saw araw a dyi sa makagaben magranyi do kāro no āpit, kan dya kadasan no maypaypalek so maynoy a obas. Maytetedted sanchiw bayo a palek a yapo do katokotokonan, kan maychawoyog anchi do paytoytokonan.

¹⁴ Pabidyen ko sanchiw naakaw saw a tawotawo ko a Israel do tana da. Patneken da sanchi a mirwaw nararayaw saw a syodad da kan omyan dana sa daw. Maymoha sanchi so obas, kan inomen da panchiw palek naw. Homakaw sanchi, kan kanen danchiw maāpit da.

¹⁵ Imoha konchiw tawotawo a Israel do tana a intoroh ko dyira, kan mabagot pa sabanchi a mirwa.” Nyaw binata ni ĀPO a Dyos nyo.