เส​คา​ลิ​ยา 13 - ฉบับอักษรลาว

ດສ໋າວ ຕສຸ໌ຍ ເຖສົາ ສາ ຫວຸຍ ເຍີຍ ເຈົ໊າ

¹ “ວົ້ວ ຮນອຍ ອ໋ອຍ ມ່າຍ ນອມ ວວມ-ຕສີ໊ງ ຄອຍ ອກອຍ ເຫວີ່ຍ ດາ​ວິດ ເຍີຍ ເຕສີ໊ຍ-ຟຸນ ເຖສົາ ເຢ​ລູ​ຊາ​ເລມ ເຍີຍ ມ່ຽນ ດສ໋າວ ຕສຸ໌ຍ, ສາ ຫວຸຍ.”

² ເນິ່ນ ເຈ໋ຍ ເຍີຍ ຕສ໊ຽວ ກ໊ອງ, “ວົ້ວ ຮນອຍ ເຢຍ ອ໋ອຍ ໄພ ກວັ່ງ ຢຽມ ເຕີ່ຍ-ປູງ ເຍີຍ ໝິ່ວ-ຝັງ ເຍີຍ ບົ໋ວ, ເຫວີ່ຍ ໄມ້ ປຸນ ຫາຍ ເຕົ້າ ແອ໋ງ ໄຮ່ ຈັ໋ງ ຕຸ໊ ນິ່ນ ບົວ. ເຢຍ ອ໋ອຍ ຕສຸ່ນ ອກອຍ ຈ໊າ ໂຕ່ວ ຫວ່າ ມ່ຽນ ເຖສົາ ໂຮຍ້ວ ໄມ້ ທສີງ-ເດສ່ງ ເຍີຍ ມ່ຽນ, ໄມ້ ປຸນ ຢຽມ ເຕີ່ຍ-ປູງ.

³ ເຊ ກ໊ອງ ມ່າຍ ນ້າຍ ຫຍູ່ງ ໂຕ່ວ ຫວ່າ ມ່ຽນ ແອ໋ງ ທສວດ ຕ້າຍ, ນິ່ນ ເຍີຍ ທສຽນ ເຕຍ ມາ ອ໋ອຍ ຕສຸ ບົ໋ວ ນິ່ນ, ‘ເມີ່ຍ ອ໋ອຍ ຕສຸ ໄຕ່ ອ໊ະ, ເຫວີ່ຍ ຕສຸ ເມີ່ຍ ເຕ໊ງ ຕສ໊ຽວ ເຍີຍ ເມ່ງ ກ໊ອງ-ແປະ.’ ນິ່ນ ໂຕ່ວ ຫວ່າ ເຍີຍ ຕສຢັ້ງ ໂຫ່ ນິ່ນ ກັ້ນ ເຍີຍ ເຕຍ ມາ ອ໋ອຍ ຕສຸ ດສົ໊ບ ທົງ ນິ່ນ.

⁴ “ວົ້ວ ຮນອຍ ເຕົ້າໆ ໂຕ່ວ ຫວ່າ ມ່ຽນ ຫລາຍ ນິ່ນ ບົວ ໂຕ່ວ ຫວ່າ ກ໊ອງ ຫລ່າວ ຢ້າງ ເຍີຍ ສີ່ ຕສຸ ໄຍ້. ນິ່ນ ບົວ ຕສ່ຽວ ໄມ້ ຕສຸ໊ ມ່າຍ ເປຢີຍ ເຍີຍ ລຸຍ ເຫວີ່ຍ ດົ໊ວ ມ່ຽນ.

⁵ ນິ່ນ ຕສູ໊ງ ອ໋ອຍ ກ໊ອງ, ‘ເຢຍ ໄມ້ ເຕສີ໌ຍ ໂຕ່ວ ຫວ່າ ມ່ຽນ. ເຢຍ ເຊ ໂຕສ໋ວ ຫລຢັງ-ເດີ່ຍ ເຍີຍ ມ່ຽນ, ເຫວີ່ຍ ຕສຸ ຢຽມ ເຢຍ ຫລຸນ ເຍີຍ ຕສຢັ້ງ ໂຫ່ ນ້າຍ ເຕີ໋ຍ ເດົາ ມຕ້າຍ ເປ໋ນ ເຢຍ ເຍີຍ.’

⁶ ເຊ ກ໊ອງ ມ່າຍ ມ່ຽນ ໜ່າຍ ນິ່ນ, ‘ເມີ່ຍ ເຍີຍ ຫລະຄວດ ໂຕສ໋ວ ຫາຍ ຫຍູ່ງ ມ່າຍ ໜານ?’ ນິ່ນ ຕສ່ຽວ ເຕົາ, ‘ນ້າຍ ເຕີ໋ຍ ໜານ ເຢຍ ຢຽມ ເຢຍ ເຍີຍ ຕ່ອຍ ເຍີຍ ເປຢົ໊າ ຕສຸ ຕ້າຍ.’”

ທິນ-ຮູ່ງ ເຍີຍ ໂກ໋ວ ປະກີ ຢູ້ງ ມ່ຽນ ຕສຸ ເບ໊າະ

⁷ ເນິ່ນ ເຈ໋ຍ ເຍີຍ ຕສ໊ຽວ ກ໊ອງ, “ດສຸ ດ໊າວ ອ້າ! ເຈ໌ຍ ຕ້າຍ ເຖສົາ ເຢຍ ເຍີຍ ໂກ໋ວ ປະກີ ຢູ້ງ ມ່ຽນ ເບ໊າະ ຈ໋າ, ເຊ ເຖສົາ ເຢຍ ຕສົວະ ຕ່ອຍ ເບ໊າະ ຈ໋າ. ເບ໊າະ ໂກ໋ວ ຢູ້ງ ມ່ຽນ, ປະກີ ຢູ້ງ ກວັ້ນ ຕສ່ຽວ ດສ໋ານ ເດສ່ງ. ເຢຍ ຢ່າ ອ໋ອຍ ຮລວດ ປົ໌ວ ຕ້າຍ ເບ໊າະ ປະກີ ຢູ້ງ ຕອນ.”

⁸ ຕສ໊ຽວ ກ໊ອງ, “ຢຽມ ກ໋ອມ ເຕີ່ຍ-ປູງ ເຍີຍ ມ່ຽນ, ປົວ ໂກ໊ວ ເຍີຍ ອີ ໂກ໊ວ ອ໋ອຍ ຕສຸ ໄພ ກວັ່ງ, ຕສຸ ໝຽດ, ລ່ຽວ ເອຈ່ຍ ເຍີຍ ມ່າຍ ປົວ ໂກ໊ວ ເຍີຍ ຢຽດ ໂກ໊ວ.

⁹ ເຢຍ ອ໋ອຍ ເຕສ໊າະ ວົ້ວ ເຕີ໋ຍ ປົວ ໂກ໊ວ ເຍີຍ ຢຽດ ໂກ໊ວ ເຈ໋ຍ ໂຕ່ວ ສິນ ນິ່ນ ບົວ ຮນັ້ງ ສິນ ຍ່ານ, ເສີຍ ນິ່ນ ບົວ ຮນັ້ງ ເສີຍ ຈຽມ. ນິ່ນ ບົວ ອ໋ອຍ ເຫ່ວ ຈ໊ຽນ ໂຈ້ວ ເຢຍ ເຍີຍ ເມ່ງ, ເຢຍ ຕສ່ຽວ ເຕົາ ນິ່ນ ບົວ. ເຢຍ ອ໋ອຍ ກ໊ອງ, ‘ນິ່ນ ບົວ ເຊ ເຢຍ ເຍີຍ ແປະ ຝີງ.’ ນິ່ນ ບົວ ຢ່າ ອ໋ອຍ ກ໊ອງ, ‘ ຕສ໊ຽວ ເຊ ເຢຍ ບົວ ເຍີຍ ທິນ-ຮູ່ງ.’”