ทิ​ตัด 2 - ฉบับอักษรลาว

ມ່າຍ ກອນ-ປ໊ວນ ເຍີຍ ໂຕ໌-ເລີ໌ຍ

¹ ເມີ່ຍ ອຈ໋າວ ມ່ຽນ, ເມີ່ຍ ອ໋ອຍ ຕສຸ ອຈ໋າວ ຕ໋ອຍ ມ່າຍ ກອນ-ປ໊ວນ ເຍີຍ ໂຕ໌.

² ອ໋ອຍ ຕສຸ ອຈ໋າວ ຫຮຍັງ-ເຈີ໊ຍ ໂກ໋ ເຍີຍ ມຈັ່ງ ຕອນ ຕສັ໊ນ ຕຸ໊ ກັ້ນ, ໂຕສ໋ວ ສີ່ ຜຸຍ ຕຸ໊ ມ່ຽນ ທ່າຍ, ຢ່າ ກຸ໊ນ ຕຸ໊ ກັ້ນ. ອ໋ອຍ ຕສຸ ອຈ໋າວ ນິ່ນ ບົວ ສຽນ ຫລົງ ເຢ​ຊູ, ຮນ້ຳ ມ່ຽນ, ຢ່າ ມ່າຍ ໜ່ອຍ ເຕ໊ຍ.

³ ຟີ່ ຮນັ້ງ ເຍີຍ, ອ໋ອຍ ຕສຸ ອຈ໋າວ ຫຮຍັງ-ເຈີ໊ຍ ໂກ໋ ເຍີຍ ມເຊັຍ ຕອນ ໂຕສ໋ວ ສີ່ ຜຸຍ ສຽນ ທິນ-ຮູ່ງ ເຍີຍ ມ່ຽນ, ໄມ້ ຕູ໋ງ ກ໊ອງ ຫວ່າ-ຮູ້, ໄມ້ ຕູ໋ງ ເຫງ ຮົບ ຕິ໊ວ. ນິ່ນ ບົວ ຂູງ ອ໋ອຍ ຕສຸ ອຈ໋າວ ຫລົງ ເຍີຍ ສີ່ ຮນັ້ງ.

⁴ ຮນັ້ງ ໜ່າຍ, ນິ່ນ ບົວ ໄຮ່ ອຈ໋າວ ເອົ໊າ-ຈ໋ານ ຮນ້ຳ ໂອກ໋ ເຖສົາ ຝຸຈ໊ວຍ,

⁵ ໄຮ່ ກຸ໊ນ ຕຸ໊ ກັ້ນ, ມ່າຍ ໂຮຍ້ວ ທສີງ-ເດສ່ງ, ຕສ໊າງ ຫລົງ ຈາ-ຕີ້ງ, ໂຕສ໋ວ ຫລົງ ປຸນ ມ່ຽນ ຢ່າ ບົວະ ກັ້ນ ເຍີຍ ໂອກ໋ ເຫວີ່ຍ ໄມ້ ປຸນ ມ່ຽນ ມ່າຍ ຕ໋ອງ ກ໊ອງ ໂຕະ ທິນ-ຮູ່ງ ເຍີຍ ໂຕ໌.

⁶ ຟີ່ ຮນັ້ງ ເຍີຍ, ເມີ່ຍ ຢ່າ ອ໋ອຍ ຕສຸ ຂວິນ ຫຮຍັງ-ເຈີ໊ຍ ຫລຸນ ເຍີຍ ມຈັ່ງ ຕອນ ກຸ໊ນ ຕຸ໊ ກັ້ນ.

⁷ ຢຽມ ໝ່ານ ສີ່ ເມີ່ຍ ຢ່າ ອ໋ອຍ ຕສຸ ໂຕສ໋ວ ຫລົງ ເຍີຍ ຫຍູ່ງ ເຕສີ໊ຍ ປຸນ ນິ່ນ ບົວ ຕສວດ. ອຈ໋າວ ໂຕ໌ ເຍີຍ ຕສຢັ້ງ ໂຫ່ ອ໋ອຍ ຕສຸ ຕສຽບ ຕສົ໊ວະ ເຍີຍ ຫລົ່ງ ໂຮຍ້ວ ອຈ໋າວ.

⁸ ອ໋ອຍ ຕສຸ ຫລົ່ງ ມ່າຍ ກອນ-ໂດ໊ະ ເຍີຍ ຫວ່າ, ຕົ້ງ ໄມ້ ມ່າຍ ຕ໋ອງ ຕ້ານ ເຍີຍ ຫວ່າ. ຮນັ້ງ ນ້າຍ, ເຖສົາ ເມີ່ຍ ຕ໋ອຍ-ເຕກ ວົ້ວ ເຕີ໋ຍ ຕສ່ຽວ ຕສຸ ໄຍ້, ເຫວີ່ຍ ຕສຸ ລໍ໌ ໄມ້ ຕຸ໊ ຕ໋ອງ ຕ້ານ ບົວ.

⁹ ອ໋ອຍ ຕສຸ ອຈ໋າວ ໂຕສ໋ວ ໂນ່ວ ວົ້ວ ເຕີ໋ຍ ຢຽມ ຫຍູ່ງໆ ສີ່ ບົວະ ກັ້ນ ເຍີຍ ຕສ໊ຽວ ກຸ໊ນ, ຢ່າ ໂຕສ໋ວ ຫຍູ່ງໆ ເຫວີ່ຍ ປຸນ ຕສ໊ຽວ ອະເຮນີ້ຍ. ໄມ້ ຕູ໋ງ ເຕົ໋າ ດສຸ້ຍ,

¹⁰ ຢ່າ ໄມ້ ຕູ໋ງ ໜິ່ມ ຕສ໊ຽວ ເຍີຍ ຍ່ານ. ນິ່ນ ບົວ ອ໋ອຍ ຕສຸ ຢຽມ ໝ່ານ ສີ່ ປຸນ ທສີງ ນິ່ນ ບົວ ຕສັ່ນໆ ຕສຽບ ຕສົ໊ວະ ເຍີຍ ໂຕສ໋ວ ເຫວີ່ຍ ປຸນ ນິ່ນ ບົວ ໂຕສ໋ວ ເຍີຍ ຫຍູ່ງໆ ຕຸ໊ ມ່ຽນ ທ່າຍ ບົວ ເຍີຍ ໂອຈ໋ວ ຕສ໊ຽວ ທິນ-ຮູ່ງ ເຍີຍ ໂຕ໌.

¹¹ ທິນ-ຮູ່ງ ເຍີຍ ເອນ ຕສູ໊ງ ປິ໋ວ ເມ່ງ ທສວດ ຕ້າຍ ເຫວີ່ຍ ປຸນ ໝ່ານ ມ່ຽນ ຕຸ໊ ໂອຈ໋ວ.

¹² ນ້າຍ ຫຍູ່ງ ເອນ ອຈ໋າວ ບົວ ກວັ່ງ ອກອຍ ຕົ້ງ ໄມ້ ທ່າຍ ທິນ-ຮູ່ງ ເຍີຍ ເຖສົາ ປ້າມ ມ່ຽນ ໂຮຍ້ວ ຫັ່ນ ໂຕສ໋ວ ເຍີຍ ຢຽດ ຕສູ໊ງ, ຕສ່ຽວ ຢຽມ ນ້າຍ ຈ໋າ ລູ່ງ ເດ໊ຍ ກຸ໊ນ ຕຸ໊ ກັ້ນ, ໂຕສ໋ວ ແປ້ງ ຟິມ ເຍີຍ, ຢ່າ ກັນ ຫລົງ ທິນ-ຮູ່ງ.

¹³ ອ໋ອຍ ຕສຸ ຮນັ້ງ ນ້າຍ ນໍ ໂຕສ໋ວ ຕສົ໊ວ ຈ໊ຽນ ບົວ ມ່າຍ ລ່ຳ ຮນ້ຳ ອ໋ອຍ ຕຸ໊ ເຍີຍ ອອນ-ເຫລາະ, ຕົ້ງ ໂຮລ ເຈ໋ຍ ເຍີຍ ທິນ-ຮູ່ງ, ບົວ ເຍີຍ ໂອຈ໋ວ ຕສ໊ຽວ ເຢ​ຊູ ກີ​ຕູ່, ຢຽມ ນິ່ນ ເຍີຍ ອຈັງ-ຫລ່າງ ແອ໋ງ ຕ້າຍ.

¹⁴ ນິ່ນ ເຫວີ່ຍ ບົວ ເຊ້ຍ ນິ່ນ ກັ້ນ ເຍີຍ ແໝ່ງ ຕສົວະ ບົວ ດສ໋ວນ, ເລີ່ຍ ດຸ໊ດ ຢຽດ ຕສູ໊ງ ຫວ່າຍ ເຍີຍ, ເອ໊າະ ເຍີຍ ສີ່. ນິ່ນ ຢ່າ ດສ໋າວ ບົວ ທສີງ-ເດສ່ງ ຕ້າຍ, ເປ໋ນ ນິ່ນ ກັ້ນ ເຍີຍ ມ່ຽນ, ບົວ ຕສ່ຽວ ຈອມ ໂຮຍ້ວ ເຍີຍ ໂຕສ໋ວ ຫຍູ່ງໆ ຄູ້ ສີ່.

¹⁵ ເມີ່ຍ ອ໋ອຍ ຕສຸ ຫລົ່ງ ນ້າຍ ເຕີ໋ຍ ຫວ່າ ອຈ໋າວ ມ່ຽນ. ອ໋ອຍ ຕສຸ ຫລົ່ງ ເດສ່ງ ເມີ່ຍ ເຍີຍ ຫັດ ມ໌າ ຂວິນ ມ່ຽນ, ກ໊ອງ-ເຫມ ມ່ຽນ. ຢ່າ ໄມ້ ຕູ໋ງ ປຸນ ຫາຍ ເຕົ້າ ໝັ່ງ ເຜຍ ເມີ່ຍ.