หล่าว ย่าง 3 - ฉบับอักษรลาว

ເຟ້ຍ ປຸນ ຊາ​ດິດ ຈິວ-ປາງ ເຍີຍ ຝຽນ

¹ “ເມີ່ຍ ອ໋ອຍ ຕສຸ ເຟ້ຍ ຝຽນ ປຸນ ຊາ​ດິດ ຈິວ-ປາງ ເຍີຍ ຟິນ-ມ່ຽນ, ບົ໋ວ ນິ່ນ, ‘ມ່າຍ ທິນ-ຮູ່ງ ເຍີຍ ເສ່ຍ ນອມ ລີ່ງ ວ່ວນ ຢ່າ ມ່າຍ ເສ່ຍ ນອມ ເຫຮລີຍ ວົ້ວ ເຕົ້າ ຮນັ້ງ ນ້າຍ ນໍ ກ໊ອງ. ເຢຍ ຮິ້ວ ຕຸ໊ ເມີ່ຍ ໂຕສ໋ວ ເຍີຍ ສີ່. ເຢຍ ຮິ້ວ ຕຸ໊ ເມີ່ຍ ດາມ ເມ່ງ ຕສຢັ້ງ ຈ໊ຽນ ເຍີຍ, ມປ່າ ເມີ່ຍ ໄຕ່ ໝີ່ ອ໊ະ.

² ເຍຍ ຕ້າຍ ມ່າະ! ເຕສ່ງ ເອຈ່ຍ, ອ໊າ ລ່ຳ ຕສຸດ ເຍີຍ, ອ໋ອຍ ຕສຸ ປຸນ ເຮ້ນ ເຈ໌ຍ ຕ້າຍ, ໄມ້ ຕູ໋ງ ປຸນ ຕສຸດ ເດສ່ງ ເຫວີ່ຍ ຕສຸ ເຢຍ ປວັດ ເມີ່ຍ ໂຕສ໋ວ ເຍີຍ ກົງ ເອີຍ ເຢຍ ເຍີຍ ທິນ-ຮູ່ງ ໝັ່ງ ເຊ ໄມ້ ຕຸ້ນ ຢຸ້ນ.

³ ຮນັ້ງ ໜ່າຍ, ອ໋ອຍ ຕສຸ ຈັ໋ງ ຈ໊ຽນ ມ່ຽນ ອຈ໋າວ ເຈ໋ຍ ເຍີຍ ເຖສົາ ເມີ່ຍ ໄຮ໌ ເຈ໋ຍ ເຍີຍ ຫວ່າ. ອ໋ອຍ ຕສຸ ເອີຍ ຈ໊ຽນ ໂຕສ໋ວ ຢ່າ ກ໊ອຍ ໂຮຍ້ວ ກວັ່ງ ຕສຸ໌ຍ. ເຊ ກ໊ອງ ເມີ່ຍ ໄມ້ ເຍຍ, ເຢຍ ຕສ່ຽວ ມີ່ງ ລໍ໌ ເມີ່ຍ ຮນັ້ງ ຈັ໋ນ-ຕສະ ນໍ. ເມີ່ຍ ຕສູ໊ງ ໄມ້ ຮິ້ວ ຕຸ໊ ເຢຍ ຫາຍ ນອມ ຕສຢັ້ງ ໂຫ່ ເຖົາ.

⁴ ‘ມປ່າ ຢຽມ ເມີ່ຍ ໜ່າຍ ຊາ​ດິດ ຈິວ-ປາງ ຖສໍ່ ມ່າຍ ອີ ເຕສ໋ຍ ເຕົ້າ ໄມ້ ປຸນ ນິ່ນ ບົວ ເຍີຍ ລຸຍ-ໂຫວ ໄລ່ ຮລົບ. ນ້າຍ ເຕີ໋ຍ ມ່ຽນ ຕສ່ຽວ ຕຸ໊ ຕສຸ໊ ລຸຍ-ໂຫວ-ແປະ ເຖສົາ ເຢຍ ຈວັ່ງ ເຈົ໊າ ຢັ້ງ, ເຫວີ່ຍ ຕສຸ ນິ່ນ ບົວ ຜຸຍ ຕຸ໊ ອ໊ະ.

⁵ ຫາຍ ເຕົ້າ ຕຸ໊ ຮີ່ງ, ວົ້ວ ເຕົ້າ ຕຸ໊ ຕສຸ໊ ແປະ ເຍີຍ ລຸຍ-ໂຫວ. ຢຽມ ຕສຢັ້ງ ແໝ່ງ ຕານ ເຢຍ ຢ່າ ໄມ້ ຊອດ ນິ່ນ ເຍີຍ ບົ໋ວ ກວັ່ງ. ເຢຍ ຢ່າ ອ໋ອຍ ຢຽມ ເຢຍ ເຍີຍ ເຕຍ ເຖສົາ ນິ່ນ ເຍີຍ ຟິນ-ມ່ຽນ ເຍີຍ ດສະຮມຽນ ຫຍ່ຽມ ວົ້ວ ເຕົ້າ ເປ໋ນ ເຢຍ ເຍີຍ ມ່ຽນ.

⁶ ‘ຫາຍ ເຕົ້າ ມ່າຍ ມນ່ອມ ອ໋ອຍ ຕສຸ ແປງ ມນ່ອມ ໝວັງ ຫລົງ ສີງ ລີ່ງ ຮນັ້ງ ຫາຍ ນໍ ບົ໋ວ ຕສວັ໋ງ ຈິວ-ປາງ.’

ເຟ້ຍ ປຸນ ຟີ​ລາ​ເດນ​ເຟຍ ຈິວ-ປາງ ເຍີຍ ຝຽນ

⁷ “ເມີ່ຍ ອ໋ອຍ ຕສຸ ເຟ້ຍ ຝຽນ ປຸນ ຟີ​ລາ​ເດນ​ເຟຍ ຈິວ-ປາງ ເຍີຍ ຟິນ-ມ່ຽນ, ບົ໋ວ ນິ່ນ, ‘ທສີງ-ເດສ່ງ ເຍີຍ, ຕສຽນ ເຍີຍ ວົ້ວ ເຕົ້າ, ນັ້ນ ດາ​ວິດ ຮູ່ງ ເຍີຍ ຟໍ້-ເຕສີ້ຍ. ນິ່ນ ຄອຍ ອກອຍ ເຍີຍ, ໄມ້ ມ່າຍ ຫາຍ ເຕົ້າ ໄຮ່ ກວນ. ນິ່ນ ກວນ ເຍີຍ, ໄມ້ ມ່າຍ ຫາຍ ເຕົ້າ ຄອຍ ຕຸ໊ ອກອຍ. ນິ່ນ ຮນັ້ງ ນ້າຍ ນໍ ກ໊ອງ.

⁸ ເຢຍ ຮິ້ວ ຕຸ໊ ເມີ່ຍ ໂຕສ໋ວ ເຍີຍ ກົງ. ໝັ່ງ ມ່າະ! ຢຽມ ເມີ່ຍ ເຍີຍ ດສະຮມຽນ ເຢຍ ຄອຍ ອກອຍ ເຕົ້າ ແກ້ງ ຢ່າ ໄມ້ ມ່າຍ ຫາຍ ເຕົ້າ ໄຮ່ ກວນ. ເຢຍ ຮິ້ວ ຕຸ໊ ເມີ່ຍ ຂູງ ມ່າຍ ເຕີ໋ຍ ປ໊າ ທຈະ, ເມີ່ຍ ຢ່າ ເອີຍ ຈ໊ຽນ ເຢຍ ເຍີຍ ຫວ່າ, ຢ່າ ຫຍ່ຽມ ເຢຍ ເຍີຍ ບົ໋ວ.

⁹ ໝັ່ງ ມ່າະ! ຊາ​ຕານ ເຍີຍ ຫວຸ່ຍ ເຍີຍ ມ່ຽນ, ຕົ້ງ ເທສງ ກັ້ນ ໂຕສ໋ວ ຢິວ​ໄທ ມ່ຽນ ມປ່າ ໄມ້ ເຕສີ໌ຍ, ນິ່ນ ບົວ ຂູງ ກ໊ອງ-ແປະ ຮນັ້ງ. ເຢຍ ອ໋ອຍ ປຸນ ນິ່ນ ບົວ ຕ້າຍ ພົວະ ເອຈ່ຍ ເມີ່ຍ ເຍີຍ ເຕສົ໋າ-ເຮລນ, ຕສ່ຽວ ປຸນ ນິ່ນ ບົວ ຮິ້ວ ຕຸ໊ ເຢຍ ຮນ້ຳ ເມີ່ຍ.

¹⁰ ເຫວີ່ຍ ຕສຸ ເມີ່ຍ ເອີຍ ຈ໊ຽນ ເຢຍ ເຍີຍ ຫວ່າ ຫລົ່ງ ໜ່ອຍ ເຕ໊ຍ ໂຄ້ວ, ເຖົາ ປ້າມ ເກນ ປວັ້ງ ຕົ້ມ ໂຄ້ວ ໜ່ານ ເຫວີ່ຍ ປຸນ ລູ່ງ ເດ໊ຍ ມ່ຽນ ຕສຸ ເສີຍ ວົ້ວ ຕສັ່ນ, ເຢຍ ຕສ່ຽວ ເປວ ຈ໊ຽນ ເມີ່ຍ.

¹¹ ‘ເຢຍ ອ໋ອຍ ຕ້າຍ ຊຽບ ອ໊ະ. ເມີ່ຍ ມ່າຍ ເຍີຍ ອ໋ອຍ ຕສຸ ໂກ໋ວ ຫລົງ ເຫວີ່ຍ ໄມ້ ປຸນ ຫາຍ ເຕົ້າ ໄຮ່ ທສ້າງ ເມີ່ຍ ເຍີຍ ນີ້ງ.

¹² ‘ຫາຍ ເຕົ້າ ຕຸ໊ ຮີ່ງ, ເຢຍ ອ໋ອຍ ປຸນ ວົ້ວ ເຕົ້າ ຢຽມ ເຢຍ ເຍີຍ ທິນ-ຮູ່ງ ເຍີຍ ສີງ ຕິ່ນ ໂຕສ໋ວ ນອມ ດ້ຽວ. ນິ່ນ ຢຽດ ລິ໌ວ ໄມ້ ທສວດ ສີງ ຕິ່ນ ອ໊ະ. ເຢຍ ອ໋ອຍ ເຟ້ຍ ເຢຍ ເຍີຍ ທິນ-ຮູ່ງ ເຍີຍ ບົ໋ວ ຢຽມ ນິ່ນ ເຍີຍ ຊິນ, ຢ່າ ອ໋ອຍ ເຟ້ຍ ເຢຍ ເຍີຍ ທິນ-ຮູ່ງ ເຍີຍ ຕສີ້ງ ເຍີຍ ບົ໋ວ, ຕົ້ງ ຢຽມ ທິນ-ຕ້ອງ, ເຢຍ ເຍີຍ ທິນ-ຮູ່ງ ວົ້ວ ເອຈ່ຍ ຕ້າຍ ວົ້ວ ນອມ ຊຢັງ-ເຢ​ລູ​ຊາ​ເລມ ຕສີ້ງ. ເຢຍ ຢ່າ ອ໋ອຍ ເຟ້ຍ ເຢຍ ກັ້ນ ເຍີຍ ຊຢັງ-ບົ໋ວ ຢຽມ ນິ່ນ ເຍີຍ ຊິນ.

¹³ ‘ຫາຍ ເຕົ້າ ມ່າຍ ມນ່ອມ ອ໋ອຍ ຕສຸ ແປງ ມນ່ອມ ໝວັງ ຫລົງ ສີງ ລີ່ງ ຮນັ້ງ ຫາຍ ນໍ ບົ໋ວ ຕສວັ໋ງ ຈິວ-ປາງ.’

ເຟ້ຍ ປຸນ ເລົາ​ດີ​ເຊຍ ຈິວ-ປາງ ເຍີຍ ຝຽນ

¹⁴ “ເມີ່ຍ ອ໋ອຍ ຕສຸ ເຟ້ຍ ປຸນ ເລົາ​ດີ​ເຊຍ ຈິວ-ປາງ ເຍີຍ ຟິນ-ມ່ຽນ, ບົ໋ວ ນິ່ນ, ‘ນ້າຍ ເຊ ໂຕສ໋ວ ອາ​ເມນ ວົ້ວ ເຕົ້າ ເຍີຍ ຫວ່າ, ເຊ ຕສຽບ ຕສົ໊ວະ ເຍີຍ ໂຕສ໋ວ ຕສຽນ ຕສອງ-ເຕສ໋ງ ຢ່າ ໂຕສ໋ວ ທິນ-ຮູ່ງ ເຕສີ໋ຍ ຕ້າຍ ເຍີຍ ໝ່ານ ໝວດ ເຍີຍ ກອນ ວົ້ວ ເຕົ້າ, ຮນັ້ງ ນ້າຍ ນໍ ກ໊ອງ,

¹⁵ “ເຢຍ ຮິ້ວ ຕຸ໊ ເມີ່ຍ ໂຕສ໋ວ ເຍີຍ ກົງ, ຮິ້ວ ຕຸ໊ ເມີ່ຍ ໄມ້ ຈອມ ຢ່າ ໄມ້ ໜຳ. ເຝີຍ ຕຸ໊ ເມີ່ຍ ຈອມ ໄຟ ໄມ້ ເຕສີຍ ແອ໊ະ, ໜຳ.

¹⁶ ມປ່າ, ເຫວີ່ຍ ຕສຸ ເມີ່ຍ ບົວ ເຊ ອຸນໆ ວົ້ວ, ໄມ້ ຈອມ ຢ່າ ໄມ້ ໜຳ, ເຢຍ ອ໋ອຍ ເລ້ຍ ເມີ່ຍ ທສວດ ເຢຍ ເຍີຍ ດສຸ້ຍ ມີ່ງ.

¹⁷ ເມີ່ຍ ກ໊ອງ, “ເຢຍ ປຸ໊ດ ຕສ້ອຍ, ຫຍູ່ງໆ ມ່າຍ ດສ້ອຍ, ໄມ້ ຖຈຽມ ຕສຸ ຫາຍ ຫຍູ່ງ ອ໊ະ.” ມປ່າ ເມີ່ຍ ໄມ້ ຮິ້ວ ຕຸ໊ ເມີ່ຍ ດົ່ງ ຫາຍ ໂຄ້ວ, ດົ່ງ ຫາຍ ຄໍ້-ລ່ຽນ, ຈົ່ມ ໄຫ່, ມຕສີງ ບົ໊ວ, ອຈັງ ຊິນ ທສີ້ ລີ້ ເຍີຍ ຢຽມ.

¹⁸ ເຢຍ ຂວິນ ເມີ່ຍ ມ໌າຍ ເຢຍ ຫລົ່ງ ໂລ່ວ ໂຕ໌ວ ສິນ ຕ້າຍ ເຍີຍ ຕສຽນ ຈຽມ ເຫວີ່ຍ ປຸນ ເມີ່ຍ ປຸ໊ດ ຕສ້ອຍ. ຢ່າ ມ໌າຍ ລຸຍ-ໂຫວ-ແປະ ຕສຸ໊ ຈ໊ຽນ ປຸນ ເມີ່ຍ ໄມ້ ໄຍ້, ໄມ້ ຕສຸ ແລ່ງ ແກ໊ງ ເຍີຍ ຢຽມ. ຢ່າ ອ໋ອຍ ຕສຸ ເຖງ ເຢຍ ມ໌າຍ ເດຍ ດສ໊າດ ເມີ່ຍ ເຍີຍ ມຕສີງ ເຫວີ່ຍ ປຸນ ເມີ່ຍ ໄຮ່ ໝັ່ງ ຕຸ໊ ປວັດ.

¹⁹ ‘ຕະຟ່ານ ເຢຍ ຮນ້ຳ ເຍີຍ ມ່ຽນ, ເຢຍ ກ໊ອງ-ເຫມ ຢ່າ ເບ໊າະ ອຈ໋າວ. ຮນັ້ງ ໜ່າຍ, ເມີ່ຍ ອ໋ອຍ ຕສຸ ຈອມ ຕ້າຍ ກ໊ອຍ ໂຮຍ້ວ ກວັ່ງ ເມີ່ຍ ເຍີຍ ຕສຸ໌ຍ.

²⁰ ໝັ່ງ ມ່າະ! ເຢຍ ໂຊ້ວ ຈ໊ຽນ ແກ້ງ ດ່າງ ແງ້ງ ແກ້ງ. ຫາຍ ເຕົ້າ ໄຮ໌ ເຢຍ ເຍີຍ ເຖຈຍ ຢ່າ ຄອຍ ແກ້ງ ເຢຍ ຕສ່ຽວ ເປັຍ ມີ່ງ ເຖສົາ ນິ່ນ ຫຍັ່ນ ຫຮນາງ, ນິ່ນ ຢ່າ ເຖສົາ ເຢຍ ຫຍັ່ນ ຫຮນາງ.

²¹ ‘ຫາຍ ເຕົ້າ ຕຸ໊ ຮີ່ງ, ເຢຍ ຕສ່ຽວ ປຸນ ວົ້ວ ເຕົ້າ ມ່າຍ ເລີ໌ຍ ຈວັ່ງ ເຢຍ ເຍີຍ ເຫວີ່ຍ ເຕສວີ໌ຍ, ຮນັ້ງ ເຢຍ ຕຸ໊ ຮີ່ງ ຕສ່ຽວ ເຖສົາ ເຢຍ ເຍີຍ ເຕຍ ຈວັ່ງ ນິ່ນ ເຍີຍ ເຫວີ່ຍ ເຕສວີ໌ຍ.

²² ‘ຫາຍ ເຕົ້າ ມ່າຍ ມນ່ອມ ອ໋ອຍ ຕສຸ ແປງ ມນ່ອມ ໝວັງ ຫລົງ ສີງ ລີ່ງ ຮນັ້ງ ຫາຍ ນໍ ບົ໋ວ ຕສວັ໋ງ ຈິວ-ປາງ.’”