ฟี​ลิบ​พอย 3 - ฉบับอักษรลาว

ມ່ຽນ ສຽນ ກີ​ຕູ່ ຕສ່ຽວ ຕຸ໊ ເຖສົາ ທິນ-ຮູ່ງ ຫອບ ໂຮຍ້ວ

¹ ເຢຍ ເຍີຍ ກໍ໋-ໂຢ໌ວ ອ່າ, ເຊດ ເມວີ໌ຍ ເຢຍ ຖສໍ່ ມ່າຍ ເຕີ໋ຍ ຫວ່າ ກ໊ອງ. ເມີ່ຍ ບົວ ເຖສົາ ຕສ໊ຽວ ເຢ​ຊູ ຈວັ່ງ ແໝ່ງ ຕສຢັ້ງ ຕສ່ຽວ ອ໋ອຍ ຕສຸ ອອນ-ເຫລາະ ອ໊ະ. ຕສິ້ນ ດ່າງ ເຢຍ ເຟ້ຍ ເຈ໋ຍ ເຍີຍ ຫວ່າ ເຢຍ ແອ໋ງ ເຟ້ຍ ດສຸ່ນ ເຊ ໄມ້ ຫລະເຍົ້າ ເຢຍ, ມປ່າ ເຊ ເຫວີ່ຍ ເປວ ຈ໊ຽນ ເມີ່ຍ ບົວ.

² ເມີ່ຍ ບົວ ອ໋ອຍ ຕສຸ ບູ້ງ ຈ໊ຽນ ວົ້ວ ເຕີ໋ຍ ຈູ໊, ຕົ້ງ ໂຕສ໋ວ ເອ໊າະ ວົ້ວ ເຕີ໋ຍ ມ່ຽນ. ນິ່ນ ບົວ ຂູງ ກ໊າດ ຫວ່າຍ ຊິນ ຮນັ້ງ.

³ ເຈ໋ຍ ຕສຽນ ກ໊າດ ເຍີຍ ເລີ໌ຍ ເຊ ຕົ້ງ ບົວ ເຫວີ່ຍ ຕສຸ ບົວ ເຂົາ ສີງ ລີ່ງ ຕສັ່ງ ທິນ-ຮູ່ງ. ບົວ ເຖສົາ ກີ​ຕູ່ ເຢ​ຊູ ຈວັ່ງ ແໝ່ງ ຕສຢັ້ງ ຕສ່ຽວ ອຈຽນ-ໂຢ້ວ ໄຫ່. ບົວ ຢ່າ ໄມ້ ເຂົາ ກັ້ນ ໄຮ່ ໂຕສ໋ວ ເຍີຍ ຫາຍ ຫຍູ່ງ.

⁴ ໄມ້ ກຸ໊ນ ເຢຍ ໄຮ່ ເຂົາ ກັ້ນ ໂຕສ໋ວ ເຍີຍ, ເຢຍ ຢ່າ ໄມ້ ເຂົາ. ຫາຍ ເຕົ້າ ຮນ້ຳ ຕ້າຍ ໄຮ່ ເຂົາ ກັ້ນ ໂຕສ໋ວ ເຍີຍ, ເຢຍ ເກົ້າ ໄຮ່ ເຂົາ.

⁵ ເຢຍ ທສວດ ເສີຍ ຕ້າຍ ປວັ໊ງ ຫຮຢຽດ ຮນອຍ ຕສ່ຽວ ເຈ໋ຍ ກ໊າດ ເຍີຍ ເລີ໌ຍ. ເຢຍ ທສວດ ເສີຍ ເປ໋ນ ອິ​ສະ​ລາ​ເອນ ມ່ຽນ, ເບນ​ຢາ​ມິນ ຝີງ, ມ່າຍ ຮິບ​ລູ ມ່ຽນ ເຍີຍ ດສຢ໊າມ-ເຟີຍ ຮນັ້ງ. ເອີຍ ກັນ ຢິວ​ໄທ ມ່ຽນ ເຍີຍ ເລີ໌ຍ-ຫລັດ ເຢຍ ເຊ ຕົ້ງ ຟາ​ລິ​ສີ ວົ້ວ ເຈົ໊າ ມ່ຽນ.

⁶ ເຢຍ ຢ່າ ຈອມ ໂຮຍ້ວ ໄຫ່, ຕສູ໊ງ ໂຕສ໋ວ ໂຕະ ຫ່ອຍ ຈິວ-ປາງ. ກ໊ອງ ເຖົາ ເອີຍ ຈ໊ຽນ ເລີ໌ຍ ໂຕສ໋ວ, ເຢຍ ໂຕສ໋ວ ຫອບ ເດສ່ງ, ໄມ້ ມ່າຍ ຕ໋ອງ ຕ້ານ.

⁷ ມປ່າ ຕສິ້ນ ດ່າງ ເຢຍ ຝຸນ ຕສີ່ ຕສິ້ນ ເຍີຍ, ອີ້ ຕສັ່ນ ເຢຍ ເຫວີ່ຍ ກີ​ຕູ່ ຝຸນ ໄມ້ ຕສີ່ ຕສິ້ນ ອ໊ະ.

⁸ ໄມ້ ຕານ ນ້າຍ. ເຢຍ ຝຸນ ຫຍູ່ງໆ ເຊ ໄມ້ ຕສີ່ ຕສິ້ນ ເຫວີ່ຍ ຕຸ໊ ຢຽດ ຫຍູ່ງ ເກົ້າ ຈ໋າຍ ເຈ໋ຍ. ຈ໋າຍ ເຈ໋ຍ ວົ້ວ ຫຍູ່ງ ເຊ ເຢຍ ໄຮ່ ຮິ້ວ ຕຸ໊ ເຢຍ ເຍີຍ ຕສ໊ຽວ ກີ​ຕູ່ ເຢ​ຊູ. ເຢຍ ກວັ່ງ ຫຍູ່ງໆ ຝຸນ ເປ໋ນ ກະນ້າຍ-ກວັ່ງ ເຫວີ່ຍ ຕຸ໊ ກີ​ຕູ່,

⁹ ຢ່າ ເຫວີ່ຍ ຕຸ໊ ເຖສົາ ນິ່ນ ຈວັ່ງ ແໝ່ງ ຕສຢັ້ງ. ເຢຍ ກັນ ຢິວ​ໄທ ມ່ຽນ ເຍີຍ ເລີ໌ຍ-ຫລັດ ໂຕສ໋ວ ມປ່າ ໄມ້ ຕຸ໊ ເຖສົາ ທິນ-ຮູ່ງ ຫອບ ໂຮຍ້ວ. ເຢຍ ຕຸ໊ ເຖສົາ ທິນ-ຮູ່ງ ຫອບ ໂຮຍ້ວ ເຊ ເຫວີ່ຍ ເຢຍ ສຽນ ກີ​ຕູ່. ເຊ ຕົ້ງ ທິນ-ຮູ່ງ ກັ້ນ ປຸນ ເຢຍ ຫອບ ນິ່ນ ເຍີຍ ໂຮຍ້ວ ເຫວີ່ຍ ຕສຸ ເຢຍ ສຽນ ກີ​ຕູ່.

¹⁰ ເຢຍ ຂູງ ອ໋ອຍ ຮິ້ວ ຕຸ໊ ກີ​ຕູ່, ຢ່າ ຮິ້ວ ຕຸ໊ ປຸນ ນິ່ນ ນັ່ງ ຕ້າຍ ເຍີຍ ຕົ້ມ ທຈະ, ຢ່າ ມ່າຍ ປ່ວນ ເຖສົາ ນິ່ນ ສ່ຽວ ໂຄ້ວ, ຢ່າ ຮນັ້ງ ນິ່ນ ນໍ ໄຕ່,

¹¹ ເຫວີ່ຍ ຕສຸ ເຢຍ ມ່າຍ ລ່ຳ ຮນ້ຳ ເຊ ເຢຍ ໄຕ່ ມີ່ງ ມປ່າ ທິນ-ຮູ່ງ ຕສູ໊ງ ອ໋ອຍ ປຸນ ເຢຍ ນັ່ງ ຕ້າຍ.

ຖິວ ມີ່ງ ຕຸ໊ ຕສີ້ງ ເຫຍີ່ຍ

¹² ເຢຍ ໄມ້ ເຕສີ໌ຍ ກ໊ອງ ເຢຍ ຕຸ໊ ລິ໌ວ ນ້າຍ ເຕີ໋ຍ ຢຽດ ຕສູ໊ງ. ຢ່າ ໄມ້ ເຕສີ໌ຍ ກ໊ອງ ເຢຍ ຕຸ້ນ ຢຸ້ນ ເດສ່ງ. ເຢຍ ເອຈ່ຍ ທຈະ ຖິວ ຈ໊ຽນ ມີ່ງ ເຫວີ່ຍ ອ໋ອຍ ເຕສ໊າະ ຕຸ໊ ຕສີ້ງ ເຫຍີ່ຍ. ເຊ ເຫວີ່ຍ ນ້າຍ ກີ​ຕູ່ ເຢ​ຊູ ຕສູ໊ງ ເຕສ໊າະ ເຢຍ ດ່າງ, ເປ໋ນ ນິ່ນ ເຍີຍ ໝີ່ ອ໊ະ.

¹³ ກໍ໋-ໂຢ໌ວ ອ່າ, ເຢຍ ໄມ້ ເຕສີ໌ຍ ຝຸນ ເຢຍ ເຕສ໊າະ ຕຸ໊ ໝີ່ ອ໊ະ. ເຢຍ ຂູງ ໂຕສ໋ວ ດຸ ຫຍູ່ງ ຮນັ້ງ. ເຈ໋ຍ ຕ້າຍ ເຍີຍ ສີ່ ເຢຍ ຫລະຄຸ ເດສ່ງ ໝີ່ ອ໊ະ, ຫລົ່ງ ທຈະ ຫູງ ຈ໊ຽນ ວົ້ວ ດ່າງ ມີ່ງ,

¹⁴ ແປງ ຕສະ ຖິວ ເຖົາ ເຕສ໊າະ ຕຸ໊ ຕສີ້ງ ເຫຍີ່ຍ ເຍີຍ ຕ໋ອງ, ເຊ ຕົ້ງ ທິນ-ຮູ່ງ ເຫ່ວ ເຢຍ ເຂົາ ກີ​ຕູ່ ເຢ​ຊູ ມີ່ງ ຢຽມ ກູ້ ຫງວ່າຍ ຕຸ໊ ເຍີຍ ຕສີ້ງ ເຫຍີ່ຍ.

¹⁵ ບົວ ຫາຍ ເຕົ້າ ເອີຍ ລີ່ງ ວ່ວນ ເຍີຍ ເຈົ໊າ ເປ໋ນ ຕົ້ມ ມ່ຽນ ອ໋ອຍ ຕສຸ ມ່າຍ ນ້າຍ ຫຍູ່ງ ໂຮຍ້ວ. ເຊ ກ໊ອງ ມ່າຍ ເຕີ໋ຍ ກັ້ນ ຫຍູ່ງ ຮນ້ຳ, ທິນ-ຮູ່ງ ຕສ່ຽວ ປຸນ ເມີ່ຍ ບົວ ຮິ້ວ ຕຸ໊ ເຊ ກັ້ນ ຫຍູ່ງ ໝີ່ ອ໊ະ.

¹⁶ ມປ່າ ບົວ ຢັ້ງ ເຢ​ຊູ ເຍີຍ ເຈົ໊າ ເຖົາ ຫາຍ, ອ໋ອຍ ຕສຸ ເອີຍ ຈ໊ຽນ ວົ້ວ ຢັ້ງ.

¹⁷ ເຢຍ ເຍີຍ ກໍ໋-ໂຢ໌ວ ອ່າ, ເມີ່ຍ ບົວ ອ໋ອຍ ຕສຸ ລົ່ມ ດສ້ອຍ ຕສວດ ເຢຍ ເຍີຍ ຫຍູ່ງ ໂຕສ໋ວ. ຢ່າ ອ໋ອຍ ຕສຸ ຫລົງໆ ໝັ່ງ ກັນ ເຢຍ ບົວ ເຍີຍ ຫຍູ່ງ ໂຕສ໋ວ ວົ້ວ ເຕີ໋ຍ ມ່ຽນ.

¹⁸ ເຫວີ່ຍ ຕສຸ ເຢຍ ບົ໋ວ ເຕສ໋ຍ ດສຸ່ນ ເມີ່ຍ ບົວ, ອີ້ ຕສັ່ນ ວວມ-ເໝວີ່ຍ ຫລ່ຽວ ຈ໊ຽນ ແອ໋ງ ບົ໋ວ ດສຸ່ນ, ມ່າຍ ມ່ຽນ ທສ້ຳ ເຍີຍ ຫລາຍ ນິ່ນ ບົວ ໂຕສ໋ວ ເຍີຍ ສີ່ ເຊ ໂຕສ໋ວ ກີ​ຕູ່ ເຍີຍ ຕສຽບ ດສັ່ງ ຈ໋າ ເຍີຍ ວິນ-ວັ້ງ.

¹⁹ ມປ່າ ເຊດ ເມວີ໌ຍ ນິ່ນ ບົວ ຕສູ໊ງ ຕສຸ ໝຽດ ເຫວີ່ຍ ຕສຸ ນິ່ນ ບົວ ເຍີຍ ຕສ້ຽນ ເຊ ນິ່ນ ບົວ ກັ້ນ ເຍີຍ ກະເຊຍ. ຫອບ ຕສຸ ໄຍ້ ເຍີຍ ສີ່ ຕ໋າວ ດສ໋ວນ ນິ່ນ ບົວ ຕໍ້ ຕ້າຍ ໂຕສ໋ວ ເມ່ງ ເຕົ້າ. ນິ່ນ ບົວ ຂູງ ຮນ້ຳ ເຖົາ ປ້າມ ເກນ ເຍີຍ ເຈົ໊າ ຮນັ້ງ.

²⁰ ມປ່າ ບົວ ໂຕສ໋ວ ທິນ-ຕ້ອງ ເຍີຍ ແປະ ຝີງ ຢ່າ ຕສົ໊ວ ຈ໊ຽນ ບົວ ເຍີຍ ໂອຈ໋ວ ຕສ໊ຽວ ຢຽມ ວົ້ວ ທິນ-ຕ້ອງ ຕ້າຍ, ເຊ ຕສ໊ຽວ ເຢ​ຊູ ກີ​ຕູ່.

²¹ ນິ່ນ ອ໋ອຍ ຫລົ່ງ ນິ່ນ ເຍີຍ ຕົ້ມ ທຈະ, ຕົ້ງ ນິ່ນ ຫລົ່ງ ປຸນ ໝ່ານ ໝວດ ຢຽມ ນິ່ນ ເຍີຍ ປົ໌ວ-ເດ໊ຍ ເຍີຍ ຕົ້ມ ທຈະ, ເຕສ໊າະ ບົວ ເມົາ ໄຫ່, ໄຮ່ ໄຕ່ ເຍີຍ ຊິນ ກ໊ອຍ ຢ່ຽນ ຕສ່ຽວ ຮນັ້ງ ນິ່ນ ອຈັງ-ຫລ່າງ ເຍີຍ ຊິນ ນໍ.