เน​หะ​มี 5 - ฉบับอักษรลาว

ເນ​ຫະ​ມີ ເຖງ ມ່ຽນ ຈົ່ມ ມ່ຽນ

¹ ມ່າຍ ແປະ ຝີງ ເຖສົາ ນິ່ນ ບົວ ເຍີຍ ເອົ໊າ ທຈະ! ງົບ ນິ່ນ ບົວ ເຍີຍ ກໍ໋-ໂຢ໌ວ, ຢິວ​ໄທ ມ່ຽນ.

² ມ່າຍ ເຕີ໋ຍ ກ໊ອງ, “ເຢຍ ບົວ ເຖສົາ ເຢຍ ບົວ ເຍີຍ ຕອນ-ເຈວີ໊ຍ ນ່າມ ໂຍ໌ວ ທສ້ຳ ໄຫ່. ເຢຍ ບົວ ຖຈຽມ ຕສຸ ຕຸ໊ ຫຮນາງ ຫຍັ່ນ ເຫວີ່ຍ ຢູ໌ງ ເຢຍ ບົວ ເຍີຍ ແໝ່ງ.”

³ ມ່າຍ ເຕີ໋ຍ ກ໊ອງ, “ຫລາຍ ຫງໍ່ ຫຮນາງ, ເຢຍ ບົວ ອ໋ອຍ ຕສຸ ຕ໋ອງ ຈ໊ຽນ ເຢຍ ບົວ ເຍີຍ ລີ່ງ ເຕີ່ຍ, ອະຫງຸ່ນ ຫຮວີງ ເຖສົາ ເຢຍ ບົວ ເຍີຍ ເປຢົ໊າ ເຫວີ່ຍ ຕຸ໊ ຫຮນາງ ຫຍັ່ນ.”

⁴ ແອ໋ງ ມ່າຍ ເຕີ໋ຍ ກ໊ອງ, “ເຢຍ ບົວ ອ໋ອຍ ຕສຸ ກ໊າ ຍ່ານ ຕ້າຍ ທສວດ ລີ່ງ ເຕີ່ຍ ເຖສົາ ອະຫງຸ່ນ ຫຮວີງ ເຍີຍ ໂດສວ-ຕສິ້ນ ປຸນ ຮູ່ງ ເຕ໋ຍ.

⁵ ເຢຍ ບົວ ເຖສົາ ເຢຍ ບົວ ເຍີຍ ກໍ໋-ໂຢ໌ວ ຕົ້ງ ຝີງ ຢິວ​ໄທ ມ່ຽນ. ເຢຍ ບົວ ເຍີຍ ນ່າມ ໂຍ໌ວ ເຖສົາ ນິ່ນ ບົວ ເຍີຍ ນ່າມ ໂຍ໌ວ ຢ່າ ຟີ່ ຮນັ້ງ ເຍີຍ. ມປ່າ ເຢຍ ບົວ ອ໋ອຍ ຕສຸ ປຸນ ເຢຍ ບົວ ເຍີຍ ຕອນ, ເຢຍ ບົວ ເຍີຍ ເຊັຍ, ໂຕສ໋ວ ມ່ຽນ ເຍີຍ ໂນ່ວ. ມ່າຍ ເຕີ໋ຍ ເຢຍ ບົວ ເຍີຍ ເຊັຍ ຕສູ໊ງ ຕສຸ ໂຕສ໋ວ ໂນ່ວ ໝີ່ ອ໊ະ. ເຢຍ ບົວ ຢ່າ ໄມ້ ໄຮ່ ເຖງ ໄມ້ ຕຸ໊ ນິ່ນ ບົວ, ເຫວີ່ຍ ຕສຸ ເຢຍ ບົວ ເຍີຍ ລີ່ງ ເຕີ່ຍ ເຖສົາ ອະຫງຸ່ນ ຫຮວີງ ຕສຸ ມ່ຽນ ເຕສ໊າະ ໝີ່ ອ໊ະ.”

⁶ ເຢຍ ໄຮ໌ ນ້າຍ ເຕີ໋ຍ ມ່ຽນ ທຈະ ກ໊ອງ ເຍີຍ ຫວ່າ, ເຢຍ ເຖຈຍ ເຈ໌ຍ ໄຫ່.

⁷ ເຢຍ ຫລົງໆ ເຍີຍ ຮນ້ຳ ເຖົາ ນ້າຍ ເຕີ໋ຍ ສີ່ ຕສ່ຽວ ໂກ໋ ໂຕສ໋ວ ໂຮລ ໂຕສ໋ວ ຈຽນ ເຍີຍ ມ່ຽນ. ເຢຍ ກ໊ອງ, “ເມີ່ຍ ບົວ ເກ໊າະ-ມ່ຽນ ປູ໋ງ ແຕສ໊ະ ປຸນ ເມີ່ຍ ບົວ ຈວັ່ງ ຝີງ ເຍີຍ ກໍ໋-ໂຢ໌ວ ຢ່າ ຫລົ່ງ ເຫລີ່ຍ.” ເຢຍ ຕສ່ຽວ ເຫ່ວ ມ່ຽນ ທສ້ຳ ກັ໊ບ ຕສຸ໊ນ ເຫວີ່ຍ ເບ່ນ ຊູງ ນ້າຍ ຕິ້ວ ເຈົ໊າ.

⁸ ເຢຍ ກ໊ອງ, “ຕສິ໋ວ ເຢຍ ບົວ ໄຮ່ ໂຕສ໋ວ ຕຸ໊ ເຍີຍ, ເຢຍ ບົວ ຕສົວະ ບົວ ເຍີຍ ກໍ໋-ໂຢ໌ວ ດສ໋ວນ, ຕົ້ງ ຕສຸ ໝ່າຍ ປຸນ ຈັ໋ນ ເຍີຍ ຢິວ​ໄທ ມ່ຽນ. ຕ໋າວ ດສ໋ວນ ເມີ່ຍ ບົວ ອີ້ ຕສັ່ນ ໝ່າຍ ເມີ່ຍ ບົວ ເຍີຍ ກໍ໋-ໂຢ໌ວ ເຫວີ່ຍ ປຸນ ເຢຍ ບົວ ອ໋ອຍ ຕສຸ ຕສົວະ ດສ໋ວນ ໄມ້ ເຕສີ໌ຍ!” ນິ່ນ ບົວ ຕສ່ຽວ ເຊກໆ ເຍີຍ, ຕສູ໊ງ ລໍ໌ ໄມ້ ຕຸ໊ ຫວ່າ ເຕົາ.

⁹ ເຢຍ ແອ໋ງ ກ໊ອງ, “ເມີ່ຍ ບົວ ຮນັ້ງ ນ້າຍ ນໍ ໂຕສ໋ວ ເຊ ໄມ້ ຫອບ. ເມີ່ຍ ບົວ ໂຕສ໋ວ ສີ່ ອ໋ອຍ ຕສຸ ກ້ຳ ເດສ໋ຍ, ທ່າຍ ບົວ ເຍີຍ ທິນ-ຮູ່ງ, ເຫວີ່ຍ ເປວ ຈ໊ຽນ, ໄມ້ ປຸນ ບົວ ເຍີຍ ວິນ-ວັ້ງ ຕ້ານ ບົວ ໄມ້ ເຕສີ໌ຍ?

¹⁰ ເຢຍ ເຖສົາ ເຢຍ ເຍີຍ ກໍ໋-ໂຢ໌ວ ເຖສົາ ເຢຍ ເຍີຍ ກົງ-ມ່ຽນ ຟີ່ ຮນັ້ງ ເຍີຍ ກ໊າ ຍ່ານ ກ໊າ ເບຢົ້າ ປຸນ ບົວ ເຍີຍ ກໍ໋-ໂຢ໌ວ. ມປ່າ ອ໋ອຍ ຕສຸ ກວັ່ງ ເອຈ່ຍ, ໄມ້ ຕູ໋ງ ຫລົ່ງ ເຫລີ່ຍ.

¹¹ ອີ້ ຕສັ່ນ ອ໋ອຍ ຕສຸ ເຕສ໊າະ ນິ່ນ ບົວ ເຍີຍ ລີ່ງ ເຕີ່ຍ, ອະຫງຸ່ນ ຫຮວີງ, ກະລັ້ນ ປ໊ຽວ ຫຮວີງ ເຖສົາ ນິ່ນ ບົວ ເຍີຍ ເປຢົ໊າ ຖຸຍ ດສ໋ວນ. ລ່ຽມ ເມີ່ຍ ບົວ ຕຸ໊ ນິ່ນ ບົວ ເຍີຍ ເຫລີ່ຍ, ເຊ ຕຸ໊ ຍ່ານ, ເບຢົ້າ, ຊຢັງ-ອະຫງຸ່ນ ຕິ໊ວ ເຖສົາ ກະລັ້ນ ໂຢ້ວ ຢຽດ ແປ໊ະ ໂກ໊ວ ເຍີຍ ຢຽດ ໂກ໊ວ ຢ່າ ອ໋ອຍ ຕສຸ ຖຸຍ ດສ໋ວນ.”

¹² ໂຕສ໋ວ ໂຮລ ເຍີຍ ມ່ຽນ ກ໊ອງ, “ເຢຍ ບົວ ຕສູ໊ງ ອ໋ອຍ ຖຸຍ ດສ໋ວນ ຢ່າ ໄມ້ ເຫ່ວ ນິ່ນ ບົວ ແອ໋ງ ຈາ ທິບ ຫາຍ ຫຍູ່ງ. ເຢຍ ບົວ ເກ້ງ ຮນັ້ງ ເມີ່ຍ ກ໊ອງ ນໍ ໂຕສ໋ວ.” ເຢຍ ຕສ່ຽວ ເຫ່ວ ໄຊ ມ່ຽນ ຕ້າຍ ຢ່າ ປຸນ ໂຕສ໋ວ ໂຮລ ໂຕສ໋ວ ຈຽນ ເຍີຍ ຕສວັ໋ງ ມ່ຽນ ໂຮ້ວ ຈ໊ຽນ ກ໊ອງ ນິ່ນ ບົວ ອ໋ອຍ ຕສິ໋ວ ນິ່ນ ບົວ ແລ໌ງ ເຍີຍ ຫວ່າ ໂຕສ໋ວ.

¹³ ເຢຍ ຢ່າ ໂຊວ ເຢຍ ໄຊ ຈ໊ຽນ ວົ້ວ ຄວ້າຍ ເດຍ ຢ່າ ກ໊ອງ, “ຫາຍ ເຕົ້າ ໄມ້ ເອີຍ ຈ໊ຽນ ນ້າຍ ເຕີ໋ຍ ແລ໌ງ ເຍີຍ ຫວ່າ ໂຕສ໋ວ, ທິນ-ຮູ່ງ ອ໋ອຍ ຮນັ້ງ ນ້າຍ ນໍ ໂຊວ ວົ້ວ ເຕົ້າ ທສວດ ນິ່ນ ເຍີຍ ເປຢົ໊າ ຢ່າ ໂຊວ ຂູງ ເດສ່ງ ນິ່ນ ເຍີຍ ຈາ-ຕີ້ງ ເຍີຍ ກະນ້າຍ. ປຸນ ນ້າຍ ຫຍູ່ງ ມ່ຽນ ຕສຸ ໂຊວ ເຖົາ ຂູງ-ປົ໌ວ ແປະ ເຕສົ໋າ ເຍີຍ ມີ່ງ ອ໊ະ.” ກັ໊ບ ຕສຸ໊ນ ເຍີຍ ຕສວັ໋ງ ມ່ຽນ ກ໊ອງ, “ອາ​ເມນ,” ຢ່າ ເທສງ ຕສ໊ຽວ. ໂຕສ໋ວ ໂຮລ ໂຕສ໋ວ ຈຽນ ເຍີຍ ມ່ຽນ ຕສ່ຽວ ເອີຍ ຈ໊ຽນ ນິ່ນ ບົວ ແລ໌ງ ເຍີຍ ຫວ່າ ໂຕສ໋ວ.

¹⁴ ທສວດ ລິ໌ວ ນ້າຍ, ຢຽມ ພ້າຍ ເຢຍ ໂຕສ໋ວ ຢູ​ດາ ເຕີ່ຍ-ປູງ ເຍີຍ ແຊ້ງ-ຕສ໊ຽວ ວົ້ວ ເຕີ໋ຍ ຕສຽບ ເຫຍີ່ຍ ຫຮຍັງ ກະຍົ໌ວ, ເຊ ຢຽມ ອານ​ທາ​ເຊ​ຊີດ ໂຕສ໋ວ ຮູ່ງ ຫຍີ່ ຕສຽບ ຫຮຍັງ ເຖົາ ຟ່າ ຕສຽບ ເຫຍີ່ຍ ຫຮຍັງ ວົ້ວ ຫຮຍັງ, ລ່ຽມ ເຢຍ ລ່ຽມ ເຢຍ ເຍີຍ ກໍ໋-ໂຢ໌ວ, ໄມ້ ຫຍັ່ນ ໂຕສ໋ວ ແຊ້ງ-ຕສ໊ຽວ ຫອບ ຕສຸ ຕຸ໊ ເຍີຍ ປ່ວນ ຫຍັ່ນ ຮົບ.

¹⁵ ຢຽມ ດ່າງ ເຢຍ ວົ້ວ ເຕີ໋ຍ ແຊ້ງ-ຕສ໊ຽວ ຫ່ອຍ ແປະ ຝີງ ດາມ ເຮນ້ຍ. ໂມ໌ວ ຮນອຍ ອ໋ອຍ ຕສຸ ປຸນ ຫຍັ່ນ ຮົບ ເຖສົາ ອະຫງຸ່ນ ຕິ໊ວ ເຖສົາ ຕສຽບ ລູ໌ງ ຍ່ານ. ລ່ຽມ ນິ່ນ ບົວ ເຍີຍ ຟິ້ວ-ຈຽນ ເຖສົາ ຈ໊ຽນ ຫ່ອຍ ແປະ ຝີງ. ມປ່າ ເຢຍ ໄມ້ ຮນັ້ງ ໜ່າຍ ໂຕສ໋ວ ເຫວີ່ຍ ຕສຸ ເຢຍ ທ່າຍ ທິນ-ຮູ່ງ.

¹⁶ ຕ໋າວ ດສ໋ວນ ເຢຍ ຫລົ່ງ ທຈະ ຕສໍ່ ຕສີ້ງ ຫລາດ, ຢ່າ ໄມ້ ລໍ໌ ກັ້ນ ເຍີຍ ເດົາ-ປ່ວນ. ເຢຍ ເຍີຍ ມ່ຽນ ຢ່າ ກັ໊ບ ຕສຸ໊ນ ຢຽມ ຕສີ້ງ ຫລາດ ໂຕສ໋ວ ກົງ.

¹⁷ ໄມ້ ຕານ ບົວະ ນ້າຍ. ມ່າຍ ຢິວ​ໄທ ມ່ຽນ ເຖສົາ ຈຽນ ຢຽດ ແປ໊ະ ຮມ໌ ຕສຽບ ເຕົ້າ ເຖສົາ ເຢຍ ຈວັ່ງ ເຕ້ຍ ຫຍັ່ນ ຫຮນາງ. ຖສໍ່ ແອ໋ງ ມ່າຍ ເຕີ໋ຍ ເວີ່ຍ ກ໋ອມ ເຢຍ ບົວ ວົ້ວ ເຕີ໋ຍ ນອມໆ ກົ໊ວະ ເຍີຍ ມ່ຽນ ຕ້າຍ ເຢຍ ບົວ ນ້າຍ.

¹⁸ ຮນອຍໆ ເບ່ນ ເຍີຍ ຫຍັ່ນ ຮົບ ອ໋ອຍ ຕສຸ ມ່າຍ ຢຽດ ເຕົ້າ ງົ່ງ, ຈຸ໊ ເຕົ້າ ປະກີ ຢູ້ງ ຈຸ່ນ ເຖສົາ ໄຈ ເຖສົາ ອ໊າບ ທສ້ຳ ເຍີຍ. ໂມ໌ວ ຕສຽບ ຮນອຍ ອ໋ອຍ ຕສຸ ມ່າຍ ເຕສ໋ຍ ດົ໊ບ-ບົວະ ຫຍູ່ງໆ ອະຫງຸ່ນ ຕິ໊ວ. ໄມ້ ກຸ໊ນ ອ໋ອຍ ຕສຸ ເບ່ນ ດົ່ງ ໜ່າຍ ທສ້ຳ, ເຢຍ ຢ່າ ໄມ້ ເຫ່ວ ນິ່ນ ບົວ ທສວດ ເຢຍ ໂຕສ໋ວ ແຊ້ງ-ຕສ໊ຽວ ຫອບ ຕສຸ ຕຸ໊ ເຍີຍ ປ່ວນ, ເຫວີ່ຍ ຕສຸ ແປະ ຝີງ ຕສູ໊ງ ດາມ ເຮນ້ຍ ໄຫ່ ອ໊ະ.

¹⁹ “ໂອ ເຢຍ ເຍີຍ ທິນ-ຮູ່ງ ອ່າ, ໂທ້ ເມີ່ຍ ຈັ໋ງ ຈ໊ຽນ ເຢຍ ເຫວີ່ຍ ນ້າຍ ເຕີ໋ຍ ມ່ຽນ ໂຕສ໋ວ ເຍີຍ ຢຽດ ຕສູ໊ງ ສີ່, ປຸນ ເຢຍ ຕຸ໊ ຫລົງ.”