เน​หะ​มี 2 - ฉบับอักษรลาว

ເນ​ຫະ​ມີ ມີ່ງ ເຢ​ລູ​ຊາ​ເລມ

¹ ອານ​ທາ​ເຊ​ຊີດ ໂຕສ໋ວ ຮູ່ງ ເຕ໋ຍ ຫຍີ່ ຕສຽບ ຫຮຍັງ ວົ້ວ ຫຮຍັງ, ນິ​ສານ ຫຮລາ, ມ່າຍ ອະຫງຸ່ນ ຕິ໊ວ ເບ່ນ ຕສຢັ໋ງ ຢຽມ ຮູ່ງ ເຕ໋ຍ ເຍີຍ ດສະຮມຽນ ວົ້ວ ຕສັ່ນ, ເຢຍ ໂປ້ວ ຕິ໊ວ ປຸນ ຮູ່ງ ເຕ໋ຍ ຮົບ. ຢຽມ ຮູ່ງ ເຕ໋ຍ ເຍີຍ ດສະຮມຽນ ເຢຍ ໄມ້ ມ່າຍ ເຈ໋ຍ ຮມຽນ ເດສົ້າ.

² ຮູ່ງ ເຕ໋ຍ ຕສ່ຽວ ໜ່າຍ ເຢຍ, “ເມີ່ຍ ເຍີຍ ຮມຽນ ເຫວີ່ຍ ຫາຍ ຕິ່ວ ດົ່ງ ໜ່າຍ ເດສົ້າ? ເມີ່ຍ ໄມ້ ເຕສີ໌ຍ ປຸ໊ດ ແປ່ງ ມ່າຍ ລ່ຳ ມຸນ ຊ່າະ? ຕ໋າຍ ເມີ່ຍ ເຍີຍ ໂຮຍ້ວ ເດສົ້າ ຮນັ້ງ.” ເຢຍ ກ້ຳ ເດສ໋ຍ ໄຫ່,

³ ມປ່າ ເຢຍ ເຕົາ ຮູ່ງ ເຕ໋ຍ, “ໂທ້ ປຸນ ຮູ່ງ ເຕ໋ຍ ຕສຢັ້ງ ຕຸ໊ ໝ່ານ ຝຸຍ. ເຢຍ ຮນັ້ງ ຫາຍ ນໍ ໄມ້ ເດສົ້າ? ຕສັ໋ງ ເຢຍ ເຍີຍ ອົງ-ຖາຍ ເຍີຍ ຕສີ້ງ ເປ໋ນ ຕສີ້ງ ຮວາງ. ຕສີ້ງ ຫລາດ ເຍີຍ ແກ້ງ ຢ່າ ຕສຸ ໂຕ໌ວ ປົ໊ວ ຫວ່າຍ ເດສ່ງ.”

⁴ ຮູ່ງ ເຕ໋ຍ ຕສ່ຽວ ໜ່າຍ ເຢຍ, “ເມີ່ຍ ອ໋ອຍ ໂທ້ ຫາຍ ຫຍູ່ງ ໄຟ?” ເຢຍ ເຖສົາ ລູ່ງ ຕສັ່ງ ເຍີຍ ທິນ-ຮູ່ງ ເຕົ໋າ ເກົ໋າ,

⁵ ຢ່າ ເຕົາ ຮູ່ງ ເຕ໋ຍ, “ເຊ ກ໊ອງ ເມີ່ຍ ປວັດ ຫອບ ໂຮຍ້ວ ເຍີຍ, ຢ່າ ອະເຮນີ້ຍ ເຢຍ, ເມີ່ຍ ເຍີຍ ໂປວ ນໍ, ໂທ້ ປຸນ ເຢຍ ມີ່ງ ຢູ​ດາ ເຕີ່ຍ-ປູງ, ເຖົາ ຕສັ໋ງ ເຢຍ ເຍີຍ ອົງ-ຖາຍ ເຍີຍ ຕສີ້ງ ເຫວີ່ຍ ແອ໋ງ ຊຢັງ-ເຖສີຍ ເຈ໌ຍ ຕ້າຍ.”

⁶ ຮູ່ງ ເຕ໋ຍ ເຖສົາ ເຢຍ ກ໊ອງ ຫວ່າ ວົ້ວ ຕສັ່ນ ມ່າຍ ຮູ່ງ ໝ່າ ເຕສວີ໌ຍ ຈ໊ຽນ ນິ່ນ ເຍີຍ ກະເຮລນ. ຮູ່ງ ເຕ໋ຍ ໜ່າຍ ເຢຍ, “ເມີ່ຍ ອ໋ອຍ ມີ່ງ ດົ່ງ ຫາຍ ເລົ່າ? ຫາຍ ຕສັ່ນ ຖສີງ ດສ໋ວນ ຕ້າຍ?” ຮູ່ງ ເຕ໋ຍ ອກອຍ ເອີ໋ຍ ປຸນ ເຢຍ ມີ່ງ, ເຢຍ ຕສ່ຽວ ຕີ່ງ ຕສຢັ໋ງ ຕສຢັ້ງ ໂຫ່ ປຸນ ຮູ່ງ ເຕ໋ຍ ຮິ້ວ.

⁷ ເຢຍ ຕສ່ຽວ ບົ໋ວ ຮູ່ງ ເຕ໋ຍ, “ເຊ ກ໊ອງ ຫອບ ເມີ່ຍ ເຍີຍ ໂຮຍ້ວ ນໍ, ໂທ້ ປຸນ ເຕສີ໊ຍ ໂຊວ ເຢຍ ຕໍ້ ມີ່ງ ປຸນ ຢູ​ເຟ​ຕິດ ດ້າຍ ບະຮນອຍ ດ໊ອດ ແໝງ ເຍີຍ ແຊ້ງ-ຕສ໊ຽວ. ນິ່ນ ບົວ ຕສ່ຽວ ອກອຍ ດສຸ້ຍ ປຸນ ເຢຍ ເຈ໋ຍ ມີ່ງ ເຖົາ ຢູ​ດາ ເຕີ່ຍ-ປູງ.

⁸ ເຢຍ ແອ໋ງ ໂທ້ ເຕສີ໊ຍ ໂຊວ ປຸນ ກຸ໊ນ ຮູ່ງ ເຕ໋ຍ ເຍີຍ ດຢັ໋ງ-ຫລົ່ມ ວົ້ວ ເຕົ້າ ອາ​ສາບ, ບົ໋ວ ນິ່ນ ປຸນ ດຢັ໋ງ ເຢຍ ຫລົ່ງ ໂຕສ໋ວ ຕສົ໊ວ ຕສັ່ງ ທິນ-ຮູ່ງ ເຍີຍ ເປຢົ໊າ ເຍີຍ ລ່າວ ເຍີຍ ແກ້ງ ທຈອງ, ໂຕສ໋ວ ຕສີ້ງ ຫລາດ ຢ່າ ໂຕສ໋ວ ເຢຍ ກັ້ນ ຢຽມ ເຍີຍ ເປຢົ໊າ.” ເຫວີ່ຍ ຕສຸ ທິນ-ຮູ່ງ ເຖສົາ ເຢຍ ຢຽມ, ເຢຍ ໂທ້ ເຍີຍ ຫຍູ່ງໆ ຮູ່ງ ເຕ໋ຍ ຕສ່ຽວ ປຸນ ເຢຍ.

⁹ ເຢຍ ຕສ່ຽວ ມີ່ງ ເຖົາ ຢູ​ເຟ​ຕິດ ດ້າຍ ບະຮນອຍ ດ໊ອດ ແໝງ ເຍີຍ ແຊ້ງ-ຕສ໊ຽວ, ເຕສ໊າະ ຮູ່ງ ເຕ໋ຍ ເຍີຍ ໂຊວ ຈິວ ປຸນ ນິ່ນ ບົວ. ຮູ່ງ ເຕ໋ຍ ແອ໋ງ ພ້າຍ ເຕີ໋ຍ ແປງ-ເປຢີ໊ຍ ເຖສົາ ເກ້ ມ໌າ ແປງ ເຖສົາ ຈ໊ຽນ ເຢຍ ມີ່ງ.

¹⁰ ມປ່າ ເບດ​ໂຮ​ລົນ ຕສີ້ງ ເຍີຍ ມ່ຽນ, ສັນ​ບານ​ລັດ, ເຖສົາ ອຳ​ມົນ ມ່ຽນ ເຍີຍ ຈຽນ, ໂທ​ບີ​ອາ, ໄຮ໌ ລິ໌ວ ນ້າຍ ເຕີ໋ຍ ເຈົ໊າ-ໂຫລ່ວ, ນິ່ນ ບົວ ໄມ້ ຫອບ ໂຮຍ້ວ ຢຽດ ເຕີ໋ຍ, ເຫວີ່ຍ ຕສຸ ປວັດ ມ່າຍ ມ່ຽນ ຕ້າຍ ອ໋ອຍ ເຖງ ອິ​ສະ​ລາ​ເອນ ມ່ຽນ ຕຸ໊ ຫລົງ.

ເນ​ຫະ​ມີ ຕສ້າ ໝັ່ງ ເຢ​ລູ​ຊາ​ເລມ ເຍີຍ ຕສີ້ງ ຫລາດ

¹¹ ເຢຍ ຕສ່ຽວ ເຖົາ ເຢ​ລູ​ຊາ​ເລມ, ຮິດ ວົ້ວ ປົວ ຮນອຍ.

¹² ເຢຍ ຢ່າ ໄມ້ ບົ໋ວ ຫາຍ ເຕົ້າ ມ່ຽນ ທິນ-ຮູ່ງ ປຸນ ເຢຍ ມ່າຍ ໂຮຍ້ວ ເຫວີ່ຍ ເຢ​ລູ​ຊາ​ເລມ ຕສີ້ງ ໂຕສ໋ວ ຫາຍ ຫຍູ່ງ. ລູ່ງ ມ໌ວນ ຕສັ່ນ ມ່າຍ ອີ ເຕສ໋ຍ ເຕົ້າ ມ່ຽນ ເຖສົາ ເຢຍ ເຈ໌ຍ ຊິນ ທສວດ ມີ່ງ. ທສວດ ລິ໌ວ ເຢຍ ເກ້ ເຍີຍ ແຊງ-ຄູ້, ໄມ້ ມ່າຍ ກັ້ນ ເຕົ້າ ແຊງ-ຄູ້ ເຖສົາ ເຢຍ ມີ່ງ.

¹³ ລູ່ງ ມ໌ວນ ຕສັ່ນ ເຢຍ ຢັ້ງ ຮ໌ອງ-ແກ້ງ ວົ້ວ ເຕົ້າ ແກ້ງ ທສວດ ມີ່ງ ເຖົາ ເຮ່ຍ ຈູ໊ ວວມ-ຕສີ໊ງ, ແອ໋ງ ເຈ໋ຍ ມີ່ງ ເຖົາ ຫລະຟັບ-ດຸຍ ແກ້ງ ຕສ້າ ໝັ່ງ ເຢ​ລູ​ຊາ​ເລມ ເຍີຍ ຕສີ້ງ ຫລາດ ຕສຸ ບາງ ຫວ່າຍ ເຍີຍ ຕ໋ອງ ເຖສົາ ຕສຸ ໂຕ໌ວ ປົ໊ວ ຫວ່າຍ ເຍີຍ ຕສີ້ງ ແກ້ງ.

¹⁴ ເຢຍ ແອ໋ງ ເຈ໋ຍ ມີ່ງ ເຖົາ ວວມ-ຕສີ໊ງ ແກ້ງ ເຖສົາ ຮູ່ງ ເຕ໋ຍ ເຍີຍ ວວມ-ຕົ້ມ ມປ່າ ໄມ້ ມ່າຍ ຕ໋ອງ ປຸນ ເຢຍ ເກ້ ເຍີຍ ແຊງ-ຄູ້ ເຈ໋ຍ ຕຸ໊ ມີ່ງ.

¹⁵ ລູ່ງ ມ໌ວນ ຕສັ່ນ ເຢຍ ກັນ ຂິດ​ລົນ ຮ໌ອງ ມີ່ງ ຕສ້າ ໝັ່ງ ຕສີ້ງ ຫລາດ ຕສ່ຽວ ຕ໋າວ ຊິນ ຢັ້ງ ໂລ໌-ເຈົ໊າ ດສ໋ວນ ແອ໋ງ ກັນ ຈ໊ຽນ ຮ໌ອງ-ແກ້ງ ເປັຍ ຕສີ້ງ.

¹⁶ ໂກ໋ວ ຕສີ້ງ ເຍີຍ ຈຽນ ຢ່າ ໄມ້ ຮິ້ວ ຕຸ໊ ເຢຍ ມີ່ງ ຫາຍ ໄຟ ໂຕສ໋ວ ຫາຍ ຫຍູ່ງ. ເຢຍ ຢ່າ ໄມ້ ແກ້ງ ບົ໋ວ ຢິວ​ໄທ ມ່ຽນ, ໄຊ ມ່ຽນ, ໂຕສ໋ວ ໂຮລ ໂຕສ໋ວ ຈຽນ ເຍີຍ ມ່ຽນ, ໄຟ ຫາຍ ເຕົ້າ ອ໋ອຍ ຕສຸ ເຖງ ໂຕສ໋ວ ນ້າຍ ຫຍູ່ງ ກົງ ເຍີຍ ມ່ຽນ.

¹⁷ ເຢຍ ຕສ່ຽວ ກ໊ອງ ບົ໋ວ ນິ່ນ ບົວ ຕສວັ໋ງ ມ່ຽນ, “ເມີ່ຍ ບົວ ຕສວັ໋ງ ມ່ຽນ ປວັດ ຈ໊ຽນ ບົວ ດ໊ອດ ໜ່ານ ດົ່ງ ຫາຍ ໂຄ້ວ. ເຢ​ລູ​ຊາ​ເລມ ຕສີ້ງ ບາງ ຫວ່າຍ ໝີ່ ອ໊ະ. ຕສີ້ງ ແກ້ງ ຢ່າ ຕສຸ ໂຕ໌ວ ປົ໊ວ ຫວ່າຍ ເດສ່ງ. ຕ້າຍ ມ່າະ! ບົວ ລົ່ມ ດສ້ອຍ ເຖສີຍ ເຢ​ລູ​ຊາ​ເລມ ເຍີຍ ຕສີ້ງ ຫລາດ ເຈ໌ຍ ຕ້າຍ, ປຸນ ບົວ ໄມ້ ຕສຸ ແອ໋ງ ປ່າຍ ຮມຽນ.”

¹⁸ ເຢຍ ແອ໋ງ ກ໊ອງ ບົ໋ວ ນິ່ນ ບົວ, ທິນ-ຮູ່ງ ຮນັ້ງ ຫາຍ ນໍ ເຖສົາ ເຢຍ ຢຽມ, ເຖງ ຈ໊ຽນ ເຢຍ, ປຸນ ນິ່ນ ບົວ ຮິ້ວ ຕຸ໊ ຮູ່ງ ເຕ໋ຍ ບົ໋ວ ເຢຍ ເຍີຍ ຫວ່າ. ຕສວັ໋ງ ມ່ຽນ ກ໊ອງ, “ບົວ ລົ່ມ ດສ້ອຍ ເອຈ່ຍ ປົ໌ວ ແອ໋ງ ເຖສີຍ ເຈ໌ຍ ຕ້າຍ ມ່າະ!” ນິ່ນ ບົວ ຕສ່ຽວ ເອຈ່ຍ ປົ໌ວ ໂຕສ໋ວ ນ້າຍ ຫຍູ່ງ ຄູ້ ກົງ.

¹⁹ ເບດ​ໂຮ​ລົນ ຕສີ້ງ ເຍີຍ ມ່ຽນ, ສັນ​ບານ​ລັດ, ເຖສົາ ອຳ​ມົນ ມ່ຽນ ເຍີຍ ຈຽນ, ໂທ​ບີ​ອາ, ແອ໋ງ ເຖສົາ ອາ​ຫລັບ ມ່ຽນ, ເກ​ເຊມ, ໝວັງ ໄຮ໌ ເຢຍ ບົວ ໂຕສ໋ວ ເຍີຍ ກົງ, ນິ່ນ ບົວ ຕສ່ຽວ ຈັ໊ດ ເຢຍ ບົວ, ໝັ່ງ ເຜຍ ເຢຍ ບົວ. ນິ່ນ ບົວ ກ໊ອງ, “ເມີ່ຍ ບົວ ໜ່າຍ ໂຕສ໋ວ ຫາຍ ຫຍູ່ງ ແລ່? ເມີ່ຍ ບົວ ຟ້ານ ໂຮຍ້ວ ແຫງ່ງ ຮູ່ງ ເຕ໋ຍ ໄຟ?”

²⁰ ເຢຍ ເຕົາ ນິ່ນ ບົວ, “ລູ່ງ ຕສັ່ງ ເຍີຍ ທິນ-ຮູ່ງ ອ໋ອຍ ເຖງ ເຢຍ ບົວ ໂຕສ໋ວ ຕສຢັ໋ງ. ເຢຍ ບົວ, ນິ່ນ ເຍີຍ ໂປວ, ຕສູ໊ງ ອ໋ອຍ ເອຈ່ຍ ປົ໌ວ ເຖສີຍ ອ໊ະ. ມປ່າ ຢຽມ ເຢ​ລູ​ຊາ​ເລມ ໄມ້ ມ່າຍ ເມີ່ຍ ບົວ ເຍີຍ ປ່ວນ. ເມີ່ຍ ບົວ ຢ່າ ໄມ້ ມ່າຍ ເລີ໌ຍ ຢ່າ ໄມ້ ມ່າຍ ເມີ່ຍ ບົວ ໂລ໌-ຮນອຍ ເຍີຍ ກອນ-ປ໊ວນ.”