มัดทาย 4 - ฉบับอักษรลาวເຢຊູ ຕສຸ ມ້ຽນ ເຍີຍ ຮູ່ງ ເສີຍ (ເປີ໊ຍ ໝັ່ງ ມາໂຄ 1:12-13 ; ລູກາ 4:1-13 ) 1 ເຢຊູ ເຈ໋ຍ ລິ໌ວ ວວມ ເຍີຍ ເລີ໌ຍ, ສີງ ລີ່ງ ຕສ່ຽວ ຕໍ້ ນິ່ນ ມີ່ງ ເຕີ່ຍ-ປູງ-ຮວາງ ຕສຸ ມ້ຽນ ເຍີຍ ຮູ່ງ ເສີຍ. 2 ເຝີຍ ຕສຽບ ຮນອຍ ເຝີຍ ຕສຽບ ມ໌ວນ ເຢຊູ ເຕສີຍ ໄມ້ ຫຍັ່ນ ຫາຍ ຫຍູ່ງ, ໂຮຍ້ວ ຕສ່ຽວ ເຊຍ ອ໊ະ. 3 ມ້ຽນ ເຍີຍ ຮູ່ງ ຕສ່ຽວ ຕ້າຍ ລໍ໌ ນິ່ນ ຢ່າ ກ໊ອງ, “ເມີ່ຍ ຕສະເກ້ງ ທິນ-ຮູ່ງ ເຍີຍ ຕອນ ນໍ, ເຫ່ວ ນ້າຍ ເຕີ໋ຍ ຫລະເປຢີ໊ຍ ເປ໋ນ ອຈົ໊ວ ຕ້າຍ ມ່າະ!” 4 ເຢຊູ ເຕົາ, “ກີງ-ໂຊວ ເຟ້ຍ ຈ໊ຽນ ກ໊ອງ, ‘ມ່ຽນ ໄມ້ ເຕສີ໌ຍ ຂູງ ເຂົາ ຫຍັ່ນ ຮົບ ຢູ໌ງ ແໝ່ງ ຮນັ້ງ, ມປ່າ ອ໋ອຍ ຕສຸ ເຂົາ ທິນ-ຮູ່ງ ກ໊ອງ ເຍີຍ ໂຈ໋ວໆ ຫວ່າ.’” 5 ມ້ຽນ ເຍີຍ ຮູ່ງ ຕສ່ຽວ ຕໍ້ ເຢຊູ ມີ່ງ ທສີງ-ເດສ່ງ ເຍີຍ ຕສີ້ງ, ເຢລູຊາເລມ, ປຸນ ນິ່ນ ຢຽມ ຕສັ່ງ ທິນ-ຮູ່ງ ເຍີຍ ເປຢົ໊າ ຮລັງ ເຈ໋ຍ ເຍີຍ ຕ໋ອງ, 6 ກ໊ອງ ບົ໋ວ ນິ່ນ, “ເມີ່ຍ ຕສະເກ້ງ ທິນ-ຮູ່ງ ເຍີຍ ຕອນ ນໍ, ປິວ ເອຈ່ຍ ກ໋າ. ເຫວີ່ຍ ຕສຸ ກີງ-ໂຊວ ເຟ້ຍ ຈ໊ຽນ ກ໊ອງ, ‘ທິນ-ຮູ່ງ ອ໋ອຍ ພ້າຍ ນິ່ນ ເຍີຍ ຟິນ-ມ່ຽນ ໂກ໋ວ ຈ໊ຽນ ເມີ່ຍ. ນິ່ນ ບົວ ຕສ່ຽວ ຫລົ່ງ ປົ໌ວ ໂປ້ວ ຈ໊ຽນ ເມີ່ຍ, ໄມ້ ປຸນ ເມີ່ຍ ເຍີຍ ເຕສົ໋າ ຕສົງ ຕສຸ ຫລະເປຢີ໊ຍ.’” 7 ເຢຊູ ເຕົາ, “ມປ່າ ກີງ-ໂຊວ ຢ່າ ເຟ້ຍ ຈ໊ຽນ ກ໊ອງ, ‘ໄມ້ ຕູ໋ງ ເສີຍ ຕສ໊ຽວ, ເມີ່ຍ ເຍີຍ ທິນ-ຮູ່ງ.’” 8 ມ້ຽນ ເຍີຍ ຮູ່ງ ແອ໋ງ ຕໍ້ ເຢຊູ ຝາວ ນອມ ຮລັງ ໄຫ່ ເຍີຍ ບົງ, ປຸນ ນິ່ນ ໝັ່ງ ລູ່ງ ເດ໊ຍ ໝ່ານ ກົ໊ວະ ຢ່າ ໝັ່ງ ໝ່ານ ກົ໊ວະ ເຍີຍ ອຈັງ-ຫລ່າງ. 9 ມ້ຽນ ເຍີຍ ຮູ່ງ ກ໊ອງ, “ເຊ ກ໊ອງ ເມີ່ຍ ເກວີ່ຍ ເອຈ່ຍ ປ໋າຍ ເຢຍ, ເຢຍ ຕສ່ຽວ ເຕສ໊າະ ນ້າຍ ເຕີ໋ຍ ຢຽດ ຕສູ໊ງ ປຸນ ເມີ່ຍ.” 10 ເຢຊູ ຕສ່ຽວ ເຕົາ, “ຊາຕານ ອ້າ! ເປຢົ໋າ ອກອຍ ມ່າະ! ກີງ-ໂຊວ ເຟ້ຍ ຈ໊ຽນ ກ໊ອງ, ‘ອ໋ອຍ ຕສຸ ປ໋າຍ ຕສ໊ຽວ, ເມີ່ຍ ເຍີຍ ທິນ-ຮູ່ງ. ຂູງ ອ໋ອຍ ຕສຸ ຟູ-ສູ ນິ່ນ ດຸ ເຕົ້າ ຮນັ້ງ.’” 11 ມ້ຽນ ເຍີຍ ຮູ່ງ ຕສຢັງ ໜ່າຍ ເລີ່ຍ ອກອຍ ເຢຊູ ໝີ່ ອ໊ະ. ຟິນ-ມ່ຽນ ຕສ່ຽວ ຕ້າຍ ຫລິ່ວ ເລີ໌ຍ ເຢຊູ. ເຢຊູ ຢຽມ ກາລິລີ ແຊ້ງ ເຈ໌ຍ ກອນ ຕສຸ້ນ ໂຕ໌ (ເປີ໊ຍ ໝັ່ງ ມາໂຄ 1:14-15 ; ລູກາ 4:14-15 ) 12 ເຢຊູ ໄຮ໌ ກ໊ອງ ໂຢຮັນ ຕສຸ ຫວວນ ໂລ່, ນິ່ນ ຕສ່ຽວ ມີ່ງ ກາລິລີ ແຊ້ງ ໝີ່ ອ໊ະ. 13 ເຢຊູ ໄມ້ ຢຽມ ນາຊາເລດ ມູ້ງ, ນິ່ນ ມີ່ງ ຢຽມ ຄາເປນາອຸມ ມູ້ງ, ກາລິລີ ຄ້ອຍ-ຕອນ ເຮລນ, ເສບູລຸນ ເຖສົາ ນັບທາລີ ເຕີ່ຍ ເຍີຍ ກັ໊ບ-ຈ໋າຍ ຕ໋ອງ. 14 ຮນັ້ງ ໜ່າຍ ທສວດ ຕ້າຍ ເຊ ເຫວີ່ຍ ປຸນ ຕສິ້ນ ດ່າງ ເຖງ ທິນ-ຮູ່ງ ໂຕ່ວ ຫວ່າ ວົ້ວ ເຕົ້າ ອິສະຢາ ເຍີຍ ຫວ່າ ຕ໋ອຍ ເດສ່ງ. 15 ອິສະຢາ ກ໊ອງ, “ເສບູລຸນ ເຖສົາ ນັບທາລີ ເຕີ່ຍ, ຢຽມ ວົ້ວ ຫງ່ານ ຕສິ ຈໍແດນ ດ້າຍ, ຕົ້ງ ມີ່ງ ຄ້ອຍ ວົ້ວ ຕິ້ວ ເຈົ໊າ, ເຊ ຈັ໋ນ ຢຽມ ເຍີຍ ເຕີ່ຍ-ປູງ, ກາລິລີ. 16 ຢຽມ ຫຮມວັງ ກະຍົ໌ວ ເຍີຍ ແປະ ຝີງ, ຕສູ໊ງ ຕຸ໊ ປວັດ ຕົ້ມ ອຈັງ. ຢຽມ ຕສຸ ໄຕ່ ເຍີຍ ຕົ້ງ ລິ່ນ ກະຍົ໌ວ ວົ້ວ ເຕີ໋ຍ, ມ່າຍ ອຈັງ ທສວດ ຕ້າຍ ຕສິ໋ວ ຈ໊ຽນ ນິ່ນ ບົວ.” 17 ຢັ້ງ ນ້າຍ ມີ່ງ ເຢຊູ ເຈ໌ຍ ກອນ ຕສຸ້ນ ໂຕ໌. ນິ່ນ ກ໊ອງ, “ອ໋ອຍ ຕສຸ ກ໊ອຍ ໂຮຍ້ວ ກວັ່ງ ຕສຸ໌ຍ. ທິນ-ຮູ່ງ ຕ້າຍ ໂຕສ໋ວ ຕສ໊ຽວ ກຸ໊ນ ມ່ຽນ ເຍີຍ ຮນອຍ ເຖົາ ຟັດ ອ໊ະ.” ເຢຊູ ເຫ່ວ ເປຢີຍ ເຕົ້າ ມ່ຽນ ຕ້າຍ ໂຕສ໋ວ ໄຊ-ກໍ໋ (ເປີ໊ຍ ໝັ່ງ ມາໂຄ 1:16-20 ; ລູກາ 5:1-11 ) 18 ເຢຊູ ຢັ້ງ ເຈົ໊າ ກັນ ກາລິລີ ຄ້ອຍ-ຕອນ ເຮລນ ມີ່ງ, ປວັດ ມ່າຍ ອີ ມົ໌ວ-ຕອນ. ນິ່ນ ບົວ ໂຕສ໋ວ ເຕສ໊າະ ເບຢົ໌າ ເຍີຍ ມ່ຽນ, ຢຽມ ວົ້ວ ຄ້ອຍ ປ໌ອງ ເບຢົ໌າ. ມ່າຍ ເຕົ້າ ເຫ່ວ ຊີມົນ, ແອ໋ງ ມ່າຍ ນອມ ບົ໋ວ ເຫ່ວ ປີເຕ, ເຖສົາ ຈ໊ຽນ ນິ່ນ ເຍີຍ ໂຢ໌ວ, ອັນດາລູ. 19 ເຢຊູ ບົ໋ວ ນິ່ນ ບົວ, “ເມີ່ຍ ບົວ ຕ້າຍ ກັນ ເຢຍ ໂອ່. ເຢຍ ອ໋ອຍ ອຈ໋າວ ເມີ່ຍ ບົວ ລໍ໌ ມ່ຽນ, ຮນັ້ງ ອີ້ ຕສັ່ນ ເມີ່ຍ ບົວ ລໍ໌ ເບຢົ໌າ ນໍ.” 20 ນິ່ນ ບົວ ລ່ຽມ ເຕສີ້ຍ ກວັ່ງ ນິ່ນ ບົວ ເຍີຍ ມູ໌ງ ກັນ ຈ໊ຽນ ເຢຊູ ມີ່ງ ອ໊ະ. 21 ເຢຊູ ເຈ໋ຍ ມີ່ງ ເຕີ໋ຍ ແອ໋ງ ປວັດ ເສເບດີ ເຍີຍ ອີ ເຕົ້າ ຕອນ, ຢາກອບ ເຖສົາ ໂຢຮັນ. ນ້າຍ ເຕີ໋ຍ ອີ ມົ໌ວ ເຖສົາ ນິ່ນ ບົວ ເຍີຍ ເຕຍ ຢຽມ ວົ້ວ ດສັ໊ງ ຫລິ່ວ ເລີ໌ຍ ມູ໌ງ. ເຢຊູ ເຫ່ວ ນິ່ນ ບົວ ຕ້າຍ. 22 ນິ່ນ ບົວ ລ່ຽມ ເຕສີ້ຍ ກວັ່ງ ຈ໊ຽນ ນິ່ນ ບົວ ເຍີຍ ເຕຍ, ກວັ່ງ ຈ໊ຽນ ດສັ໊ງ, ກັນ ເຢຊູ ມີ່ງ ອ໊ະ. ເຢຊູ ຕສຸ້ນ ໂຕ໌ ຢ່າ ຕສໍ່ ແປ່ງ (ເປີ໊ຍ ໝັ່ງ ລູກາ 6:17-19 ) 23 ເຢຊູ ມີ່ງ ກ໋ອມ ກາລິລີ ແຊ້ງ, ຢຽມ ນິ່ນ ບົວ ເຍີຍ ຫວຸ່ຍ ຕ້ອງ ອຈ໋າວ ມ່ຽນ, ຢ່າ ຕສຸ້ນ ທິນ-ຮູ່ງ ໂຕສ໋ວ ຕສ໊ຽວ ກຸ໊ນ ມ່ຽນ ເຍີຍ ຄູ້ ຝຽນ. ນິ່ນ ຢ່າ ຕສໍ່ ຫລົງ ຕສວັ໋ງ ມ່ຽນ ເຍີຍ ຫຍູ່ງໆ ແປ່ງ. 24 ເຢຊູ ເຍີຍ ເມ່ງ ເຕົ້າ ຊີງ ປວັ໊ງ ຊີເລຍ ເຕີ່ຍ-ປູງ. ມ່ຽນ ຕສ່ຽວ ຕໍ້ ຢຽດ ຕສູ໊ງ ແປ່ງ ມ່ຽນ ຕ້າຍ ລໍ໌ ເຢຊູ, ເຊ ຕໍ້ ປຸ໊ດ ຫຍູ່ງໆ ແປ່ງ ເຖສົາ ຕສຸ ເຕ໊ຍ ມຸນ ເຍີຍ, ຕສຸ ມ້ຽນ ມົວະ ເຍີຍ, ປຸ໊ດ ຕູ໌ງ-ດິນ ເຍີຍ, ເຖສົາ ປຸ໊ດ ແປ່ງ-ໄບ ເຍີຍ ມ່ຽນ ຕ້າຍ. ເຢຊູ ຢ່າ ຕສໍ່ ຫລົງ ນິ່ນ ບົວ. 25 ມ່ຽນ ທສ້ຳ ໄຫ່ ກັນ ຈ໊ຽນ ເຢຊູ ມີ່ງ. ມ່າຍ ເຕີ໋ຍ ຢຽມ ກາລິລີ ແຊ້ງ, ມ່າຍ ເຕີ໋ຍ ຢຽມ ໂທດບຸລີ ແຊ້ງ, ມ່າຍ ເຕີ໋ຍ ຢຽມ ເຢລູຊາເລມ ຕສີ້ງ, ມ່າຍ ເຕີ໋ຍ ຢຽມ ຢູເດຍ ແຊ້ງ, ແອ໋ງ ມ່າຍ ເຕີ໋ຍ ຢຽມ ຈໍແດນ ດ້າຍ ເຍີຍ ຕົງ ປູງ ແໝງ ກັນ ຈ໊ຽນ ເຢຊູ ມີ່ງ. |
Mien Bible (Lao Script) © 2007 Thailand Bible Society, 2007.
Thailand Bible Society