เล​วี 3 - ฉบับอักษรลาว

ຝົ່ງ ຫໍ່ ເຕສ່ຍ ເຫວີ່ຍ ຈິວ ທົງ ເຍີຍ ເລີ໌ຍ

¹ “‘ເຊ ກ໊ອງ ມ່ຽນ ຝົ່ງ ຫໍ່ ກະນ້າຍ ເຕສ່ຍ ເຫວີ່ຍ ຈິວ ທົງ, ນິ່ນ ຢ່າ ຫລົ່ງ ຢຽມ ງົ່ງ ກວັ້ນ ເຕສ໊າະ ທສວດ ຕ້າຍ ເຍີຍ, ໄມ້ ກຸ໊ນ ງົ່ງ ໂກ໊ວ ໄຟ ເຍີ໌ຍ, ອ໋ອຍ ຕສຸ ຢຽມ ຕສ໊ຽວ ເຍີຍ ດສະຮມຽນ ຝົ່ງ ຫໍ່ ໄມ້ ຫວ່າຍ ຝັງ ເຍີຍ ແຊງ-ຄູ້.

² ອ໋ອຍ ຕສຸ ຕໍ້ ປົ໌ວ ມານ ຈ໊ຽນ ນິ່ນ ເຕສ່ຍ ວົ້ວ ເຕົ້າ ແຊງ-ຄູ້ ເຍີຍ ມອກ໊ອງ, ຢຽມ ຫວຸ່ຍ ປວັ້ງ ດົ໊ບ-ລິ່ວ ເຍີຍ ແກ້ງ ດ່າງ ໄຕ໋. ອາ​ລົນ ເຍີຍ ຕອນ, ໄຊ ມ່ຽນ ບົວ, ຕສ່ຽວ ເຕສ໊າະ ດສຢ໊າມ ຕ້າຍ ພຽດ ຮວີງ ກ໋ອມ ເຕສ່ຍ-ຕ້ອງ ເປຢີຍ ປູງ.

³ ຢຽມ ນ້າຍ ເຕີ໋ຍ ເຕສ່ຍ ເຫວີ່ຍ ຈິວ ທົງ ເຍີຍ ກະນ້າຍ, ນິ່ນ ອ໋ອຍ ຕສຸ ເຕສ໊າະ ເຕີ໋ຍ ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່ ປຸນ ຕສ໊ຽວ. ອ໋ອຍ ຕສຸ ເຕສ໊າະ ຢຽມ ໂຮຍ້ວ ເຍີຍ ເຮມີຍ ເຖສົາ ຢຽດ ຕສູ໊ງ ແທສະ-ຈ້າງ ເຮມີຍ,

⁴ ເຖສົາ ອີ ນອມ ຫຍຸດ ເຕສີ໊ຍ, ເຖສົາ ແນດ ຫຍຸດ ເຕສີ໊ຍ ເຍີຍ ປັ໊ນ ໂຢ້ວ. ປວັງ ຈ໊ຽນ ຮລັນ ເຍີຍ ອໍ໊-ບຢ໌ອງ ຢ່າ ອ໋ອຍ ຕສຸ ເຖສົາ ຫຍຸດ ເຕສີ໊ຍ ເຕສ໊າະ ທສວດ.

⁵ ອາ​ລົນ ເຍີຍ ຕອນ ຕສ່ຽວ ເຕສ໊າະ ນ້າຍ ປົ໊ວະ ກະນ້າຍ ອັນ ເຕສ່ຍ-ຕ້ອງ, ປົ໊ວ ເຕສ່ຍ ເຍີຍ ກະນ້າຍ ກູ້ ຫງວ່າຍ. ປົ໊ວ ເຕສ່ຍ ເຍີຍ ກະນ້າຍ ຢຽມ ເຕສັຍ ຈ໊ຽນ ໂຕ໌ວ ເຍີຍ ຕສ້າງ ກູ້ ຫງວ່າຍ. ນ້າຍ ເຊ ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່ ເຍີຍ ກະນ້າຍ, ເວີ່ຍ ດາງ ເຍີຍ ເຖຈຍ ຫອບ ຕສ໊ຽວ ເຍີຍ ໂຮຍ້ວ.

⁶ “‘ເຊ ກ໊ອງ ຕໍ້ ຢຽມ ປະກີ ຢູ້ງ ໄຟ ຢູ້ງ ກວັ້ນ ເຍີຍ ແຊງ-ຄູ້ ຕ້າຍ ເຕສ່ຍ ປຸນ ຕສ໊ຽວ ເຫວີ່ຍ ຈິວ ທົງ, ອ໋ອຍ ຕສຸ ຕໍ້ ໄມ້ ຫວ່າຍ ຝັງ ເຍີຍ ປະກີ ຢູ້ງ ໄຟ ຢູ້ງ, ໄມ້ ກຸ໊ນ ໂກ໊ວ ໄຟ ເຍີ໌ຍ.

⁷ ນິ່ນ ຫລົ່ງ ເຕົ້າ ປະກີ ຢູ້ງ ຕອນ ເຕສ່ຍ ນໍ, ອ໋ອຍ ຕສຸ ຕໍ້ ມີ່ງ ຢຽມ ຕສ໊ຽວ ເຍີຍ ດສະຮມຽນ.

⁸ ອ໋ອຍ ຕສຸ ຕໍ້ ປົ໌ວ ມານ ຈ໊ຽນ ນິ່ນ ເຕສ່ຍ ວົ້ວ ເຕົ້າ ແຊງ-ຄູ້ ເຍີຍ ມອກ໊ອງ, ຢຽມ ຫວຸ່ຍ ປວັ້ງ ດົ໊ບ-ລິ່ວ ເຍີຍ ແກ້ງ ດ່າງ ໄຕ໋. ອາ​ລົນ ເຍີຍ ຕອນ ບົວ ຕສ່ຽວ ເຕສ໊າະ ດສຢ໊າມ ພຽດ ຮວີງ ກ໋ອມ ເຕສ່ຍ-ຕ້ອງ ເປຢີຍ ປູງ.

⁹ ຢຽມ ນ້າຍ ເຕີ໋ຍ ເຕສ່ຍ ເຫວີ່ຍ ຈິວ ທົງ ເຍີຍ ກະນ້າຍ ອ໋ອຍ ຕສຸ ຕໍ້ ເຕີ໋ຍ ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່ ປຸນ ຕສ໊ຽວ. ອ໋ອຍ ຕສຸ ຕໍ້ ຢຽດ ຕສູ໊ງ ເຮມີຍ, ຈຸ່ນ ເຍີຍ ເຕວີ໊ຍ ກ໊າດ ເຖົາ ກອນ, ກ໊າດ ເຖົາ ຕິ ຕ໌ານ ເມວີ໌ຍ-ບູ໊ງ, ເຖສົາ ຢຽດ ຕສູ໊ງ ຢຽມ ໂຮຍ້ວ ເຍີຍ ເຮມີຍ, ລ່ຽມ ແທສະ-ຈ້າງ ເຮມີຍ,

¹⁰ ອີ ນອມ ຫຍຸດ ເຕສີ໊ຍ ເຖສົາ ແນດ ຫຍຸດ ເຕສີ໊ຍ ເຍີຍ ປັ໊ນ ໂຢ້ວ. ປວັງ ຈ໊ຽນ ຮລັນ ເຍີຍ ອໍ໊-ບຢ໌ອງ ຢ່າ ອ໋ອຍ ຕສຸ ເຖສົາ ຈ໊ຽນ ຫຍຸດ ເຕສີ໊ຍ ເຕສ໊າະ ທສວດ.

¹¹ ໄຊ ມ່ຽນ ຕສ່ຽວ ອັນ ເຕສ່ຍ-ຕ້ອງ ກູ້ ຫງວ່າຍ ຫລົ່ງ ໂຕ໌ວ ປົ໊ວ ເຕສ່ຍ ໂຕສ໋ວ ຫຍັ່ນ ເຍີຍ ກະນ້າຍ ຝົ່ງ ຫໍ່ ປຸນ ຕສ໊ຽວ.

¹² “‘ເຊ ກ໊ອງ ມ່ຽນ ເຕສ່ຍ ເຍີຍ ກະນ້າຍ ເຊ ຢູ້ງ, ອ໋ອຍ ຕສຸ ຕໍ້ ຕ້າຍ ຢຽມ ຕສ໊ຽວ ເຍີຍ ດສະຮມຽນ ຝົ່ງ ຫໍ່.

¹³ ອ໋ອຍ ຕສຸ ຕໍ້ ປົ໌ວ ມານ ຈ໊ຽນ ຢູ້ງ ເຍີຍ ມອກ໊ອງ, ຢຽມ ຫວຸ່ຍ ປວັ້ງ ດົ໊ບ-ລິ່ວ ເຍີຍ ແກ້ງ ດ່າງ ໄຕ໋. ອາ​ລົນ ເຍີຍ ຕອນ ບົວ ຕສ່ຽວ ເຕສ໊າະ ດສຢ໊າມ ພຽດ ເຕສ່ຍ-ຕ້ອງ ເປຢີຍ ປູງ.

¹⁴ ຢຽມ ນິ່ນ ຝົ່ງ ຫໍ່ ເຍີຍ ຢູ້ງ ອ໋ອຍ ຕສຸ ເຕສ໊າະ ເຕີ໋ຍ ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່ ປຸນ ຕສ໊ຽວ. ອ໋ອຍ ຕສຸ ເຕສ໊າະ ຢຽດ ຕສູ໊ງ ຢຽມ ໂຮຍ້ວ ເຍີຍ ເຮມີຍ, ລ່ຽມ ແທສະ-ຈ້າງ ເຮມີຍ,

¹⁵ ອີ ນອມ ຫຍຸດ ເຕສີ໊ຍ ເຖສົາ ແນດ ຫຍຸດ ເຕສີ໊ຍ ເຍີຍ ປັ໊ນ ໂຢ້ວ. ປວັງ ຈ໊ຽນ ຮລັນ ເຍີຍ ອໍ໊-ບຢ໌ອງ ຢ່າ ອ໋ອຍ ຕສຸ ເຖສົາ ຈ໊ຽນ ຫຍຸດ ເຕສີ໊ຍ ເຕສ໊າະ ທສວດ.

¹⁶ ໄຊ ມ່ຽນ ຕສ່ຽວ ອັນ ເຕສ່ຍ-ຕ້ອງ ກູ້ ຫງວ່າຍ ຫລົ່ງ ໂຕ໌ວ ປົ໊ວ ເຕສ່ຍ ໂຕສ໋ວ ຫຍັ່ນ ເຍີຍ ກະນ້າຍ ຝົ່ງ ຫໍ່ ປຸນ ຕສ໊ຽວ ເວີ່ຍ ດາງ ເຍີຍ ເຖຈຍ. ເຮມີຍ ຢຽດ ຕສູ໊ງ ເປ໋ນ ຕສ໊ຽວ ເຍີຍ.

¹⁷ “‘ໄມ້ ກຸ໊ນ ເມີ່ຍ ບົວ ຢຽມ ຫາຍ, ໄມ້ ຕູ໋ງ ຫຍັ່ນ ເຮມີຍ ໄຟ ດສຢ໊າມ. ນ້າຍ ເຊ ເມີ່ຍ ບົວ ຕ່ອຍ ເຈ໋ຍ ຕ່ອຍ, ຢຽດ ລິ໌ວ ອ໋ອຍ ຕສຸ ກັນ ເຍີຍ ເລີ໌ຍ.’”