เล​วี 22 - ฉบับอักษรลาว

ເຕສ່ຍ ເຍີຍ ທສີງ-ເດສ່ງ ກະນ້າຍ

¹ ຕສ໊ຽວ ກ໊ອງ ບົ໋ວ ໂມ​ເຊ,

² “ອ໋ອຍ ຕສຸ ບົ໋ວ ອາ​ລົນ ເຖສົາ ນິ່ນ ເຍີຍ ຕອນ ບົວ, ‘ຟິ ຫລົງ ອິ​ສະ​ລາ​ເອນ ມ່ຽນ ຝູງ ປຸນ ເຢຍ ເຍີຍ ທສີງ-ເດສ່ງ ກະນ້າຍ, ເຫວີ່ຍ ໄມ້ ປ່າຍ ເຢຍ ເຍີຍ ທສີງ-ເດສ່ງ ບົ໋ວ. ເຢຍ ເຊ ຕສ໊ຽວ. ’

³ “ອ໋ອຍ ຕສຸ ບົ໋ວ ນິ່ນ ບົວ, ‘ຕ່ອຍ ເຈ໋ຍ ຕ່ອຍ, ເຊ ກ໊ອງ ເມີ່ຍ ບົວ ເຍີຍ ຫາຍ ເຕົ້າ ເຕສີ໊ຍ-ຟຸນ ມ່າຍ ຫວຸຍ ເຍີຍ ຕສຢັ້ງ ໂຫ່ ຕ້າຍ ຟັດ ອິ​ສະ​ລາ​ເອນ ມ່ຽນ ຝູງ ປຸນ ຕສ໊ຽວ ເຍີຍ ທສີງ-ເດສ່ງ ກະນ້າຍ, ວົ້ວ ເຕົ້າ ອ໋ອຍ ຕສຸ ໄພ ກວັ່ງ, ໄມ້ ຕຸ໊ ຢຽມ ເຢຍ ເຍີຍ ດສະຮມຽນ. ເຢຍ ເຊ ຕສ໊ຽວ.

⁴ “‘ຕະຟ່ານ ອາ​ລົນ ເຍີຍ ຫາຍ ເຕົ້າ ເຕສີ໊ຍ-ຟຸນ ປຸ໊ດ ກົ້ມ ຮູ້ ແປ່ງ ໄຟ ຊິນ ມ່າຍ ກະນ້າຍ ທສວດ ເຍີຍ, ນິ່ນ ໄມ້ ຕູ໋ງ ຫຍັ່ນ ທສີງ-ເດສ່ງ ກະນ້າຍ. ຕສົ໊ວ ເຖົາ ນິ່ນ ທສີງ-ເດສ່ງ ຖສີງ ຫຍັ່ນ ຕຸ໊. ຫາຍ ເຕົ້າ ມົວະ ຕສຸ ມ່າຍ ຫວຸຍ ເຍີຍ ກະນ້າຍ ຕສ່ຽວ ມ່າຍ ຫວຸຍ. ເຊ ມົວະ ຕສຸ ຈັ໋ນ-ໄຕ່, ໄຟ ມົວະ ຕສຸ ໄຈ໋-ໜົ່ງ ທສວດ ເຍີຍ ມ່ຽນ,

⁵ ໄຟ ມົວະ ຕສຸ ຫາຍ ຫຍູ່ງ ຍອງ ເດົາ ໄຮ່ ປຸນ ນິ່ນ ມ່າຍ ຫວຸຍ ເຍີຍ ກະນ້າຍ, ໄຟ ມົວະ ຕສຸ ຫາຍ ເຕົ້າ ໄມ້ ທສີງ-ເດສ່ງ ເຍີຍ ມ່ຽນ ໄມ້ ກຸ໊ນ ວົ້ວ ເຕົ້າ ມ່າຍ ຫາຍ ຫຍູ່ງ ຫວຸຍ.

⁶ ຫາຍ ເຕົ້າ ມົວະ ຕສຸ ນ້າຍ ເຕີ໋ຍ ຫາຍ ຫຍູ່ງ ກະນ້າຍ ຕສ່ຽວ ມ່າຍ ຫວຸຍ ເຖົາ ຫຮມວັງ. ນິ່ນ ໄມ້ ຕູ໋ງ ຫຍັ່ນ ຝົ່ງ ຫໍ່ ເຍີຍ ທສີງ-ເດສ່ງ ກະນ້າຍ. ອ໋ອຍ ຕສຸ ຫລົ່ງ ວວມ ດສ໋າວ ຊິນ ດ່າງ.

⁷ ເຖົາ ບະຮນອຍ ມວດ ເຍີຍ ຕສຢັ້ງ ໂຫ່ ນິ່ນ ທສີງ-ເດສ່ງ ໝີ່ ອ໊ະ. ອກະຮ້າ ຫຍັ່ນ ນ້າຍ ເຕີ໋ຍ ກະນ້າຍ ຕຸ໊ ເຍີຍ ເຫວີ່ຍ ຕສຸ ນ້າຍ ເຊ ນິ່ນ ເຍີຍ ຫຍັ່ນ ຮົບ.

⁸ ໄມ້ ຕູ໋ງ ຫຍັ່ນ ນິ່ນ ກັ້ນ ໄຕ່ ເຍີຍ ກະນ້າຍ ໄຟ ຕສຸ ເຮ່ຍ ຕສ້ອຍ ຫງາດ ໄຕ່ ເຍີຍ ກະນ້າຍ ຕສ່ຽວ ຕສຸ ມ່າຍ ຫວຸຍ. ເຢຍ ເຊ ຕສ໊ຽວ.

⁹ “‘ໄຊ ມ່ຽນ ອ໋ອຍ ຕສຸ ເອີຍ ຈ໊ຽນ ເຢຍ ຕີ່ງ ຕ້າຍ ເຍີຍ ເລີ໌ຍ-ເຫຍີ່ຍ ໂຕສ໋ວ. ໄມ້ ເຕສີຍ ແອ໊ະ, ເດສ໋ຍ ນິ່ນ ບົວ ອ໋ອຍ ຕສຸ ດາມ ຕສຸ໌ຍ ຕສ່ຽວ ຕສຸ ໄຕ່ ເຫວີ່ຍ ຕສຸ ໄມ້ ເອີຍ ຈ໊ຽນ ນ້າຍ ເຕີ໋ຍ ເລີ໌ຍ. ເຢຍ ເຊ ຕສ໊ຽວ, ຕົ້ງ ປຸນ ນິ່ນ ບົວ ທສີງ-ເດສ່ງ ວົ້ວ ເຕົ້າ.

¹⁰ “‘ຂູງ ໄຊ ມ່ຽນ ເຍີຍ ຮມວັ້ງ ຕ່ອຍ ໄຮ່ ຫຍັ່ນ ຝົ່ງ ຫໍ່ ເຍີຍ ທສີງ-ເດສ່ງ ກະນ້າຍ. ກັ້ນ ເຕົ້າ ໄມ້ ຄູ່ ຫຍັ່ນ. ຕີ້ງ ໄຊ ມ່ຽນ ເຍີຍ ເປຢົ໊າ ເຍີຍ ແຄະ ມ່ຽນ ໄຟ ທສີ້ງ ຕ້າຍ ເຍີຍ ກົງ-ມ່ຽນ ໄມ້ ຄູ່ ຫຍັ່ນ.

¹¹ ມປ່າ ເຊ ກ໊ອງ ໄຊ ມ່ຽນ ຫລົ່ງ ຍ່ານ ມ໌າຍ ໂນ່ວ ໄຟ ຢຽມ ນິ່ນ ເຍີຍ ເປຢົ໊າ ທສວດ ເສີຍ ເຍີຍ ມ່ຽນ, ຫຍັ່ນ ນ້າຍ ເຕີ໋ຍ ກະນ້າຍ ຕຸ໊ ເຍີຍ.

¹² ເຊ ກ໊ອງ ໄຊ ມ່ຽນ ເຍີຍ ເຊັຍ ຕອງ ຈາ, ໄມ້ ເຕສີ໌ຍ ຫລົ່ງ ໂຕສ໋ວ ໄຊ ເຍີຍ ມ່ຽນ, ນິ່ນ ໄມ້ ຄູ່ ຫຍັ່ນ ຝົ່ງ ຫໍ່ ເຍີຍ ທສີງ-ເດສ່ງ ກະນ້າຍ.

¹³ ມປ່າ ເຊ ກ໊ອງ ໄຊ ມ່ຽນ ເຍີຍ ເຊັຍ ກວ໊າ ມີ່ງ ໄຟ ເລີ່ຍ ມີ່ງ ຢ່າ ໄມ້ ມ່າຍ ຝຸຈ໊ວຍ, ແອ໋ງ ດສ໋ວນ ຕ້າຍ ຢຽມ ນິ່ນ ເຍີຍ ເຕຍ ເຍີຍ ເປຢົ໊າ ຮນັ້ງ ຫລຸນ ເຍີຍ ຕສຢັ້ງ ໂຫ່ ນໍ, ຕສ່ຽວ ຫຍັ່ນ ນິ່ນ ເຍີຍ ເຕຍ ເຍີຍ ຫຍັ່ນ ຮົບ ຕຸ໊ ເຍີຍ. ມປ່າ ກະເຫຍ່ຍ ເຍີຍ ມ່ຽນ ໄມ້ ຄູ່ ຫຍັ່ນ.

¹⁴ “‘ເຊ ກ໊ອງ ຫາຍ ເຕົ້າ ທສະ-ໂປ່ວ ຫຍັ່ນ ຝົ່ງ ຫໍ່ ເຍີຍ ທສີງ-ເດສ່ງ ກະນ້າຍ, ນິ່ນ ອ໋ອຍ ຕສຸ ຈ໊າວ ຊູງ ນິ່ນ ຫຍັ່ນ ເຍີຍ ແອ໋ງ ປຸ້ຍ ປຢາ ໂກ໊ວ ເຍີຍ ຢຽດ ໂກ໊ວ, ຢ່າ ເຕສ໊າະ ນ້າຍ ເຕີ໋ຍ ທສີງ-ເດສ່ງ ກະນ້າຍ ຝູງ ປຸນ ໄຊ ມ່ຽນ.

¹⁵ ໄຊ ມ່ຽນ ໄມ້ ຕູ໋ງ ປຸນ ອິ​ສະ​ລາ​ເອນ ມ່ຽນ ຝົ່ງ ຫໍ່ ປຸນ ຕສ໊ຽວ ເຍີຍ ທສີງ-ເດສ່ງ ກະນ້າຍ ມ່າຍ ຫວຸຍ.

¹⁶ ຫລາຍ ຫຍັ່ນ ຕ່ອງ ນ້າຍ ເຕີ໋ຍ ທສີງ-ເດສ່ງ ກະນ້າຍ, ນິ່ນ ບົວ ຕສ່ຽວ ຕສຸ ດາມ-ຕອງ ຕີ່ງ ຕສຸ໌ຍ. ເຢຍ ເຊ ຕສ໊ຽວ, ຕົ້ງ ປຸນ ນິ່ນ ບົວ ທສີງ-ເດສ່ງ ວົ້ວ ເຕົ້າ.’”

ຕສ໊ຽວ ໄມ້ ຕສິ໊ບ ເຍີຍ ກະນ້າຍ

¹⁷ ຕສ໊ຽວ ກ໊ອງ ບົ໋ວ ໂມ​ເຊ,

¹⁸ “ອ໋ອຍ ຕສຸ ບົ໋ວ ອາ​ລົນ ເຖສົາ ນິ່ນ ເຍີຍ ຕອນ ເຖສົາ ອິ​ສະ​ລາ​ເອນ ເຍີຍ ຕສວັ໋ງ ມ່ຽນ, ‘ຕະຟ່ານ ເມີ່ຍ ບົວ ຫາຍ ເຕົ້າ ອິ​ສະ​ລາ​ເອນ ມ່ຽນ ໄຟ ຢຽມ ອິ​ສະ​ລາ​ເອນ ເຕີ່ຍ-ປູງ ເຍີຍ ກັ້ນ ຝີງ ມ່ຽນ, ຕໍ້ ກະນ້າຍ ຕ້າຍ ຝົ່ງ ຫໍ່ ປົ໊ວ ເຕສ່ຍ ປຸນ ຕສ໊ຽວ, ໄມ້ ກຸ໊ນ ເຫວີ່ຍ ຈ໊າວ ຊູງ ແລ໌ງ ເຍີຍ ແຫງ່ງ ຫວ່າ ໄຟ ທສວດ ຟິມ ຝົ່ງ ຫໍ່ ເຕສ່ຍ,

¹⁹ ອ໋ອຍ ຕສຸ ຕໍ້ ເຕົ້າ ໄມ້ ຫວ່າຍ ຝັງ ເຍີຍ ງົ່ງ ໂກ໊ວ ໄຟ ປະກີ ຢູ້ງ ໂກ໊ວ ໄຟ ຢູ້ງ ໂກ໊ວ, ຕສ໊ຽວ ຖສີງ ຕ້າຍ ຕສິ໊ບ.

²⁰ ໄມ້ ຕູ໋ງ ຕໍ້ ຫາຍ ຫຍູ່ງ ຫວ່າຍ ຝັງ ເຍີຍ, ເຫວີ່ຍ ຕສຸ ຕສ໊ຽວ ໄມ້ ຕສິ໊ບ ເມີ່ຍ ບົວ ເຍີຍ.

²¹ ຫາຍ ເຕົ້າ ຕໍ້ ຢຽມ ງົ່ງ ກວັ້ນ, ຢູ້ງ ກວັ້ນ ໄຟ ປະກີ ຢູ້ງ ກວັ້ນ ເຍີຍ ແຊງ-ຄູ້ ຕ້າຍ ເຕສ່ຍ ປຸນ ຕສ໊ຽວ ເຫວີ່ຍ ຈິວ ທົງ, ໄຟ ຈ໊າວ ຊູງ ແລ໌ງ ເຍີຍ ແຫງ່ງ ຫວ່າ, ໄຟ ທສວດ ຟິມ ຝົ່ງ ຫໍ່, ອ໋ອຍ ຕສຸ ຕໍ້ ໄມ້ ຫວ່າຍ ຝັງ ຢ່າ ໄມ້ ມ່າຍ ຕ໋ອງ ເອກ້ມ ເຍີຍ ແຊງ-ຄູ້, ຕສ໊ຽວ ຖສີງ ຕ້າຍ ຕສິ໊ບ.

²² ໄມ້ ຕູ໋ງ ຕໍ້ ມຕສີງ ແມ່ງ ເຍີຍ, ຕສຸ ມຸນ ຊຢັງ ເຍີຍ, ປົ໌ວ-ເຕສົ໋າ ຫວ່າຍ ເຍີຍ, ມ່າຍ ກະນ້າຍ ຫລ່ຽວ ທສວດ ເຍີຍ, ປຸ໊ດ ຟາງ ປຸ໊ດ ຫລາຍ ເຍີຍ ແຊງ-ຄູ້ ຝົ່ງ ຫໍ່ ປຸນ ຕສ໊ຽວ. ໄມ້ ຕູ໋ງ ເຕສ໊າະ ນ້າຍ ເຕີ໋ຍ ຫາຍ ຫຍູ່ງ ອັນ ເຕສ່ຍ-ຕ້ອງ ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່ ປຸນ ຕສ໊ຽວ.

²³ ເຊ ກ໊ອງ ຕໍ້ ຕສຢັ້ງ ຕ້າຍ ຫວ່າຍ ເຕີ໋ຍ ຝັງ ໄຟ ຍັ້ນ ເຍີຍ ງົ່ງ ໄຟ ປະກີ ຢູ້ງ ຕອນ ທສວດ ຟິມ ເຕສ່ຍ ຕຸ໊ ເຍີຍ. ມປ່າ ເຊ ກ໊ອງ ເຕສ່ຍ ເຫວີ່ຍ ຈ໊າວ ຊູງ ແລ໌ງ ເຍີຍ ແຫງ່ງ ຫວ່າ, ຕສ໊ຽວ ໄມ້ ຕສິ໊ບ.

²⁴ ໄມ້ ຕູ໋ງ ຫລົ່ງ ໄຈ໋-ດຸ້ຍ ຝາວ ດສຢ໊າມ ເຍີຍ, ໄຟ ດີ້ງ ເຍີຍ, ໄຟ ກະນ້າຍ ເປ໊ດ ຕສຸ ເຍີຍ, ໄຟ ຜາຍ ໄຈ໋-ດຸ້ຍ ເຍີຍ ແຊງ-ຄູ້ ຝົ່ງ ຫໍ່ ປຸນ ຕສ໊ຽວ. ຢຽມ ເມີ່ຍ ບົວ ເຍີຍ ເຕີ່ຍ-ປູງ ໄມ້ ຕູ໋ງ ຮນັ້ງ ນ້າຍ ໂຕສ໋ວ.

²⁵ ຢ່າ ໄມ້ ຕູ໋ງ ຫລົ່ງ ຢຽມ ຈັ໋ນ ຕຸ໊ ຕ້າຍ ເຍີຍ ນ້າຍ ປົ໊ວະ ແຊງ-ຄູ້ ຝົ່ງ ຫໍ່ ໂຕສ໋ວ ເມີ່ຍ ບົວ ເຍີຍ ທິນ-ຮູ່ງ ເຍີຍ ຫຍັ່ນ ຮົບ. ນ້າຍ ຫຍູ່ງ ແຊງ-ຄູ້ ຫວ່າຍ ຝັງ, ມ່າຍ ຕ໋ອງ ເອກ້ມ ເຍີຍ, ຕສ໊ຽວ ຕສ່ຽວ ໄມ້ ຕສິ໊ບ.’”

²⁶ ຕສ໊ຽວ ກ໊ອງ ບົ໋ວ ໂມ​ເຊ,

²⁷ “ງົ່ງ ໄຟ ປະກີ ຢູ້ງ ໄຟ ຢູ້ງ ຫາຍ ຕສັ່ນ ເອຈ່ຍ ຕອນ ຕ້າຍ, ຕອນ ອ໋ອຍ ຕສຸ ເຖສົາ ມາ ຢຽມ ເສ່ຍ ຮນອຍ. ຢຽມ ຕະເປ໊ດ ຮນອຍ ຝາວ ແໝງ ໂຕສ໋ວ ເຕສ່ຍ ເຍີຍ ກະນ້າຍ ຕຸ໊ ເຍີຍ, ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່ ປຸນ ຕສ໊ຽວ, ຕສ໊ຽວ ອະເຮນີ້ຍ ຕສິ໊ບ.

²⁸ ໄມ້ ກຸ໊ນ ງົ່ງ ເຍີ໌ຍ ໄຟ ປະກີ ຢູ້ງ ເຍີ໌ຍ, ໄມ້ ຕູ໋ງ ເຖສົາ ນິ່ນ ເຍີຍ ຕອນ ຕົ້ງ ຮນອຍ ໄຕ໋.

²⁹ “ຕໍ້ ກະນ້າຍ ມີ່ງ ເຕສ່ຍ ເຫວີ່ຍ ແລ໌ງ ຕສີ້ງ ຕສ໊ຽວ, ອ໋ອຍ ຕສຸ ໂຕສ໋ວ ຫອບ ເລີ໌ຍ ເຫວີ່ຍ ປຸນ ຕສ໊ຽວ ອະເຮນີ້ຍ.

³⁰ ຕົ້ງ ວົ້ວ ຮນອຍ ອ໋ອຍ ຕສຸ ຫຍັ່ນ ເຖົາ ເດສ່ງ, ໄມ້ ຕູ໋ງ ລ່ຽວ ຢຽດ ເຕີ໋ຍ ເຖົາ ຕະເຫຍີ່ຍ ດອມ. ເຢຍ ເຊ ຕສ໊ຽວ.

³¹ “ເມີ່ຍ ບົວ ອ໋ອຍ ຕສຸ ກັນ ຫລົງ ເຢຍ ບົ໋ວ ເຍີຍ ຫວ່າ ຢ່າ ເອີຍ ຈ໊ຽນ ໂຕສ໋ວ. ເຢຍ ເຊ ຕສ໊ຽວ.

³² ໄມ້ ຕູ໋ງ ປ່າຍ ເຢຍ ເຍີຍ ທສີງ-ເດສ່ງ ບົ໋ວ. ຢຽມ ອິ​ສະ​ລາ​ເອນ ມ່ຽນ ບຸດົ໋ງ ອ໋ອຍ ຕສຸ ທ່າຍ ເຢຍ ທສີງ-ເດສ່ງ. ເຢຍ ເຊ ຕສ໊ຽວ, ຕົ້ງ ປຸນ ເມີ່ຍ ບົວ ທສີງ-ເດສ່ງ

³³ ຢ່າ ຕໍ້ ເມີ່ຍ ບົວ ຢຽມ ອີ​ຢິ໊ບ ເຕີ່ຍ-ປູງ ທສວດ ຕ້າຍ ເຫວີ່ຍ ໂຕສ໋ວ ເມີ່ຍ ບົວ ເຍີຍ ທິນ-ຮູ່ງ ວົ້ວ ເຕົ້າ. ເຢຍ ເຊ ຕສ໊ຽວ. ”