เล​วี 20 - ฉบับอักษรลาว

ຕສຸ ຕີ່ງ ຕສຸ໌ຍ ເຍີຍ ເລີ໌ຍ

¹ ຕສ໊ຽວ ກ໊ອງ ບົ໋ວ ໂມ​ເຊ,

² “ອ໋ອຍ ຕສຸ ບົ໋ວ ອິ​ສະ​ລາ​ເອນ ມ່ຽນ, ‘ຕະຟ່ານ ອິ​ສະ​ລາ​ເອນ ມ່ຽນ, ໄຟ ຢຽມ ອິ​ສະ​ລາ​ເອນ ເຕີ່ຍ-ປູງ ເຍີຍ ກັ້ນ ຝີງ ມ່ຽນ, ຫາຍ ເຕົ້າ ເຕສ໊າະ ກັ້ນ ເຍີຍ ຝຸຈ໊ວຍ ຝູງ ປຸນ ໂມ​ເລກ ຕສ້ຽນ, ຕສູ໊ງ ອ໋ອຍ ຕສຸ ເຕສ໊າະ ວົ້ວ ເຕົ້າ ໄຕ໋ ໄຕ່. ຕສວັ໋ງ ແປະ ຝີງ ອ໋ອຍ ຕສຸ ເຕສ໊າະ ຫລະເປຢີ໊ຍ ຕສົງ ໄຕ່ ນິ່ນ.

³ ເຢຍ ກັ້ນ ຢ່າ ອ໋ອຍ ບ໊ຽນ ຮມຽນ ປຸນ ວົ້ວ ເຕົ້າ ຢ່າ ປຸນ ນິ່ນ ຢຽມ ນິ່ນ ເຍີຍ ມ່ຽນ ບຸດົ໋ງ ຕສຸ ໄພ ກວັ່ງ, ເຫວີ່ຍ ຕສຸ ນິ່ນ ເຕສ໊າະ ເຕົ້າ ນິ່ນ ເຍີຍ ຝຸຈ໊ວຍ ຝູງ ປຸນ ໂມ​ເລກ ຕສ້ຽນ, ຕສ່ຽວ ໂຕສ໋ວ ປຸນ ເຢຍ ເຍີຍ ສີງ ຕິ່ນ ມ່າຍ ຫວຸຍ ຢ່າ ປ່າຍ ເຢຍ ເຍີຍ ທສີງ-ເດສ່ງ ບົ໋ວ.

⁴ ວົ້ວ ເຕົ້າ ມ່ຽນ ເຕສ໊າະ ເຕົ້າ ນິ່ນ ເຍີຍ ຝຸຈ໊ວຍ ຝູງ ປຸນ ໂມ​ເລກ ຕສ້ຽນ ວົ້ວ ຕສັ່ນ, ເຊ ກ໊ອງ ປ໊ວນ-ເຕີ່ຍ ແປະ ຝີງ ຮນັ້ງ ອຈິ໊ບ ຈ໊ຽນ ມຕສີງ ໄມ້ ປວັດ ນໍ, ຢ່າ ໄມ້ ຕສົງ ໄຕ່ ນິ່ນ,

⁵ ເຢຍ ກັ້ນ ອ໋ອຍ ບ໊ຽນ ຮມຽນ ປຸນ ວົ້ວ ເຕົ້າ ເຖສົາ ນິ່ນ ເຍີຍ ຮມວັ້ງ ຕ່ອຍ ຢ່າ ປຸນ ນິ່ນ ຢຽມ ນິ່ນ ເຍີຍ ມ່ຽນ ບຸດົ໋ງ ຕສຸ ໄພ ກວັ່ງ, ລ່ຽມ ເຖສົາ ນິ່ນ ມ່າຍ ເຮ່ຍ ໂຮຍ້ວ ກັນ ໂມ​ເລກ ຕສ້ຽນ ວົ້ວ ເຕີ໋ຍ.

⁶ “‘ເຊ ກ໊ອງ ຫາຍ ເຕົ້າ ມີ່ງ ລໍ໌ ມ່ຽນ ເຖງ ກ໊ານ ເຮີຍ ໄຟ ໂບ໊ວ ກວ໋າ, ເຊ ຮນັ້ງ ມ່າຍ ເຮ່ຍ ໂຮຍ້ວ ເຍີຍ ມ່ຽນ ນໍ. ເຢຍ ອ໋ອຍ ບ໊ຽນ ຮມຽນ ປຸນ ວົ້ວ ເຕົ້າ, ຢ່າ ປຸນ ນິ່ນ ຢຽມ ນິ່ນ ເຍີຍ ມ່ຽນ ບຸດົ໋ງ ຕສຸ ໄພ ກວັ່ງ.

⁷ “‘ອ໋ອຍ ຕສຸ ສາ ກັ້ນ ທສີງ-ເດສ່ງ ຕ້າຍ, ເຫວີ່ຍ ຕສຸ ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ.

⁸ ອ໋ອຍ ຕສຸ ກັນ ຫລົງ ເຢຍ ເຍີຍ ຫລີ່ງ, ເອີຍ ຈ໊ຽນ ໂຕສ໋ວ ເດສ່ງ. ເຢຍ ເຊ ຕສ໊ຽວ, ຕົ້ງ ປຸນ ເມີ່ຍ ບົວ ທສີງ-ເດສ່ງ ວົ້ວ ເຕົ້າ.

⁹ “‘ເຊ ກ໊ອງ ຫາຍ ເຕົ້າ ຕສ໋ຽວ ນິ່ນ ເຍີຍ ເຕຍ ໄຟ ມາ, ອ໋ອຍ ຕສຸ ເຕສ໊າະ ວົ້ວ ເຕົ້າ ໄຕ໋ ໄຕ່. ນິ່ນ ຕສ໋ຽວ ເຕຍ ໄຟ ມາ, ນິ່ນ ກັ້ນ ອ໋ອຍ ຕສຸ ດາມ ກັ້ນ ເຍີຍ ຕສຸ໌ຍ.

¹⁰ “‘ເຊ ກ໊ອງ ມ່ຽນ ຫຮຢຽນ ກັ້ນ ເຕົ້າ ມ່ຽນ ເຍີຍ ເອົ໊າ, ຕສູ໊ງ ອ໋ອຍ ຕສຸ ປຸນ ນິ່ນ ບົວ ອີ ເຕົ້າ ຕສຸ ໄຕ່.

¹¹ “‘ເຊ ກ໊ອງ ມ່ຽນ ເປວີ໋ຍ ກັ້ນ ເຍີຍ ເຕຍ ເຍີຍ ເອົ໊າ ຕສ່ຽວ ປ່າຍ ນິ່ນ ເຍີຍ ເຕຍ. ຕສູ໊ງ ອ໋ອຍ ຕສຸ ເຕສ໊າະ ນິ່ນ ບົວ ອີ ເຕົ້າ ໄຕ໋ ໄຕ່. ນິ່ນ ບົວ ກັ້ນ ອ໋ອຍ ຕສຸ ດາມ ກັ້ນ ເຍີຍ ຕສຸ໌ຍ.

¹² “‘ເຊ ກ໊ອງ ມ່ຽນ ເປວີ໋ຍ ກັ້ນ ເຍີຍ ບວັ໌ງ, ຕສູ໊ງ ອ໋ອຍ ຕສຸ ເຕສ໊າະ ນິ່ນ ບົວ ອີ ເຕົ້າ ໄຕ໋ ໄຕ່. ນິ່ນ ບົວ ໂຕສ໋ວ ໄມ້ ຫລວນ ຫ່ອງ ເຍີຍ ສີ່. ນິ່ນ ບົວ ກັ້ນ ອ໋ອຍ ຕສຸ ດາມ ກັ້ນ ເຍີຍ ຕສຸ໌ຍ.

¹³ “‘ເຊ ກ໊ອງ ມຈັ່ງ ຕອນ ເປວີ໋ຍ ມຈັ່ງ ຕອນ ຕ໋ອງ ມເຊັຍ ຕອນ, ນິ່ນ ບົວ ໂຕສ໋ວ ເຍີຍ ເຊ ກ້ຳ ເດສ໊ຍ ເຍີຍ ສີ່. ຕສູ໊ງ ອ໋ອຍ ຕສຸ ເຕສ໊າະ ນິ່ນ ບົວ ອີ ເຕົ້າ ໄຕ໋ ໄຕ່. ນິ່ນ ບົວ ກັ້ນ ອ໋ອຍ ຕສຸ ດາມ ກັ້ນ ເຍີຍ ຕສຸ໌ຍ.

¹⁴ “‘ເຊ ກ໊ອງ ມ່ຽນ ຫລົ່ງ ອີ ເຊັຍ-ໝ່າ ໂຕສ໋ວ ເອົ໊າ ເຊ ຫວ່າຍ ໄຫ່ ເຍີຍ ສີ່. ຕສູ໊ງ ອ໋ອຍ ຕສຸ ເຕສ໊າະ ນິ່ນ ບົວ ປົວ ເຕົ້າ ຫລົ່ງ ໂຕ໌ວ ປົ໊ວ ໄຕ່ ເຫວີ່ຍ ໄມ້ ປຸນ ຫວ່າຍ ສີ່ ຢຽມ ເມີ່ຍ ບົວ ບຸດົ໋ງ.

¹⁵ “‘ເຊ ກ໊ອງ ຫາຍ ເຕົ້າ ມຈັ່ງ ຕອນ ຫຮຢຽນ ແຊງ-ຄູ້, ອ໋ອຍ ຕສຸ ເຕສ໊າະ ນິ່ນ ໄຕ໋ ໄຕ່. ຢ່າ ອ໋ອຍ ຕສຸ ເຕສ໊າະ ວົ້ວ ເຕົ້າ ແຊງ-ຄູ້ ໄຕ໋.

¹⁶ “‘ເຊ ກ໊ອງ ຫາຍ ເຕົ້າ ມເຊັຍ ຕອນ ຕໍ້ ກັ້ນ ປຸນ ແຊງ-ຄູ້ ແຊງ, ອ໋ອຍ ຕສຸ ລ່ຽມ ມເຊັຍ ຕອນ, ລ່ຽມ ແຊງ-ຄູ້ ໄຕ໋ ໄຕ່. ອີ ເຕົ້າ ຕສູ໊ງ ອ໋ອຍ ຕສຸ ໄຕ໋ ກວັ່ງ. ນິ່ນ ບົວ ກັ້ນ ອ໋ອຍ ຕສຸ ດາມ ກັ້ນ ເຍີຍ ຕສຸ໌ຍ.

¹⁷ “‘ເຊ ກ໊ອງ ຫາຍ ເຕົ້າ ຫລົ່ງ ກັ້ນ ເຍີຍ ຕໍ່ ໄຟ ໝົ່ວ, ໄມ້ ກຸ໊ນ ເຊ ເຕຍ ເຍີຍ ເຊັຍ ໄຟ ມາ ເຍີຍ ເຊັຍ, ຕອງ ຈາ, ຈວັ່ງ ຕ໋ອງ ເປວີ໋ຍ, ເຊ ໄຍ້ ໄຫ່ ເຍີຍ ສີ່. ນິ່ນ ບົວ ອ໋ອຍ ຕສຸ ຕອງ ຈ໊ຽນ ນິ່ນ ບົວ ເຍີຍ ມ່ຽນ ຕສຸ ໄພ ກວັ່ງ. ວົ້ວ ເຕົ້າ ມຈັ່ງ ຕອນ ປ່າຍ ກັ້ນ ເຍີຍ ຕໍ່ ໄຟ ໝົ່ວ ຕສ່ຽວ ອ໋ອຍ ຕສຸ ດາມ ກັ້ນ ເຍີຍ ຕສຸ໌ຍ.

¹⁸ “‘ເຊ ກ໊ອງ ຫາຍ ເຕົ້າ ມຈັ່ງ ຕອນ ເປວີ໋ຍ ມເຊັຍ ຕອນ ຕ໋ອຍ ມ່າຍ ຊິນ-ຢ່ຽນ ເຍີຍ ຕສຢັ້ງ ໂຫ່, ອ໋ອຍ ຕສຸ ປຸນ ນິ່ນ ບົວ ອີ ເຕົ້າ ຢຽມ ກັ້ນ ເຍີຍ ມ່ຽນ ບຸດົ໋ງ ຕສຸ ໄພ ກວັ່ງ, ເຫວີ່ຍ ຕສຸ ນິ່ນ ບົວ ຕ່ອງ ທສີງ-ເດສ່ງ ເຍີຍ ເລີ໌ຍ ປຸນ ກັ້ນ ມ່າຍ ຫວຸຍ.

¹⁹ “‘ໄມ້ ຕູ໋ງ ເປວີ໋ຍ ເມີ່ຍ ເຍີຍ ໂກວ-ໝ່າ ໄຟ ມົ໌ວ-ໝ່າ ໄຟ ຕໍ່ ເຕີ້ຍ ໄຟ ເດສ໌ຍ-ໝ່າ. ຮນັ້ງ ນ້າຍ ໂຕສ໋ວ ເຊ ປ່າຍ ຕສຸ ຈວັ່ງ ດສຢ໊າມ-ເຟີຍ ເຍີຍ ທສຽນ-ເທສະ. ນິ່ນ ບົວ ອີ ເຕົ້າ ຕສູ໊ງ ອ໋ອຍ ຕສຸ ດາມ ກັ້ນ ເຍີຍ ຕສຸ໌ຍ.

²⁰ “‘ເຊ ກ໊ອງ ຫາຍ ເຕົ້າ ມຈັ່ງ ຕອນ ເປວີ໋ຍ ຈົ້ວ ໝ່າ ໄຟ ເດສ໌ຍ-ໝ່າ ໄຟ ຕົ້ມ ມຢັ່ງ ໝ່າ ໄຟ ມຢັ່ງ ໝ່າ ຕສ່ຽວ ປ່າຍ ຕສຸ ນິ່ນ ເຍີຍ ແປ໊ະ-ເຕ໋ຍ ໄຟ ໂຢ໌ວ-ເຕ໋ຍ ໄຟ ຕົ້ມ ເນົ໌າ-ເຕ໋ຍ ໄຟ ເນົ໌າ-ເຕ໋ຍ. ນິ່ນ ບົວ ອີ ເຕົ້າ ອ໋ອຍ ຕສຸ ດາມ ກັ້ນ ເຍີຍ ຕສຸ໌ຍ. ເຖົາ ໄຕ່ ນິ່ນ ບົວ ຢ່າ ໄມ້ ໄຮ່ ມ່າຍ ຝຸຈ໊ວຍ.

²¹ “‘ເຊ ກ໊ອງ ຫາຍ ເຕົ້າ ມຈັ່ງ ຕອນ ຫລົ່ງ ມົ໌ວ-ຕ່ອຍ ເຍີຍ ເອົ໊າ, ນ້າຍ ເຊ ໂຕສ໋ວ ໄມ້ ທສີງ-ເດສ່ງ ເຍີຍ ສີ່, ປ່າຍ ຕສຸ ນິ່ນ ເຍີຍ ມົ໌ວ-ຕ່ອຍ. ນິ່ນ ບົວ ຕສ່ຽວ ໄມ້ ໄຮ່ ມ່າຍ ຝຸຈ໊ວຍ.

²² “‘ອ໋ອຍ ຕສຸ ກັນ ຫລົງ ເຢຍ ເຍີຍ ຢຽດ ຕສູ໊ງ ຫລີ່ງ ເຖສົາ ຕິ້ວໆ ເລີ໌ຍ, ຢ່າ ເອີຍ ຈ໊ຽນ ໂຕສ໋ວ, ເຫວີ່ຍ ປຸນ ຕົ້ງ ເຢຍ ອີ້ ຕສັ່ນ ຕໍ້ ເມີ່ຍ ບົວ ມີ່ງ ຢຽມ ວົ້ວ ນອມ ເຕີ່ຍ-ປູງ ໄມ້ ໂລ້ ເມີ່ຍ ບົວ ທສວດ.

²³ ຢ່າ ໄມ້ ຕູ໋ງ ກັນ ຢຽມ ວົ້ວ ນອມ ເຕີ່ຍ-ປູງ ເຍີຍ ມ່ຽນ ເຍີຍ ເລີ໌ຍ, ຕົ້ງ ເຢຍ ອ໋ອຍ ຕສຸ່ນ ທສວດ ເມີ່ຍ ບົວ ວົ້ວ ດ່າງ ແໝງ ເຍີຍ ຝີງໆ ມ່ຽນ ເຍີຍ ເລີ໌ຍ. ຫລາຍ ນິ່ນ ບົວ ໂຕສ໋ວ ນ້າຍ ເຕີ໋ຍ ຢຽດ ຕສູ໊ງ ສີ່ ເຢຍ ໂຢ໋ວ! ໄຫ່ ນິ່ນ ບົວ.

²⁴ ມປ່າ ເຢຍ ບົ໋ວ ເຈ໋ຍ ເມີ່ຍ ບົວ, “ເຢຍ ອ໋ອຍ ເຕສ໊າະ ນ້າຍ ນອມ ເຕີ່ຍ-ປູງ ຈິວ ປຸນ ເມີ່ຍ ບົວ, ໂຕສ໋ວ ເປ໋ນ ເມີ່ຍ ບົວ ດສິບ ເຍີຍ ເຕີ່ຍ-ປູງ, ເຊ ເດົາ-ໂທ້ວ ຫລົງ ເຍີຍ ເຕີ່ຍ-ປູງ.” ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຊ ຢຽມ ໝ່ານ ຝີງ ກິ໊ນ ເມີ່ຍ ບົວ ທສວດ ຕ້າຍ ວົ້ວ ເຕົ້າ.

²⁵ “‘ເຫວີ່ຍ ນ້າຍ ເມີ່ຍ ບົວ ອ໋ອຍ ຕສຸ ເຕສ໊າະ ມ່າຍ ຫວຸຍ ເຖສົາ ໄມ້ ມ່າຍ ຫວຸຍ ເຍີຍ ແຊງ-ຄູ້ ປຸນ ອກອຍ, ມ່າຍ ຫວຸຍ ເຖສົາ ໄມ້ ມ່າຍ ຫວຸຍ ເຍີຍ ເໜາະ. ຢ່າ ໄມ້ ຕູ໋ງ ຫລາຍ ເຢຍ ກິ໊ນ ທສວດ ມ່າຍ ຫວຸຍ ເຍີຍ ແຊງ-ຄູ້ ໄຟ ເໜາະ ໄຟ ຍອງ ເດົາ ເຍີຍ ກະນ້າຍ ປຸນ ກັ້ນ ມ່າຍ ຫວຸຍ.

²⁶ ເມີ່ຍ ບົວ ອ໋ອຍ ຕສຸ ເຫວີ່ຍ ເຢຍ ທສີງ-ເດສ່ງ, ເຫວີ່ຍ ຕສຸ ເຢຍ, ຕສ໊ຽວ, ເຊ ທສີງ-ເດສ່ງ ເຍີຍ, ຢ່າ ຢຽມ ໝ່ານ ຝີງ ກິ໊ນ ເມີ່ຍ ບົວ ທສວດ ຕ້າຍ ເປ໋ນ ເຢຍ ເຍີຍ ແປະ ຝີງ.

²⁷ “‘ໄມ້ ກຸ໊ນ ມຈັ່ງ ມເຊັຍ, ເມີ່ຍ ບົວ ຫາຍ ເຕົ້າ ເຖງ ມ່ຽນ ກ໊ານ ເຮີຍ ໄຟ ໂບ໊ວ ກວ໋າ, ຕສູ໊ງ ອ໋ອຍ ຕສຸ ປຸນ ນິ່ນ ບົວ ຕສຸ ໄຕ່. ອ໋ອຍ ຕສຸ ຫລົ່ງ ຫລະເປຢີ໊ຍ ຕສົງ ໄຕ່. ນິ່ນ ບົວ ກັ້ນ ເຍີຍ ຕສຸ໌ຍ ນິ່ນ ບົວ ກັ້ນ ອ໋ອຍ ຕສຸ ດາມ-ຕອງ.’”