เล​วี 12 - ฉบับอักษรลาว

ມເຊັຍ ຕອນ ຢູ໌ງ ກູ້ ງວ໌າ ສາ ຫວຸຍ ເຍີຍ ເລີ໌ຍ

¹ ຕສ໊ຽວ ກ໊ອງ ບົ໋ວ ໂມ​ເຊ,

² “ອ໋ອຍ ຕສຸ ບົ໋ວ ອິ​ສະ​ລາ​ເອນ ມ່ຽນ, ‘ເຊ ກ໊ອງ ຫາຍ ເຕົ້າ ມເຊັຍ ຕອນ ມ່າຍ ກູ້ ງວ໌າ, ຢູ໌ງ ຕຸ໊ ເຕົ້າ ຕອນ, ວົ້ວ ເຕົ້າ ມເຊັຍ ຕອນ ມ່າຍ ຫວຸຍ ເສ່ຍ ຮນອຍ ຮນັ້ງ ຊິນ-ຢ່ຽນ ເຍີຍ ຮນອຍ-ເຫຍັຍ ມ່າຍ ຫວຸຍ ວົ້ວ ນໍ.

³ ເຖົາ ຕະເປ໊ດ ວົ້ວ ຮນອຍ, ອ໋ອຍ ຕສຸ ເຖງ ວົ້ວ ເຕົ້າ ກູ້ ງວ໌າ-ຕອນ ເຈ໋ຍ ກ໊າດ ເຍີຍ ເລີ໌ຍ.

⁴ ມເຊັຍ ຕອນ ຖສໍ່ ອ໋ອຍ ຕສຸ ແອ໋ງ ຕສົ໊ວ ຟ່າ ຕສຽບ ຟາມ ຮນອຍ ຖສີງ ຕ້າຍ ໄຮ່ ສາ ເດສ່ງ ຢູ໌ງ ກູ້ ງວ໌າ ທສວດ ດສຢ໊າມ ເຍີຍ ຫວຸຍ. ນິ່ນ ຢ່າ ໄມ້ ຕູ໋ງ ມົວະ ຕສຸ ຫາຍ ຫຍູ່ງ ທສີງ-ເດສ່ງ ເຍີຍ ກະນ້າຍ. ຢ່າ ໄມ້ ຕູ໋ງ ເປັຍ ຕສັ່ງ ທິນ-ຮູ່ງ ເຍີຍ ດົ໊ບ-ລິ່ວ. ຕສົ໊ວ ເຖົາ ຢູ໌ງ ກູ້ ງວ໌າ ທສວດ ດສຢ໊າມ ມ່າຍ ຫວຸຍ ເຍີຍ ຮນອຍ-ເຫຍັຍ ປວັ໊ງ.

⁵ ມປ່າ ຢູ໌ງ ຕຸ໊ ກູ້ ງວ໌າ-ເຊັຍ ນໍ, ຕສ່ຽວ ມ່າຍ ຫວຸຍ ອີ ນອມ ເລີ໌ຍ-ປ໋າຍ, ຮນັ້ງ ຊິນ-ຢ່ຽນ ເຍີຍ ຮນອຍ-ເຫຍັຍ ມ່າຍ ຫວຸຍ ວົ້ວ ນໍ. ອ໋ອຍ ຕສຸ ແອ໋ງ ຕສົ໊ວ ຫລົວະ ຕສຽບ ຫລົວະ ຮນອຍ ເຖົາ ຢູ໌ງ ກູ້ ງວ໌າ ທສວດ ດສຢ໊າມ ມ່າຍ ຫວຸຍ ເຍີຍ ຮນອຍ-ເຫຍັຍ ປວັ໊ງ.

⁶ “‘ເຖົາ ສາ ຫວຸຍ ເຍີຍ ຮນອຍ-ເຫຍັຍ ປວັ໊ງ, ໄມ້ ກຸ໊ນ ຢູ໌ງ ຕຸ໊ ຕອນ ໄຟ ເຊັຍ, ນິ່ນ ອ໋ອຍ ຕສຸ ຕໍ້ ເຕົ້າ ຕ໋ອຍ ຫຮຍັງ ເຍີຍ ປະກີ ຢູ້ງ ຕອນ ໂຕສ໋ວ ປົ໊ວ ເຕສ່ຍ ຝົ່ງ ຫໍ່ ເຍີຍ ກະນ້າຍ. ຢ່າ ອ໋ອຍ ຕສຸ ຕໍ້ ນອມ ແປະ ກົ໊ບ ຫລຸນ ໄຟ ຢຽດ ນອມ ເໜາະ ໂອກ ເຕສ່ຍ ເຫວີ່ຍ ຟິ ຕສຸ໌ຍ. ອ໋ອຍ ຕສຸ ຕໍ້ ເຖົາ ຫວຸ່ຍ ປວັ້ງ ດົ໊ບ-ລິ່ວ ເຍີຍ ແກ້ງ ດ່າງ ຈິວ ປຸນ ໄຊ ມ່ຽນ.

⁷ ໄຊ ມ່ຽນ ຕສ່ຽວ ຕໍ້ ນ້າຍ ເຕີ໋ຍ ກະນ້າຍ ຢຽມ ຕສ໊ຽວ ເຍີຍ ດສະຮມຽນ ເຕສ່ຍ ເຖງ ນິ່ນ ສາ ເດສ່ງ ຢູ໌ງ ກູ້ ງວ໌າ ທສວດ ດສຢ໊າມ ເຍີຍ ຫວຸຍ. ນ້າຍ ເຊ ມເຊັຍ ຕອນ ຢູ໌ງ ກູ້ ງວ໌າ ເຍີຍ ເລີ໌ຍ ໄມ້ ກຸ໊ນ ຢູ໌ງ ຕອນ ໄຟ ເຊັຍ.

⁸ ເຊ ກ໊ອງ ນິ່ນ ໄມ້ ມ່າຍ ຍ່ານ ມ໌າຍ ຢຽດ ເຕົ້າ ປະກີ ຢູ້ງ ຕອນ, ນິ່ນ ອ໋ອຍ ຕສຸ ຕໍ້ ອີ ນອມ ເໜາະ ໂອກ ໄຟ ອີ ນອມ ແປະ ກົ໊ບ ຫລຸນ. ຫລົ່ງ ນອມ ໂຕສ໋ວ ປົ໊ວ ເຕສ່ຍ ຝົ່ງ ຫໍ່ ເຍີຍ ກະນ້າຍ. ແອ໋ງ ຫລົ່ງ ນອມ ຟິ ຕສຸ໌ຍ, ປຸນ ໄຊ ມ່ຽນ ເຖງ ນິ່ນ ສາ ຫວຸຍ. ນິ່ນ ຕສ່ຽວ ທສີງ-ເດສ່ງ ໝີ່ ອ໊ະ.’”