เล​วี 11 - ฉบับอักษรลาว

ມ່າຍ ຫວຸຍ ເຖສົາ ໄມ້ ມ່າຍ ຫວຸຍ ເຍີຍ ແຊງ-ຄູ້

¹ ຕສ໊ຽວ ກ໊ອງ ບົ໋ວ ໂມ​ເຊ ເຖສົາ ອາ​ລົນ,

² “ອ໋ອຍ ຕສຸ ບົ໋ວ ອິ​ສະ​ລາ​ເອນ ມ່ຽນ, ‘ຢຽມ ເດົາ-ເປີ້ຍ ເຍີຍ ແຊງ-ຄູ້ ຢຽດ ຕສູ໊ງ, ເຊ ຕົ້ງ ນ້າຍ ເຕີ໋ຍ ເມີ່ຍ ບົວ ຫຍັ່ນ ຕຸ໊ ເຍີຍ.

³ ຕະຟ່ານ ເຕີ້ຍ ບ໋າຍ ເປ໋ນ ອີ ເຫຮລງ ຢ່າ ຟານ ໂທສ້ ເຍີຍ ແຊງ-ຄູ້, ຫຍັ່ນ ຕຸ໊ ເຍີຍ.

⁴ “‘ມ່າຍ ເຕີ໋ຍ ເຕີ້ຍ ບ໋າຍ ມປ່າ ໄມ້ ຟານ ໂທສ້, ຕສ່ຽວ ໄມ້ ຕູ໋ງ ຫຍັ່ນ. ລໍ່ ທໍ່ ຟານ ໂທສ້ ມປ່າ ເຕີ້ຍ ໄມ້ ບ໋າຍ ຕສ່ຽວ ເຫວີ່ຍ ເມີ່ຍ ບົວ ມ່າຍ ຫວຸຍ ໝີ່ ອ໊ະ.

⁵ ຢຽມ ຫລະເປຢີ໊ຍ ເຍີຍ ຕົ້ມ ນ໌າວ ຟານ ໂທສ້ ເຍີຍ ມປ່າ ໄມ້ ມ່າຍ ເຕີ້ຍ ບ໋າຍ ຕສ່ຽວ ເຫວີ່ຍ ເມີ່ຍ ບົວ ມ່າຍ ຫວຸຍ.

⁶ ໂຖວ ຟານ ໂທສ້ ເຍີຍ ມປ່າ ໄມ້ ມ່າຍ ເຕີ້ຍ ບ໋າຍ, ຕສ່ຽວ ເຫວີ່ຍ ເມີ່ຍ ບົວ ມ່າຍ ຫວຸຍ.

⁷ ໄມ້ ກຸ໊ນ ຕູ໌ງ ມ່າຍ ເຕີ້ຍ ບ໋າຍ ໂຕສ໋ວ ອີ ເຫຮລງ ມປ່າ ໄມ້ ຟານ ໂທສ້ ຕສ່ຽວ ເຫວີ່ຍ ເມີ່ຍ ບົວ ມ່າຍ ຫວຸຍ.

⁸ ນ້າຍ ປົ໊ວະ ກະນ້າຍ ເຍີຍ ອໍ໊ ໄມ້ ຕູ໋ງ ຫຍັ່ນ. ລ່ຽມ ໄຕ່ ເຍີຍ ຢ່າ ໄມ້ ຕູ໋ງ ມົວະ ຕສຸ. ນ້າຍ ເຊ ເຫວີ່ຍ ເມີ່ຍ ບົວ ມ່າຍ ຫວຸຍ ອ໊ະ.

⁹ “‘ຢຽມ ວວມ ມ່າຍ ແໝ່ງ ເຍີຍ ກະນ້າຍ, ໄມ້ ກຸ໊ນ ຢຽມ ຄ້ອຍ ໄຟ ໂດ໊ະ, ຕະຟ່ານ ມ່າຍ ດ໊າດ ມ່າຍ ເຈ໋ຍ ເຍີຍ, ຫຍັ່ນ ຕຸ໊ ເຍີຍ.

¹⁰ ໄມ້ ກຸ໊ນ ຢຽມ ຄ້ອຍ ຢຽມ ໂດ໊ະ, ຫຍູ່ງໆ ຢຽມ ວວມ ມ່າຍ ແໝ່ງ ເຍີຍ, ຕົ໌ງ ເຍີຍ ກະນ້າຍ, ຕະຟ່ານ ໄມ້ ມ່າຍ ດ໊າດ ໄມ້ ມ່າຍ ເຈ໋ຍ ເຍີຍ, ເມີ່ຍ ບົວ ອ໋ອຍ ຕສຸ ກ້ຳ ເດສ໊ຍ ອ໊ະ.

¹¹ ເມີ່ຍ ບົວ ອ໋ອຍ ຕສຸ ກ້ຳ ເດສ໊ຍ ນ້າຍ ປົ໊ວະ ກະນ້າຍ, ຕສ່ຽວ ໄມ້ ຕູ໋ງ ຫຍັ່ນ ນິ່ນ ບົວ ເຍີຍ ອໍ໊. ລ່ຽມ ໄຕ່ ເຍີຍ ຢ່າ ອ໋ອຍ ຕສຸ ກ້ຳ ເດສ໊ຍ.

¹² ຕະຟ່ານ ຢຽມ ວວມ ມ່າຍ ແໝ່ງ ເຍີຍ ກະນ້າຍ ໄມ້ ມ່າຍ ດ໊າດ, ໄມ້ ມ່າຍ ເຈ໋ຍ, ເຊ ເຫວີ່ຍ ເມີ່ຍ ບົວ ເປ໋ນ ກ້ຳ ເດສ໊ຍ ເຍີຍ ກະນ້າຍ.

¹³ “‘ນ້າຍ ເຊ ເມີ່ຍ ບົວ ອ໋ອຍ ຕສຸ ກ້ຳ ເດສ໊ຍ ເຍີຍ ເໜາະ. ໄມ້ ຕູ໋ງ ຫຍັ່ນ ເຫວີ່ຍ ຕສຸ ນິ່ນ ບົວ ກ້ຳ ເດສ໊ຍ ເຍີຍ. ມ່າຍ ຕົ້ມ ຈ໊າງ, ຕົ້ມ ຈ໊າງ-ງົ່ງ, ຕົ້ມ ຈ໊າງ-ບົ໊ວ,

¹⁴ ຕົ້ມ ຈ໊າງ-ເຕວີ໊ຍ-ດ໊າວ, ຫຍູ່ງໆ ຕົ້ມ ຈ໊າງ-ເຈັ໊ຍ,

¹⁵ ຫຍູ່ງໆ ເໜາະ ອາ,

¹⁶ ເໜາະ ລໍ່ ທໍ່, ເໜາະ ກູ໊ ລົງ ເປນ, ເໜາະ ໂອກ ວວມ, ຫຍູ່ງໆ ຕົ້ມ ຈ໊າງ-ເໜາະ ໂອກ,

¹⁷ ເໜາະ ມລົ່ມ, ເໜາະ ອ໊າບ, ແຊງ-ກວັດ,

¹⁸ ເໜາະ ກູ໊ ລົງ ແປະ, ເໜາະ ແປະ ເຫາະ, ຕົ້ມ ຈ໊າງ-ຢັ້ງ,

¹⁹ ເໜາະ ເຍ່ຍ, ເຕສ໋ຍ ຫຍູ່ງ ເໜາະ ກະສາ, ເໜາະ ຟາມ-ທສີງ, ເຖສົາ ບະບຸຍ.

²⁰ “‘ຕະຟ່ານ ມ່າຍ ດ໊າດ, ມ່າຍ ເປຢີຍ ເຈັ໊ຍ ເຕສົ໋າ ຍອງ ເຍີຍ ແກງ ເຊ ເຫວີ່ຍ ເມີ່ຍ ບົວ ເປ໋ນ ກ້ຳ ເດສ໊ຍ ເຍີຍ ກະນ້າຍ.

²¹ ມປ່າ ມ່າຍ ເຕີ໋ຍ ມ່າຍ ດ໊າດ ຢ່າ ມ່າຍ ເປຢີຍ ເຈັ໊ຍ ເຕສົ໋າ ຍອງ, ເມີ່ຍ ບົວ ຫຍັ່ນ ຕຸ໊ ເຍີຍ. ເຊ ຍວດ ຈ໊ຽນ ເຕສົ໋າ, ໄຮ່ ຖິວ ເຍີຍ ວົ້ວ ເຕີ໋ຍ.

²² ນ້າຍ ປົ໊ວະ ແກງ ເມີ່ຍ ບົວ ຫຍັ່ນ ຕຸ໊ ເຍີຍ. ມ່າຍ ຫຍູ່ງໆ ຕົ້ມ ຈົ໊ບ-ເຫຍີ່ຍ, ແກງ-ຖິວ, ຈົ໊ບ-ເຫຍີ່ຍ ແມງ, ເຖສົາ ຫຍູ່ງໆ ຈົ໊ບ-ຕອນ.

²³ ມປ່າ ກັ້ນ ຫຍູ່ງ ມ່າຍ ດ໊າດ, ມ່າຍ ເປຢີຍ ເຈັ໊ຍ ເຕສົ໋າ ເຍີຍ ແກງ, ເມີ່ຍ ບົວ ອ໋ອຍ ຕສຸ ກ້ຳ ເດສ໊ຍ ເຍີຍ.

²⁴ “‘ນ້າຍ ປົ໊ວະ ກະນ້າຍ ໄຮ່ ປຸນ ເມີ່ຍ ບົວ ມ່າຍ ຫວຸຍ. ຫາຍ ເຕົ້າ ມົວະ ຕສຸ ນ້າຍ ເຕີ໋ຍ ກະນ້າຍ-ໄຕ່ ມ່າຍ ຫວຸຍ ເຖົາ ຫຮມວັງ.

²⁵ ຫາຍ ເຕົ້າ ເຕສ໊າະ ນອມ ໄຟ ເຕົ້າ ນ້າຍ ເຕີ໋ຍ ກະນ້າຍ-ໄຕ່, ອ໋ອຍ ຕສຸ ໂດສ໋ ນິ່ນ ເຍີຍ ລຸຍ-ໂຫວ ຢ່າ ມ່າຍ ຫວຸຍ ເຖົາ ຫຮມວັງ.

²⁶ “‘ຫຍູ່ງໆ ແຊງ-ຄູ້ ເຕີ້ຍ ບ໋າຍ ມປ່າ ໄມ້ ເປ໋ນ ອີ ເຫຮລງ ຢ່າ ໄມ້ ຟານ ໂທສ້ ເຊ ເຫວີ່ຍ ເມີ່ຍ ບົວ ມ່າຍ ຫວຸຍ. ຫາຍ ເຕົ້າ ມົວະ ຕສຸ ນ້າຍ ປົ໊ວະ ແຊງ-ຄູ້-ໄຕ່ ຕສ່ຽວ ມ່າຍ ຫວຸຍ ອ໊ະ.

²⁷ ຢຽດ ຕສູ໊ງ ມ່າຍ ເປຢີຍ ເຈັ໊ຍ ປົ໌ວ-ເຕສົ໋າ ຢັ້ງ ເຈົ໊າ ເຍີຍ ແຊງ-ຄູ້, ເຊ ຫລົ່ງ ປົ໌ວ-ຕສ໊າງ ເຖສົາ ເຕສົ໋າ-ເປ໊ນ ທສ້າຍ ເດົາ ວົ້ວ ເຕີ໋ຍ, ເຫວີ່ຍ ເມີ່ຍ ບົວ ມ່າຍ ຫວຸຍ. ຫາຍ ເຕົ້າ ມົວະ ຕສຸ ນ້າຍ ເຕີ໋ຍ ແຊງ-ຄູ້-ໄຕ່ ຕສ່ຽວ ມ່າຍ ຫວຸຍ ເຖົາ ຫຮມວັງ.

²⁸ ຫາຍ ເຕົ້າ ເຕສ໊າະ ນ້າຍ ປົ໊ວະ ກະນ້າຍ-ໄຕ່ ອ໋ອຍ ຕສຸ ໂດສ໋ ນິ່ນ ເຍີຍ ລຸຍ-ໂຫວ ຢ່າ ມ່າຍ ຫວຸຍ ເຖົາ ຫຮມວັງ. ນ້າຍ ເຕີ໋ຍ ເຊ ເຫວີ່ຍ ເມີ່ຍ ບົວ ມ່າຍ ຫວຸຍ ອ໊ະ.

²⁹ “‘ຕະຟ່ານ ຍອງ ເດົາ ເຍີຍ ກະນ້າຍ ເຊ ຕົ້ງ ນ້າຍ ເຕີ໋ຍ ເຫວີ່ຍ ເມີ່ຍ ບົວ ມ່າຍ ຫວຸຍ. ມ່າຍ ຟັ່ນ ບຢ້າ, ນ໌າວ, ໂຕ້ວ ທ່ານ ວວມ,

³⁰ ນາງ-ຕະຕີ໋ງ, ໂຕ້ວ ທ່ານ, ໂຕ້ວ ທ່ານ ຟຸນ, ນາງ-ກູ້ ຫລ່າງ, ເຖສົາ ກະເຊີ່ຍ ຈ໋ອງ.

³¹ ຕະຟ່ານ ຍອງ ເດົາ ເຍີຍ ກະນ້າຍ, ຕົ້ງ ນ້າຍ ເຕີ໋ຍ ເຫວີ່ຍ ເມີ່ຍ ບົວ ມ່າຍ ຫວຸຍ. ເຊ ກ໊ອງ ນ້າຍ ເຕີ໋ຍ ກະນ້າຍ ໄຕ່ ມີ່ງ, ຫາຍ ເຕົ້າ ມົວະ ຕສຸ ຕສ່ຽວ ມ່າຍ ຫວຸຍ ເຖົາ ຫຮມວັງ.

³² ມ່າຍ ເຕົ້າ ນ້າຍ ເຕີ໋ຍ ກະນ້າຍ ໄຕ່ ມີ່ງ, ດ໊ອດ ຕສຸ ຫາຍ ຫຍູ່ງ, ໄມ້ ກຸ໊ນ ຫລົ່ງ ດຢັ໋ງ ໂຕສ໋ວ ເຍີຍ, ໄຟ ຫລົ່ງ ເດຍ ໂຕສ໋ວ ເຍີຍ, ໄຟ ດົ໊ບ ໂຕສ໋ວ ເຍີຍ, ໄຟ ຫລະມ່າ ເດຍ-ໂທສວ, ຢ່າ ໄມ້ ກຸ໊ນ ວົ້ວ ຫຍູ່ງ ກະນ້າຍ ຫລົ່ງ ໂຕສ໋ວ ຫາຍ ຫຍູ່ງ, ເຊ ມ່າຍ ຫວຸຍ. ອ໋ອຍ ຕສຸ ເຕສ໊າະ ວົ້ວ ຫຍູ່ງ ກະນ້າຍ ຕສ໋ຽມ ຈ໊ຽນ ວວມ. ເຊ ມ່າຍ ຫວຸຍ ເຖົາ ຫຮມວັງ ຕສ່ຽວ ທສີງ-ເດສ່ງ ອ໊ະ.

³³ ເຊ ກ໊ອງ ມ່າຍ ນ້າຍ ເຕີ໋ຍ ກະນ້າຍ ໄຕ່ ມີ່ງ, ດ໊ອດ ຕສຸ ເນຍ-ມໍ ກະຍົ໌ວ, ຢຽດ ຕສູ໊ງ ຢຽມ ກະຍົ໌ວ ເຍີຍ ກະນ້າຍ ຕສ່ຽວ ມ່າຍ ຫວຸຍ. ອ໋ອຍ ຕສຸ ເຕສ໊າະ ເນຍ-ມໍ ເບ໊າະ ກວັ່ງ.

³⁴ ມ່າຍ ຫາຍ ຫຍູ່ງ ຫຍັ່ນ ຕຸ໊ ເຍີຍ ກະນ້າຍ ມປ່າ ວົ້ວ ນອມ ເນຍ-ມໍ ເຍີຍ ວວມ ດ໊ຽບ ຕສຸ, ຕສ່ຽວ ມ່າຍ ຫວຸຍ. ມ່າຍ ຫາຍ ຫຍູ່ງ ຮົບ ຕຸ໊ ເຍີຍ ກະນ້າຍ ຢຽມ ວົ້ວ ນອມ ເນຍ-ມໍ ຢ່າ ມ່າຍ ຫວຸຍ ອ໊ະ.

³⁵ ມ່າຍ ເຕົ້າ ນ້າຍ ຫຍູ່ງ ກະນ້າຍ ໄຕ່ ມີ່ງ, ດ໊ອດ ຕສຸ ຫາຍ ຫຍູ່ງ ຢ່າ ເຕສີ໌ຍ, ວົ້ວ ຫຍູ່ງ ຕສ່ຽວ ມ່າຍ ຫວຸຍ ອ໊ະ. ໄມ້ ກຸ໊ນ ໂດສ໋ ໄຟ ແທສງ, ອ໋ອຍ ຕສຸ ເບ໊າະ ກວັ່ງ. ເຊ ມ່າຍ ຫວຸຍ, ຢ່າ ເຫວີ່ຍ ເມີ່ຍ ບົວ ມ່າຍ ຫວຸຍ ອ໊ະ.

³⁶ ວວມ-ຕສີ໊ງ ໄຟ ຊຽວ ວວມ ເຍີຍ ຄວດ ມ່າຍ ນ້າຍ ຫຍູ່ງ ກະນ້າຍ-ໄຕ່ ດ໊ອດ ເປັຍ ນໍ, ຖສໍ່ ທສີງ-ເດສ່ງ ເຍີຍ. ມປ່າ ຫາຍ ເຕົ້າ ມົວະ ຕສຸ ນ້າຍ ເຕົ້າ ກະນ້າຍ-ໄຕ່, ນິ່ນ ຕສ່ຽວ ມ່າຍ ຫວຸຍ.

³⁷ ເຊ ກ໊ອງ ມ່າຍ ອກັ໋ນ ນ້າຍ ເຕີ໋ຍ ກະນ້າຍ-ໄຕ່ ດ໊ອດ ຕສຸ ອ໋ອຍ ຕສວັ໋ງ ເຍີຍ ຍິມ, ຍິມ ຖສໍ່ ທສີງ-ເດສ່ງ ເຍີຍ.

³⁸ ມປ່າ ເຊ ກ໊ອງ ຍິມ ຕສ໋ຽມ ຕສຸ ວວມ ຢ່າ ມ່າຍ ເຕົ້າ ນ້າຍ ເຕີ໋ຍ ກະນ້າຍ ໄຕ່ ມີ່ງ ດ໊ອດ ເປັຍ, ຍິມ ຕສ່ຽວ ເຫວີ່ຍ ເມີ່ຍ ບົວ ມ່າຍ ຫວຸຍ.

³⁹ “‘ເຊ ກ໊ອງ ຕົ້ງ ເມີ່ຍ ບົວ ຫຍັ່ນ ຕຸ໊ ເຍີຍ ແຊງ-ຄູ້ ມປ່າ ນິ່ນ ກັ້ນ ໄຕ່ ມີ່ງ, ຫາຍ ເຕົ້າ ມົວະ ຕສຸ ຕສ່ຽວ ມ່າຍ ຫວຸຍ ເຖົາ ຫຮມວັງ.

⁴⁰ ຫາຍ ເຕົ້າ ຫຍັ່ນ ນ້າຍ ເຕົ້າ ແຊງ-ຄູ້-ໄຕ່ ອ໋ອຍ ຕສຸ ໂດສ໋ ນິ່ນ ເຍີຍ ລຸຍ-ໂຫວ ຢ່າ ມ່າຍ ຫວຸຍ ເຖົາ ຫຮມວັງ. ຫາຍ ເຕົ້າ ເຕສ໊າະ ນ້າຍ ເຕົ້າ ກະນ້າຍ-ໄຕ່ ອ໋ອຍ ຕສຸ ໂດສ໋ ນິ່ນ ເຍີຍ ລຸຍ-ໂຫວ ຢ່າ ມ່າຍ ຫວຸຍ ເຖົາ ຫຮມວັງ.

⁴¹ “‘ຕະຟ່ານ ຍອງ ກັນ ເດົາ ເຍີຍ ຫຍູ່ງໆ ກະນ້າຍ ເຊ ກ້ຳ ເດສ໊ຍ ເຍີຍ. ໄມ້ ຕູ໋ງ ຫຍັ່ນ.

⁴² ຫລົ່ງ ກະເຊຍ ລຸ່ຍ ເດົາ ເຍີຍ, ໄຟ ຫລົ່ງ ເປຢີຍ ເຈັ໊ຍ ປົ໌ວ-ເຕສົ໋າ ເຍີຍ, ໄຟ ມ່າຍ ປົ໌ວ-ເຕສົ໋າ ທສ້ຳ ເຍີຍ ຍອງ ເດົາ, ນ້າຍ ເຕີ໋ຍ ຢຽດ ຕສູ໊ງ ຍອງ ກັນ ເດົາ ມີ່ງ ເຍີຍ ກະນ້າຍ ໄມ້ ຕູ໋ງ ຫຍັ່ນ. ເຊ ເຫວີ່ຍ ເມີ່ຍ ບົວ ເປ໋ນ ກ້ຳ ເດສ໊ຍ ເຍີຍ ກະນ້າຍ.

⁴³ ໄມ້ ຕູ໋ງ ຫລາຍ ນ້າຍ ເຕີ໋ຍ ຍອງ ເດົາ ເຍີຍ ກະນ້າຍ ປຸນ ເມີ່ຍ ບົວ ກັ້ນ ເປ໋ນ ກ້ຳ ເດສ໊ຍ ເຍີຍ ກະນ້າຍ. ຢ່າ ໄມ້ ຕູ໋ງ ເຫວີ່ຍ ນ້າຍ ເຕີ໋ຍ ກະນ້າຍ ປຸນ ກັ້ນ ມ່າຍ ຫວຸຍ.

⁴⁴ ເຢຍ ໂຕສ໋ວ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ. ເມີ່ຍ ບົວ ອ໋ອຍ ຕສຸ ສາ ກັ້ນ ທສີງ-ເດສ່ງ ຕ້າຍ ເຫວີ່ຍ ຕສຸ ເຢຍ ເຊ ທສີງ-ເດສ່ງ. ໄມ້ ຕູ໋ງ ຫລາຍ ຍອງ ເດົາ ເຍີຍ ຫາຍ ຫຍູ່ງ ກະນ້າຍ ປຸນ ກັ້ນ ມ່າຍ ຫວຸຍ.

⁴⁵ ເຢຍ ໂຕສ໋ວ ຕສ໊ຽວ, ຕົ້ງ ຕໍ້ ເມີ່ຍ ບົວ ຢຽມ ອີ​ຢິ໊ບ ເຕີ່ຍ-ປູງ ທສວດ ຕ້າຍ ເຫວີ່ຍ ໂຕສ໋ວ ເມີ່ຍ ບົວ ເຍີຍ ທິນ-ຮູ່ງ. ເຫວີ່ຍ ນ້າຍ ເມີ່ຍ ບົວ ອ໋ອຍ ຕສຸ ທສີງ-ເດສ່ງ ເຫວີ່ຍ ຕສຸ ເຢຍ ເຊ ທສີງ-ເດສ່ງ ເຍີຍ.

⁴⁶ “‘ນ້າຍ ເຊ ແຊງ-ຄູ້, ເໜາະ, ຫຍູ່ງໆ ຢຽມ ວວມ ຕົ໌ງ ເຍີຍ, ມ່າຍ ແໝ່ງ ເຍີຍ, ເຖສົາ ຍອງ ເດົາ ເຍີຍ ກະນ້າຍ ເຍີຍ ເລີ໌ຍ-ເຫຍີ່ຍ.

⁴⁷ ເມີ່ຍ ບົວ ອ໋ອຍ ຕສຸ ເຕສັ໊ຍ ຕຸ໊ ມ່າຍ ຫວຸຍ ເຍີຍ ເຖສົາ ໄມ້ ມ່າຍ ຫວຸຍ ເຍີຍ, ມ່າຍ ແໝ່ງ ເຍີຍ ກະນ້າຍ, ຫາຍ ຫຍູ່ງ ຫຍັ່ນ ຕຸ໊, ຫາຍ ຫຍູ່ງ ຫຍັ່ນ ໄມ້ ຕຸ໊.’”