โย​ซู​วา 20 - ฉบับอักษรลาว

ຕີ່ງ ຕສຢັ໋ງ ເສຍ ແໝ່ງ ຕສີ້ງ

¹ ຕສ໊ຽວ ກ໊ອງ ບົ໋ວ ໂຢ​ຊູ​ວາ,

² “ອ໋ອຍ ຕສຸ ບົ໋ວ ອິ​ສະ​ລາ​ເອນ ມ່ຽນ ກິ໊ນ ເຕີ໋ຍ ຕສີ້ງ ເຫວີ່ຍ ໂຕສ໋ວ ເສຍ ແໝ່ງ ຕສີ້ງ ຕສິ໋ວ ເຢຍ ຫລົ່ງ ໂມ​ເຊ ບົ໋ວ ເມີ່ຍ ບົວ ເຍີຍ ຫວ່າ,

³ ເຫວີ່ຍ ປຸນ ທສະ-ໂປ່ວ ໄຕ໋ ມ່ຽນ ໄຟ ໄມ້ ເຈ໌ຍ ໂຮຍ້ວ ໄຕ໋ ມ່ຽນ ເຍີຍ ມ່ຽນ ໄຮ່ ເປຢົ໋າ ມີ່ງ ວົ້ວ. ນ້າຍ ເຕີ໋ຍ ຕສີ້ງ ເປ໋ນ ເມີ່ຍ ບົວ ດ້າວ ເຂົາ ເຍີຍ ຕ໋ອງ ເຫວີ່ຍ ເປຢົ໋າ ຈ໊າວ ມ່ຽນ ແໝ່ງ ວິນ ວົ້ວ ເຕົ້າ.

⁴ “ທສະ-ໂປ່ວ ໄຕ໋ ມ່ຽນ ເຍີຍ ມ່ຽນ ເປຢົ໋າ ມີ່ງ ເຖົາ ຢຽດ ນອມ ນ້າຍ ເຕີ໋ຍ ຕສີ້ງ, ນິ່ນ ອ໋ອຍ ຕສຸ ໂຊ້ວ ຈ໊ຽນ ຕສີ້ງ ແກ້ງ ດ່າງ ຢ່າ ກ໊ອງ ເມ່ງ ນິ່ນ ເຍີຍ ສີ່ ປຸນ ວົ້ວ ນອມ ຕສີ້ງ ເຍີຍ ມ່ຽນ ໂກ໋ ຮິ້ວ. ນິ່ນ ບົວ ຕສ່ຽວ ຕໍ້ ນິ່ນ ເປັຍ ຕສີ້ງ ກະຍົ໌ວ ປຸນ ຕ໋ອງ ນິ່ນ ຢຽມ, ນິ່ນ ຕສ່ຽວ ເຖສົາ ນິ່ນ ບົວ ຢຽມ ວົ້ວ.

⁵ ເຊ ກ໊ອງ ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ຕສຸ່ນ ຈ໊ຽນ ນິ່ນ ຕ້າຍ, ວົ້ວ ນອມ ຕສີ້ງ ເຍີຍ ມ່ຽນ ໂກ໋ ໄມ້ ຕູ໋ງ ເຕສ໊າະ ໄຕ໋ ມ່ຽນ ເຍີຍ ມ່ຽນ ຈິວ ປຸນ ນິ່ນ, ເຫວີ່ຍ ຕສຸ ທສະ-ໂປ່ວ ໄຕ໋ ມ່ຽນ ວົ້ວ ເຕົ້າ, ໄມ້ ເຕສີ໌ຍ ໜິບ ວິນ ໄຟ ເຈ໌ຍ ໂຮຍ້ວ ໄຕ໋.

⁶ ນິ່ນ ອ໋ອຍ ຕສຸ ຢຽມ ວົ້ວ ນອມ ຕສີ້ງ ເຖົາ ໂຊ້ວ ຈ໊ຽນ ກັ໊ບ ຕສຸ໊ນ ເຍີຍ ຕສວັ໋ງ ມ່ຽນ ເຍີຍ ດສະຮມຽນ ຕສຸ ຊ້ຽມ ຕສຸ໌ຍ, ຢ່າ ຕສົ໊ວ ເຖົາ ຕົ້ງ ວົ້ວ ຕສັ່ນ ໂຕສ໋ວ ຕົ້ມ ໄຊ ມ່ຽນ ວົ້ວ ເຕົ້າ ເກວີຍ ເສີຍ. ອກະຮ້າ ທສະ-ໂປ່ວ ໄຕ໋ ມ່ຽນ ວົ້ວ ລ່ານ ມ່ຽນ ໄຮ່ ດສ໋ວນ ນິ່ນ ກັ້ນ ເຍີຍ ເປຢົ໊າ, ດສ໋ວນ ນິ່ນ ເປຢົ໋າ ທສວດ ວົ້ວ ນອມ ມູ້ງ.”

⁷ ຮນັ້ງ ນ້າຍ ນິ່ນ ບົວ ຕີ່ງ ຕສຢັ໋ງ ຢຽມ ນັບ​ທາ​ລີ ເຍີຍ ບົງ-ໄອ໊ ຕ໋ອງ, ກາ​ລິ​ລີ ເຕີ່ຍ ເຍີຍ ເຄ​ເດດ ຕສີ້ງ, ເຖສົາ ເອ​ຟາ​ອິມ ບົງ-ໄອ໊ ຕ໋ອງ, ເຊ​ເຄມ ຕສີ້ງ, ເຖສົາ ຢຽມ ຢູ​ດາ ເຍີຍ ບົງ-ໄອ໊ ຕ໋ອງ, ຄີ​ລິ​ຢ໊າດ​ອານ​ບາ, ເຊ ເຮ​ໂບ​ລົນ ຕສີ້ງ.

⁸ ຢຽມ ຈໍ​ແດນ ດ້າຍ ຕົງ ປູງ ແໝງ, ເຢ​ລີ​ໂຄ ຕສີ້ງ ຕົງ ປູງ ເຍີຍ ເຕີ່ຍ-ປູງ-ຮວາງ ເຍີຍ ເດົາ-ແປ້ງ, ນິ່ນ ບົວ ຕີ່ງ ຕສຢັ໋ງ ລູ​ເບນ ຝີງ ເຍີຍ ເບ​ເຊ ມູ້ງ. ກາດ ຝີງ ກະຍົ໌ວ ນິ່ນ ບົວ ຕີ່ງ ກິ​ເລ​ອາດ ເຕີ່ຍ ເຍີຍ ລາ​ມົດ ຕສີ້ງ, ຢຽມ ມະ​ນັດ​ເສ ຝີງ ເຍີຍ ບາ​ຊານ ເຕີ່ຍ, ໂກ​ລານ ມູ້ງ.

⁹ ນ້າຍ ເຕີ໋ຍ ຕສີ້ງ ເຊ ເຫວີ່ຍ ອິ​ສະ​ລາ​ເອນ ເຍີຍ ຕສວັ໋ງ ມ່ຽນ ຢ່າ ເຫວີ່ຍ ຢຽມ ນິ່ນ ບົວ ກະຍົ໌ວ ເຍີຍ ກັ້ນ ຝີງ ມ່ຽນ ຕີ່ງ ຕ້າຍ ປຸນ ທສະ-ໂປ່ວ ໄຕ໋ ມ່ຽນ ເຍີຍ ມ່ຽນ ໄຮ່ ເປຢົ໋າ ມີ່ງ ຢຽມ ນ້າຍ ເຕີ໋ຍ ຕສີ້ງ ຕສ່ຽວ ໄມ້ ຕສຸ ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ໄຕ໋. ຕສົ໊ວ ເຖົາ ຕຸ໊ ໂຊ້ວ ຈ໊ຽນ ກັ໊ບ ຕສຸ໊ນ ເຍີຍ ຕສວັ໋ງ ມ່ຽນ ເຍີຍ ດສະຮມຽນ ຕສຸ ຊ້ຽມ ຕສຸ໌ຍ.