โย​ซู​วา 16 - ฉบับอักษรลาว

ພ້າຍ ປຸນ ເອ​ຟາ​ອິມ ເຖສົາ ມະ​ນັດ​ເສ ດ໊າມ-ຝີງ ເຍີຍ ປ່ວນ ເດົາ

¹ ພ້າຍ ປຸນ ໂຢ​ເຊບ ເຍີຍ ເຕສີ໊ຍ-ຟຸນ ນ່າມ ປູງ ເຍີຍ ກັ໊ບ-ຈ໋າຍ ຢຽມ ຈໍ​ແດນ ດ້າຍ, ນິດ ຟັດ ເຢ​ລີ​ໂຄ ຕສີ້ງ, ເຢ​ລີ​ໂຄ ເຍີຍ ວວມ-ຕສີ໊ງ ຕົງ ປູງ ແໝງ, ແອ໋ງ ເຈ໋ຍ ເຕີ່ຍ-ປູງ-ຮວາງ, ຢຽມ ເຢ​ລີ​ໂຄ ແຖສງ ຝາວ ມີ່ງ ເຖົາ ເບດ​ເອນ ຕສີ້ງ ເຍີຍ ບົງ-ໄອ໊ ຕ໋ອງ.

² ຢຽມ ເບດ​ເອນ ຕສີ້ງ, ເຊ ລູດ ຕສີ້ງ, ແອ໋ງ ເຈ໋ຍ ມີ່ງ ເຖົາ ອາ​ທາ​ລົດ ມູ້ງ, ເຊ ອານ​ຄີ ມ່ຽນ ເຍີຍ ເຕີ່ຍ-ປູງ.

³ ກັ໊ບ-ຈ໋າຍ ແອ໋ງ ເອຈ່ຍ ມີ່ງ ໄຟ ປູງ ແໝງ, ມີ່ງ ເຖົາ ຢາ​ເຟນ​ທີ ມ່ຽນ ເຍີຍ ເຕີ່ຍ, ເຈ໋ຍ ມີ່ງ ເຖົາ ວົ້ວ ເດ໊ຍ ເຍີຍ ເບດ​ໂຮ​ລົນ ຕສີ້ງ, ຢ່າ ເອຈ່ຍ ມີ່ງ ເຖົາ ເກ​ເຊ ຕສີ້ງ, ແອ໋ງ ຕົ໋ນ ຈ໊ຽນ ຄ້ອຍ.

⁴ ໂຢ​ເຊບ ເຍີຍ ຕອນ, ມະ​ນັດ​ເສ ເຖສົາ ເອ​ຟາ​ອິມ ເຍີຍ ເຕສີ໊ຍ-ຟຸນ, ຕສ່ຽວ ຕຸ໊ ນິ່ນ ບົວ ດສິບ ເຍີຍ ປ່ວນ ເດົາ.

⁵ ນ້າຍ ເຊ ເອ​ຟາ​ອິມ ມ່ຽນ ເຍີຍ ເຕສີ໊ຍ-ຟຸນ ດສິບ ເຍີຍ ປ່ວນ ເດົາ ຕສິ໋ວ ນິ່ນ ບົວ ເຍີຍ ປູ້ງ ປ່ວນ. ນິ່ນ ບົວ ດສິບ ເຍີຍ ເດົາ ເຍີຍ ກັ໊ບ-ຈ໋າຍ ຢຽມ ຕົງ ປູງ ແໝງ, ອາ​ທາ​ລົດ​ອັດ​ດາ ລ໌າງ, ມີ່ງ ເຖົາ ວົ້ວ ເຈ໋ຍ ເຍີຍ ເບດ​ໂຮ​ລົນ ຕສີ້ງ,

⁶ ແອ໋ງ ເຈ໋ຍ ມີ່ງ ເຖົາ ຄ້ອຍ. ຢຽມ ນິ່ນ ບົວ ເຍີຍ ກັ໊ບ-ຈ໋າຍ ປ໊ະ ປູງ ແໝງ, ມິກ​ເມ​ທັດ ມູ້ງ. ຕົງ ປູງ ແໝງ ເຍີຍ ກັ໊ບ-ຈ໋າຍ ເງົາ ມີ່ງ ເຖົາ ທາ​ອາ​ນັດ​ຊິ​ໂລ ມູ້ງ, ຢ່າ ເຈ໋ຍ ດ່າງ ນ້າຍ ນອມ ມູ້ງ ມີ່ງ ຕົງ ປູງ ແໝງ ເຖົາ ຢາ​ໂນ​ອາ ມູ້ງ.

⁷ ຢຽມ ຢາ​ໂນ​ອາ ມູ້ງ ເອຈ່ຍ ນ່າມ ປູງ ເຖົາ ອາ​ທາ​ລົດ ມູ້ງ ເຖສົາ ນາ​ອາ​ລາ ມູ້ງ, ມີ່ງ ຕ໋າວ ຈ໊ຽນ ເຢ​ລີ​ໂຄ ຕສີ້ງ, ແອ໋ງ ມີ່ງ ຕົ໋ນ ຈ໊ຽນ ຈໍ​ແດນ ດ້າຍ.

⁸ ກັ໊ບ-ຈ໋າຍ ຢຽມ ທັບ​ປູ​ວາ ມູ້ງ ເອຈ່ຍ ໄຟ ປູງ ແໝງ ເຖົາ ຄາ​ນາ ໂດ໊ະ ມີ່ງ ຕົ໋ນ ຈ໊ຽນ ຄ້ອຍ. ນ້າຍ ເຊ ເອ​ຟາ​ອິມ ຝີງ ຕສິ໋ວ ນິ່ນ ບົວ ເຍີຍ ປູ້ງ ປ່ວນ ດສິບ ເຍີຍ ປ່ວນ ເດົາ.

⁹ ຢ່າ ມ່າຍ ຢຽມ ມະ​ນັດ​ເສ ມ່ຽນ ດສິບ ເຍີຍ ປ່ວນ ກະຍົ໌ວ ພ້າຍ ປຸນ ເອ​ຟາ​ອິມ ມ່ຽນ ເຍີຍ ນອມໆ ມູ້ງ ເຖສົາ ວົ້ວ ເຕີ໋ຍ ມູ້ງ ເຍີຍ ຟິ້ວ-ລ໌າງ.

¹⁰ ມປ່າ ນິ່ນ ບົວ ໄມ້ ຕສຸ່ນ ຢຽມ ເກ​ເຊ ຕສີ້ງ ເຍີຍ ຄາ​ນາ​ອັນ ມ່ຽນ ທສວດ. ຄາ​ນາ​ອັນ ມ່ຽນ ຕສ່ຽວ ຢຽມ ເອ​ຟາ​ອິມ ມ່ຽນ ກະຍົ໌ວ ເຖົາ ອີ້ ຈ໋າ ຮນອຍ, ມປ່າ ນິ່ນ ບົວ ຕສຸ ໂຕສ໋ວ ໂນ່ວ, ໂຕສ໋ວ ກົງ ໂຄ້ວ.