โย​ฮัน 5 - ฉบับอักษรลาว

ເຢ​ຊູ ຢຽມ ວວມ-ຕົ້ມ ເຮລນ ຕສໍ່ ແປ່ງ

¹ ອກະຮ້າ ເຢ​ຊູ ມີ່ງ ເຢ​ລູ​ຊາ​ເລມ ຕສີ້ງ ເຈ໋ຍ ຢິວ​ໄທ ມ່ຽນ ເຍີຍ ຢຽດ ນອມ ຕສິ໊ບ.

² ຢຽມ ເຢ​ລູ​ຊາ​ເລມ ມ່າຍ ເຕົ້າ ແກ້ງ ເຫ່ວ ປະກີ ຢູ້ງ ແກ້ງ. ແກ້ງ ກະເຮລນ ມ່າຍ ນອມ ວວມ-ຕົ້ມ, ຮິບ​ລູ ຫວ່າ ເຫ່ວ ເບດ​ຊາ​ທາ. ວວມ-ຕົ້ມ ເຮລນ ຢ່າ ມ່າຍ ປຢາ ນອມ ປີ໋ງ ລ່າງ ເຍີຍ ລິ່ວ.

³ ປຸ໊ດ-ແປ່ງ ມ່ຽນ ທສ້ຳ ເຍີຍ ເປວີ໋ຍ ວົ້ວ. ມຕສີງ ແມ່ງ, ມຕສີງ ບົ໊ວ ຢ່າ ມ່າຍ, ເຕສົ໋າ ຫວ່າຍ ເຍີຍ ຢ່າ ມ່າຍ, ປຸ໊ດ ແປ່ງ-ໄບ ໄມ້ ໄຮ່ ຕົ໌ງ ເຍີຍ ຢ່າ ມ່າຍ. ນິ່ນ ບົວ ຕສົ໊ວ ວວມ ຕົ໌ງ,

⁴ ເຫວີ່ຍ ຕສຸ ມ່າຍ ເຕີ໋ຍ ຕສຢັ້ງ ໂຫ່ ມ່າຍ ເຕົ້າ ຕສ໊ຽວ ເຍີຍ ຟິນ-ມ່ຽນ ເອຈ່ຍ ຕ້າຍ ມົວະ ວວມ ຕົ໌ງ. ວວມ ຕົ໌ງ ລິ໌ວ, ຫາຍ ເຕົ້າ ເອຈ່ຍ ມີ່ງ ຕສ໋ຽມ ດ່າງ, ໄມ້ ກຸ໊ນ ປຸ໊ດ ຫາຍ ຫຍູ່ງ ແປ່ງ, ແປ່ງ ຕສ່ຽວ ຫລົງ ເດສ່ງ ອ໊ະ.

⁵ ຢຽມ ວົ້ວ ມ່າຍ ເຕົ້າ ມ່ຽນ ປຸ໊ດ ຟ່າ ຕສຽບ ເປ໊ດ ຫຮຍັງ ແປ່ງ.

⁶ ເຢ​ຊູ ປວັດ ນິ່ນ ເປວີ໋ຍ ວົ້ວ ຢ່າ ຮິ້ວ ຕຸ໊ ນິ່ນ ປຸ໊ດ ແປ່ງ ເລົ່າ ໄຫ່, ຕສ່ຽວ ໜ່າຍ ກ໋າ ນິ່ນ, “ເມີ່ຍ ອ໋ອຍ ແປ່ງ ຫລົງ ເຍີຍ ໄຟ?”

⁷ ວົ້ວ ເຕົ້າ ແປ່ງ ມ່ຽນ ເຕົາ, “ຕົ້ມ ກໍ໋ ອ່າ, ວວມ ຕົ໌ງ ເຍີຍ ຕສຢັ້ງ ໂຫ່ ໄມ້ ມ່າຍ ຫາຍ ເຕົ້າ ຕໍ້ ເຢຍ ເອຈ່ຍ ວວມ. ເຢຍ ກັ້ນ ມີ່ງ ໄມ້ ແກ້ງ ເຖົາ, ມ່ຽນ ເປັຍ ດ່າງ ໝີ່ ອ໊ະ.”

⁸ ເຢ​ຊູ ກ໊ອງ ບົ໋ວ ນິ່ນ, “ເຈ໌ຍ ຊິນ ຕ້າຍ, ຕໍ້ ຈ໊ຽນ ເມີ່ຍ ເຍີຍ ຈິ່ວ ຢັ້ງ ເຈົ໊າ ມີ່ງ ອ໊ະ.”

⁹ ວົ້ວ ເຕົ້າ ມ່ຽນ ລ່ຽມ ເຕສີ້ຍ ຫລົງ ຕ້າຍ ຕສ່ຽວ ຕໍ້ ຈ໊ຽນ ນິ່ນ ເຍີຍ ຈິ່ວ ຢັ້ງ ເຈົ໊າ ມີ່ງ ໝີ່ ອ໊ະ. ວົ້ວ ຮນອຍ ເຊ ຕ໋ອຍ ຕສຸ ຕີ້ງ ກົງ ຮນອຍ.

¹⁰ ຢິວ​ໄທ ມ່ຽນ ຕສ່ຽວ ກ໊ອງ ບົ໋ວ ແປ່ງ ຫລົງ ວົ້ວ ເຕົ້າ, “ຕີ້ງ ກົງ ຮນອຍ ເມີ່ຍ ຕໍ້ ຈ໊ຽນ ຈິ່ວ ມີ່ງ ຫາຍ ເດົາ ເຊ ຕ່ອງ ບົວ ເຍີຍ ເລີ໌ຍ.”

¹¹ ນິ່ນ ເຕົາ, “ຕສໍ່ ເຢຍ ຫລົງ ວົ້ວ ເຕົ້າ ມ່ຽນ ເຫ່ວ ເຢຍ ຕໍ້ ຈ໊ຽນ ຈິ່ວ ຢັ້ງ ເຈົ໊າ ມີ່ງ ອ໊ະ.”

¹² ວົ້ວ ເຕີ໋ຍ ມ່ຽນ ແອ໋ງ ໜ່າຍ ນິ່ນ, “ເຫ່ວ ເມີ່ຍ ຕໍ້ ຈ໊ຽນ ຈິ່ວ ມີ່ງ ວົ້ວ ເຕົ້າ ເຊ ຫາຍ ເຕົ້າ?”

¹³ ມປ່າ ແປ່ງ ຫລົງ ວົ້ວ ເຕົ້າ ມ່ຽນ ໄມ້ ຮິ້ວ ຕຸ໊ ຕສໍ່ ນິ່ນ ຫລົງ ວົ້ວ ເຕົ້າ ຕົ້ງ ຫາຍ ເຕົ້າ, ເຫວີ່ຍ ຕສຸ ມ່ຽນ ທສ້ຳ ໄຫ່, ເຢ​ຊູ ຢ່າ ເລີ່ຍ ອກອຍ ມີ່ງ ໝີ່ ອ໊ະ.

¹⁴ ອກະຮ້າ ເຢ​ຊູ ແອ໋ງ ປວັດ ນິ່ນ ຕສໍ່ ຫລົງ ວົ້ວ ເຕົ້າ ມ່ຽນ ຢຽມ ຕສັ່ງ ທິນ-ຮູ່ງ ເຍີຍ ເປຢົ໊າ ຕສ່ຽວ ກ໊ອງ ບົ໋ວ ນິ່ນ, “ໝັ່ງ ກ໋າ, ເມີ່ຍ ເຍີຍ ແປ່ງ ຕສໍ່ ຫລົງ ເດສ່ງ. ຢັ້ງ ນ້າຍ ເຈ໋ຍ ໄມ້ ຕູ໋ງ ປ໌າມ ຕສຸ໌ຍ ອ໊ະ ໂອ່. ເດສ໋ຍ ເມີ່ຍ ແອ໋ງ ໄຮ່ ປວັ້ງ ເກົ້າ ໂຄ້ວ ເຈ໋ຍ ເຍີຍ ໜ່ານ ຕສີ້ງ.”

¹⁵ ວົ້ວ ເຕົ້າ ມ່ຽນ ດສ໋ວນ ມີ່ງ ກ໊ອງ ບົ໋ວ ໂຕສ໋ວ ໂຮລ ເຍີຍ ຢິວ​ໄທ ມ່ຽນ, “ຕສໍ່ ເຢຍ ຫລົງ ວົ້ວ ເຕົ້າ ເຊ ຕົ້ງ ເຢ​ຊູ.”

¹⁶ ເຫວີ່ຍ ຕສຸ ເຢ​ຊູ ຫລົ່ງ ຕີ້ງ ກົງ ຮນອຍ ໂຕສ໋ວ ນ້າຍ ເຕີ໋ຍ ສີ່, ຢິວ​ໄທ ມ່ຽນ ຖສີງ ຕ້າຍ ໂຕສ໋ວ ໂຕະ ນິ່ນ.

¹⁷ ມປ່າ ເຢ​ຊູ ກ໊ອງ ບົ໋ວ ນິ່ນ ບົວ, “ເຢຍ ເຍີຍ ເຕຍ ຕສັ່ນໆ ໂຕສ໋ວ ກົງ ເຖົາ ອີ້ ຕສັ່ນ. ເຢຍ ຢ່າ ໂຕສ໋ວ ກົງ ອ໊ະ.”

¹⁸ ເຢ​ຊູ ຮນັ້ງ ນ້າຍ ນໍ ກ໊ອງ, ໂຕສ໋ວ ໂຮລ ເຍີຍ ຢິວ​ໄທ ມ່ຽນ ເກົ້າ ຟັດ ອ໋ອຍ ໄຕ໋ ນິ່ນ, ເຫວີ່ຍ ຕສຸ ນິ່ນ ໄມ້ ຕານ ຕ່ອງ ຕີ້ງ ກົງ ຮນອຍ ເຍີຍ ເລີ໌ຍ ຮນັ້ງ. ນິ່ນ ຢ່າ ກ໊ອງ ທິນ-ຮູ່ງ ໂຕສ໋ວ ນິ່ນ ເຍີຍ ເຕຍ, ຕສ່ຽວ ທ່າຍ ນິ່ນ ກັ້ນ ເຖສົາ ທິນ-ຮູ່ງ ຟີ່ ດົ່ງ ໂຮລ.

ທິນ-ຮູ່ງ ປຸນ ຫັດ ມ໌າ ນິ່ນ ເຍີຍ ຕອນ

¹⁹ ເຢ​ຊູ ບົ໋ວ ນິ່ນ ບົວ, “ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ຕສັ່ງ ເຕ໋ຍ ເຍີຍ ຕອນ ໄມ້ ໄຮ່ ເຊວີ່ຍ ກັ້ນ ເຍີຍ ໂຮຍ້ວ ໂຕສ໋ວ ຫາຍ ຫຍູ່ງ. ຕອນ ປວັດ ເຕຍ ໂຕສ໋ວ ຫາຍ ຫຍູ່ງ, ນິ່ນ ຕສ່ຽວ ຂູງ ໂຕສ໋ວ ວົ້ວ ຫຍູ່ງ ຮນັ້ງ. ເຕຍ ໂຕສ໋ວ ຫາຍ ຫຍູ່ງ, ນິ່ນ ເຍີຍ ຕອນ ຕສ່ຽວ ໂຕສ໋ວ ວົ້ວ ຫຍູ່ງ.

²⁰ ຕສັ່ງ ເຕ໋ຍ ຮນ້ຳ ນິ່ນ ເຍີຍ ຕອນ, ຕສ່ຽວ ເຕສ໊າະ ກັ້ນ ໂຕສ໋ວ ເຍີຍ ຢຽດ ຕສູ໊ງ ສີ່ ປຸນ ນິ່ນ ເຍີຍ ຕອນ ໝັ່ງ. ນິ່ນ ຕສູ໊ງ ອ໋ອຍ ໂຕສ໋ວ ເກົ້າ ໂຮລ ນ້າຍ ເຕີ໋ຍ ສີ່ ປຸນ ນິ່ນ ເຍີຍ ຕອນ ໝັ່ງ, ເມີ່ຍ ບົວ ຕສ່ຽວ ບົວະ ຮ່ອງ ໄຫ່.

²¹ ຕສັ່ງ ເຕ໋ຍ ຮນັ້ງ ຫາຍ ນໍ ປຸນ ໄຕ່ ມີ່ງ ເຍີຍ ມ່ຽນ ນັ່ງ ຕ້າຍ ຕສຢັ້ງ ຈ໊ຽນ, ນິ່ນ ເຍີຍ ຕອນ ຢ່າ ຮນັ້ງ ວົ້ວ ນໍ ປຸນ ຕົ້ງ ນິ່ນ ອ໋ອຍ ປຸນ ວົ້ວ ເຕີ໋ຍ ຕຸ໊ ຕສຢັ້ງ ຈ໊ຽນ.

²² ຕສັ່ງ ເຕ໋ຍ ກັ້ນ ໄມ້ ຊ້ຽມ ຫາຍ ເຕົ້າ ເຍີຍ ຕສຸ໌ຍ. ນິ່ນ ເຕສ໊າະ ຫລີ່ງ ຈິວ ປຸນ ນິ່ນ ເຍີຍ ຕອນ ຊ້ຽມ ຢຽດ ຕສູ໊ງ ຕສຸ໌ຍ,

²³ ເຫວີ່ຍ ປຸນ ມ່ຽນ ທ່າຍ ນິ່ນ ເຍີຍ ຕອນ ຮນັ້ງ ນິ່ນ ບົວ ທ່າຍ ຕສັ່ງ ເຕ໋ຍ ນໍ. ຫາຍ ເຕົ້າ ໄມ້ ທ່າຍ ນິ່ນ ເຍີຍ ຕອນ, ວົ້ວ ເຕົ້າ ໄມ້ ທ່າຍ ຕສັ່ງ ເຕ໋ຍ, ຕົ້ງ ພ້າຍ ນິ່ນ ເຍີຍ ຕອນ ຕ້າຍ ວົ້ວ ເຕົ້າ.

²⁴ “ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ຫາຍ ເຕົ້າ ໝວັງ ເຢຍ ເຍີຍ ຫວ່າ ຢ່າ ສຽນ ເຂົາ ພ້າຍ ເຢຍ ຕ້າຍ ວົ້ວ ເຕົ້າ, ຕສ່ຽວ ຕຸ໊ ຢຽດ ລິ໌ວ ເຍີຍ ແໝ່ງ, ຢ່າ ໄມ້ ຕສຸ ຕີ່ງ ຕສຸ໌ຍ. ນິ່ນ ເປຢົ໋າ ດຸ໊ດ ໄຕ່ ເຍີຍ ເຈົ໊າ ຕຸ໊ ຕສຢັ້ງ ແໝ່ງ.

²⁵ ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ຕສຢັ້ງ ໂຫ່ ອ໋ອຍ ເຖົາ, ຕສູ໊ງ ເຖົາ ອ໊ະ, ໄຕ່ ມີ່ງ ເຍີຍ ມ່ຽນ ໄຮ໌ ທິນ-ຮູ່ງ ເຍີຍ ຕອນ ເຍີຍ ເຖຈຍ, ຕສ່ຽວ ນັ່ງ ຕ້າຍ ຕສຢັ້ງ ຈ໊ຽນ.

²⁶ ຕສັ່ງ ເຕ໋ຍ ຮນັ້ງ ຫາຍ ນໍ ໂຕສ໋ວ ຕສຢັ້ງ ແໝ່ງ ເຍີຍ ກອນ-ຍ່ວນ, ນິ່ນ ຢ່າ ຈິວ ປຸນ ນິ່ນ ເຍີຍ ຕອນ ຮນັ້ງ ວົ້ວ ນໍ ໂຕສ໋ວ ຕສຢັ້ງ ແໝ່ງ ເຍີຍ ກອນ-ຍ່ວນ.

²⁷ ຕສັ່ງ ເຕ໋ຍ ຢ່າ ປຸນ ນິ່ນ ເຍີຍ ຕອນ ມ່າຍ ຫລີ່ງ ຊ້ຽມ ຕສຸ໌ຍ ເຫວີ່ຍ ຕສຸ ນິ່ນ ເຍີຍ ຕອນ ໂຕສ໋ວ ປ້າມ ມ່ຽນ ເຍີຍ ຕອນ.

²⁸ “ເມີ່ຍ ບົວ ໄມ້ ຕູ໋ງ ເຫວີ່ຍ ນ້າຍ ເຕີ໋ຍ ສີ່ ຮນ້ຳ ໄມ້ ເມ່ງ ແປະ. ຕສຢັ້ງ ໂຫ່ ອ໋ອຍ ເຖົາ, ຢຽມ ໂຕສ໊ວ ເຍີຍ ຢຽດ ຕສູ໊ງ ຕຸ໊ ໄຮ໌ ນິ່ນ ເຍີຍ ເຖຈຍ

²⁹ ຕສ່ຽວ ຢຽມ ໂຕສ໊ວ ທສວດ ຕ້າຍ. ໂຕສ໋ວ ຫລົງ ວົ້ວ ເຕີ໋ຍ ຕຸ໊ ນັ່ງ ຕ້າຍ ຕສຢັ້ງ ຈ໊ຽນ. ໂຕສ໋ວ ຫວ່າຍ ວົ້ວ ເຕີ໋ຍ ນັ່ງ ຕ້າຍ ຕສຸ ຕີ່ງ ຕສຸ໌ຍ.

ເຖງ ເຢ​ຊູ ໂຕສ໋ວ ຕສອງ-ເຕສ໋ງ

³⁰ “ເຢຍ ໄມ້ ໄຮ່ ເອີຍ ເຢຍ ກັ້ນ ເຍີຍ ໂຮຍ້ວ ໂຕສ໋ວ ຫາຍ ຫຍູ່ງ. ທິນ-ຮູ່ງ ຮນັ້ງ ຫາຍ ນໍ ບົ໋ວ ເຢຍ, ເຢຍ ຕສ່ຽວ ຮນັ້ງ ວົ້ວ ນໍ ຊ້ຽມ. ເຢຍ ຢ່າ ແປ້ງ ຟິມ ເຍີຍ ຊ້ຽມ, ເຫວີ່ຍ ຕສຸ ເຢຍ ໄມ້ ເຕສີ໌ຍ ອ໋ອຍ ເອີຍ ເຢຍ ກັ້ນ ເຍີຍ ເອີ໋ຍ ໂຕສ໋ວ. ຂູງ ອ໋ອຍ ເອີຍ ພ້າຍ ເຢຍ ຕ້າຍ ວົ້ວ ເຕົ້າ ເຍີຍ ເອີ໋ຍ ຮນັ້ງ.

³¹ ເຊ ກ໊ອງ ເຢຍ ເຫວີ່ຍ ເຢຍ ກັ້ນ ໂຕສ໋ວ ຕສອງ-ເຕສ໋ງ, ມ່ຽນ ຕສ່ຽວ ຝຸນ ໄມ້ ຕສຽນ.

³² ມປ່າ ແອ໋ງ ມ່າຍ ເຕົ້າ ເຖງ ເຢຍ ໂຕສ໋ວ ຕສອງ-ເຕສ໋ງ. ເຢຍ ຮິ້ວ ຕຸ໊ ນິ່ນ ເຍີຍ ຕສອງ-ເຕສ໋ງ ຫວ່າ ຕສະເກ້ງ ຕສຽນ ເຍີຍ.

³³ “ເມີ່ຍ ບົວ ພ້າຍ ມ່ຽນ ມີ່ງ ໂຢ​ຮັນ ວົ້ວ, ນິ່ນ ຢ່າ ເຫວີ່ຍ ຕສຽນ ເລີ໌ຍ ໂຕສ໋ວ ຕສອງ-ເຕສ໋ງ.

³⁴ ເຢຍ ໄມ້ ເຕສີ໌ຍ ຖຈຽມ ຕສຸ ມ່ຽນ ເຖງ ເຢຍ ໂຕສ໋ວ ຕສອງ-ເຕສ໋ງ. ເຢຍ ຂູງ ຮນັ້ງ ນ້າຍ ນໍ ກ໊ອງ ເຫວີ່ຍ ປຸນ ເມີ່ຍ ບົວ ຕຸ໊ ໂອຈ໋ວ ຮນັ້ງ.

³⁵ ໂຢ​ຮັນ ເປີ໊ຍ ນອມ ຕັງ, ຕ໊ຽມ ເຕສັຍ ອຈັງ ເຍີຍ. ເມີ່ຍ ບົວ ຢ່າ ອຈຽນ-ໂຢ້ວ ອະເຮນີ້ຍ ຢຽມ ຖສາມ ນິ່ນ ເຍີຍ ອຈັງ.

³⁶ “ເຢຍ ຢ່າ ມ່າຍ ຫຍູ່ງ ໂຕສ໋ວ ຕສອງ-ເຕສ໋ງ ເກົ້າ ໂຮລ ເຈ໋ຍ ໂຢ​ຮັນ ໂຕສ໋ວ ເຍີຍ. ເຊ ຕົ້ງ ຕສັ່ງ ເຕ໋ຍ ພ້າຍ ເຢຍ ໂຕສ໋ວ ຕສຢັ໋ງ ເຍີຍ ຫຍູ່ງໆ ກົງ. ເຊ ອີ້ ຕສັ່ນ ເຢຍ ໂຕສ໋ວ ຈ໊ຽນ ນ້າຍ ເຕີ໋ຍ ກົງ ປຸນ ທສີງ ຕສັ່ງ ເຕ໋ຍ ກັ້ນ ພ້າຍ ເຢຍ ຕ້າຍ.

³⁷ ຕສັ່ງ ເຕ໋ຍ ພ້າຍ ເຢຍ ຕ້າຍ, ນິ່ນ ກັ້ນ ຢ່າ ເຖງ ເຢຍ ໂຕສ໋ວ ຕສອງ-ເຕສ໋ງ. ມປ່າ ເມີ່ຍ ບົວ ໄມ້ ໄຮ໌ ເຈ໋ຍ ນິ່ນ ເຍີຍ ເຖຈຍ ຢ່າ ໄມ້ ປວັດ ເຈ໋ຍ ນິ່ນ ເຍີຍ ຝັງ ເຕສີ໊ຍ.

³⁸ ເມີ່ຍ ບົວ ເຍີຍ ໂຮຍ້ວ ໄມ້ ຕສ້າງ ນິ່ນ ເຍີຍ ຫວ່າ, ເຫວີ່ຍ ຕສຸ ເມີ່ຍ ບົວ ໄມ້ ສຽນ ນິ່ນ ພ້າຍ ຕ້າຍ ວົ້ວ ເຕົ້າ.

³⁹ ເມີ່ຍ ບົວ ທຈະ ຕສ້າ ກີງ-ໂຊວ, ຫລ່າຍ ກີງ-ໂຊວ ໄຮ່ ເຖງ ເມີ່ຍ ບົວ ຕຸ໊ ຢຽດ ລິ໌ວ ເຍີຍ ແໝ່ງ. ນ້າຍ ກີງ-ໂຊວ ເຖງ ເຢຍ ໂຕສ໋ວ ຕສອງ-ເຕສ໋ງ

⁴⁰ ມປ່າ ເມີ່ຍ ບົວ ໄມ້ ຄັ້ງ ຕ້າຍ ລໍ໌ ເຢຍ ຕຸ໊ ຕສຢັ້ງ ແໝ່ງ.

⁴¹ “ເຢຍ ໄມ້ ເຕສີ໌ຍ ລໍ໌ ມ່ຽນ ເທສງ ເຢຍ.

⁴² ເຢຍ ຮິ້ວ ຕຸ໊ ເມີ່ຍ ບົວ, ຢ່າ ຮິ້ວ ຕຸ໊ ຢຽມ ເມີ່ຍ ບົວ ເຍີຍ ໂຮຍ້ວ ເມີ່ຍ ບົວ ໄມ້ ຮນ້ຳ ທິນ-ຮູ່ງ.

⁴³ ເຢຍ ດາມ ເຢຍ ເຍີຍ ເຕຍ ເຍີຍ ເມ່ງ ຕ້າຍ ມປ່າ ເມີ່ຍ ບົວ ໄມ້ ຕສິ໊ບ ເຢຍ. ເຊ ກ໊ອງ ມ່າຍ ເຕົ້າ ດາມ ຈ໊ຽນ ນິ່ນ ກັ້ນ ເຍີຍ ເມ່ງ ຕ້າຍ, ເມີ່ຍ ບົວ ອ໋ອຍ ຕສິ໊ບ ນິ່ນ ເຍີຍ.

⁴⁴ ເມີ່ຍ ບົວ ອະເຮນີ້ຍ ຕຸ໊ ມ່ຽນ ເທສງ, ມປ່າ ເມີ່ຍ ບົວ ໄມ້ ລໍ໌ ດຸ ເຕົ້າ ວົ້ວ ເຕົ້າ ທິນ-ຮູ່ງ ເທສງ ເມີ່ຍ ບົວ. ວົ້ວ ຫຍູ່ງ ເມີ່ຍ ບົວ ຮນັ້ງ ຫາຍ ນໍ ໄຮ່ ສຽນ ເຢຍ?

⁴⁵ “ເມີ່ຍ ບົວ ໄມ້ ຕູ໋ງ ຮນ້ຳ ເຢຍ ອ໋ອຍ ຢຽມ ຕສັ່ງ ເຕ໋ຍ ເຍີຍ ດສະຮມຽນ ໂກ໋ ເມີ່ຍ ບົວ. ອ໋ອຍ ໂກ໋ ເມີ່ຍ ບົວ ວົ້ວ ເຕົ້າ ເຊ ໂມ​ເຊ, ຕົ້ງ ເມີ່ຍ ບົວ ມ່າຍ ລ່ຳ ຮນ້ຳ ວົ້ວ ເຕົ້າ.

⁴⁶ ເຊ ກ໊ອງ ເມີ່ຍ ບົວ ຕສະເກ້ງ ສຽນ ໂມ​ເຊ, ເມີ່ຍ ບົວ ຕສ່ຽວ ສຽນ ເຢຍ, ເຫວີ່ຍ ຕສຸ ນິ່ນ ເຟ້ຍ ເຍີຍ ກ໊ອງ ເຖົາ ເຢຍ.

⁴⁷ ມປ່າ ເມີ່ຍ ບົວ ໄມ້ ສຽນ ໂມ​ເຊ ເຟ້ຍ ເຍີຍ ນໍ, ເມີ່ຍ ບົວ ຮນັ້ງ ຫາຍ ນໍ ໄຮ່ ສຽນ ເຢຍ ເຍີຍ ຫວ່າ?”