โยฮัน 10 - ฉบับอักษรลาวປະກີ ຢູ້ງ ຫລາດ ເຍີຍ ຫວ່າ-ເປີ໊ຍ 1 ເຢຊູ ກ໊ອງ, “ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ຫາຍ ເຕົ້າ ເປັຍ ປະກີ ຢູ້ງ ຫລາດ, ໄມ້ ຢັ້ງ ຫລາດ ແກ້ງ ເປັຍ, ຂູງ ຍອງ ຢັ້ງ ກັ້ນ ນອມ ຕ໋ອງ ເປັຍ, ນິ່ນ ໂຕສ໋ວ ຈັ໋ນ-ຕສະ ໜິ່ມ ຢູ້ງ, ທສ້າງ ຢູ້ງ ຮນັ້ງ. 2 ມປ່າ ຢັ້ງ ແກ້ງ ເປັຍ ວົ້ວ ເຕົ້າ ເຊ ໂກ໋ວ ປະກີ ຢູ້ງ ເຍີຍ ມ່ຽນ. 3 ຕສົ໊ວ ແກ້ງ ເຍີຍ ມ່ຽນ ເຖງ ນິ່ນ ຄອຍ ແກ້ງ. ປະກີ ຢູ້ງ ຢ່າ ໝວັງ ນິ່ນ ເຍີຍ ເຖຈຍ. ນິ່ນ ເອີຍ ເຕົ້າໆ ປະກີ ຢູ້ງ ເຍີຍ ບົ໋ວ ຕສຢ໋າວ, ຕສ່ຽວ ຕໍ້ ນິ່ນ ບົວ ທສວດ ຫລາດ ມີ່ງ. 4 ປູ໋ງ ນິ່ນ ກັ້ນ ເຍີຍ ປະກີ ຢູ້ງ ທສວດ ເດສ່ງ ຕ້າຍ, ນິ່ນ ມີ່ງ ດ່າງ. ປະກີ ຢູ້ງ ຢ່າ ກັນ ຈ໊ຽນ ນິ່ນ ມີ່ງ ເຫວີ່ຍ ຕສຸ ນິ່ນ ບົວ ເຕສັ໊ຍ ຕຸ໊ ນິ່ນ ເຍີຍ ເຖຈຍ. 5 ກັ້ນ ເຕົ້າ ມ່ຽນ ຢູ້ງ ໄມ້ ກັນ. ຂູງ ອ໋ອຍ ເປຢົ໋າ ຮນັ້ງ, ເຫວີ່ຍ ຕສຸ ເຕສັ໊ຍ ໄມ້ ຕຸ໊ ນິ່ນ ເຍີຍ ເຖຈຍ.” 6 ເຢຊູ ກ໊ອງ ນ້າຍ ຕິ້ວ ຫວ່າ-ເປີ໊ຍ ບົ໋ວ ນິ່ນ ບົວ ມປ່າ ນິ່ນ ບົວ ໄມ້ ເມ່ງ ແປະ ເອີ໋ຍ ເລີ໌ຍ. ເຢຊູ ເຊ ໂກ໋ວ ປະກີ ຢູ້ງ ຫລົງ ເຍີຍ ຕສ໊ຽວ 7 ເຢຊູ ຕສ່ຽວ ແອ໋ງ ກ໊ອງ ບົ໋ວ ນິ່ນ ບົວ, “ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ເຢຍ ເຊ ນ້າຍ ເຕີ໋ຍ ປະກີ ຢູ້ງ ເຍີຍ ຫລາດ ແກ້ງ. 8 ຕ້າຍ ດ່າງ ເຢຍ ວົ້ວ ເຕີ໋ຍ ຢຽດ ຕສູ໊ງ ໂຕສ໋ວ ຈັ໋ນ-ຕສະ ໜິ່ມ ຢູ້ງ, ທສ້າງ ຢູ້ງ ຮນັ້ງ. ມປ່າ ປະກີ ຢູ້ງ ໄມ້ ໝວັງ ນິ່ນ ບົວ. 9 ເຢຍ ເຊ ຫລາດ ແກ້ງ. ຫາຍ ເຕົ້າ ຢັ້ງ ເຢຍ ນ້າຍ ເຕົ້າ ແກ້ງ ເປັຍ ອ໋ອຍ ຕຸ໊ ໂອຈ໋ວ ຢ່າ ເປັຍໆ ທສວດໆ ລໍ໌ ຫຍັ່ນ. 10 ຈັ໋ນ-ຕສະ ຕ້າຍ ຂູງ ອ໋ອຍ ໜິ່ມ, ອ໋ອຍ ໄຕ໋, ອ໋ອຍ ໝຽດ, ມປ່າ ເຢຍ ຕ້າຍ ເຫວີ່ຍ ປຸນ ປ້າມ ມ່ຽນ ຕຸ໊ ຕສຢັ້ງ ແໝ່ງ, ຕສູ໊ງ ອ໋ອຍ ປຸນ ນິ່ນ ບົວ ຕຸ໊ ຕຸ້ນ ຢຸ້ນ ເຍີຍ ແໝ່ງ. 11 “ເຢຍ ເຊ ໂກ໋ວ ປະກີ ຢູ້ງ ຫລົງ ເຍີຍ ຕສ໊ຽວ. ໂກ໋ວ ປະກີ ຢູ້ງ ຫລົງ ວົ້ວ ເຕົ້າ ຫຍຸ່ນ ເຫວີ່ຍ ປະກີ ຢູ້ງ ເຊ້ຍ ນິ່ນ ເຍີຍ ແໝ່ງ. 12 ທສີ້ງ ຕ້າຍ ເຍີຍ ກົງ-ມ່ຽນ ໄມ້ ເຕສີ໌ຍ ຕສຽນ ໂກ໋ວ ປະກີ ຢູ້ງ ເຍີຍ ຕສ໊ຽວ. ປະກີ ຢູ້ງ ຢ່າ ໄມ້ ເຕສີ໌ຍ ນິ່ນ ກັ້ນ ເຍີຍ. ປວັດ ເຮ່ຍ ຈູ໊ ຕ້າຍ ຕສ່ຽວ ກວັ່ງ ຈ໊ຽນ ເປຢົ໋າ. ເຮ່ຍ ຈູ໊ ຕສ່ຽວ ເປ໊ດ, ແຮະ ປະກີ ຢູ້ງ ກວັ້ນ ເປຢົ໋າ ດສ໋ານ ເດສ່ງ. 13 ທສີ້ງ ຕ້າຍ ເຍີຍ ກົງ-ມ່ຽນ ເປຢົ໋າ ໝີ່ ອ໊ະ, ເຫວີ່ຍ ຕສຸ ມ່ຽນ ທສີ້ງ ນິ່ນ ຮນັ້ງ, ນິ່ນ ໄມ້ ເດສົ້າ ຢູ້ງ. 14 “ເຢຍ ເຊ ໂກ໋ວ ປະກີ ຢູ້ງ ຫລົງ ເຍີຍ ຕສ໊ຽວ. ເຢຍ ຮິ້ວ ຕຸ໊ ເຢຍ ເຍີຍ ປະກີ ຢູ້ງ, ເຢຍ ເຍີຍ ປະກີ ຢູ້ງ ຢ່າ ຮິ້ວ ຕຸ໊ ເຢຍ, 15 ຮນັ້ງ ຕສັ່ງ ເຕ໋ຍ ຮິ້ວ ຕຸ໊ ເຢຍ, ເຢຍ ຢ່າ ຮິ້ວ ຕຸ໊ ຕສັ່ງ ເຕ໋ຍ. ເຢຍ ຢ່າ ເຫວີ່ຍ ນ້າຍ ເຕີ໋ຍ ຢູ້ງ ເຊ້ຍ ເຢຍ ເຍີຍ ແໝ່ງ. 16 ເຢຍ ແອ໋ງ ກັ້ນ ມ່າຍ ປະກີ ຢູ້ງ, ເຊ ໄມ້ ເຕສີ໌ຍ ຢຽມ ນ້າຍ ນອມ ຫລາດ ເຍີຍ ປະກີ ຢູ້ງ. ເຢຍ ອ໋ອຍ ຕສຸ ຕໍ້ ນິ່ນ ບົວ ຕ້າຍ. ນິ່ນ ບົວ ຕສ່ຽວ ໝວັງ ເຢຍ ເຍີຍ ເຖຈຍ, ຢ່າ ເຖສົາ ນ້າຍ ເຕີ໋ຍ ເປ໋ນ ຢຽດ ກວັ້ນ, ມ່າຍ ຢຽດ ເຕົ້າ ຕສ໊ຽວ ໂກ໋ວ ນິ່ນ ບົວ ຮນັ້ງ. 17 “ຕສັ່ງ ເຕ໋ຍ ຮນ້ຳ ເຢຍ ເຫວີ່ຍ ຕສຸ ເຢຍ ເຊ້ຍ ເຢຍ ກັ້ນ ເຍີຍ ແໝ່ງ ໄຕ່. ເຢຍ ເຊ້ຍ ເຢຍ ເຍີຍ ແໝ່ງ ເຫວີ່ຍ ແອ໋ງ ຕຸ໊ ແໝ່ງ ດສ໋ວນ. 18 ໄມ້ ມ່າຍ ຫາຍ ເຕົ້າ ເຕສ໊າະ ເຢຍ ເຍີຍ ແໝ່ງ, ເຢຍ ກັ້ນ ເຊ້ຍ ເຢຍ ເຍີຍ ແໝ່ງ. ເຢຍ ມ່າຍ ເລີ໌ຍ ເຊ້ຍ ເຢຍ ເຍີຍ ແໝ່ງ ຢ່າ ມ່າຍ ເລີ໌ຍ ແອ໋ງ ຕຸ໊ ເຢຍ ເຍີຍ ແໝ່ງ ດສ໋ວນ. ເຢຍ ເຍີຍ ເຕຍ ພ້າຍ ເຢຍ ຮນັ້ງ ນ້າຍ ນໍ ໂຕສ໋ວ.” 19 ຫລາຍ ນ້າຍ ເຕີ໋ຍ ຫວ່າ ຢິວໄທ ມ່ຽນ ແອ໋ງ ປຸນ ອກອຍ ໝີ່ ອ໊ະ. 20 ມ່າຍ ທສ້ຳ ເຍີຍ ກ໊ອງ, “ນິ່ນ ຕສຸ ມ້ຽນ ມົວະ. ນິ່ນ ປຸ໊ດ ດິນ ໝີ່ ອ໊ະ. ໝວັງ ນິ່ນ ເຍີຍ ຫວ່າ ໂຕສ໋ວ ຫາຍ ຫຍູ່ງ ແລ່!” 21 ມປ່າ ມ່າຍ ເຕີ໋ຍ ກ໊ອງ, “ຫາຍ ເຕົ້າ ຕສຸ ມ້ຽນ ມົວະ ໄມ້ ໄຮ່ ກ໊ອງ ນ້າຍ ຫຍູ່ງ ຫວ່າ ເຫລາະ. ມ້ຽນ ໄຮ່ ປຸນ ມຕສີງ ແມ່ງ ເຍີຍ ມ່ຽນ ໝັ່ງ ຕຸ໊ ປວັດ ເຍີຍ?” ຢິວໄທ ມ່ຽນ ເອກ້ມ ເຢຊູ 22 ວົ້ວ ຕສັ່ນ ຢຽມ ເຢລູຊາເລມ ຕສີ້ງ ເຈ໋ຍ ໂຫ່ວ ຕສັ່ງ ທິນ-ຮູ່ງ ເຍີຍ ເປຢົ໊າ ເຍີຍ ຕສິ໊ບ ເຊ ຕົງ-ເກນ ຮນອຍ. 23 ເຢຊູ ຢຽມ ຕສັ່ງ ທິນ-ຮູ່ງ ເຍີຍ ເປຢົ໊າ, ຊາໂລມອນ ເຍີຍ ປີ໋ງ ລ່າງ ຕ໋ອງ, ເຈ໋ຍ ມີ່ງ ເຈ໋ຍ ຕ້າຍ ເຍີຍ. 24 ຢິວໄທ ມ່ຽນ ຕ້າຍ ກັ໊ບ ຕສຸ໊ນ ນິ່ນ ວົ້ວ ຢ່າ ໜ່າຍ, “ເມີ່ຍ ອ໋ອຍ ປຸນ ເຢຍ ບົວ ໂຮຍ້ວ ຫລຸ່ນ ເຖົາ ຫາຍ ຕສັ່ນ? ເຊ ກ໊ອງ ເມີ່ຍ ຕສະເກ້ງ ກີຕູ່, ບົ໋ວ ຕສະ ເຢຍ ບົວ ມ່າະ!” 25 ເຢຊູ ເຕົາ, “ເຢຍ ບົ໋ວ ເຈ໋ຍ ເມີ່ຍ ບົວ, ເມີ່ຍ ບົວ ຢ່າ ໄມ້ ສຽນ ນີ! ເຢຍ ເຕ໊ງ ເຢຍ ເຍີຍ ເຕຍ ເຍີຍ ບົ໋ວ ໂຕສ໋ວ ບົວະ ຮ່ອງ ເຍີຍ ສີ່. ວົ້ວ ເຕີ໋ຍ ສີ່ ເຖງ ເຢຍ ໂຕສ໋ວ ຕສອງ-ເຕສ໋ງ. 26 ມປ່າ ເມີ່ຍ ບົວ ໄມ້ ສຽນ ເຫວີ່ຍ ຕສຸ ເມີ່ຍ ບົວ ໄມ້ ເຕສີ໌ຍ ເຢຍ ເຍີຍ ປະກີ ຢູ້ງ. 27 ເຢຍ ເຍີຍ ປະກີ ຢູ້ງ ໝວັງ ເຢຍ ເຍີຍ ເຖຈຍ. ເຢຍ ຢ່າ ຮິ້ວ ຕຸ໊ ນິ່ນ ບົວ, ນິ່ນ ບົວ ຢ່າ ກັນ ຈ໊ຽນ ເຢຍ ມີ່ງ. 28 ເຢຍ ປຸນ ນິ່ນ ບົວ ມ່າຍ ຢຽດ ລິ໌ວ ເຍີຍ ແໝ່ງ, ຢຽດ ລິ໌ວ ໄມ້ ຕສຸ ໄຕ່. ນິ່ນ ບົວ ຢຽມ ເຢຍ ເຍີຍ ປົ໌ວ, ໄມ້ ມ່າຍ ຫາຍ ເຕົ້າ ໄຮ່ ທສ້າງ ຕຸ໊ ທສວດ. 29 ເຢຍ ເຍີຍ ເຕຍ ເຕສ໊າະ ນິ່ນ ບົວ ຈິວ ປຸນ ເຢຍ. ເຕຍ ຢ່າ ເກົ້າ ໂຮລ ເຈ໋ຍ ໝ່ານ ໝວດ. ນິ່ນ ບົວ ຢຽມ ເຢຍ ເຍີຍ ເຕຍ ເຍີຍ ປົ໌ວ, ໄມ້ ມ່າຍ ຫາຍ ເຕົ້າ ໄຮ່ ທສ້າງ ຕຸ໊ ທສວດ. 30 ເຢຍ ເຖສົາ ເຢຍ ເຍີຍ ເຕຍ ເປ໋ນ ຢຽດ ເຕົ້າ ຮນັ້ງ.” 31 ຢິວໄທ ມ່ຽນ ແອ໋ງ ເຕສ໊າະ ຫລະເປຢີ໊ຍ ອ໋ອຍ ຕສົງ ເຢຊູ ໄຫ່ ອ໊ະ. 32 ເຢຊູ ບົ໋ວ ນິ່ນ ບົວ, “ເຢຍ ເອີຍ ເຢຍ ເຍີຍ ເຕຍ ພ້າຍ ເຢຍ ໂຕສ໋ວ ຄູ້ ສີ່ ທສ້ຳ ເຍີຍ ປຸນ ເມີ່ຍ ບົວ ປວັດ. ຫລາຍ ຫາຍ ດສຸ່ນ ຄູ້ ສີ່ ເມີ່ຍ ບົວ ເຕສ໊າະ ຫລະເປຢີ໊ຍ ອ໋ອຍ ຕສົງ ເຢຍ ໄຕ່?” 33 ນິ່ນ ບົວ ເຕົາ, “ເຢຍ ບົວ ໄມ້ ເຕສີ໌ຍ ຫລາຍ ເມີ່ຍ ໂຕສ໋ວ ເຍີຍ ຄູ້ ສີ່ ອ໋ອຍ ຕສົງ ເມີ່ຍ, ເຊ ຫລາຍ ເມີ່ຍ ຄີ ທິນ-ຮູ່ງ. ເມີ່ຍ ເຊ ປ້າມ ມ່ຽນ ຮນັ້ງ ມປ່າ ເທສງ ເມີ່ຍ ກັ້ນ ໂຕສ໋ວ ທິນ-ຮູ່ງ.” 34 ເຢຊູ ເຕົາ, “ເມີ່ຍ ບົວ ກັ້ນ ເຍີຍ ເລີ໌ຍ-ຫລັດ ເຟ້ຍ ຈ໊ຽນ ກ໊ອງ ນ້າຍ ໂຈ໋ວ ຫວ່າ ໄມ້ ເຕສີ໌ຍ? ‘ເຢຍ ກ໊ອງ, ເມີ່ຍ ບົວ ເຊ ຕສ້ຽນ.’ 35 ບົວ ຮິ້ວ ຕຸ໊ ກີງ-ໂຊວ ເຍີຍ ຫວ່າ ຢຽດ ລິ໌ວ ໄມ້ ໄຮ່ ກ໊ອຍ ຢ່ຽນ. ເຊ ກ໊ອງ ຕສິ໊ບ ທິນ-ຮູ່ງ ເຍີຍ ຫວ່າ ວົ້ວ ເຕີ໋ຍ ມ່ຽນ ທິນ-ຮູ່ງ ເຫ່ວ ຕສ້ຽນ ນໍ, 36 ວົ້ວ ຫຍູ່ງ, ຕສັ່ງ ເຕ໋ຍ ກິ໊ນ ຕ້າຍ ພ້າຍ ເອຈ່ຍ ປ້າມ ເກນ ວົ້ວ ເຕົ້າ ນີ? ເຢຍ ກ໊ອງ ເຢຍ ໂຕສ໋ວ ທິນ-ຮູ່ງ ເຍີຍ ຕອນ, ເມີ່ຍ ບົວ ເຫວີ່ຍ ຫາຍ ຕິ່ວ ກ໊ອງ ເຢຍ ຄີ ທິນ-ຮູ່ງ? 37 ເຊ ກ໊ອງ ເຢຍ ໄມ້ ເອີຍ ເຢຍ ເຍີຍ ເຕຍ ເຍີຍ ຕສະເອີ໋ຍ ໂຕສ໋ວ ນໍ, ໄມ້ ຕູ໋ງ ສຽນ ເຢຍ. 38 ມປ່າ ເຊ ກ໊ອງ ເຢຍ ເອີຍ ຈ໊ຽນ ໂຕສ໋ວ, ໄມ້ ກຸ໊ນ ເມີ່ຍ ບົວ ໄມ້ ສຽນ ເຢຍ, ເມີ່ຍ ບົວ ຖສໍ່ ອ໋ອຍ ຕສຸ ສຽນ ເຢຍ ໂຕສ໋ວ ເຍີຍ ສີ່. ເມີ່ຍ ບົວ ຕສ່ຽວ ໄຮ່ ຮິ້ວ ຕຸ໊ ຕສັ່ງ ເຕ໋ຍ ຢຽມ ເຢຍ ກະຍົ໌ວ. ເຢຍ ຢ່າ ຢຽມ ຕສັ່ງ ເຕ໋ຍ ກະຍົ໌ວ.” 39 ວົ້ວ ເຕີ໋ຍ ມ່ຽນ ແອ໋ງ ອ໋ອຍ ເຕສ໊າະ ເຢຊູ, ມປ່າ ເຢຊູ ຢຽມ ນິ່ນ ບົວ ເຍີຍ ປົ໌ວ-ເດ໊ຍ ເປຢົ໋າ ທສວດ ໝີ່ ອ໊ະ. 40 ເຢຊູ ແອ໋ງ ດສ໋ວນ ວົ້ວ ຫງ່ານ ຕສິ ຈໍແດນ ດ້າຍ, ຕົ້ງ ຕສິ້ນ ດ່າງ ໂຢຮັນ ເຖງ ມ່ຽນ ເຈ໋ຍ ວວມ ເຍີຍ ເລີ໌ຍ ວົ້ວ ນອມ ຕ໋ອງ, ຢຽມ ຖສາມ ວົ້ວ. 41 ມ່າຍ ມ່ຽນ ທສ້ຳ ເຍີຍ ຕ້າຍ ລໍ໌ ນິ່ນ. ນິ່ນ ບົວ ກ໊ອງ, “ໂຢຮັນ ໄມ້ ໂຕສ໋ວ ເຈ໋ຍ ຫາຍ ຫຍູ່ງ ບົວະ ຮ່ອງ ເຍີຍ ຈັ໋ງ-ໂຫ່. ມປ່າ ໂຢຮັນ ກ໊ອງ ຫາຍ ຫຍູ່ງ ເຖົາ ນ້າຍ ລ່ານ ມ່ຽນ ຢຽດ ຕສູ໊ງ ເຊ ຕສຽນ ເຍີຍ.” 42 ຢຽມ ວົ້ວ ມ່າຍ ມ່ຽນ ທສ້ຳ ເຍີຍ ຕສ່ຽວ ສຽນ ເຢຊູ. |
Mien Bible (Lao Script) © 2007 Thailand Bible Society, 2007.
Thailand Bible Society