เย​เล​มี 26 - ฉบับอักษรลาว

ມ່ຽນ ອ໋ອຍ ໄຕ໋ ເຢ​ເລ​ມີ

¹ ຢູ​ດາ ຮູ່ງ, ໂຢ​ສິ​ຢາ, ເຍີຍ ຕອນ, ເຢ​ໂຮ​ຢາ​ຄິມ, ເຈ໌ຍ ກອນ ໂຕສ໋ວ ຮູ່ງ ກຸ໊ນ ເຍີຍ ຕສຢັ້ງ ໂຫ່, ມ່າຍ ນ້າຍ ໂຈ໋ວ ຫວ່າ ຢຽມ ຕສ໊ຽວ ຕ້າຍ.

² ຕສ໊ຽວ ຮນັ້ງ ນ້າຍ ກ໊ອງ, “ເມີ່ຍ ອ໋ອຍ ຕສຸ ໂຊ້ວ ຈ໊ຽນ ຕສັ່ງ ຕສ໊ຽວ ເຍີຍ ເປຢົ໊າ, ຫລາດ ກະຍົ໌ວ. ກ໊ອງ ບົ໋ວ ຢູ​ດາ ເຍີຍ ນອມໆ ຕສີ້ງ ຕ້າຍ ເຍີຍ ມ່ຽນ, ຕົ້ງ ຕ້າຍ ຕສັ່ງ ຕສ໊ຽວ ເຍີຍ ເປຢົ໊າ ປ໋າຍ ຕສ໊ຽວ. ອ໋ອຍ ຕສຸ ກ໊ອງ ເຢຍ ບົ໋ວ ເມີ່ຍ ກ໊ອງ ເຍີຍ ຢຽດ ຕສູ໊ງ ຫວ່າ. ໄມ້ ຕູ໋ງ ປູ໋ງ ດ໊ອດ ຢຽດ ໂຈ໋ວ.

³ ເດສ໋ຍ ນິ່ນ ບົວ ອ໋ອຍ ໝວັງ, ເຕົ້າໆ ຕສ່ຽວ ເລີ່ຍ ອກອຍ ນິ່ນ ເອ໊າະ ເຍີຍ ເຈົ໊າ ເຫວີ່ຍ ປຸນ ເຢຍ ກ໊ອຍ ຕສະເອີ໋ຍ, ໄມ້ ຫລາຍ ນິ່ນ ບົວ ໂຕສ໋ວ ເຍີຍ ເອ໊າະ ສີ່ ປຸນ ນິ່ນ ບົວ ຕສຸ ທສ້ຽວ ເຍີຍ ເຕສະ ໜ່ານ.”

⁴ ເມີ່ຍ ອ໋ອຍ ຕສຸ ບົ໋ວ ນິ່ນ ບົວ, “ ຕສ໊ຽວ ຮນັ້ງ ນ້າຍ ກ໊ອງ, ‘ເຊ ກ໊ອງ ເມີ່ຍ ບົວ ໄມ້ ໝວັງ ເຢຍ, ໄມ້ ຢັ້ງ ເຢຍ ຈິວ ປຸນ ເມີ່ຍ ບົວ ເຍີຍ ເລີ໌ຍ-ຫລັດ,

⁵ ຢ່າ ໄມ້ ເອີຍ ຈ໊ຽນ ເຢຍ ເຍີຍ ໂປວ ກ໊ອງ ເຍີຍ ຫວ່າ, ເຊ ເຢຍ ໄມ້ ຕີ້ງ ລ່ຽວ ເຍີຍ ພ້າຍ ມີ່ງ ວົ້ວ ເຕີ໋ຍ ໂຕ່ວ ຫວ່າ ມ່ຽນ, ໄມ້ ກຸ໊ນ ເມີ່ຍ ບົວ ໄມ້ ໝວັງ ເຈ໋ຍ,

⁶ ເຢຍ ຕສ່ຽວ ໂຕສ໋ວ ປຸນ ນ້າຍ ນອມ ເປຢົ໊າ ຮນັ້ງ ຊີ​ໂລ ຢ່າ ປຸນ ນ້າຍ ນອມ ຕສີ້ງ ເປ໋ນ ລູ່ງ ເດ໊ຍ ໝ່ານ ກົ໊ວະ ມ່ຽນ ຕສ໋ຽວ ເຍີຍ ຕ໋ອງ.’”

⁷ ໄຊ ມ່ຽນ ເຖສົາ ໂຕ່ວ ຫວ່າ ມ່ຽນ ເຖສົາ ຕສວັ໋ງ ມ່ຽນ ໄຮ໌ ເຢ​ເລ​ມີ ຢຽມ ຕສັ່ງ ຕສ໊ຽວ ເຍີຍ ເປຢົ໊າ ກ໊ອງ ວົ້ວ ເຕີ໋ຍ ຫວ່າ.

⁸ ເຢ​ເລ​ມີ ກ໊ອງ ລິ໌ວ ຕສ໊ຽວ ພ້າຍ ນິ່ນ ກ໊ອງ ບົ໋ວ ຕສວັ໋ງ ມ່ຽນ ເຍີຍ ຢຽດ ຕສູ໊ງ ຫວ່າ, ໄຊ ມ່ຽນ ເຖສົາ ໂຕ່ວ ຫວ່າ ມ່ຽນ ເຖສົາ ຕສວັ໋ງ ມ່ຽນ ເຍົາ ຈ໊ຽນ ນິ່ນ ກ໊ອງ, “ເມີ່ຍ ອ໋ອຍ ຕສຸ ໄຕ່ ອ໊ະ.

⁹ ເມີ່ຍ ເຫວີ່ຍ ຫາຍ ຕິ່ວ ເຕ໊ງ ຕສ໊ຽວ ເຍີຍ ບົ໋ວ ໂຕ່ວ ຫວ່າ ກ໊ອງ, ‘ນ້າຍ ນອມ ເປຢົ໊າ ອ໋ອຍ ຮນັ້ງ ຊີ​ໂລ. ນ້າຍ ນອມ ຕສີ້ງ ອ໋ອຍ ເປ໋ນ ປ່າຍ ຮວາງ ເຍີຍ ຕ໋ອງ, ໄມ້ ມ່າຍ ມ່ຽນ ຢຽມ?’” ຕສວັ໋ງ ແປະ ຝີງ ຕສ່ຽວ ຢຽມ ຕສັ່ງ ຕສ໊ຽວ ເຍີຍ ເປຢົ໊າ ເວີ່ຍ ກ໋ອມ ເຢ​ເລ​ມີ.

¹⁰ ຢູ​ດາ ເຍີຍ ເປຢີ໊ຍ ເຕສີ໊ຍ ໝວັງ ໄຮ໌ ນ້າຍ ເຕີ໋ຍ ສີ່, ນິ່ນ ບົວ ຢຽມ ຮູ່ງ ຕິ່ນ ຝາວ ເຖົາ ຕສັ່ງ ຕສ໊ຽວ ເຍີຍ ເປຢົ໊າ, ເຕສວີ໌ຍ ຈ໊ຽນ ຕສັ່ງ ຕສ໊ຽວ ເຍີຍ ເປຢົ໊າ ເຍີຍ ຊຢັງ-ແກ້ງ ເຍີຍ ແກ້ງ ດ່າງ.

¹¹ ໄຊ ມ່ຽນ ເຖສົາ ໂຕ່ວ ຫວ່າ ມ່ຽນ ກ໊ອງ ບົ໋ວ ວົ້ວ ເຕີ໋ຍ ເປຢີ໊ຍ ເຕສີ໊ຍ ເຖສົາ ຕສວັ໋ງ ແປະ ຝີງ, “ນ້າຍ ລ່ານ ມ່ຽນ ຕສີ່ ຕຸ໊ ຕີ່ງ ຕສຸ໌ຍ ໄຕ່ ອ໊ະ, ເຫວີ່ຍ ຕສຸ ນິ່ນ ໂຕ່ວ ຫວ່າ ກ໊ອງ ນ້າຍ ນອມ ຕສີ້ງ ຮນັ້ງ ເມີ່ຍ ບົວ ກັ້ນ ເຍີຍ ມນ່ອມ ໄຮ໌ ລິ໌ວ ເຍີຍ ນໍ.”

¹² ເຢ​ເລ​ມີ ຕສ່ຽວ ບົ໋ວ ຕສວັ໋ງ ເປຢີ໊ຍ ເຕສີ໊ຍ ເຖສົາ ຢຽດ ຕສູ໊ງ ແປະ ຝີງ, “ ຕສ໊ຽວ ພ້າຍ ເຢຍ ໂຕ່ວ ຫວ່າ ກ໊ອງ ນ້າຍ ນອມ ເປຢົ໊າ ເຖສົາ ນ້າຍ ນອມ ຕສີ້ງ. ນິ່ນ ກ໊ອງ ຕົ້ງ ເມີ່ຍ ບົວ ໝວັງ ໄຮ໌ ເຍີຍ ຢຽດ ຕສູ໊ງ ຫວ່າ.

¹³ ເຫວີ່ຍ ນ້າຍ ອີ້ ຕສັ່ນ ເມີ່ຍ ບົວ ອ໋ອຍ ຕສຸ ກ໊ອຍ ຢ່ຽນ ເມີ່ຍ ບົວ ເຍີຍ ເຈົ໊າ ເຖສົາ ໂຕສ໋ວ ເຍີຍ ສີ່, ໝວັງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ຫວ່າ. ຕສ໊ຽວ ຕສ່ຽວ ກ໊ອຍ ຕສະເອີ໋ຍ, ໄມ້ ຕສິ໋ວ ນິ່ນ ກ໊ອງ ເມີ່ຍ ບົວ ເຍີຍ ຫວ່າ ປຸນ ເມີ່ຍ ບົວ ຕສຸ ທສ້ຽວ ເຍີຍ ເຕສະ ໜ່ານ.

¹⁴ ມປ່າ ເຢຍ ກັ້ນ ແອ໊ະ, ເຢຍ ຢຽມ ເມີ່ຍ ບົວ ເຍີຍ ປົ໌ວ-ເດ໊ຍ. ເມີ່ຍ ບົວ ປວັດ ຮນັ້ງ ຫາຍ ນໍ ຫລົງ, ຮນັ້ງ ຫາຍ ນໍ ຫອບ, ເມີ່ຍ ບົວ ກຸ໊ນ ຮນັ້ງ ວົ້ວ ນໍ ໂຕສ໋ວ.

¹⁵ ເມີ່ຍ ບົວ ອ໋ອຍ ຕສຸ ຮິ້ວ ຕຸ໊ ຕີ່ງ, ເຊ ກ໊ອງ ເມີ່ຍ ບົວ ໄຕ໋ ເຢຍ ໄຕ່, ເມີ່ຍ ບົວ ຕສ່ຽວ ປຸນ ໄມ້ ໂຕສ໋ວ ຕ່ອງ ເຍີຍ ມ່ຽນ ເຍີຍ ດສຢ໊າມ ຫລ່ຽວ ທສວດ. ເມີ່ຍ ບົວ ເຖສົາ ນ້າຍ ນອມ ຕສີ້ງ ເຖສົາ ຢຽມ ຕສີ້ງ ກະຍົ໌ວ ເຍີຍ ແປະ ຝີງ ອ໋ອຍ ຕສຸ ດາມ-ຕອງ, ເຫວີ່ຍ ຕສຸ ຕສຽນ ສີ່ ຕສ໊ຽວ ພ້າຍ ເຢຍ ຕ້າຍ ເຕສ໊າະ ນ້າຍ ເຕີ໋ຍ ຢຽດ ຕສູ໊ງ ຫວ່າ ກ໊ອງ ປຸນ ເມີ່ຍ ບົວ ໝວັງ.”

¹⁶ ເປຢີ໊ຍ ເຕສີ໊ຍ ເຖສົາ ຕສວັ໋ງ ແປະ ຝີງ ຕສ່ຽວ ກ໊ອງ ບົ໋ວ ໄຊ ມ່ຽນ ເຖສົາ ໂຕ່ວ ຫວ່າ ມ່ຽນ, “ນ້າຍ ລ່ານ ມ່ຽນ ໄມ້ ຕສີ່ ຕຸ໊ ໄຕ່, ເຫວີ່ຍ ຕສຸ ນິ່ນ ເຕ໊ງ ຕສ໊ຽວ, ເຢຍ ບົວ ເຍີຍ ທິນ-ຮູ່ງ, ເຍີຍ ບົ໋ວ ເຖສົາ ເຢຍ ບົວ ກ໊ອງ ຫວ່າ.”

¹⁷ ມ່າຍ ເຕີ໋ຍ ກົ໊ວະ ຕສັ່ງ ເຍີຍ ມ່ຽນ ໂກ໋ ໂຊ້ວ ເຈ໌ຍ ຕ້າຍ ເຖສົາ ກັ໊ບ ຕສຸ໊ນ ເຍີຍ ຕສວັ໋ງ ແປະ ຝີງ ກ໊ອງ,

¹⁸ “ຢຽມ ຢູ​ດາ ເຍີຍ ຮູ່ງ, ເຮ​ເຊ​ຄີ​ຢາ, ເຍີຍ ຮນອຍ-ເຫຍັຍ, ຢຽມ ໂມ​ເລ​ເຊດ ມ່ຽນ, ມີ​ຄາ, ໂຕ່ວ ຫວ່າ ກ໊ອງ ບົ໋ວ ຢູ​ດາ ເຍີຍ ຕສວັ໋ງ ມ່ຽນ, ‘ເນິ່ນ ເຈ໋ຍ ເຍີຍ ຕສ໊ຽວ ຮນັ້ງ ນ້າຍ ນໍ ກ໊ອງ, “ສິ​ໂອນ ອ໋ອຍ ຕສຸ ໄລ່ ຮນັ້ງ ໄລ່ ລີ່ງ ເຕີ່ຍ ນໍ, ເຢ​ລູ​ຊາ​ເລມ ອ໋ອຍ ຕສຸ ເປ໋ນ ບາງ ຫວ່າຍ ເຍີຍ ກະນ້າຍ-ດຸຍ. ວົ້ວ ນອມ ເປຢົ໊າ ເຍີຍ ບົງ ຢ່າ ເປ໋ນ ດຢັ໋ງ-ຫລົ່ມ.”’”

¹⁹ “ຢູ​ດາ ຮູ່ງ, ເຮ​ເຊ​ຄີ​ຢາ, ເຖສົາ ຢູ​ດາ ເຍີຍ ຕສວັ໋ງ ມ່ຽນ ເຕສ໊າະ ນິ່ນ ໄຕ໋ ໄຕ່ ໄຟ? ເຮ​ເຊ​ຄີ​ຢາ ໄມ້ ເຕສີ໌ຍ ທ່າຍ ຕສ໊ຽວ ແອ໋ງ ໂທ້ ນິ່ນ ເຖສີຍ ເອນ ໄຟ? ຕສ໊ຽວ ຢ່າ ໄມ້ ເຕສີ໌ຍ ກ໊ອຍ ຕສະເອີ໋ຍ, ໄມ້ ເອີຍ ນິ່ນ ກ໊ອງ ນິ່ນ ອ໋ອຍ ໂຕສ໋ວ ເຍີຍ ປຸນ ນິ່ນ ບົວ ຕສຸ ທສ້ຽວ ເຍີຍ ເຕສະ ໜ່ານ ໄຟ? ມປ່າ ເຢຍ ບົວ ກັ້ນ ຕສູ໊ງ ອ໋ອຍ ປຸນ ເຢຍ ບົວ ກັ້ນ ຕສຸ ທສ້ຽວ ເຍີຍ ຕົ້ມ ເຕສະ ໜ່ານ.”

²⁰ ແອ໋ງ ມ່າຍ ເຕົ້າ ຄີ​ລິ​ຢ໊າດ​ເຢ​ອາ​ລິມ ມ່ຽນ. ເຊ​ໄມ​ອາ ເຍີຍ ຕອນ, ອຸ​ລີ​ອາ, ເຕ໊ງ ຕສ໊ຽວ ເຍີຍ ບົ໋ວ ໂຕ່ວ ຫວ່າ. ນິ່ນ ຫລົ່ງ ຫວ່າ ຮນັ້ງ ເຢ​ເລ​ມີ ໂຕ່ວ ຕ້າຍ ກ໊ອງ ນ້າຍ ນອມ ຕສີ້ງ ເຖສົາ ນ້າຍ ນອມ ກົ໊ວະ.

²¹ ເຢ​ໂຮ​ຢາ​ຄິມ ຮູ່ງ ເຖສົາ ນິ່ນ ເຮ້ນ ໄຫ່ ເຍີຍ ຕສວັ໋ງ ແປງ ເຖສົາ ຕສວັ໋ງ ຈຽນ ໄຮ໌ ອຸ​ລີ​ອາ ເຍີຍ ຫວ່າ, ຮູ່ງ ເຕ໋ຍ ຕສ່ຽວ ລໍ໌ ນິ່ນ ໄຕ໋. ອຸ​ລີ​ອາ ໝວັງ ໄຮ໌ ນ້າຍ ເຕີ໋ຍ ຫວ່າ ນິ່ນ ກ້ຳ ເດສ໋ຍ ຕສ່ຽວ ເປຢົ໋າ ມີ່ງ ຢຽມ ອີ​ຢິ໊ບ.

²² ເຢ​ໂຮ​ຢາ​ຄິມ ຮູ່ງ ແອ໋ງ ພ້າຍ ເຕີ໋ຍ ມ່ຽນ ມີ່ງ ອີ​ຢິ໊ບ. ມ່າຍ ອັກ​ໂບ ເຍີຍ ຕອນ, ເອນ​ນາ​ທັນ, ຢ່າ ມ່າຍ ເຕສ໋ຍ ລ່ານ ມ່ຽນ ເຖສົາ ຈ໊ຽນ ນິ່ນ ມີ່ງ.

²³ ນິ່ນ ບົວ ຕສ່ຽວ ມີ່ງ ອີ​ຢິ໊ບ ຕໍ້ ອຸ​ລີ​ອາ ດສ໋ວນ ຕ້າຍ ຈິວ ປຸນ ເຢ​ໂຮ​ຢາ​ຄິມ ຮູ່ງ. ຮູ່ງ ເຕ໋ຍ ຫລົ່ງ ດສຸ ດ໊າວ ໄຕ໋ ແອ໋ງ ຕໍ້ ນິ່ນ ເຍີຍ ເຊີຍ ມີ່ງ ຕສອຍ ກວັ່ງ ໂພວ-ທົງ ມ່ຽນ ເຍີຍ ໂຕສ໊ວ-ເກ້ມ.

²⁴ ມປ່າ ຊາ​ຟານ ເຍີຍ ຕອນ, ອາ​ຫິ​ຄຳ, ເປວ ເຢ​ເລ​ມີ. ຮນັ້ງ ໜ່າຍ ເຢ​ເລ​ມີ ໄມ້ ຕສຸ ຈິວ ປຸນ ຢຽມ ແປະ ຝີງ ເຍີຍ ປົ໌ວ-ເດ໊ຍ ໄຕ໋.