เย​เล​มี 20 - ฉบับอักษรลาว

ປາດ​ເຮ ເຕສ໊າະ ເຢ​ເລ​ມີ

¹ ອິມ​ເມ ເຍີຍ ຕອນ, ປາດ​ເຮ ໄຊ ມ່ຽນ, ໂຕສ໋ວ ເປຢີ໊ຍ ກຸ໊ນ ຕສັ່ງ ຕສ໊ຽວ ເຍີຍ ເປຢົ໊າ. ນິ່ນ ໄຮ໌ ເຢ​ເລ​ມີ ໂຕ່ວ ຫວ່າ ກ໊ອງ ນ້າຍ ເຕີ໋ຍ ສີ່.

² ປາດ​ເຮ ຕສ່ຽວ ເບ໊າະ ໂຕ່ວ ຫວ່າ ມ່ຽນ, ເຢ​ເລ​ມີ, ແອ໋ງ ຢຽມ ຕສັ່ງ ຕສ໊ຽວ ເຍີຍ ເປຢົ໊າ ວົ້ວ ເຈ໋ຍ ປູງ ເບນ​ຢາ​ມິນ ແກ້ງ ເຍີຍ ກັບ ປົ໌ວ-ເຕສົ໋າ ກະນ້າຍ ກັບ ຈ໊ຽນ ນິ່ນ.

³ ຕະເຫຍີ່ຍ ຮນອຍ, ປາດ​ເຮ ປູ໋ງ ເຢ​ເລ​ມີ ທສວດ ກັບ ປົ໌ວ-ເຕສົ໋າ ເຍີຍ ກະນ້າຍ ວົ້ວ ຕສັ່ນ, ເຢ​ເລ​ມີ ກ໊ອງ ບົ໋ວ ນິ່ນ, “ ຕສ໊ຽວ ໄມ້ ເຕສີ໌ຍ ເຫ່ວ ເມີ່ຍ ເຍີຍ ບົ໋ວ ໂຕສ໋ວ ປາດ​ເຮ. ນິ່ນ ເຫ່ວ ເມີ່ຍ ໂຕສ໋ວ ມາ​ໂກ​ມິດ​ຊາ​ບິບ.

⁴ ເຫວີ່ຍ ຕສຸ ຕສ໊ຽວ ຮນັ້ງ ນ້າຍ ກ໊ອງ, “ເຢຍ ຕສູ໊ງ ອ໋ອຍ ປຸນ ເມີ່ຍ ແຮະ ເມີ່ຍ ກັ້ນ ກ້ຳ ເດສ໋ຍ, ແອ໋ງ ແຮະ ເມີ່ຍ ເຍີຍ ຢຽດ ຕສູ໊ງ ໂລ໌-ແກງ ຕ່ອຍ ກ້ຳ ເດສ໋ຍ. ເມີ່ຍ ໝັ່ງ ຈ໊ຽນ ເຍີຍ ຕສຢັ້ງ ໂຫ່, ນິ່ນ ບົວ ຢຽມ ວິນ-ວັ້ງ ເຍີຍ ດສະຮມຽນ ຕສຸ ດສຸ ດ໊າວ ໄຕ໋. ເຢຍ ຢ່າ ອ໋ອຍ ເຕສ໊າະ ຢູ​ດາ ເຍີຍ ຕສວັ໋ງ ມ່ຽນ ຈິວ ປຸນ ບາ​ບີ​ລົນ ເຍີຍ ຮູ່ງ. ນິ່ນ ຢ່າ ອ໋ອຍ ເຕສ໊າະ ນິ່ນ ບົວ ກວ໊າດ ມີ່ງ ເຖົາ ບາ​ບີ​ລົນ, ຢຽມ ວົ້ວ ຫລົ່ງ ດສຸ ດ໊າວ ໄຕ໋ ນິ່ນ ບົວ.

⁵ ໄມ້ ຕານ ບົວະ ນ້າຍ. ເຢຍ ອ໋ອຍ ເຕສ໊າະ ຢຽມ ນ້າຍ ນອມ ຕສີ້ງ ເຍີຍ ຢຽດ ຕສູ໊ງ ຕສິ້ນ ຕສ້ອຍ, ຢຽດ ຕສູ໊ງ ຕສ່ອນ ຕ້າຍ ເຍີຍ ກະນ້າຍ, ເຖສົາ ຢູ​ດາ ຮູ່ງ ຢຽດ ຕສູ໊ງ ຈ໋າຍ ເຍີຍ ກະນ້າຍ, ຈິວ ປຸນ ຢຽມ ນິ່ນ ບົວ ເຍີຍ ວິນ-ວັ້ງ ເຍີຍ ປົ໌ວ ລູ້, ອ໋ອຍ ເຕສ໊າະ ແອ໋ງ ປ້ຽນ ມີ່ງ ບາ​ບີ​ລົນ.

⁶ ປາດ​ເຮ ອ້າ! ເມີ່ຍ ແອ໊ະ, ເຖສົາ ຢຽດ ຕສູ໊ງ ຢຽມ ເມີ່ຍ ເຍີຍ ເປຢົ໊າ ເຍີຍ ມ່ຽນ ອ໋ອຍ ຕສຸ ກວ໊າດ ມີ່ງ. ເມີ່ຍ ຕສ່ຽວ ມີ່ງ ບາ​ບີ​ລົນ. ເມີ່ຍ ຕສູ໊ງ ອ໋ອຍ ຕສຸ ຢຽມ ວົ້ວ ໄຕ່ ແອ໋ງ ຕສັ໋ງ ຈ໊ຽນ ວົ້ວ, ເຊ ເມີ່ຍ ເຖສົາ ເມີ່ຍ ເຍີຍ ຕສວັ໋ງ ໂລ໌-ແກງ ຕ່ອຍ, ຕົ້ງ ເມີ່ຍ ໂຕ່ວ ຈ໊າ ຫວ່າ ປຸນ ວົ້ວ ເຕີ໋ຍ.”

ເຢ​ເລ​ມີ ງົບ

⁷ ຕສ໊ຽວ ອ່າ, ເມີ່ຍ ດົ໊ວ ເຢຍ, ເຢຍ ຢ່າ ຕສຸ ດົ໊ວ ອ໊ະ. ເມີ່ຍ ມ່າຍ ທຈະ ເກົ້າ ເຮ້ນ ເຢຍ ຕສ່ຽວ ຮີ່ງ ເຢຍ. ເຢຍ ຕສຢັ້ງ ຮນອຍ ຕສຸ ມ່ຽນ ຈັ໊ດ ເຢຍ, ເຕົ້າໆ ຮວວດ ເຢຍ.

⁸ ເຫວີ່ຍ ຕສຸ ເຢຍ ຫາຍ ຕສັ່ນ ກ໊ອງ, ເຢຍ ເຫ່ວ ທສວດ. ເຢຍ ເຫ່ວ ຈ໊ຽນ ກ໊ອງ, “ຕສຸ ເຮີ້ຍ ສີ່, ປ່າຍ ຫວ່າຍ ອ໊ະ ໂລ່ະ!” ເຫວີ່ຍ ຕສຸ ຕສ໊ຽວ ເຍີຍ ຫວ່າ ຕສຢັ້ງ ຮນອຍ ປຸນ ເຢຍ ຕສຸ ມ່ຽນ ກ໊ອງ ໂຕະ, ຕສຸ ມ່ຽນ ຮວວດ.

⁹ ເຊ ກ໊ອງ ເຢຍ ໄມ້ ແອ໋ງ ກ໊ອງ, “ເຢຍ ໄມ້ ກ໊ອງ ເຖົາ ນິ່ນ, ໄຟ ແອ໋ງ ເຕ໊ງ ນິ່ນ ເຍີຍ ບົ໋ວ ກ໊ອງ,” ນິ່ນ ເຍີຍ ຫວ່າ ຢຽມ ເຢຍ ເຍີຍ ໂຮຍ້ວ ຮນັ້ງ ໂຕ໌ວ ປົ໊ວ ນໍ, ຢ່າ ຕສົ໊ດ ຈ໊ຽນ ເຢຍ ເຍີຍ ບູ໊ງ ກະຍົ໌ວ. ເຢຍ ຍ໌ຽນ ຈ໊ຽນ ໄຮ໌ ໂຄ້ວ ໄຫ່, ຍ໌ຽນ ໄມ້ ຕຸ໊ ອ໊ະ.

¹⁰ ເຫວີ່ຍ ຕສຸ ເຢຍ ໄຮ໌ ມ່ຽນ ທສ້ຳ ເຍີຍ ຫວ່າ-ຊັບ ກ໊ອງ, “ກ້ຳ ເດສ໋ຍ ໄຫ່ ເຍີຍ ສີ່ ຢຽມ ເວີ່ຍ ກ໋ອມ.” ເຢຍ ຕສົວະ ໄຫ່ ເຍີຍ ຢຽດ ຕສູ໊ງ ໂລ໌-ແກງ ຕ່ອຍ ກ໊ອງ, “ໂກ໋ ນິ່ນ ມ່າະ! ບົວ ລົ່ມ ດສ້ອຍ ໂກ໋ ນິ່ນ ອ໊ະ.” ນິ່ນ ບົວ ຢ່າ ຕສົ໊ວ ຈ໊ຽນ ເຢຍ ໂຕສ໋ວ ຕ່ອງ. ນິ່ນ ບົວ ກ໊ອງ, “ເດສ໋ຍ ນິ່ນ ໄຮ່ ຕສຸ ດົ໊ວ, ເຢຍ ບົວ ຕສ່ຽວ ໄຮ່ ຮີ່ງ ນິ່ນ, ແອ໋ງ ຈ໊າວ ວິນ ປຸນ ນິ່ນ.”

¹¹ ມປ່າ ຕສ໊ຽວ ເຖສົາ ເຢຍ ຢຽມ ຮນັ້ງ ເບ໊າະ ຈ໋າ ເຮ້ນ ເຍີຍ ແປງ ນໍ.” ໂຕສ໋ວ ໂຕະ ເຢຍ ວົ້ວ ເຕີ໋ຍ ຕສ່ຽວ ດິ໊ ຕສຸ ດອບ. ນິ່ນ ບົວ ໄມ້ ໄຮ່ ຮີ່ງ ເຢຍ. ນິ່ນ ບົວ ຕສູ໊ງ ຕສຸ ປ່າຍ ຮມຽນ ທສ້ຳ ເຍີຍ, ເຫວີ່ຍ ຕສຸ ນິ່ນ ບົວ ໂຕສ໋ວ ໄມ້ ທສວດ. ນິ່ນ ບົວ ຕສຸ ປ່າຍ ຮມຽນ, ມ່ຽນ ຢຽດ ລິ໌ວ ໄມ້ ຫລະຄຸ.

¹² ເນິ່ນ ເຈ໋ຍ ເຍີຍ ຕສ໊ຽວ ອ້າ! ເມີ່ຍ ເສີຍ ຄູ້ ມ່ຽນ, ຢ່າ ໝັ່ງ ມ່ຽນ ເຍີຍ ໂຮຍ້ວ ເຖສົາ ຮນ້ຳ ເຍີຍ ສີ່. ໂທ້ ປຸນ ເຢຍ ປວັດ ເມີ່ຍ ຈ໊າວ ວິນ ປຸນ ນິ່ນ ບົວ, ເຫວີ່ຍ ຕສຸ ເຢຍ ເຕສ໊າະ ເຢຍ ເຍີຍ ສີ່ ຈິວ ປຸນ ເມີ່ຍ ໝີ່ ອ໊ະ.

¹³ ອ໋ອຍ ຕສຸ ປ໋າວ ດສູງ ປຸນ ຕສ໊ຽວ, ອ໋ອຍ ຕສຸ ເທສງ ຕສ໊ຽວ, ເຫວີ່ຍ ຕສຸ ນິ່ນ ໂອຈ໋ວ ຕັ໋ງ-ຕົ໋ນ ມ່ຽນ ເຍີຍ ແໝ່ງ, ເປຢົ໋າ ດຸ໊ດ ເອ໊າະ ມ່ຽນ ເຍີຍ ປົ໌ວ-ເດ໊ຍ.

¹⁴ ໂທ້ ປຸນ ເຢຍ ທສວດ ເສີຍ ວົ້ວ ຮນອຍ ຕສຸ ຕສ໋ຽວ ອ໊ະ. ໂທ້ ໄມ້ ຕູ໋ງ ປຸນ ເຢຍ ເຍີຍ ມາ ຢູ໌ງ ເຢຍ ຕ້າຍ ວົ້ວ ຮນອຍ ຕຸ໊ ຟຸ.

¹⁵ ໂທ້ ປຸນ ຕໍ້ ຝຽນ ຕ້າຍ ບົ໋ວ ເຢຍ ເຍີຍ ເຕຍ, “ເມີ່ຍ ຕຸ໊ ເຕົ້າ ຕອນ ຕ້າຍ ອ໊ະ,” ປຸນ ເຢຍ ເຍີຍ ເຕຍ ອະເຮນີ້ຍ ວົ້ວ ເຕົ້າ ມ່ຽນ ຕສຸ ຕສ໋ຽວ ອ໊ະ.

¹⁶ ໂທ້ ປຸນ ວົ້ວ ເຕົ້າ ມ່ຽນ ຮນັ້ງ ຕສ໊ຽວ ປ່າຍ ຫວ່າຍ ວົ້ວ ເຕີ໋ຍ ຕສີ້ງ, ໄມ້ ຕຸ໊ ຄໍ້-ລ່ຽນ. ໂທ້ ປຸນ ນິ່ນ ລູ່ງ ດອມ ໝວັງ ໄຮ໌ ເດສົ້າ ຍ້ຽມ ເຍີຍ ເຖຈຍ, ລູ່ງ ອ໋ານ ໄຮ໌ ເບ໊າະ ຈ໋າ ເຍີຍ ເຖຈຍ ບຸຍ.

¹⁷ ເຫວີ່ຍ ຕສຸ ເຢຍ ຢຽມ ມາ ເຍີຍ ກະເຊຍ ວົ້ວ ຕສັ່ນ ນິ່ນ ໄມ້ ໄຕ໋ ເຢຍ, ປຸນ ເຢຍ ເຍີຍ ມາ ເປ໋ນ ຕສັ໋ງ ເຢຍ ເຍີຍ ໂຕສ໊ວ, ນິ່ນ ເຍີຍ ກະເຊຍ ຢຽດ ລິ໌ວ ໂຮລ.

¹⁸ ເຢຍ ເຫວີ່ຍ ຫາຍ ຕິ່ວ ທສວດ ເສີຍ ຕ້າຍ? ເຫວີ່ຍ ປວັດ ລ່າວ ຫລຸ່ຍ, ເດສົ້າ ໂຄ້ວ, ປຸນ ຕສຸ ໄຍ້ ເຍີຍ ເຈົ໊າ ຫຍັ່ນ ເດສ່ງ ເຢຍ ເຍີຍ ຮນອຍ-ເຫຍັຍ.