เย​เล​มี 11 - ฉบับอักษรลาว

ປູ໋ງ ດ໊ອດ ແລ໌ງ ເຍີຍ ແຫງ່ງ ຫວ່າ

¹ ເຢ​ເລ​ມີ ຕຸ໊ ຕສິ໊ບ ຕສ໊ຽວ ເຍີຍ ຫວ່າ ກ໊ອງ,

² “ເມີ່ຍ ອ໋ອຍ ຕສຸ ໝວັງ ນ້າຍ ເຕີ໋ຍ ແລ໌ງ ເຍີຍ ແຫງ່ງ ຫວ່າ ຢ່າ ກ໊ອງ ບົ໋ວ ຢູ​ດາ ມ່ຽນ ເຖສົາ ຢຽມ ເຢ​ລູ​ຊາ​ເລມ ເຍີຍ ມ່ຽນ.

³ ເມີ່ຍ ອ໋ອຍ ຕສຸ ກ໊ອງ ບົ໋ວ ນິ່ນ ບົວ, ‘ ຕສ໊ຽວ, ອິ​ສະ​ລາ​ເອນ ມ່ຽນ ເຍີຍ ທິນ-ຮູ່ງ, ຮນັ້ງ ນ້າຍ ກ໊ອງ, “ຫາຍ ເຕົ້າ ໄມ້ ໝວັງ ນ້າຍ ເຕີ໋ຍ ແລ໌ງ ເຍີຍ ແຫງ່ງ ຫວ່າ ຕສູ໊ງ ຕສຸ ຕສ໋ຽວ.

⁴ ນ້າຍ ເຕີ໋ຍ ແຫງ່ງ ຫວ່າ ຕົ້ງ ເຢຍ ເຕສ໊າະ ເມີ່ຍ ບົວ ເຍີຍ ອົງ-ຖາຍ ທສວດ ອີ​ຢິ໊ບ ເຕີ່ຍ-ປູງ, ເຊ ຢຽມ ເຮລັຍ-ໂລ່ວ ທສວດ ຕ້າຍ ຫັດ ນິ່ນ ບົວ ເຍີຍ ຫວ່າ.” ເຢຍ ກ໊ອງ, ‘ໝວັງ ເຢຍ ກ໊ອງ ເຍີຍ ຫວ່າ ຢ່າ ເອີຍ ຈ໊ຽນ ເຢຍ ຫັດ ເມີ່ຍ ບົວ ເຍີຍ ຢຽດ ຕສູ໊ງ ຫວ່າ ໂຕສ໋ວ. ເມີ່ຍ ບົວ ຕສ່ຽວ ເປ໋ນ ເຢຍ ເຍີຍ ແປະ ຝີງ. ເຢຍ ຢ່າ ເປ໋ນ ເມີ່ຍ ບົວ ເຍີຍ ທິນ-ຮູ່ງ,

⁵ ເຫວີ່ຍ ເອີຍ ຈ໊ຽນ ເຢຍ ໂຮ້ວ ຈ໊ຽນ ເຖສົາ ເມີ່ຍ ບົວ ເຍີຍ ອົງ-ຖາຍ ແລ໌ງ ເຍີຍ ແຫງ່ງ ຫວ່າ. ເຢຍ ກ໊ອງ ເຢຍ ອ໋ອຍ ເຕສ໊າະ ນອມ ເດົາ-ໂທ້ວ ຫລົງ ເຍີຍ ເຕີ່ຍ-ປູງ ເຖສີຍ ປຸນ ນິ່ນ ບົວ ຮນັ້ງ ອີ້ ຮນອຍ ນໍ.’” ເຢຍ ເຕົາ, “ ຕສ໊ຽວ ອ່າ, ໂທ້ ປຸນ ຮນັ້ງ ໜ່າຍ ອ໊ະ.”

⁶ ຕສ໊ຽວ ກ໊ອງ ບົ໋ວ ເຢຍ, “ເມີ່ຍ ອ໋ອຍ ຕສຸ ຢຽມ ຢູ​ດາ ເຍີຍ ຕສີ້ງ ເຖສົາ ເຢ​ລູ​ຊາ​ເລມ ເຍີຍ ຈາຍ-ຫ່ອງ ຕສຸ້ນ ນ້າຍ ເຕີ໋ຍ ຢຽດ ຕສູ໊ງ ຫວ່າ ກ໊ອງ, ‘ເມີ່ຍ ບົວ ອ໋ອຍ ຕສຸ ໝວັງ ນ້າຍ ເຕີ໋ຍ ແລ໌ງ ເຍີຍ ແຫງ່ງ ຫວ່າ ຢ່າ ເອີຍ ຈ໊ຽນ ໂຕສ໋ວ,

⁷ ເຫວີ່ຍ ຕສຸ ເຢຍ ຕໍ້ ເມີ່ຍ ບົວ ເຍີຍ ອົງ-ຖາຍ ຢຽມ ອີ​ຢິ໊ບ ເຕີ່ຍ-ປູງ ທສວດ ຕ້າຍ ວົ້ວ ຕສັ່ນ, ເຢຍ ເຮນ້ຍໆ ເຍີຍ ຕົ໊ນ ນິ່ນ ບົວ. ເຖົາ ອີ້ ຮນອຍ ເຢຍ ໄມ້ ຕີ້ງ ລ່ຽວ ເຍີຍ ຂວິນ ນິ່ນ ບົວ. ເຢຍ ກ໊ອງ, “ອ໋ອຍ ຕສຸ ໝວັງ ເຢຍ ເຍີຍ ຫວ່າ.”

⁸ ໄມ້ ກຸ໊ນ ຮນັ້ງ ໜ່າຍ, ນິ່ນ ບົວ ໄມ້ ເອີຍ ຈ໊ຽນ ໂຕສ໋ວ ຢ່າ ໄມ້ ແປງ ມນ່ອມ ໝວັງ. ມປ່າ ເຕົ້າໆ ຕສິ໋ວ ກັ້ນ ເຍີຍ ເອ໊າະ ໂຮຍ້ວ ແຫງ່ງ ຈ໊ຽນ ໂຕສ໋ວ. ຫລາຍ ນິ່ນ ບົວ ໄມ້ ເອີຍ ຈ໊ຽນ ເຢຍ ຫັດ ນິ່ນ ບົວ ເຍີຍ ແຫງ່ງ ຫວ່າ, ເຢຍ ຕສ່ຽວ ປຸນ ນິ່ນ ບົວ ຕສຸ ຕສິ໋ວ ນ້າຍ ເຕີ໋ຍ ຢຽດ ຕສູ໊ງ ແຫງ່ງ ຫວ່າ ເຍີຍ ສີ່.’”

⁹ ຕສ໊ຽວ ແອ໋ງ ກ໊ອງ ບົ໋ວ ເຢຍ, “ຢູ​ດາ ມ່ຽນ ເຖສົາ ຢຽມ ເຢ​ລູ​ຊາ​ເລມ ເຍີຍ ແປະ ຝີງ ຕ໊າ ຕສະເອີ໋ຍ ແຫງ່ງ ຈ໊ຽນ.

¹⁰ ນິ່ນ ບົວ ຮວິນ ດສ໋ວນ ຕ້າຍ ໂຕສ໋ວ ຕົ້ງ ນິ່ນ ບົວ ເຍີຍ ອົງ-ຖາຍ ໄມ້ ໝວັງ ເຢຍ ເຍີຍ ຫວ່າ ປ໌າມ ເຍີຍ ຕສຸ໌ຍ. ນິ່ນ ບົວ ກັນ ເຫຍ່ຍ ເຍີຍ ຕສ້ຽນ ຢ່າ ຟູ-ສູ ນິ່ນ ບົວ. ອິ​ສະ​ລາ​ເອນ ເຍີຍ ເຕສີ໊ຍ-ຟຸນ ເຖສົາ ຢູ​ດາ ເຍີຍ ເຕສີ໊ຍ-ຟຸນ ໂຕສ໋ວ ຕ່ອງ ເຢຍ ເຖສົາ ນິ່ນ ບົວ ເຍີຍ ອົງ-ຖາຍ ແລ໌ງ ເຍີຍ ແຫງ່ງ ຫວ່າ.

¹¹ ເຫວີ່ຍ ນ້າຍ ຕສ໊ຽວ ຮນັ້ງ ນ້າຍ ກ໊ອງ, ‘ໝັ່ງ ມ່າະ! ເຢຍ ອ໋ອຍ ປຸນ ນິ່ນ ບົວ ຕສຸ ເອ໊າະ ສີ່. ນິ່ນ ບົວ ໄມ້ ໄຮ່ ເປຢົ໋າ ໄມ້ ດຸ໊ດ. ໄມ້ ກຸ໊ນ ນິ່ນ ບົວ ເຫ່ວ ເຢຍ, ເຢຍ ໄມ້ ໝວັງ ນິ່ນ ບົວ.

¹² ຢູ​ດາ ເຍີຍ ຕສີ້ງ ເຍີຍ ມ່ຽນ ເຖສົາ ຢຽມ ເຢ​ລູ​ຊາ​ເລມ ເຍີຍ ແປະ ຝີງ ຕສ່ຽວ ມີ່ງ ເຫ່ວ ຕົ້ງ ນິ່ນ ບົວ ປົ໊ວ ຮູງ ປຸນ ວົ້ວ ເຕີ໋ຍ ຕສ້ຽນ. ມປ່າ ຕສຸ ໂຄ້ວ ເຍີຍ ຕສຢັ້ງ ໂຫ່, ນ້າຍ ເຕີ໋ຍ ຕສ້ຽນ ໂອຈ໋ວ ໄມ້ ຕຸ໊ ນິ່ນ ບົວ.

¹³ ຢູ​ດາ ມ່ຽນ ອ້າ! ເມີ່ຍ ບົວ ເຍີຍ ຕສ້ຽນ ເຖສົາ ເມີ່ຍ ບົວ ເຍີຍ ຕສີ້ງ ຟີ່ ບົວະ ເຍີຍ. ເມີ່ຍ ບົວ ເຫວີ່ຍ ກ້ຳ ເດສ໊ຍ ເຍີຍ ບາ​ອັນ ຕສ້ຽນ ຫລຽບ ປົ໊ວ ຮູງ ເຕ້ຍ ດົ່ງ ເຢ​ລູ​ຊາ​ເລມ ເຍີຍ ຈາຍ-ຫ່ອງ ທສ້ຳ.’

¹⁴ “ໄມ້ ຕູ໋ງ ເຫວີ່ຍ ນ້າຍ ເຕີ໋ຍ ແປະ ຝີງ ເຕົ໋າ ເກົ໋າ. ໄມ້ ຕູ໋ງ ເຫວີ່ຍ ນິ່ນ ບົວ ເຫ່ວ ຈ໊ຽນ ໂທ້ ໄຟ ເຖງ ນິ່ນ ບົວ ເຕົ໋າ ເກົ໋າ, ເຫວີ່ຍ ຕສຸ ນິ່ນ ບົວ ປວັ້ງ ຕສຸ ໂຄ້ວ ເຍີຍ ຕສຢັ້ງ ໂຫ່ ເຫ່ວ ເຢຍ, ເຢຍ ໄມ້ ໝວັງ ນິ່ນ ບົວ.

¹⁵ “ເຢຍ ຮນ້ຳ ເຍີຍ ມ່ຽນ ໂຕສ໋ວ ເອ໊າະ ໄຫ່ ເຍີຍ ສີ່, ນິ່ນ ຝູ່ງ ມ່າຍ ເລີ໌ຍ ຢຽມ ເຢຍ ເຍີຍ ເປຢົ໊າ? ໂຮ້ວ ຫວ່າ ໄຟ ເຕສ່ຍ ເຍີຍ ແຊງ-ຄູ້ ອໍ໊ ໄຮ່ ເຖງ ເປຢົ໋າ ດຸ໊ດ ໄມ້ ຕສຸ ຕີ່ງ ຕສຸ໌ຍ ໄຟ? ວົ້ວ ຫຍູ່ງ ເມີ່ຍ ໄຮ່ ອຈຽນ-ໂຢ້ວ ເຍີຍ ໄຟ?”

¹⁶ ຕສິ້ນ ດ່າງ ຕສ໊ຽວ ກ໊ອງ ເມີ່ຍ ຮນັ້ງ ຕິ້ວ ກະລັ້ນ ດຢັ໋ງ ຍ໌ຽມ ເຍີຍ, ເດສວີ່ຍ ເຍີຍ, ຢ່າ ຕສຢັ້ງ ປ໊ຽວ ຫລົງ. ມປ່າ ຮນັ້ງ ຕົ້ມ ດສຢ໋າວ ເຍີຍ ເຖຈຍ ບຸຍ, ເຢຍ ອ໋ອຍ ຕ໊ຽມ ເຕສັຍ ໂຕ໌ວ ປຸນ ນິ່ນ ເຍີຍ ອກວ້າ ຕສຸ ປົ໊ວ ທຈຸຍ ເດສ່ງ.

¹⁷ ເນິ່ນ ເຈ໋ຍ ເຍີຍ ຕສ໊ຽວ, ເຊ ຕສວັ໋ງ ເມີ່ຍ ວົ້ວ ເຕົ້າ, ກ໊ອງ ທສວດ ອ໋ອຍ ປຸນ ເມີ່ຍ ຕສຸ ເຕສະ ໜ່ານ, ເຫວີ່ຍ ຕສຸ ອິ​ສະ​ລາ​ເອນ ເຍີຍ ເຕສີ໊ຍ-ຟຸນ ເຖສົາ ຢູ​ດາ ເຍີຍ ເຕສີ໊ຍ-ຟຸນ ໂຕສ໋ວ ເອ໊າະ ສີ່ ປົ໊ວ ຮູງ ປຸນ ບາ​ອັນ ຕສ້ຽນ ທສົວະ ເຢຍ ເຖຈຍ ເຈ໌ຍ.”

ມ່ຽນ ຕ໊າ ຕສະເອີ໋ຍ ຫ່ອຍ ເຢ​ເລ​ມີ

¹⁸ ຕສ໊ຽວ ປຸນ ເຢຍ ຮິ້ວ ຕຸ໊ ນ້າຍ ເຕີ໋ຍ ສີ່ ເຢຍ ຖສີງ ຕ້າຍ ຮິ້ວ. ນິ່ນ ປິ໋ວ ເມ່ງ ປຸນ ເຢຍ ຮິ້ວ ຕຸ໊ ນິ່ນ ບົວ ຕ໊າ ເອ໊າະ ເຍີຍ ຕສະເອີ໋ຍ ຫ່ອຍ ເຢຍ.

¹⁹ ເຢຍ ຮນັ້ງ ເຕົ້າ ສ່ວນ ເຍີຍ ປະກີ ຢູ້ງ ຕອນ ຕສຸ ຕໍ້ ມີ່ງ ໄຕ໋ ເຍີຍ ຕ໋ອງ. ເຢຍ ໄມ້ ຮິ້ວ ຕຸ໊ ນິ່ນ ບົວ ຕ໊າ ຕສະເອີ໋ຍ ຫ່ອຍ ເຢຍ. ນິ່ນ ບົວ ກ໊ອງ, “ບົວ ອ໋ອຍ ຕສຸ ເຕສ໊າະ ລ່ຽມ ດຢັ໋ງ ລ່ຽມ ປ໊ຽວ ໝຽດ ເດສ່ງ. ບົວ ອ໋ອຍ ຕສຸ ເຕສ໊າະ ນິ່ນ ຢຽມ ຢ້າງ ເກນ ໄພ ກວັ່ງ ເຫວີ່ຍ ປຸນ ມ່ຽນ ຢຽດ ລິ໌ວ ໄມ້ ຈັ໋ງ ນິ່ນ ເຍີຍ ບົ໋ວ.”

²⁰ ມປ່າ ເນິ່ນ ເຈ໋ຍ ເຍີຍ ຕສ໊ຽວ ອ່າ, ເມີ່ຍ ແປ້ງ ຟິມ ເຍີຍ ຊ້ຽມ ຢ່າ ເສີຍ ມ່ຽນ ເຍີຍ ໂຮຍ້ວ ເຖສົາ ຮນ້ຳ ເຍີຍ ສີ່. ໂທ້ ປຸນ ເຢຍ ປວັດ ເມີ່ຍ ວິ່ນ ປຸນ ນິ່ນ ບົວ, ເຫວີ່ຍ ຕສຸ ເຢຍ ເຍີຍ ເຈົ໊າ ເຢຍ ຈິວ ປຸນ ເມີ່ຍ ໝີ່ ອ໊ະ.

²¹ “ເຫວີ່ຍ ນ້າຍ ຕສ໊ຽວ ກ໊ອງ ເຖົາ ລໍ໌ ເມີ່ຍ ເຍີຍ ແໝ່ງ ວົ້ວ ເຕີ໋ຍ ອາ​ນາ​ທົດ ມ່ຽນ. ນ້າຍ ເຕີ໋ຍ ມ່ຽນ ກ໊ອງ, ‘ໄມ້ ຕູ໋ງ ເຕ໊ງ ຕສ໊ຽວ ເຍີຍ ເມ່ງ ໂຕ່ວ ຫວ່າ. ໄມ້ ເຕສີຍ ແອ໊ະ, ເມີ່ຍ ຕສ່ຽວ ຕສຸ ເຢຍ ບົວ ເຍີຍ ປົ໌ວ ໄຕ໋ ໄຕ່.’

²² ເຫວີ່ຍ ນ້າຍ ເນິ່ນ ເຈ໋ຍ ເຍີຍ ຕສ໊ຽວ ຮນັ້ງ ນ້າຍ ກ໊ອງ, ‘ໝັ່ງ ມ່າະ! ເຢຍ ອ໋ອຍ ຕີ່ງ ນິ່ນ ບົວ ເຍີຍ ຕສຸ໌ຍ. ນິ່ນ ບົວ ເຍີຍ ມ່ຽນ ຫລຸນ ມ່ຽນ ອ໋ອຍ ຕສຸ ດສຸ ດ໊າວ ໄຕ໋. ນິ່ນ ບົວ ເຍີຍ ນ່າມ ໂຍ໌ວ ຕສຸ ຫງໍ່ ຫຮນາງ ໄຕ່.

²³ ນິ່ນ ບົວ ໄມ້ ເຕສ່ງ ຢຽດ ເຕົ້າ ເຫວີ່ຍ ຕສຸ ເຢຍ ຕີ່ງ ອາ​ນາ​ທົດ ມ່ຽນ ເຍີຍ ຕສຸ໌ຍ ເຍີຍ ຫຮຍັງ-ຕ້າວ ເຖົາ, ເຢຍ ຕສ່ຽວ ປຸນ ນິ່ນ ບົວ ຕສຸ ເຕສະ ໜ່ານ.’”