เย​เล​มี 1 - ฉบับอักษรลาว

¹ ນ້າຍ ເຊ ເຢ​ເລ​ມີ ເຍີຍ ຫວ່າ. ເຢ​ເລ​ມີ ເຊ ເບນ​ຢາ​ມິນ ເຕີ່ຍ, ອາ​ນາ​ທົດ ມູ້ງ ເຍີຍ ຢຽດ ເຕົ້າ ໄຊ ມ່ຽນ, ຮິນ​ຄີ​ຢາ, ເຍີຍ ຕອນ.

² ຢຽມ ຢູ​ດາ ເຍີຍ ຮູ່ງ, ອາ​ມົນ ເຍີຍ ຕອນ, ໂຢ​ສິ​ຢາ, ໂຕສ໋ວ ຮູ່ງ ຕສຽບ ຟາມ ຫຮຍັງ ວົ້ວ ຫຮຍັງ, ເຢ​ເລ​ມີ ຕຸ໊ ຕສິ໊ບ ຕສ໊ຽວ ເຍີຍ ຫວ່າ.

³ ນິ່ນ ຢ່າ ຕຸ໊ ຕສິ໊ບ ຕ໋ອຍ ຢູ​ດາ ເຍີຍ ຮູ່ງ, ໂຢ​ສິ​ຢາ, ເຍີຍ ຕອນ, ເຢ​ໂຮ​ຢາ​ຄິມ ກຸ໊ນ ເຍີຍ ຕສຢັ້ງ ໂຫ່ ເຖົາ ຢູ​ດາ ເຍີຍ ຮູ່ງ, ໂຢ​ສິ​ຢາ ເຍີຍ ຕອນ, ເສ​ເດ​ຄີ​ຢາ, ໂຕສ໋ວ ຮູ່ງ ຕສຽບ ຢ໊ຽດ ວົ້ວ ຫຮຍັງ ຈົ່ມ ເຖົາ ຮມ໌ ຫຮລາ, ເຢ​ລູ​ຊາ​ເລມ ມ່ຽນ ຕສຸ ກວ໊າດ ມີ່ງ ເຍີຍ ຕສຢັ້ງ ໂຫ່.

ຕສ໊ຽວ ພ້າຍ ເຢ​ເລ​ມີ

⁴ ເຢຍ ຕຸ໊ ຕສິ໊ບ ຕສ໊ຽວ ເຍີຍ ຫວ່າ ກ໊ອງ,

⁵ “ເຢຍ ໄມ້ ແກ້ງ ເຕສີ໋ຍ ເມີ່ຍ ຕ້າຍ ຢຽມ ມາ ເຍີຍ ກະເຊຍ ວົ້ວ ຕສັ່ນ, ເຢຍ ຮິ້ວ ຕຸ໊ ເມີ່ຍ. ເມີ່ຍ ໄມ້ ແກ້ງ ທສວດ ເສີຍ, ເຢຍ ຢ່າ ກິ໊ນ ຕສຢັ໋ງ ເມີ່ຍ. ເຢຍ ພ້າຍ ເມີ່ຍ ໂຕ່ວ ຫວ່າ ປຸນ ໝ່ານ ກົ໊ວະ ມ່ຽນ.”

⁶ ເຢຍ ກ໊ອງ, “ຕສ໊ຽວ ທິນ-ຮູ່ງ ອ້າ! ເຢຍ ໄມ້ ຮິ້ວ ຕຸ໊ ຮນັ້ງ ຫາຍ ນໍ ກ໊ອງ ເຫວີ່ຍ ຕສຸ ເຢຍ ເຊ ຫຮຍັງ-ເຈີ໊ຍ ຫລຸນ ເຍີຍ.”

⁷ ມປ່າ ຕສ໊ຽວ ກ໊ອງ ບົ໋ວ ເຢຍ, “ເມີ່ຍ ໄມ້ ຕູ໋ງ ກ໊ອງ, ‘ເຢຍ ຫຮຍັງ-ເຈີ໊ຍ ຫລຸນ,’ ເຫວີ່ຍ ຕສຸ ເຢຍ ພ້າຍ ເມີ່ຍ ມີ່ງ ລໍ໌ ຫາຍ ເຕົ້າ, ເມີ່ຍ ອ໋ອຍ ຕສຸ ມີ່ງ ອ໊ະ. ເຢຍ ຫັດ ເມີ່ຍ ກ໊ອງ ຫາຍ ຫຍູ່ງ, ເມີ່ຍ ຕສູ໊ງ ອ໋ອຍ ຕສຸ ກ໊ອງ ອ໊ະ.

⁸ ເມີ່ຍ ໄມ້ ຕູ໋ງ ກ້ຳ ເດສ໋ຍ ນິ່ນ ບົວ, ເຫວີ່ຍ ຕສຸ ເຢຍ ເຖສົາ ເມີ່ຍ ຢຽມ, ອ໋ອຍ ໂອຈ໋ວ ເມີ່ຍ.” ນ້າຍ ເຊ ຕສ໊ຽວ ກ໊ອງ ເຍີຍ ຫວ່າ.

⁹ ຕສ໊ຽວ ຕສ່ຽວ ຊູງ ນິ່ນ ເຍີຍ ປົ໌ວ ຮລົວ ເຢຍ ເຍີຍ ດສຸ້ຍ. ຕສ໊ຽວ ກ໊ອງ ບົ໋ວ ເຢຍ, “ເຢຍ ເຕສ໊າະ ເຢຍ ເຍີຍ ຫວ່າ ອັນ ເມີ່ຍ ເຍີຍ ດສຸ້ຍ.

¹⁰ ໝັ່ງ ມ່າະ! ອີ້ ຮນອຍ ເຢຍ ອອນ ເມີ່ຍ ມ່າຍ ຫລີ່ງ ກຸ໊ນ ໝ່ານ ຝີງ ໝ່ານ ກົ໊ວະ, ໄຮ່ ແປງ ທສວດ, ໄຮ່ ປ່າຍ ຫວ່າຍ, ໄຮ່ ໝຽດ, ໄຮ່ ບ໊ຽນ, ໄຮ່ ຫລຽບ ເຈ໌ຍ, ໄຮ່ ເຖສີຍ ເຈ໌ຍ ຕ້າຍ.”

ອີ ຫຍູ່ງ ຫິ່ນ ຢ້າງ ເຍີຍ ສີ່

¹¹ ເຢຍ ແອ໋ງ ຕຸ໊ ຕສິ໊ບ ຕສ໊ຽວ ເຍີຍ ຫວ່າ ກ໊ອງ, “ເຢ​ເລ​ມີ ອ້າ! ເມີ່ຍ ໝັ່ງ ປວັດ ຫາຍ ຫຍູ່ງ?” ເຢຍ ກ໊ອງ, “ເຢຍ ປວັດ ຕິ້ວ ອັນ​ມັນ ດຢັ໋ງ ເຍີຍ ປຢ໊າ.”

¹² ຕສ໊ຽວ ກ໊ອງ ບົ໋ວ ເຢຍ, “ເມີ່ຍ ປວັດ ຕຸ໊ ຫອບ ເຍີຍ, ເຫວີ່ຍ ຕສຸ ເຢຍ ໝັ່ງ ຈ໊ຽນ ເຢຍ ເຍີຍ ຫວ່າ, ອ໋ອຍ ປຸນ ເຢຍ ເຍີຍ ຫວ່າ ທສວດ ຕ້າຍ ຕສຽນ.

¹³ ເຢຍ ແອ໋ງ ຕຸ໊ ຕສິ໊ບ ຕສ໊ຽວ ເຍີຍ ຫວ່າ ຕະເຫຍີ່ຍ ດສຸ່ນ ກ໊ອງ, “ເມີ່ຍ ໝັ່ງ ປວັດ ຫາຍ ຫຍູ່ງ?” ເຢຍ ກ໊ອງ, “ເຢຍ ປວັດ ມ່າຍ ນອມ ແທສງ ເບວີ໋ຍ ຈ໊ຽນ ຢຽມ ປ໊ະ ປູງ ຮວິນ ຕ້າຍ.”

¹⁴ ຕສ໊ຽວ ກ໊ອງ ບົ໋ວ ເຢຍ, “ມ່າຍ ທສ້ຽວ ເຍີຍ ເຕສະ ໜ່ານ ອ໋ອຍ ຢຽມ ປ໊ະ ປູງ ທສວດ ຕ້າຍ ເຖົາ ນ້າຍ ນອມ ເຕີ່ຍ-ປູງ ເຍີຍ ຢຽດ ຕສູ໊ງ ແປະ ຝີງ.”

¹⁵ ຕສ໊ຽວ ກ໊ອງ, “ໝັ່ງ ມ່າະ! ເຢຍ ອ໋ອຍ ເຫ່ວ ປ໊ະ ປູງ ກົ໊ວະ ເຍີຍ ໝ່ານ ຝີງ. “ນິ່ນ ບົວ ຕສ່ຽວ ຕ້າຍ. ຝີງໆ ອ໋ອຍ ຫລຽບ ນິ່ນ ບົວ ເຍີຍ ຮູ່ງ ເຫວີ່ຍ ຢຽມ ເຢ​ລູ​ຊາ​ເລມ ເຍີຍ ຕສີ້ງ ແກ້ງ ດ່າງ. ນິ່ນ ບົວ ຕສ່ຽວ ເວີ່ຍ ກ໋ອມ ຕສີ້ງ ຫລາດ ເບ໊າະ ແອ໋ງ ເບ໊າະ ຢູ​ດາ ເຍີຍ ນອມໆ ຕສີ້ງ.

¹⁶ ເຢຍ ອ໋ອຍ ກ໊ອງ ທສວດ ຫວ່າ ຕີ່ງ ເຢຍ ເຍີຍ ແປະ ຝີງ ເຍີຍ ຕສຸ໌ຍ ຫລາຍ ນິ່ນ ບົວ ໂຕສ໋ວ ເຍີຍ ຢຽດ ຕສູ໊ງ ເອ໊າະ ສີ່ ກວັ່ງ ເຢຍ. ເຫວີ່ຍ ຕສຸ ນິ່ນ ບົວ ປົ໊ວ ຮູງ ປຸນ ເຫຍ່ຍ ເຍີຍ ຕສ້ຽນ, ຢ່າ ເກວີ່ຍ ເອຈ່ຍ ປ໋າຍ ນິ່ນ ບົວ ກັ້ນ ເຍີຍ ປົ໌ວ ໂຕສ໋ວ ຕ້າຍ ເຍີຍ ໝິ່ວ-ຝັງ.

¹⁷ “ ມປ່າ ເຢ​ເລ​ມີ ອ່າ, ເມີ່ຍ ອ໋ອຍ ຕສຸ ເຈ໌ຍ ຕ້າຍ ເບ່ນ ຕສຢັ໋ງ ກ໊ອງ ເດສ່ງ ເຢຍ ພ້າຍ ເມີ່ຍ ກ໊ອງ ເຍີຍ ຢຽດ ຕສູ໊ງ ຫວ່າ. ໄມ້ ຕູ໋ງ ຫລາຍ ນິ່ນ ບົວ ກ້ຳ ເດສ໋ຍ. ໄມ້ ເຕສີຍ ແອ໊ະ, ເດສົ້າ ເຫີຍ ເຢຍ ປຸນ ເມີ່ຍ ຢຽມ ນິ່ນ ບົວ ເຍີຍ ດສະຮມຽນ ກ້ຳ ເດສ໋ຍ.

¹⁸ ໝັ່ງ ມ່າະ! ເຢຍ ອີ້ ຮນອຍ ປຸນ ເມີ່ຍ ຮນັ້ງ ນອມ ວ້ວນ ໄຫ່ ເຍີຍ ຕສີ້ງ, ຮນັ້ງ ນອມ ເຮລັຍ-ດ້ຽວ, ຮນັ້ງ ຕົ້ງ ຊິ ຫລາດ, ເຫວີ່ຍ ແຫງ່ງ ຈ໊ຽນ ວົ້ວ ນອມ ເຕີ່ຍ-ປູງ ເດສ່ງ, ເຊ ຢູ​ດາ ເຍີຍ ຮູ່ງ ເຖສົາ ໂຕສ໋ວ ໂຮລ ເຍີຍ ມ່ຽນ, ໄຊ ມ່ຽນ, ລ່ຽມ ເຕີ່ຍ-ປູງ ເຍີຍ ແປະ ຝີງ.

¹⁹ ນິ່ນ ບົວ ຕສ່ຽວ ອ໋ອຍ ເຖສົາ ເມີ່ຍ ເບ໊າະ ຈ໋າ ມປ່າ ໄມ້ ຮີ່ງ ເມີ່ຍ, ເຫວີ່ຍ ຕສຸ ເຢຍ ເຖສົາ ເມີ່ຍ ຢຽມ, ອ໋ອຍ ໂອຈ໋ວ ເມີ່ຍ.” ນ້າຍ ເຊ ຕສ໊ຽວ ກ໊ອງ ເຍີຍ ຫວ່າ.