ยา​กอบ 5 - ฉบับอักษรลาว

ຂວິນ ປຸ໊ດ-ຕສ້ອຍ ມ່ຽນ

¹ ປຸ໊ດ-ຕສ້ອຍ ມ່ຽນ ອ້າ! ໝວັງ ເຢຍ ກ໊ອງ ໂອ່. ອ໋ອຍ ຕສຸ ເຫວີ່ຍ ເມີ່ຍ ບົວ ອ໋ອຍ ປວັ້ງ ເຍີຍ ໂຄ້ວ ໜ່ານ ປູ໋ງ-ຊີງ ປູ໋ງ-ເຖຈຍ ເຍີຍ ຍ້ຽມ.

² ເມີ່ຍ ບົວ ເຍີຍ ຕສິ້ນ ຕສ້ອຍ ຢຸ ເດສ່ງ, ລຸຍ-ໂຫວ ຕສຸ ແກງ ຫງາດ ຫວ່າຍ ເດສ່ງ.

³ ເມີ່ຍ ບົວ ເຍີຍ ຈຽມ ຍ່ານ ເຈ໋ຍ ດສີ໋ງ ໝີ່ ອ໊ະ. ນ້າຍ ດສີ໋ງ ໂຕສ໋ວ ຕສອງ-ເຕສ໋ງ ປຸນ ທສີງ ເມີ່ຍ ບົວ ຕ່ອງ. ດສີ໋ງ ຢ່າ ອ໋ອຍ ຮນັ້ງ ໂຕ໌ວ ນໍ, ປົ໊ວ ເດສ່ງ ເມີ່ຍ ບົວ ເຍີຍ ຊິນ. ຢຽມ ນ້າຍ ເຕີ໋ຍ ອກະຮ້າ ລາຍ ເຍີຍ ຮນອຍ ເມີ່ຍ ບົວ ຂູງ ຊຽວ ຈ໊ຽນ ຕສິ້ນ ຕສ້ອຍ ຮນັ້ງ.

⁴ ເມີ່ຍ ບົວ ໄມ້ ຄອຍ ກົງ-ຕສິ້ນ ປຸນ ເຖງ ເມີ່ຍ ບົວ ໂຕສ໋ວ ເດີ່ຍ ເຍີຍ ມ່ຽນ. ນ້າຍ ເຕີ໋ຍ ກົງ-ຕສິ້ນ ເຫ່ວ ຈ໊ຽນ ໂກ໋ ເມີ່ຍ ບົວ. ໝວັງ ກ໋າ! ເຖງ ເມີ່ຍ ບົວ ຊຽວ ແກງ-ຕສວັ໋ງ ເຍີຍ ມ່ຽນ ເຍີຍ ເຖຈຍ ຝາວ ເຖົາ ເນິ່ນ ເຈ໋ຍ ເຍີຍ ຕສ໊ຽວ ເຍີຍ ມນ່ອມ.

⁵ ເມີ່ຍ ບົວ ຢຽມ ເສີຍ ຕສັ່ງ ຂູງ ຫຍັ່ນ ຫລົງ ຮົບ ຫລົງ ຕສ໋າວ ເຮ່ນ ບ໋ຽນ ຮນັ້ງ. ນ້າຍ ເຊ ຮນັ້ງ ຫວຸຍ ກັ້ນ ຈຸ່ນ ຕສົ໊ວ ຕສຸ ໄຕ໋ ວົ້ວ ຮນອຍ.

⁶ ເມີ່ຍ ບົວ ຕີ່ງ ຕສຸ໌ຍ ຢ່າ ໄຕ໋ ຄູ້ ມ່ຽນ, ນິ່ນ ຢ່າ ໄມ້ ແຫງ່ງ ເມີ່ຍ ບົວ.

ອ໋ອຍ ຕສຸ ຫລົ່ງ ໜ່ອຍ ເຕ໊ຍ

⁷ ກໍ໋-ໂຢ໌ວ ອ່າ, ເມີ່ຍ ບົວ ອ໋ອຍ ຕສຸ ຫລົ່ງ ໜ່ອຍ ຕສົ໊ວ ເຖົາ ຕສ໊ຽວ ແອ໋ງ ຕ້າຍ. ໝັ່ງ ກ໋າ! ໂຕສ໋ວ ເດີ່ຍ ເຍີຍ ມ່ຽນ ດົ່ງ ຫາຍ ຫລົ່ງ ໜ່ອຍ ຕສົ໊ວ ຈ໊ຽນ ຊຽວ ເດີ່ຍ ຈ໋າຍ ໄຫ່ ເຍີຍ ລ່າງ ຕສິ. ນິ່ນ ຢ່າ ຫລົ່ງ ໜ່ອຍ ຕສົ໊ວ ທສຽວ-ເກນ ບຢູ່ງ ເຖສົາ ທສຸນ-ເກນ ບຢູ່ງ ຕ້າຍ.

⁸ ເມີ່ຍ ບົວ ຢ່າ ອ໋ອຍ ຕສຸ ຫລົ່ງ ໜ່ອຍ, ຫລຽບ ຕີ່ງ ໂຮຍ້ວ ເຫວີ່ຍ ຕສຸ ຕສ໊ຽວ ຕ້າຍ ເຍີຍ ຮນອຍ ເຖົາ ຟັດ ອ໊ະ.

⁹ ກໍ໋-ໂຢ໌ວ ອ່າ, ເມີ່ຍ ບົວ ໄມ້ ຕູ໋ງ ລ່ານ ງົບ ລ່ານ ເຫວີ່ຍ ປຸນ ເມີ່ຍ ບົວ ໄມ້ ຕສຸ ຊ້ຽມ ຕສຸ໌ຍ. ໝັ່ງ ກ໋າ, ຊ້ຽມ ຕສຸ໌ຍ ຈຽນ ຕສູ໊ງ ໂຊ້ວ ຈ໊ຽນ ວົ້ວ ແກ້ງ ດ່າງ ອ໊ະ!

¹⁰ ເຢຍ ເຍີຍ ກໍ໋-ໂຢ໌ວ ອ່າ, ຈັ໋ງ ຈ໊ຽນ ຕສິ້ນ ດ່າງ ເຕ໊ງ ຕສ໊ຽວ ເຍີຍ ບົ໋ວ ກ໊ອງ ວົ້ວ ເຕີ໋ຍ ໂຕ່ວ ຫວ່າ ມ່ຽນ. ນິ່ນ ບົວ ສ່ຽວ ໂຄ້ວ ຢ່າ ຫລົ່ງ ໜ່ອຍ ເຕ໊ຍ. ເມີ່ຍ ບົວ ອ໋ອຍ ຕສຸ ຫລົ່ງ ນິ່ນ ບົວ ໂຕສ໋ວ ຫຍູ່ງ ເຕສີ໊ຍ.

¹¹ ບົວ ກ໊ອງ, ຫລົ່ງ ໜ່ອຍ ເຕ໊ຍ ເຖົາ ຕ້າວ ເຍີຍ ມ່ຽນ ມ່າຍ ອອນ-ເຫລາະ. ເມີ່ຍ ບົວ ໄຮ໌ ເຈ໋ຍ ວົ້ວ ເຕົ້າ ໂຢ໊ບ ຫລົ່ງ ໜ່ອຍ ເຕ໊ຍ ຕຸ໊ ໂຄ້ວ. ຢ່າ ຮິ້ວ ຕຸ໊ ເຊດ ເມວີ໌ຍ ຕສ໊ຽວ ດົ່ງ ຫາຍ ຄໍ້-ລ່ຽນ ມ່ຽນ, ໂຕສ໋ວ ຫລົງ ປຸນ ມ່ຽນ.

ໄມ້ ຕູ໋ງ ຕສຢັ໊ງ ຫາຍ ຫຍູ່ງ ແລ໌ງ ຫວ່າ

¹² ເຢຍ ເຍີຍ ກໍ໋-ໂຢ໌ວ ອ່າ, ເກົ້າ ຈ໊ຽນ ເຈ໋ຍ ເຊ ໄມ້ ຕູ໋ງ ຕສຢັ໊ງ ລູ່ງ ຕສຢັ໊ງ ເດົາ ໄຟ ຕສຢັ໊ງ ຫາຍ ຫຍູ່ງ ແລ໌ງ ຫວ່າ. ຫາຍ ຫຍູ່ງ “ເຕສີ໌ຍ” ຕສ່ຽວ ກ໊ອງ “ເຕສີ໌ຍ.” ຫາຍ ຫຍູ່ງ “ໄມ້ ເຕສີ໌ຍ” ຕສ່ຽວ ກ໊ອງ “ໄມ້ ເຕສີ໌ຍ” ເຫວີ່ຍ ປຸນ ເມີ່ຍ ບົວ ໄມ້ ຕສຸ ຕີ່ງ ຕສຸ໌ຍ.

ອ໋ອຍ ຕສຸ ຮນັ້ງ ຫາຍ ນໍ ເຕົ໋າ ເກົ໋າ

¹³ ຢຽມ ເມີ່ຍ ບົວ ກະຍົ໌ວ ຫາຍ ເຕົ້າ ມ່າຍ ຂວນ ນ່ານ ໄຟ? ວົ້ວ ເຕົ້າ ອ໋ອຍ ຕສຸ ເຕົ໋າ ເກົ໋າ. ຫາຍ ເຕົ້າ ມ່າຍ ອອນ-ເຫລາະ ໄຟ? ອ໋ອຍ ຕສຸ ປ໋າວ ເທສງ ທິນ-ຮູ່ງ ເຍີຍ ດສູງ.

¹⁴ ເມີ່ຍ ບົວ ຫາຍ ເຕົ້າ ປຸ໊ດ ແປ່ງ ໄຟ? ນິ່ນ ອ໋ອຍ ຕສຸ ເຫ່ວ ຈິວ-ປາງ ເຍີຍ ມ່ຽນ ໂກ໋ ຕ້າຍ ເຖງ ເຕົ໋າ ເກົ໋າ ຢ່າ ເຕ໊ງ ຕສ໊ຽວ ເຍີຍ ບົ໋ວ ເຕສ໊າະ ໂຢ້ວ ຮຢຽດ ຈ໊ຽນ ນິ່ນ ເຍີຍ ຊິນ.

¹⁵ ຫລົ່ງ ສຽນ ຟິມ ເຕົ໋າ ເກົ໋າ ຕສ່ຽວ ໂອຈ໋ວ ຕຸ໊ ແປ່ງ ມ່ຽນ, ຕສ໊ຽວ ຢ່າ ອ໋ອຍ ປຸນ ນິ່ນ ຫລົງ ຕ້າຍ. ເຊ ກ໊ອງ ນິ່ນ ປ໌າມ ຕສຸ໌ຍ, ທິນ-ຮູ່ງ ຕສ່ຽວ ກວັ່ງ ນິ່ນ ເຍີຍ ຕສຸ໌ຍ ໝີ່ ອ໊ະ.

¹⁶ ຮນັ້ງ ໜ່າຍ, ເມີ່ຍ ບົວ ລ່ານ ອ໋ອຍ ຕສຸ ຫຍ່ຽມ ຕສຸ໌ຍ ປຸນ ລ່ານ, ລ່ານ ອ໋ອຍ ຕສຸ ເຖງ ລ່ານ ເຕົ໋າ ເກົ໋າ. ເມີ່ຍ ບົວ ເຍີຍ ແປ່ງ ຕສ່ຽວ ຫລົງ ໝີ່ ອ໊ະ. ຄູ້ ມ່ຽນ ເຕົ໋າ ເກົ໋າ, ນິ່ນ ເຕົ໋າ ເກົ໋າ ເຍີຍ ຫວ່າ ມ່າຍ ທຈະ ຢ່າ ລີ່ງ ໄຫ່.

¹⁷ ເອ​ລີ​ຢາ ເຊ ຢຽດ ເຕົ້າ ປ້າມ ມ່ຽນ, ເຖສົາ ບົວ ຟີ່ ຮນັ້ງ ເຍີຍ. ນິ່ນ ຫລົ່ງ ໂຮຍ້ວ ເອຈ່ຍ ທຈະ ເຕົ໋າ ເກົ໋າ ໂທ້ ທິນ-ຮູ່ງ ໄມ້ ຕູ໋ງ ປຸນ ລູ່ງ ຕຸ້ຍ ບຢູ່ງ. ລູ່ງ ຕສ່ຽວ ໄມ້ ຕຸ້ຍ ບຢູ່ງ ປົວ ຫຮຍັງ-ປ໋ຽນ.

¹⁸ ເອ​ລີ​ຢາ ແອ໋ງ ເຕົ໋າ ເກົ໋າ, ລູ່ງ ຕສ່ຽວ ຕຸ້ຍ ບຢູ່ງ. ເດົາ ຢ່າ ທສວດ ແກງ-ຕສວັ໋ງ ອ໊ະ.

¹⁹ ເຢຍ ເຍີຍ ກໍ໋-ໂຢ໌ວ ອ່າ, ເຊ ກ໊ອງ ຢຽມ ເມີ່ຍ ບົວ ກະຍົ໌ວ ມ່າຍ ເຕົ້າ ເລີ່ຍ ຕສຽນ ເລີ໌ຍ ມີ່ງ ຕ່ອງ ເຈົ໊າ, ແອ໋ງ ມ່າຍ ເຕົ້າ ເຄນ ນິ່ນ ດສ໋ວນ ຕ້າຍ ນໍ,

²⁰ ອ໋ອຍ ຕສຸ ຈັ໋ງ ຈ໊ຽນ ຫາຍ ເຕົ້າ ເຄນ ຢັ້ງ ຕ່ອງ ເຈົ໊າ ເຍີຍ ຕສຸ໌ຍ-ມ່ຽນ ດສ໋ວນ ຕ້າຍ, ວົ້ວ ເຕົ້າ ຕສ່ຽວ ໂອຈ໋ວ ຕສຸ໌ຍ-ມ່ຽນ ໄມ້ ຕສຸ ໄຕ່. ມ່າຍ ຕສຸ໌ຍ ທສ້ຳ ມປ່າ ຕຸ໊ ທິນ-ຮູ່ງ ກວັ່ງ ເດສ່ງ ໝີ່ ອ໊ະ.