อิ​สะ​ยา 54 - ฉบับอักษรลาว

ຕສ໊ຽວ ຢຽດ ລິ໌ວ ຮນ້ຳ ອິ​ສະ​ລາ​ເອນ ມ່ຽນ

¹ “ໂອ ໄມ້ ໄຮ່ ມ່າຍ ແຊງ-ຢູ໌ງ, ໄມ້ ຢູ໌ງ ເຈ໋ຍ ກູ້ ງວ໌າ ເຍີຍ ມເຊັຍ ຕອນ ອ້າ! ກຸ໊ນ ປ໋າວ ດສູງ ອ໊ະ. ໄມ້ ມຸນ ເຈ໋ຍ ກູ້ ງວ໌າ ເຍີຍ ມເຊັຍ ຕອນ ອ້າ! ອ໋ອຍ ຕສຸ ອຈຽນ-ໂຢ້ວ ເຍີຍ ປ໋າວ ດສູງ, ເຫ່ວ ເຖຈຍ ໂຮລ ເຍີຍ, ເຫວີ່ຍ ຕສຸ ກວັ່ງ ຮວາງ ເຍີຍ ເອົ໊າ ຕສູ໊ງ ອ໋ອຍ ມ່າຍ ຝຸຈ໊ວຍ ເກົ້າ ທສ້ຳ ຕອງ ຈາ ເຍີຍ ມເຊັຍ ຕອນ.” ຕສ໊ຽວ ຮນັ້ງ ນ້າຍ ກ໊ອງ.

² “ອ໋ອຍ ຕສຸ ທສັບ ເມີ່ຍ ທສອງ ດົ໊ບ-ລິ່ວ ເຍີຍ ເດົາ, ທສອງ ເມີ່ຍ ເຍີຍ ດົ໊ບ-ລິ່ວ ເຍີຍ ເດຍ ຈັ໊ງ, ໄມ້ ຕູ໋ງ ຕສັ໊ນ. ອ໋ອຍ ຕສຸ ແປງ ເມີ່ຍ ທສອງ ດົ໊ບ-ລິ່ວ ເຍີຍ ຮລາງ ດ໊າວ, ບອງ ເມີ່ຍ ທສອງ ດົ໊ບ-ລິ່ວ ເຍີຍ ຕົ່ງ ວ້ວນ.

³ ເຫວີ່ຍ ຕສຸ ເມີ່ຍ ອ໋ອຍ ຫຮຢາງ ມີ່ງ ຕສ໋າຍ ມີ່ງ ບຢ່າວ. ເມີ່ຍ ເຍີຍ ເຕສີ໊ຍ-ຟຸນ ຢ່າ ຕຸ໊ ດສິບ ທສ້ຳ-ກົ໊ວະ, ຢ່າ ຕຸ໊ ຫລຽບ ງວ໌າ-ກອນ ຢຽມ ນິ່ນ ບົວ ເຍີຍ ຕສີ້ງ ຮວາງ.

⁴ “ໄມ້ ຕູ໋ງ ກ້ຳ ເດສ໋ຍ ເຫວີ່ຍ ຕສຸ ເມີ່ຍ ໄມ້ ຕສຸ ໄຍ້. ໄມ້ ຕູ໋ງ ໄຍ້ ເຫວີ່ຍ ຕສຸ ເມີ່ຍ ໄມ້ ຕສຸ ສ່ຽວ ໝັ່ງ ເຜຍ ເຍີຍ ເຈົ໊າ. ເມີ່ຍ ຕສູ໊ງ ອ໋ອຍ ຫລະຄຸ ຫລຸນ ເຍີຍ ຕສຢັ້ງ ໂຫ່ ຕສຸ ໄຍ້ ເຍີຍ ສີ່, ຢ່າ ໄມ້ ຕສຸ ແອ໋ງ ຈັ໋ງ ຫລາຍ ໂຕສ໋ວ ເອົ໊າ-ກວ໊າ ຕສຸ ມ່ຽນ ຕ້ານ ເຍີຍ ເຈົ໊າ.

⁵ ເຫວີ່ຍ ຕສຸ ເຕສີ໋ຍ ເມີ່ຍ ຕ້າຍ ວົ້ວ ເຕົ້າ ເຊ ເມີ່ຍ ເຍີຍ ໂອກ໋. ນິ່ນ ເຍີຍ ບົ໋ວ ເຊ ເນິ່ນ ເຈ໋ຍ ເຍີຍ ຕສ໊ຽວ. ອິ​ສະ​ລາ​ເອນ ເຍີຍ ທສີງ-ເດສ່ງ ທິນ-ຮູ່ງ ເຊ ຕສົວະ ເມີ່ຍ ວົ້ວ ເຕົ້າ. ມ່ຽນ ເຫ່ວ ນິ່ນ ເປ໋ນ ກ໋ອມ ລູ່ງ ເດ໊ຍ ເຍີຍ ທິນ-ຮູ່ງ.

⁶ ຕສ໊ຽວ ເຫ່ວ ເມີ່ຍ ຮນັ້ງ ຕສຸ ເລີ່ຍ ກວັ່ງ, ໂຮຍ້ວ ມຸນ, ໂຮຍ້ວ ເດສົ້າ ເຍີຍ ເອົ໊າ, ຮນັ້ງ ຫຮຍັງ-ເຈີ໊ຍ ຫລຸນ ເຍີຍ ເອົ໊າ ຕສຸ ເລີ່ຍ ກວັ່ງ.” ນ້າຍ ເຊ ເມີ່ຍ ເຍີຍ ທິນ-ຮູ່ງ ກ໊ອງ ເຍີຍ ຫວ່າ.

⁷ “ເຢຍ ກວັ່ງ ເມີ່ຍ ຕັ້ງ ປ໊າ ຮນັ້ງ, ມປ່າ ເຢຍ ຕສະເກ້ງ ອ໋ອຍ ຄໍ້-ລ່ຽນ ເມີ່ຍ, ຕໍ້ ເມີ່ຍ ດສ໋ວນ.

⁸ ເຢຍ ກະເຖຈຍ ແປ໊ດ ທສວດ ຕສ່ຽວ ປີ໋ງ ເຢຍ ເຍີຍ ຮມຽນ ໄມ້ ໝັ່ງ ເມີ່ຍ ດຸ ຕັ້ງ ຮນັ້ງ, ມປ່າ ເຢຍ ຢຽດ ລິ໌ວ ອ໋ອຍ ຮນ້ຳ ເມີ່ຍ, ຄໍ້-ລ່ຽນ ເມີ່ຍ.” ຕສ໊ຽວ, ຕົ້ງ ຕສົວະ ເມີ່ຍ ວົ້ວ ເຕົ້າ, ຮນັ້ງ ນ້າຍ ນໍ ກ໊ອງ.

⁹ “ນ້າຍ ເຕີ໋ຍ ສີ່ ເຫວີ່ຍ ເຢຍ ເຊ ຮນັ້ງ ໂນ​ຢາ ເຍີຍ ລູ່ງ ເດ໊ຍ. ວົ້ວ ຕສັ່ນ ເຢຍ ແລ໌ງ ໄມ້ ປຸນ ບຢູ່ງ-ຊຸ້ຍ-ອິ໋ມ ແອ໋ງ ຢ໋ຽມ ລູ່ງ ເດ໊ຍ ຮນັ້ງ ຢຽມ ໂນ​ຢາ ເຍີຍ ຕສຢັ້ງ ໂຫ່ ຢ໋ຽມ ນໍ. ເຢຍ ຢ່າ ຮນັ້ງ ວົ້ວ ນໍ ໂຮ້ວ ຫວ່າ ເຢຍ ໄມ້ ແອ໋ງ ເຖຈຍ ເຈ໌ຍ ເມີ່ຍ, ເຢຍ ຢ່າ ໄມ້ ເຫມ ເມີ່ຍ.

¹⁰ ໄມ້ ກຸ໊ນ ຕົ້ມ ບົງ ຕສຸ ເຕສ໊າະ ອກອຍ, ຟິ້ວ-ບົງ ຕສຸ ດັ່ນ ຕົ໌ງ, ເຢຍ ອ໋ອຍ ຢຽດ ລິ໌ວ ຕສຽບ ຕສົ໊ວະ ເຍີຍ ຮນ້ຳ ເມີ່ຍ, ໄມ້ ປູ໋ງ ດ໊ອດ. ເຢຍ ແລ໌ງ ແປ້ງ ອອນ ເຍີຍ ແຫງ່ງ ຫວ່າ ຢຽດ ລິ໌ວ ໄມ້ ເລີ່ຍ ອກອຍ ເມີ່ຍ.” ນ້າຍ ເຊ ຕສ໊ຽວ, ຕົ້ງ ຄໍ້-ລ່ຽນ ເມີ່ຍ ວົ້ວ ເຕົ້າ, ກ໊ອງ ເຍີຍ ຫວ່າ.

ອກະຮ້າ ຮີ້ງ ເຍີຍ ເຢ​ລູ​ຊາ​ເລມ

¹¹ “ໂອ ຕສຸ ໂຄ້ວ, ຕສຸ ຕົ້ມ ດສຢ໋າວ ປ່ວນ ມີ່ງ ປ່ວນ ຕ້າຍ ຢ່າ ໄມ້ ຕຸ໊ ອອນ ໂຮຍ້ວ ເຍີຍ ຕສີ້ງ ອ້າ! ເຢຍ ອ໋ອຍ ຫລົ່ງ ຫລະເປຢີ໊ຍ ແມງ-ບົ໊ວ ເຖສີຍ ເມີ່ຍ ເຈ໌ຍ, ຫລົ່ງ ບັ໊ນ ບົ໊ວ ດສັງ ເຍີຍ ຫລະເປຢີ໊ຍ-ຈ໋າຍ ຫລຽບ ເມີ່ຍ ເຍີຍ ກອນ-ໂດ໊ະ.

¹² ເຢຍ ອ໋ອຍ ຫລົ່ງ ຫລະເປຢີ໊ຍ-ຈ໋າຍ ຊິ ເຍີຍ, ດສັງ ເຍີຍ, ໂຕສ໋ວ ເມີ່ຍ ເຍີຍ ລ່າວ, ຫລົ່ງ ອຈັງ ເຍີຍ, ດສັງ ເຍີຍ ຫລະເປຢີ໊ຍ ໂຕສ໋ວ ເມີ່ຍ ເຍີຍ ຕສີ້ງ ແກ້ງ, ຢ່າ ຫລົ່ງ ຫລະເປຢີ໊ຍ-ຈ໋າຍ ໂຕສ໋ວ ເມີ່ຍ ເຍີຍ ຢຽດ ຕສູ໊ງ ຕສີ້ງ ຫລາດ.

¹³ ເຢຍ, ຕສ໊ຽວ, ອ໋ອຍ ອຈ໋າວ ເມີ່ຍ ເຍີຍ ຢຽດ ຕສູ໊ງ ນ່າມ ໂຍ໌ວ. ເມີ່ຍ ເຍີຍ ນ່າມ ໂຍ໌ວ ຢ່າ ອ໋ອຍ ຕຸ໊ ແປ້ງ ອອນ ທສ້ຳ.

¹⁴ ເມີ່ຍ ອ໋ອຍ ເຂົາ ແປ້ງ ຟິມ ເຍີຍ ເຈົ໊າ ຫລຽບ ວ້ວນ. ເມີ່ຍ ຕຸ໊ ເລີ່ຍ ອກອຍ ຕສຸ ເຕສີ໋ຍ ເຍີຍ ເຈົ໊າ ເຫວີ່ຍ ຕສຸ ເມີ່ຍ ໄມ້ ຕສຸ ກ້ຳ ເດສ໋ຍ. ແຮະ ມ່ຽນ ກ້ຳ ເດສ໋ຍ ເຍີຍ ສີ່ ເລີ່ຍ ເມີ່ຍ ໂກ, ເຫວີ່ຍ ຕສຸ ແຮະ ມ່ຽນ ເຍີຍ ສີ່ ໄມ້ ຕ້າຍ ນິດ ຟັດ ເມີ່ຍ.

¹⁵ ເຊ ກ໊ອງ ຫາຍ ເຕົ້າ ໂທສະ ມ່ຽນ ກັ໊ບ ຕສຸ໊ນ ເບ໊າະ ເມີ່ຍ ເຊ ໄມ້ ເຕສີ໌ຍ ເຢຍ ໂຕສ໋ວ. ຫາຍ ເຕົ້າ ຕ້າຍ ເບ໊າະ ເມີ່ຍ, ວົ້ວ ເຕົ້າ ຕສູ໊ງ ອ໋ອຍ ຫລາຍ ເມີ່ຍ ຕສຸ ເຊວີຍ.

¹⁶ “ໝັ່ງ ມ່າະ! ເຢຍ ເຕສີ໋ຍ ເຮລັຍ-ຕສັ່ງ. ນິ່ນ ປຢົ໊ມ ໂຕ໌ວ-ຖານ ທສວດ ໂຕ໌ວ-ບຽດ, ຢ່າ ໂຕສ໋ວ ທສວດ ຫວົວະ ກິ່ນ ຜຸຍ ອ໋ອຍ ຕສຸ ຫລົ່ງ ຫວົວະ ກິ່ນ ໂຕສ໋ວ ເຍີຍ ກົງ. ເຢຍ ຢ່າ ເຕສີ໋ຍ ທສວດ ໂຕສ໋ວ ໝຽດ ເຍີຍ ມ່ຽນ ເຫວີ່ຍ ໂຕສ໋ວ ຫວ່າຍ.

¹⁷ ໂຕສ໋ວ ທສວດ ຫ່ອຍ ເມີ່ຍ ເຍີຍ ຫວົວະ ກິ່ນ ໄມ້ ໄຮ່ ຫ່ອຍ ໄມ້ ຕສຸ. ຕະຟ່ານ ໂກ໋ ເມີ່ຍ ເຍີຍ ມ່ຽນ, ເມີ່ຍ ໄຮ່ ປຸນ ນິ່ນ ບົວ ຕສຸ ຕີ່ງ ຕສຸ໌ຍ. ນ້າຍ ເຊ ຕສ໊ຽວ ເຍີຍ ໂປວ ດສິບ ຕ້າຍ ເຍີຍ ປ່ວນ. ເຢຍ ຢ່າ ປຸນ ນິ່ນ ບົວ ຕຸ໊ ແປ້ງ ຟິມ ເຍີຍ ເຈົ໊າ.” ນ້າຍ ເຊ ຕສ໊ຽວ ກ໊ອງ ເຍີຍ ຫວ່າ.