อิ​สะ​ยา 46 - ฉบับอักษรลาว

ບາ​ບີ​ລົນ ເຍີຍ ໝິ່ວ-ຝັງ

¹ ເບນ ໂດ໊ະ ເອຈ່ຍ, ເນ​ໂບ ຈ໊າຍ ຈຸ໊ດ ເອຈ່ຍ. ບາ​ບີ​ລົນ ເຍີຍ ໝິ່ວ-ຝັງ ຢຽມ ແຊງ-ຄູ້ ເຖສົາ ງົ່ງ ເຍີຍ ຕິ ຕ໌ານ ທໍ. ເມີ່ຍ ບົວ ແກງ ເຍີຍ ກະນ້າຍ, ປຸນ ແຊງ-ຄູ້ ທໍ ເຮນ້ຍ ຢ່າ ໂຄ້ວ.

² ນິ່ນ ບົວ ຈ໊າຍ ຈຸ໊ດ, ລົ່ມ ດສ້ອຍ ໂດ໊ະ ເອຈ່ຍ, ໄມ້ ໄຮ່ ເປວ ກັ້ນ ທໍ ເຍີຍ ກະນ້າຍ. ນິ່ນ ບົວ ກັ້ນ ຕສູ໊ງ ຕສຸ ທສ້າງ ມີ່ງ.

³ “ໂອ ຢາ​ໂຄບ ເຍີຍ ເຕສີ໊ຍ-ຟຸນ ອ່າ, ເຊ ອິ​ສະ​ລາ​ເອນ ເຍີຍ ເຕສີ໊ຍ-ຟຸນ ເຕສ່ງ ເອຈ່ຍ ເຍີຍ ຢຽດ ຕສູ໊ງ ມ່ຽນ, ຢຽມ ເມີ່ຍ ບົວ ທສວດ ເສີຍ ຕ້າຍ ເຢຍ ຮລອບ ຈ໊ຽນ ເມີ່ຍ ບົວ. ຢຽມ ມາ ເຍີຍ ກະເຊຍ ວົ້ວ ຕສັ່ນ ເຢຍ ຕສູ໊ງ ປ໊າ ຈ໊ຽນ ເມີ່ຍ ບົວ.

⁴ ເຖົາ ເມີ່ຍ ບົວ ຫຮຍັງ-ເຈີ໊ຍ ໂກ໋, ບະເປຢີຍ ແປະ, ເຢຍ, ເຊ ເຢຍ ຕສ໊ຽວ, ອ໋ອຍ ປ໊າ ຈ໊ຽນ ເມີ່ຍ ບົວ. ເຢຍ ອ໋ອຍ ເປວ ຈ໊ຽນ ຢ່າ ອ໋ອຍ ໂອຈ໋ວ ເມີ່ຍ ບົວ.

⁵ “ເມີ່ຍ ບົວ ອ໋ອຍ ເຕສ໊າະ ເຢຍ ເປີ໊ຍ ຫາຍ ເຕົ້າ? ອ໋ອຍ ປຸນ ເຢຍ ເຖສົາ ຫາຍ ເຕົ້າ ຟີ່ ດົ່ງ? ເມີ່ຍ ບົວ ອ໋ອຍ ເຕສ໊າະ ເຢຍ ເປີ໊ຍ ເຢຍ ເຖສົາ ຫາຍ ເຕົ້າ ຟີ່ ຮນັ້ງ?

⁶ ເຕສ໊າະ ບົວະ ໂຕ໋ ທສວດ ຈຽມ, ຢ່າ ຫລົ່ງ ທິນ-ແປ້ງ ຕັ໊ງ ດສຢັງ ຍ່ານ ເຍີຍ ມ່ຽນ, ທສີ້ງ ຈຽມ-ຕສັ່ງ ໂຕ໋ ເປ໋ນ ຕສ້ຽນ ເຍີຍ ຝັງ, ນິ່ນ ບົວ ຕສ່ຽວ ເກວີ່ຍ ເອຈ່ຍ ປ໋າຍ.

⁷ ນິ່ນ ບົວ ເຕສ໊າະ ຕສ້ຽນ ເຍີຍ ຝັງ ອັນ ຈ໊ຽນ ບະເຕົ້າ ແກງ ມີ່ງ. ນິ່ນ ບົວ ອອນ ຈ໊ຽນ ຢຽດ ນອມ ຕ໋ອງ, ຝັງ ຕສ່ຽວ ຢຽມ ຈ໊ຽນ ວົ້ວ. ໝິ່ວ-ຝັງ ໄມ້ ໄຮ່ ຊຸ້ຍ ມີ່ງ ກັ້ນ ນອມ ຕ໋ອງ. ໄມ້ ກຸ໊ນ ມ່າຍ ມ່ຽນ ຕ້າຍ ເຫ່ວ ຈ໊ຽນ ໂທ້ ນິ່ນ, ໝິ່ວ-ຝັງ ໄມ້ ໄຮ່ ເຕົາ, ຢ່າ ໄມ້ ໄຮ່ ໂອຈ໋ວ ມ່ຽນ ເປຢົ໋າ ດຸ໊ດ ນິ່ນ ເຍີຍ ໂຄ້ວ ໜ່ານ.

⁸ “ຈັ໋ງ ຈ໊ຽນ, ຫລົງໆ ເຍີຍ ຮນ້ຳ. ເມີ່ຍ ບົວ ຕສຸ໌ຍ-ມ່ຽນ ອ໋ອຍ ຕສຸ ຢຽມ ໂຮຍ້ວ ຮນ້ຳ ຫລົງ.

⁹ ຈັ໋ງ ຈ໊ຽນ ໂລ໌-ຮນອຍ ທສວດ ຕ້າຍ ເຍີຍ ສີ່, ເຫວີ່ຍ ຕສຸ ເຢຍ ເຊ ທິນ-ຮູ່ງ ຢ່າ ໄມ້ ມ່າຍ ກັ້ນ ເຕົ້າ. ເຢຍ ເຊ ທິນ-ຮູ່ງ. ໄມ້ ມ່າຍ ກັ້ນ ເຕົ້າ ຮນັ້ງ ເຢຍ.

¹⁰ ຢຽມ ຕົ້ງ ທສໍ ວົ້ວ ເຢຍ ກ໊ອງ ເຊດ ເມວີ໌ຍ ອ໋ອຍ ທສວດ ຕ້າຍ ເຍີຍ ສີ່, ຢ່າ ຢຽມ ໂລ໌-ຮນອຍ ກ໊ອງ ໄມ້ ແກ້ງ ຕຸ໊ ໂຕສ໋ວ ເຍີຍ ສີ່. ເຢຍ ເຍີຍ ຕສະເອີ໋ຍ ຫລຽບ ຕີ່ງ ໝີ່ ອ໊ະ. ຕະຟ່ານ ເຢຍ ອະເຮນີ້ຍ ໂຕສ໋ວ ເຍີຍ ເຢຍ ຕສູ໊ງ ອ໋ອຍ ໂຕສ໋ວ ຕສຢັ໋ງ.

¹¹ ເຢຍ ອ໋ອຍ ເຫ່ວ ຕົ້ມ ຈ໊າງ ຢຽມ ຕົງ ປູງ ຕ້າຍ, ເຊ ເຫ່ວ ເຕົ້າ ມ່ຽນ ຢຽມ ໂກ ເຍີຍ ເຕີ່ຍ-ປູງ ຕ້າຍ ເອີຍ ເຢຍ ເຍີຍ ຕສະເອີ໋ຍ ໂຕສ໋ວ ຕສຢັ໋ງ. ເຢຍ ກ໊ອງ ລິ໌ວ, ເຢຍ ຕສະເກ້ງ ອ໋ອຍ ປຸນ ທສວດ ຕ້າຍ, ເຢຍ ຕີ່ງ ລິ໌ວ ເຍີຍ, ເຢຍ ຕສະເກ້ງ ໂຕສ໋ວ.

¹² ເມີ່ຍ ບົວ ໂຮຍ້ວ ແຫງ່ງ, ເລີ່ຍ ແປ້ງ ຟິມ ເຈົ໊າ ເຍີຍ ມ່ຽນ ອ້າ! ໝວັງ ເຢຍ ມ່າະ!

¹³ ເຢຍ ປຸນ ເຢຍ ຮີ່ງ ເຈ໋ຍ ເຍີຍ ຮນອຍ ຕ້າຍ ຟັດ, ຕສູ໊ງ ເລີ່ຍ ໄມ້ ໂກ ອ໊ະ. ເຢຍ ເຍີຍ ໂອຈ໋ວ ເອນ ຢ່າ ໄມ້ ໄງ່. ເຢຍ ອ໋ອຍ ປຸນ ສິ​ໂອນ ຕຸ໊ ໂອຈ໋ວ ເອນ, ປຸນ ອິ​ສະ​ລາ​ເອນ ຕຸ໊ ເຢຍ ເຍີຍ ອຈັງ-ຫລ່າງ.