อิ​สะ​ยา 43 - ฉบับอักษรลาว

ຕສ໊ຽວ ໂອຈ໋ວ ນິ່ນ ເຍີຍ ແປະ ຝີງ

¹ ໂອ ຢາ​ໂຄບ ອ່າ, ເຕສີ໋ຍ ເມີ່ຍ ຕ້າຍ ວົ້ວ ເຕົ້າ, ໂອ ອິ​ສະ​ລາ​ເອນ ອ່າ, ນັ້ນ ເມີ່ຍ ຕ້າຍ ເຍີຍ ຕສ໊ຽວ, ອີ້ ຕສັ່ນ ຮນັ້ງ ນ້າຍ ນໍ ກ໊ອງ, “ໄມ້ ຕູ໋ງ ກ້ຳ ເດສ໋ຍ ເຫວີ່ຍ ຕສຸ ເຢຍ ຕສົວະ ເມີ່ຍ ດສ໋ວນ ຕ້າຍ ອ໊ະ. ເຢຍ ຕສິ໋ວ ເມີ່ຍ ເຍີຍ ບົ໋ວ ເຫ່ວ ເມີ່ຍ. ເມີ່ຍ ເປ໋ນ ເຢຍ ເຍີຍ ໝີ່ ອ໊ະ.

² ເມີ່ຍ ເຈ໋ຍ ວວມ ເຍີຍ ຕສຢັ້ງ ໂຫ່, ເຢຍ ເຖສົາ ເມີ່ຍ ຢຽມ. ເມີ່ຍ ເຈ໋ຍ ດ້າຍ, ດ້າຍ ເຍີຍ ວວມ ຢ່າ ໄມ້ ຢ໋ຽມ ເມີ່ຍ. ເມີ່ຍ ຢັ້ງ ໂຕ໌ວ ເຈ໋ຍ, ເມີ່ຍ ໄມ້ ຕສຸ ໂຕ໌ວ ປົ໊ວ, ໂຕ໌ວ-ບຽດ ຢ່າ ໄມ້ ເຕສັຍ ເມີ່ຍ.

³ ເຫວີ່ຍ ຕສຸ ເຢຍ ເຊ ຕສ໊ຽວ, ເມີ່ຍ ເຍີຍ ທິນ-ຮູ່ງ, ເຊ ອິ​ສະ​ລາ​ເອນ ເຍີຍ ທສີງ-ເດສ່ງ ທິນ-ຮູ່ງ, ເມີ່ຍ ເຍີຍ ໂອຈ໋ວ ຕສ໊ຽວ. ເຢຍ ເຕສ໊າະ ອີ​ຢິ໊ບ ໂຕສ໋ວ ຕສົວະ ເມີ່ຍ ເຍີຍ ຈ໋າ-ຕສິ້ນ, ຢ່າ ເຕສ໊າະ ເອ​ທີ​ໂອ​ເປຍ ເຖສົາ ເສ​ບາ ຫລົ່ງ ທິ້ວ ເມີ່ຍ.

⁴ ເຫວີ່ຍ ຕສຸ ຕສິ໋ວ ເຢຍ ເຍີຍ ມຕສີງ ໝັ່ງ, ເມີ່ຍ ເຊ ຈ໋າຍ ໄຫ່. ເຢຍ ທ່າຍ ເມີ່ຍ ຢ່າ ຮນ້ຳ ເມີ່ຍ. ເຢຍ ຕສ່ຽວ ເຕສ໊າະ ມ່ຽນ ຫລົ່ງ ທິ້ວ ເມີ່ຍ, ຢ່າ ເຕສ໊າະ ເຕສ໋ຍ ຝີງ ມ່ຽນ ຢ່ຽນ ເມີ່ຍ ເຍີຍ ແໝ່ງ.

⁵ ໄມ້ ຕູ໋ງ ກ້ຳ ເດສ໋ຍ ເຫວີ່ຍ ຕສຸ ເຢຍ ເຖສົາ ເມີ່ຍ ຢຽມ. ເຢຍ ອ໋ອຍ ຕໍ້ ເມີ່ຍ ເຍີຍ ເຕສີ໊ຍ-ຟຸນ ຢຽມ ຕົງ ປູງ ຕ້າຍ, ຢ່າ ຢຽມ ໄຟ ປູງ ຕໍ້ ເມີ່ຍ ເຍີຍ ມ່ຽນ ຕ້າຍ ກັ໊ບ ຕສຸ໊ນ.

⁶ ເຢຍ ອ໋ອຍ ບົ໋ວ ປ໊ະ ປູງ, ‘ປູ໋ງ ນິ່ນ ບົວ ມ່າະ!’ ຢ່າ ອ໋ອຍ ບົ໋ວ ນ່າມ ປູງ, ‘ໄມ້ ຕູ໋ງ ແດສງ ນິ່ນ ບົວ.’ ເຢຍ ອ໋ອຍ ຕໍ້ ເຢຍ ເຍີຍ ຕອນ ບົວ ຢຽມ ໂກ ເຍີຍ ຕ້າຍ, ຢ່າ ຢຽມ ລູ່ງ ກອນ ຕໍ້ ເຢຍ ເຍີຍ ເຊັຍ ດສ໋ວນ,

⁷ ເຊ ຕະຟ່ານ ກັນ ເຢຍ ເຍີຍ ບົ໋ວ ເຫ່ວ ເຍີຍ ມ່ຽນ, ຕົ້ງ ເຢຍ ເຕສີ໋ຍ ຕ້າຍ ເຫວີ່ຍ ປຸນ ເຢຍ ຕຸ໊ ອຈັງ-ຫລ່າງ, ເຊ ເຢຍ ນັ້ນ ຕ້າຍ ເຕສີ໋ຍ ຕ້າຍ ເຍີຍ ມ່ຽນ.’

ອິ​ສະ​ລາ​ເອນ ເຊ ທິນ-ຮູ່ງ ເຍີຍ ຕສອງ-ເຕສ໋ງ ມ່ຽນ

⁸ ອ໋ອຍ ຕສຸ ຕໍ້ ມ່າຍ ມຕສີງ ມປ່າ ແມ່ງ ເຍີຍ, ມ່າຍ ມນ່ອມ ມປ່າ ດູງ ເຍີຍ ມ່ຽນ ທສວດ ຕ້າຍ.

⁹ ໝ່ານ ກົ໊ວະ ມ່ຽນ ອ໋ອຍ ຕສຸ ກັ໊ບ ຕສຸ໊ນ, ຕສວັ໋ງ ຝີງ ອ໋ອຍ ຕສຸ ລົ່ມ ດສ້ອຍ ຕ້າຍ. ຢຽມ ນິ່ນ ບົວ ບຸດົ໋ງ ມ່າຍ ຫາຍ ເຕົ້າ ຈາ-ດ່າງ ກ໊ອງ ນ້າຍ ເຕີ໋ຍ ສີ່ ຢ່າ ກ໊ອງ ເຈ໋ຍ ຕ້າຍ ເຍີຍ ສີ່ ປຸນ ເຢຍ ບົວ ໝວັງ? ປຸນ ນິ່ນ ບົວ ຕໍ້ ນິ່ນ ບົວ ເຍີຍ ຕສອງ-ເຕສ໋ງ ມ່ຽນ ທສວດ ຕ້າຍ ປຸນ ທສີງ ນິ່ນ ບົວ ຫອບ, ມ່ຽນ ຕສ່ຽວ ໝວັງ ໄຮ໌ ຢ່າ ກ໊ອງ, “ນ້າຍ ຕສະເກ້ງ ຕສຽນ ເຍີຍ.”

¹⁰ ຕສ໊ຽວ ກ໊ອງ, “ເມີ່ຍ ບົວ ເຊ ເຢຍ ເຍີຍ ຕສອງ-ເຕສ໋ງ ມ່ຽນ, ຢ່າ ໂຕສ໋ວ ເຢຍ ເຍີຍ ໂປວ, ຕົ້ງ ເຢຍ ກິ໊ນ ວົ້ວ ເຕົ້າ, ເຫວີ່ຍ ປຸນ ເມີ່ຍ ບົວ ໄຮ່ ຮິ້ວ ຕຸ໊ ຢ່າ ສຽນ ເຢຍ, ຢ່າ ເມ່ງ ແປະ ເຢຍ ເຊ ຕສ໊ຽວ. ທສວດ ລິ໌ວ ເຢຍ ໄມ້ ມ່າຍ ກັ້ນ ເຕົ້າ ຕສ້ຽນ. ຕສິ້ນ ດ່າງ ໄມ້ ມ່າຍ, ອກະຮ້າ ຢ່າ ໄມ້ ມ່າຍ.

¹¹ ເຢຍ, ເຊ ເຢຍ ກັ້ນ, ໂຕສ໋ວ ຕສ໊ຽວ. ທສວດ ລິ໌ວ ເຢຍ ໄມ້ ມ່າຍ ກັ້ນ ເຕົ້າ ໂອຈ໋ວ ຕສ໊ຽວ.

¹² ເຢຍ ປຸນ ເມີ່ຍ ບົວ ຮິ້ວ, ຢ່າ ໂອຈ໋ວ ເມີ່ຍ ບົວ ຢ່າ ກ໊ອງ ບົ໋ວ ເມີ່ຍ ບົວ, ເຊ ເຢຍ, ໄມ້ ເຕສີ໌ຍ ຢຽມ ເມີ່ຍ ບົວ ບຸດົ໋ງ ເຍີຍ ເຫຍ່ຍ ເຍີຍ ຕສ້ຽນ.” ຕສ໊ຽວ ກ໊ອງ, “ເມີ່ຍ ບົວ ໂຕສ໋ວ ເຢຍ ເຍີຍ ຕສອງ-ເຕສ໋ງ ມ່ຽນ, ເຢຍ ເຊ ທິນ-ຮູ່ງ.”

¹³ ຢຽມ ໂລ໌! ຮນອຍ ຕ້າຍ ເຢຍ ມຕ້າຍ ຢຽດ ລິ໌ວ ໂຕສ໋ວ ທິນ-ຮູ່ງ. ໄມ້ ມ່າຍ ຫາຍ ເຕົ້າ ໄຮ່ ໂອຈ໋ວ ມ່ຽນ ເປຢົ໋າ ດຸ໊ດ ເຢຍ ເຍີຍ ປົ໌ວ. ເຢຍ ໂຕສ໋ວ ເຍີຍ ຫາຍ ຫຍູ່ງ, ໄມ້ ມ່າຍ ຫາຍ ເຕົ້າ ໄຮ່ ກ໊ອຍ ຢ່ຽນ.

ບາ​ບີ​ລົນ ອ໋ອຍ ປວັ້ງ ເຍີຍ ສີ່

¹⁴ ອິ​ສະ​ລາ​ເອນ ເຍີຍ ທສີງ-ເດສ່ງ ທິນ-ຮູ່ງ, ຕົ້ງ ຕສົວະ ເມີ່ຍ ບົວ ວົ້ວ ເຕົ້າ ຕສ໊ຽວ, ຮນັ້ງ ນ້າຍ ນໍ ກ໊ອງ, “ເຫວີ່ຍ ເມີ່ຍ ບົວ ເຍີຍ ກອນ ເຢຍ ພ້າຍ ຈຸນ-ແປງ ກວັ້ນ ມີ່ງ ບາ​ບີ​ລົນ, ເບ໊າະ ປ່າຍ ນິ່ນ ບົວ ເຍີຍ ຢຽດ ຕສູ໊ງ ຕສີ້ງ ແກ້ງ, ບາ​ບີ​ລົນ ມ່ຽນ ອຈຽນ-ໂຢ້ວ ເຫ່ວ ເຍີຍ ເຖຈຍ ຕສ່ຽວ ທິ້ວ ເປ໋ນ ເດສົ້າ ຍ້ຽມ ເຍີຍ ເຖຈຍ.

¹⁵ ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທສີງ-ເດສ່ງ ທິນ-ຮູ່ງ, ຕົ້ງ ເຕສີ໋ຍ ອິ​ສະ​ລາ​ເອນ ວົ້ວ ເຕົ້າ, ເມີ່ຍ ບົວ ເຍີຍ ຮູ່ງ ເຕ໋ຍ.”

¹⁶ ຕສ໊ຽວ ຮນັ້ງ ນ້າຍ ນໍ ກ໊ອງ. ຕສ໊ຽວ ຄອຍ ທົງ ຄ້ອຍ ເຍີຍ ເຈົ໊າ, ຄອຍ ຕິ້ວ ເຈົ໊າ ຢຽມ ຕົ້ມ ວວມ ກະຍົ໌ວ.

¹⁷ ນິ່ນ ປຸນ ເບ໊າະ ຈ໋າ ເຍີຍ ເທສຍ ເຖສົາ ມ໌າ, ປຸນ ຈຸນ-ແປງ ເຖສົາ ເບ໊າະ ຈ໋າ ເຮ້ນ ເຍີຍ ແປງ ທສວດ ຕ້າຍ. ນິ່ນ ບົວ ເປວີ໋ຍ ເອຈ່ຍ, ຢຽດ ລິ໌ວ ໄມ້ ໄຮ່ ເຈ໌ຍ ຊິນ. ນິ່ນ ບົວ ຕສຸດ ເດສ່ງ, ຮນັ້ງ ຕັງ-ໂທສ້ ເຍີຍ ໂຕ໌ວ ໄຕ່ ນໍ.

¹⁸ ຕສ໊ຽວ ຮນັ້ງ ນ້າຍ ນໍ ກ໊ອງ, “ໄມ້ ຕູ໋ງ ຈັ໋ງ ເຈ໋ຍ ຕ້າຍ ເຍີຍ ສີ່, ຢ່າ ໄມ້ ຕູ໋ງ ດສ່ຳ ໂລ໌-ຮນອຍ ເຍີຍ ເຈົ໊າ.

¹⁹ ໝັ່ງ ມ່າະ! ເຢຍ ອ໋ອຍ ໂຕສ໋ວ ຢຽດ ຫຍູ່ງ ຊຢັງ-ສີ່, ອີ້ ຕສັ່ນ ທສວດ ຕ້າຍ ອ໊ະ. ເມີ່ຍ ບົວ ໄມ້ ປວັດ ໄຟ? ເຢຍ ອ໋ອຍ ຢຽມ ເຕີ່ຍ-ປູງ-ຮວາງ ຄອຍ ເຈົ໊າ, ຢ່າ ປຸນ ເຕີ່ຍ-ປູງ-ຮ໌ານ ທສວດ ໂດ໊ະ.

²⁰ ຫລົ່ມ ເຍີຍ ເຮ່ຍ ຕສ້ອຍ ອ໋ອຍ ທ່າຍ ເຢຍ, ເຮ່ຍ ຈູ໊ ເຖສົາ ເໜາະ ລໍ່ ທໍ່ ຢ່າ ທ່າຍ ເຢຍ, ເຫວີ່ຍ ຕສຸ ເຢຍ ປຸນ ເຕີ່ຍ-ປູງ-ຮວາງ ມ່າຍ ວວມ, ຢ່າ ປຸນ ເຕີ່ຍ-ປູງ-ຮ໌ານ ມ່າຍ ໂດ໊ະ, ເຫວີ່ຍ ປຸນ ເຢຍ ເຍີຍ ແປະ ຝີງ, ເຢຍ ກິ໊ນ ຕ້າຍ ເຍີຍ ມ່ຽນ, ມ່າຍ ວວມ ຮົບ,

²¹ ເຊ ເຫວີ່ຍ ເຢຍ ກັ້ນ ເຕສີ໋ຍ ຕ້າຍ ເຍີຍ ມ່ຽນ. ນິ່ນ ບົວ ຕສ່ຽວ ໄຮ່ ເທສງ ເຢຍ.

ອິ​ສະ​ລາ​ເອນ ເຍີຍ ຕສຸ໌ຍ

²² “ໂອ ຢາ​ໂຄບ ອ່າ, ໄມ້ ກຸ໊ນ ຮນັ້ງ ໜ່າຍ ເມີ່ຍ ຖສໍ່ ໄມ້ ເຫ່ວ ເຢຍ. ໂອ ອິ​ສະ​ລາ​ເອນ ອ່າ, ເມີ່ຍ ໄມ້ ເຫວີ່ຍ ເຢຍ ເຕ໊ຍ ໂຄ້ວ ຢຽດ ເຕີ໋ຍ.

²³ ເມີ່ຍ ໄມ້ ຕໍ້ ປະກີ ຢູ້ງ ຕ້າຍ ເຕສ່ຍ ເຢຍ, ຢ່າ ໄມ້ ຫລົ່ງ ເມີ່ຍ ເຕສ່ຍ ເຍີຍ ກະນ້າຍ ທ່າຍ ເຢຍ. ເຢຍ ໄມ້ ປຸນ ເມີ່ຍ ເຫວີ່ຍ ຝົ່ງ ຫໍ່ ເຍີຍ ກະນ້າຍ ໂຄ້ວ, ຢ່າ ໄມ້ ຕສັ່ນໆ ໂທ້ ຮູງ ປຸນ ເມີ່ຍ ໂຄ້ວ ໄຫ່.

²⁴ ເມີ່ຍ ໄມ້ ຫລົ່ງ ຍ່ານ ມ໌າຍ ກ້ຳ ເຕສ໋ຍ ປຸນ ເຢຍ, ໄຟ ຫລົ່ງ ເຕສ່ຍ ເຍີຍ ກະນ້າຍ ເຍີຍ ເຮມີຍ ປຸນ ເຢຍ ປວັ໊ງ ໂຮຍ້ວ. ຕ໋າວ ດສ໋ວນ ເມີ່ຍ ປຸນ ເຢຍ ເຫວີ່ຍ ເມີ່ຍ ເຍີຍ ຕສຸ໌ຍ ໂຄ້ວ, ເມີ່ຍ ໂຕສ໋ວ ຕ່ອງ ປ໌າມ ເຍີຍ ຕສຸ໌ຍ ປຸນ ເຢຍ ຕສະເກ້ງ ໂຄ້ວ ໄຫ່.

²⁵ “ຂູງ ມ່າຍ ເຢຍ ເຫວີ່ຍ ກັ້ນ ຊອດ ກວັ່ງ ເມີ່ຍ ໂຕສ໋ວ ຕ່ອງ ເຍີຍ ສີ່, ຢ່າ ໄມ້ ຈັ໋ງ ເມີ່ຍ ເຍີຍ ຕສຸ໌ຍ.

²⁶ ເວດ ທສວດ ເຈ໋ຍ ຕ້າຍ ເຍີຍ ສີ່ ປຸນ ເຢຍ ໝວັງ, ປຸນ ບົວ ລົ່ມ ດສ້ອຍ ຕ້າຍ ຫລວນ. ກຸ໊ນ ກ໊ອງ ເມີ່ຍ ເຍີຍ ເຈົ໊າ ປຸນ ທສີງ ເມີ່ຍ ໄມ້ ຕ່ອງ.

²⁷ ເມີ່ຍ ເຍີຍ ຕ້າວ ເຕົ້າ ອົງ-ຖາຍ-ແງະ ປ໌າມ ຕສຸ໌ຍ. ເມີ່ຍ ເຍີຍ ເປຢີ໊ຍ ເຕສີ໊ຍ ຢ່າ ແຫງ່ງ ເຢຍ.

²⁸ ເຢຍ ອ໋ອຍ ປຸນ ຢຽມ ສີງ ຕິ່ນ ໂຕສ໋ວ ໂຮລ ວົ້ວ ເຕີ໋ຍ ມ່າຍ ຫວຸຍ, ເຕສ໊າະ ຢາ​ໂຄບ ຈິວ ປຸນ ຕສຸ ໝຽດ ເດສ່ງ, ຢ່າ ປຸນ ອິ​ສະ​ລາ​ເອນ ຕສຸ ມ່ຽນ ຮວວດ.