อิ​สะ​ยา 41 - ฉบับอักษรลาว

¹ ທິນ-ຮູ່ງ ກ໊ອງ, “ຄ້ອຍ-ໂດສວ ອ່າ, ອ໋ອຍ ຕສຸ ຢຽມ ເຢຍ ເຍີຍ ດສະຮມຽນ ເຊກ ເດສັຍ, ອ໋ອຍ ຕສຸ ປຸນ ໝ່ານ ຝີງ ຕຸ໊ ຊຢັງ-ທຈະ ເຮ້ນ ເຈ໌ຍ ຕ້າຍ. ປຸນ ນິ່ນ ບົວ ຕ້າຍ ຟັດ ຢ່າ ປຸນ ນິ່ນ ບົວ ກ໊ອງ, ປຸນ ບົວ ຕ້າຍ ຕສຸ໊ນ ລົ່ມ ດສ້ອຍ ຕສຸ ຊ້ຽມ ຕີ່ງ.

² “ຫາຍ ເຕົ້າ ຢົວະ ເຕົ້າ ມ່ຽນ ຢຽມ ຕົງ ປູງ ຕ້າຍ? ຕະຟ່ານ ນິ່ນ ເຍີຍ ເຕສົ໋າ ທສ້າຍ ເຍີຍ ຕ໋ອງ ນິ່ນ ຕຸ໊ ຮີ່ງ ເດສ່ງ. ຕສ໊ຽວ ເຕສ໊າະ ເຕສ໋ຍ ກົ໊ວະ ຈິວ ປຸນ ນິ່ນ, ປຸນ ນິ່ນ ກຸ໊ນ ເຕສ໋ຍ ເຕົ້າ ຮູ່ງ ເຕ໋ຍ. ນິ່ນ ຫລົ່ງ ນິ່ນ ເຍີຍ ດສຸ ດ໊າວ ໄຕ໋ ນິ່ນ ບົວ, ປຸນ ນິ່ນ ບົວ ເປ໋ນ ເນຍ-ບູງ, ຢ່າ ຫລົ່ງ ນິ່ນ ເຍີຍ ຈວັງ-ຕສິ໋ນ ປຸນ ນິ່ນ ບົວ ຮນັ້ງ ຕສຸ ດສຢ໋າວ ປ່ວນ ເຍີຍ ເບຢົ້າ ອກ໊າວ.

³ ນິ່ນ ຕສຸ່ນ ນິ່ນ ບົວ ມີ່ງ ຢ່າ ແປ້ງ ອອນ ເຍີຍ ເຈ໋ຍ ນິ່ນ ບົວ, ຢັ້ງ ນິ່ນ ເຍີຍ ເຕສົ໋າ ໄມ້ ທສ້າຍ ເຈ໋ຍ ເຍີຍ ເຈົ໊າ.

⁴ ຫາຍ ເຕົ້າ ໂຕສ໋ວ ນ້າຍ ເຕີ໋ຍ ສີ່ ຢ່າ ໂຕສ໋ວ ຕຸ໊ ທສວດ, ຢຽມ ຕົ້ງ ທສໍ ເຫ່ວ ຕ່ອຍ ເຈ໋ຍ ຕ່ອຍ ທສວດ ຕ້າຍ? ເຢຍ, ຕສ໊ຽວ, ຢຽມ ກອນ, ເຖົາ ເຊດ ເມວີ໌ຍ ເຢຍ ຢ່າ ຢຽມ ເຍີຍ. ເຢຍ ເຊ ຕົ້ງ ວົ້ວ ເຕົ້າ ອ໊ະ.”

⁵ ຄ້ອຍ-ໂດສວ ເຍີຍ ມ່ຽນ ຕຸ໊ ປວັດ ຕສ່ຽວ ກ້ຳ ເດສ໋ຍ, ຈົ່ມ ລູ່ງ ເດ໊ຍ ເຍີຍ ມ່ຽນ ຊິນ ຕສິ໋ນ. ນິ່ນ ບົວ ເປັຍ ຕ້າຍ ຟັດ,

⁶ ເກ໊າະ-ມ່ຽນ ເຖງ ເກ໊າະ-ມ່ຽນ ເຍີຍ ຈວັ່ງ ລ໌າງ ມ່ຽນ ຢ່າ ກ໊ອງ ບົ໋ວ ນິ່ນ ເຍີຍ ກໍ໋-ໂຢ໌ວ, “ອ໋ອຍ ຕສຸ ຕສູ໋ງ ຕ໊າມ.”

⁷ ດຢັ໋ງ-ຕສັ່ງ ຂວິນ ຈຽມ-ຕສັ່ງ. ຫລົ່ງ ເຕສວີ້ຍ ຕ໊າ ຢ້ວນ ເຍີຍ ມ່ຽນ ເທສງ ຫ່ອນ ເຍີຍ ມ່ຽນ. ກ໊ອງ, “ຫ່ອນ ຕຸ໊ ຢ່າວ ໄຫ່.” ນິ່ນ ແອ໋ງ ຫລົ່ງ ຕີງ ຕີງ ຈ໊ຽນ ປຸນ ໝິ່ວ-ຝັງ ໄມ້ ໄຮ່ ຄີງ.

⁸ “ມປ່າ ເມີ່ຍ, ອິ​ສະ​ລາ​ເອນ, ເຊ ເຢຍ ເຍີຍ ໂປວ, ຢາ​ໂຄບ, ຕົ້ງ ເຢຍ ກິ໊ນ ຕ້າຍ ວົ້ວ ເຕົ້າ, ເຢຍ ເຍີຍ ໂລ໌-ແກງ ຕ່ອຍ, ອັບ​ລາ​ຮຳ ເຍີຍ ເຕສີ໊ຍ-ຟຸນ,

⁹ ເຢຍ ຢຽມ ລູ່ງ ກອນ ເຕສ໊າະ ເມີ່ຍ, ຢ່າ ຢຽມ ເດົາ-ເປີ້ຍ ໂກ ເຈ໋ຍ ເຍີຍ ຕ໋ອງ ເຫ່ວ ເມີ່ຍ ຕ້າຍ. ເຢຍ ກ໊ອງ, ‘ເມີ່ຍ ໂຕສ໋ວ ເຢຍ ເຍີຍ ໂປວ.’ ເຢຍ ກິ໊ນ ເມີ່ຍ ຕ້າຍ ຢ່າ ໄມ້ ກວັ່ງ ເມີ່ຍ.

¹⁰ ໄມ້ ຕູ໋ງ ກ້ຳ ເດສ໋ຍ. ເຢຍ ເຖສົາ ເມີ່ຍ ຢຽມ. ໄມ້ ຕູ໋ງ ໂຮຍ້ວ ໜຳ ເຫວີ່ຍ ຕສຸ ເຢຍ ໂຕສ໋ວ ເມີ່ຍ ເຍີຍ ທິນ-ຮູ່ງ. ເຢຍ ອ໋ອຍ ປຸນ ເມີ່ຍ ເຮ້ນ ຢ່າ ອ໋ອຍ ເຖງ ເມີ່ຍ. ເຢຍ ອ໋ອຍ ຫລົ່ງ ເຢຍ ແປ້ງ ຟິມ ເຍີຍ ບຢ່າວ ເຈັ໊ຍ ປົ໌ວ ປ໊າ ຈ໊ຽນ ເມີ່ຍ.

¹¹ “ຕະຟ່ານ ໂນ໌ວ ເມີ່ຍ ວົ້ວ ເຕີ໋ຍ ມ່ຽນ ຕສູ໊ງ ອ໋ອຍ ຕສຸ ໄຍ້, ຕສຸ ປ່າຍ ຮມຽນ. ແຫງ່ງ ເມີ່ຍ ວົ້ວ ເຕີ໋ຍ, ອ໋ອຍ ຕສຸ ປ່າຍ, ຕສຸ ໝຽດ.

¹² ໄມ້ ກຸ໊ນ ເມີ່ຍ ລໍ໌ ເຖສົາ ເມີ່ຍ ຕ໋ອຍ-ເຕກ ເຍີຍ ມ່ຽນ, ເມີ່ຍ ລໍ໌ ຢ່າ ລໍ໌ ໄມ້ ປວັດ. ເຖສົາ ເມີ່ຍ ເບ໊າະ ຈ໋າ ວົ້ວ ເຕີ໋ຍ ອ໋ອຍ ເຈ໋ຍ ເດສ່ງ, ຕສຸ ປ່າຍ ໝີ່ ອ໊ະ.

¹³ ເຫວີ່ຍ ຕສຸ ເຢຍ, ຕສ໊ຽວ, ເມີ່ຍ ເຍີຍ ທິນ-ຮູ່ງ, ນັ້ນ ເມີ່ຍ ເຍີຍ ບຢ່າວ ເຈັ໊ຍ ປົ໌ວ. ເຊ ຕົ້ງ ເຢຍ ກ໊ອງ ບົ໋ວ ເມີ່ຍ, ໄມ້ ຕູ໋ງ ກ້ຳ ເດສ໋ຍ, ເຢຍ ອ໋ອຍ ເຖງ ເມີ່ຍ.

¹⁴ ໂອ ຢາ​ໂຄບ ອ່າ, ເມີ່ຍ ຮນັ້ງ ແກງ-ເມົາ ໄມ້ ເຮ້ນ, ໄມ້ ຕູ໋ງ ກ້ຳ ເດສ໋ຍ. ໂອ ອິ​ສະ​ລາ​ເອນ ອ່າ, ເມີ່ຍ ໄຝ. ເຢຍ ກັ້ນ ອ໋ອຍ ເຖງ ເມີ່ຍ.” ນ້າຍ ເຊ ຕສ໊ຽວ ກ໊ອງ, ຕົ້ງ ຕສົວະ ເມີ່ຍ ວົ້ວ ເຕົ້າ, ເຊ ອິ​ສະ​ລາ​ເອນ ເຍີຍ ທສີງ-ເດສ່ງ ທິນ-ຮູ່ງ.

¹⁵ “ໝັ່ງ ມ່າະ! ເຢຍ ອ໋ອຍ ປຸນ ເມີ່ຍ ເປ໋ນ ເບ໊າະ ເບຢົ້າ ເຍີຍ ຈາ-ສີ່, ຊຢັງ ເຍີຍ, ໄຫລ່ ເຍີຍ, ມ່າຍ ຍ່າ ເຍີຍ. ເມີ່ຍ ອ໋ອຍ ເບ໊າະ ບົງ ບາງ ໝ່ວນ ເດສ່ງ, ຢ່າ ໂຕສ໋ວ ປຸນ ບົງ-ໄອ໊ ຮນັ້ງ ເບັ໊ຍ ນໍ.

¹⁶ ເມີ່ຍ ອ໋ອຍ ຫຍົມ ນິ່ນ ບົວ. ດສຢ໋າວ ຕສ່ຽວ ປ່ວນ ນິ່ນ ບົວ ມີ່ງ. ດສຢ໋າວ-ຕສຸ່ນ ອ໋ອຍ ປ່ວນ ນິ່ນ ບົວ ຟາດ ດສ໋ານ. ມປ່າ ເມີ່ຍ ອ໋ອຍ ເຂົາ ຕສ໊ຽວ ຕຸ໊ ອຈຽນ-ໂຢ້ວ. ເມີ່ຍ ອ໋ອຍ ເທສງ ອິ​ສະ​ລາ​ເອນ ເຍີຍ ທສີງ-ເດສ່ງ ທິນ-ຮູ່ງ.

¹⁷ “ມ່ຽນ ຈົ່ມ ມ່ຽນ ເຖສົາ ຕັ໋ງ-ຕົ໋ນ ເຍີຍ ມ່ຽນ ລໍ໌ ວວມ, ຢ່າ ໄມ້ ມ່າຍ. ນິ່ນ ບົວ ຈາງ ອກ໊າດ, ບຽດ ບ໋ອງ ອກາຍ, ມປ່າ ເຢຍ, ຕສ໊ຽວ, ອ໋ອຍ ເຕົາ ນິ່ນ ບົວ. ເຢຍ, ອິ​ສະ​ລາ​ເອນ ເຍີຍ ທິນ-ຮູ່ງ, ໄມ້ ກວັ່ງ ນິ່ນ ບົວ.

¹⁸ ເຢຍ ອ໋ອຍ ຢຽມ ເດົາ-ຮລັງ ອຈັງ ເຍີຍ ຕ໋ອງ ປຸນ ດ້າຍ ທສວດ, ປຸນ ຢຽມ ຮ໌ອງ ກະຍົ໌ວ ມ່າຍ ວວມ-ຕສີ໊ງ. ເຢຍ ອ໋ອຍ ປຸນ ເຕີ່ຍ-ປູງ-ຮ໌ານ ເປ໋ນ ວວມ-ອຈ້າງ, ປຸນ ເດົາ-ອກາຍ ເປ໋ນ ວວມ-ຕສີ໊ງ.

¹⁹ ເຢຍ ອ໋ອຍ ຢຽມ ເຕີ່ຍ-ປູງ-ຮວາງ ຕສວັ໋ງ ສີ​ດາ ຕສົ້ງ ດຢັ໋ງ, ຕະຊຸ ດຢັ໋ງ, ຟານ ຕສິ ລ່ຽວ ດຢັ໋ງ ເຖສົາ ກະລັ້ນ ດຢັ໋ງ. ເຢຍ ອ໋ອຍ ຢຽມ ເຕີ່ຍ-ປູງ-ຮ໌ານ ຕສວັ໋ງ ປົວ ຄວ້າຍ ນ່ອມ ເຍີຍ ຕສົ້ງ, ແອ໋ງ ເຖສົາ ອີ ຫຍູ່ງ ຕສົ້ງ ດຢັ໋ງ,

²⁰ ເຫວີ່ຍ ປຸນ ມ່ຽນ ປວັດ ຕສ່ຽວ ຮິ້ວ, ເຊ ປຸນ ນິ່ນ ບົວ ຮນ້ຳ ຫລົງ ຢ່າ ເມ່ງ ແປະ, ເຊ ຕສ໊ຽວ ເຍີຍ ປົ໌ວ ຮນັ້ງ ນ້າຍ ນໍ ໂຕສ໋ວ, ເຊ ອິ​ສະ​ລາ​ເອນ ເຍີຍ ທສີງ-ເດສ່ງ ທິນ-ຮູ່ງ ເຕສີ໋ຍ ທສວດ ຕ້າຍ.”

ຈ໊າ ຕສ້ຽນ ໄມ້ ລ່ຳ ຫລົ່ງ

²¹ ຕສ໊ຽວ ກ໊ອງ, “ຕໍ້ ເມີ່ຍ ບົວ ໂກ໋ ເຍີຍ ສີ່ ຕ້າຍ ກ໊ອງ ມ່າະ!” ຢາ​ໂຄບ ເຍີຍ ຮູ່ງ ເຕ໋ຍ ກ໊ອງ, “ ເມີ່ຍ ບົວ ອ໋ອຍ ແດສງ ຮີ່ງ ເຍີຍ ເລີ໌ຍ ກຸ໊ນ ຕ້າຍ ກ໊ອງ ອ໊ະ.

²² ກຸ໊ນ ຕໍ້ ຕ້າຍ ບົ໋ວ ເຢຍ ບົວ ອ໋ອຍ ມ່າຍ ຫາຍ ຫຍູ່ງ ສີ່ ທສວດ. ເຈ໋ຍ ຕ້າຍ ເຍີຍ ສີ່ ອ໋ອຍ ຕສຸ ບົ໋ວ ເຢຍ ບົວ ເຫວີ່ຍ ປຸນ ເຢຍ ບົວ ຕສ້າ ໝັ່ງ ຕສ່ຽວ ຮິ້ວ ຕຸ໊ ນ້າຍ ເຕີ໋ຍ ສີ່ ເຍີຍ ເຊດ ເມວີ໌ຍ ອ໋ອຍ ຮນັ້ງ ຫາຍ ນໍ.

²³ ກ໊ອງ ປຸນ ເຢຍ ບົວ ໝວັງ ເຫວີ່ຍ ປຸນ ເຢຍ ບົວ ຮິ້ວ ຕຸ໊ ໂຮ໌ ອກາງ ອ໋ອຍ ມ່າຍ ຫາຍ ຫຍູ່ງ ສີ່ ທສວດ. ເຢຍ ບົວ ຕສ່ຽວ ໄຮ່ ຮິ້ວ ຕຸ໊ ເມີ່ຍ ບົວ ເຊ ຕສ້ຽນ. ໂຕສ໋ວ ຄູ້ ສີ່ ໄຟ ໂຕສ໋ວ ເອ໊າະ ສີ່ ເຫວີ່ຍ ປຸນ ເຢຍ ບົວ ເດສົ້າ ຢ່າ ກ້ຳ ເດສ໋ຍ.

²⁴ ໝັ່ງ ມ່າະ! ເມີ່ຍ ບົວ ເຊ ຕສະເກ້ງ ໄມ້ ລ່ຳ ຫລົ່ງ. ເມີ່ຍ ບົວ ເຍີຍ ກົງ ຢ່າ ໂຕສ໋ວ ໄມ້ ທສວດ ຫາຍ ຫຍູ່ງ. ກິ໊ນ ເມີ່ຍ ບົວ ວົ້ວ ເຕົ້າ ເຊ ກ້ຳ ເດສ໊ຍ ໄຫ່.

²⁵ “ເຢຍ ຢຽມ ປ໊ະ ປູງ ກິ໊ນ ເຕົ້າ ມ່ຽນ ຕ້າຍ, ນິ່ນ ຢຽມ ບະຮນອຍ ທສວດ ປູງ ເຫ່ວ ເຢຍ ເຍີຍ ບົ໋ວ. ນິ່ນ ອ໋ອຍ ທສ້າຍ ຈ໊ຽນ ກຸ໊ນ ເຍີຍ ມ່ຽນ ຮນັ້ງ ນິ່ນ ບົວ ໂຕສ໋ວ ວວມ-ປ່ຳ, ຮນັ້ງ ນັ້ນ ເນຍ-ມໍ ເຍີຍ ມ່ຽນ ທສ້າຍ ປະໄນ່ ເນຍ.

²⁶ ຫາຍ ເຕົ້າ ຢຽມ ກອນ ກ໊ອງ ນ້າຍ ເຕີ໋ຍ ສີ່, ເຫວີ່ຍ ປຸນ ເຢຍ ບົວ ຮິ້ວ, ໄຟ ຈາ-ດ່າງ ບົ໋ວ, ເຢຍ ບົວ ຖສີງ ຕ້າຍ ໄຮ່ ກ໊ອງ, ‘ກ໊ອງ ຕຸ໊ ຕສຸ ເຍີຍ’? ໄມ້ ມ່າຍ ຫາຍ ເຕົ້າ ບົ໋ວ ເຢຍ ບົວ ຮິ້ວ ຕຸ໊ ນ້າຍ ເຕີ໋ຍ ສີ່, ໄມ້ ມ່າຍ ຫາຍ ເຕົ້າ ຈາ-ດ່າງ ກ໊ອງ. ໄມ້ ມ່າຍ ຫາຍ ເຕົ້າ ໄຮ໌ ເມີ່ຍ ບົວ ກ໊ອງ ຫາຍ ຫຍູ່ງ.

²⁷ ເຢຍ ໂຕສ໋ວ ຕ້າວ ເຕົ້າ ກ໊ອງ ບົ໋ວ ສິ​ໂອນ, ‘ໝັ່ງ ມ່າະ! ນິ່ນ ບົວ ຢຽມ ນ້າຍ.’ ເຢຍ ພ້າຍ ເຕົ້າ ໂຕ່ວ ຄູ້ ຝຽນ ເຍີຍ ມ່ຽນ ມີ່ງ ເຢ​ລູ​ຊາ​ເລມ.

²⁸ ເຢຍ ໝັ່ງ ເຍີຍ ຕສຢັ້ງ ໂຫ່ ໄມ້ ມ່າຍ ມ່ຽນ. ເຢຍ ໝັ່ງ ມປ່າ ຢຽມ ນິ່ນ ບົວ ບຸດົ໋ງ ໄມ້ ມ່າຍ ທສ່າງ ລ່າງ ເຍີຍ ມ່ຽນ. ເຢຍ ໜ່າຍ ຢ່າ ໄມ້ ມ່າຍ ຫາຍ ເຕົ້າ ເຕົາ.

²⁹ ໝັ່ງ ມ່າະ! ນິ່ນ ບົວ ຢຽດ ຕສູ໊ງ ໄມ້ ລ່ຳ ຫລົ່ງ. ນິ່ນ ບົວ ໂຕສ໋ວ ເຍີຍ ເຈົ໊າ ຢ່າ ໄມ້ ລ່ຳ ຫລົ່ງ. ນິ່ນ ບົວ ໂຕ໋ ຕ້າຍ ເຍີຍ ໝິ່ວ-ຝັງ ຮນັ້ງ ຂູງ-ດສຢ໋າວ ນໍ.”