อิ​สะ​ยา 34 - ฉบับอักษรลาว

ທິນ-ຮູ່ງ ຕີ່ງ ນິ່ນ ເຍີຍ ວິນ-ວັ້ງ ເຍີຍ ຕສຸ໌ຍ

¹ ໂອ ໝ່ານ ກົ໊ວະ ມ່ຽນ ອ້າ! ຕ້າຍ ຟັດ ໝວັງ. ໂອ ໝ່ານ ມ່ຽນ ອ້າ! ອ໋ອຍ ຕສຸ ແປງ ມນ່ອມ ໝວັງ. ເດົາ-ເປີ້ຍ ເຖສົາ ຢຽມ ເດົາ-ເປີ້ຍ ເຍີຍ ໝ່ານ ໝວດ, ລູ່ງ ເດ໊ຍ ເຖສົາ ຢຽມ ລູ່ງ ເດ໊ຍ ຕ້າຍ ເຍີຍ ຢຽດ ຕສູ໊ງ ກະນ້າຍ ອ໋ອຍ ຕສຸ ໝວັງ.

² ເຫວີ່ຍ ຕສຸ ຕສ໊ຽວ ເຖຈຍ ເຈ໌ຍ ໝ່ານ ຝີງ, ນິ່ນ ໂນ໌ວ ໄຫ່ ນິ່ນ ບົວ ເຍີຍ ຢຽດ ຕສູ໊ງ ຈຸນ-ແປງ. ນິ່ນ ຕສູ໊ງ ອ໋ອຍ ໝຽດ ເດສ່ງ ນິ່ນ ບົວ, ອ໋ອຍ ຈິວ ປຸນ ນິ່ນ ບົວ ຕສຸ ໄຕ໋ ໄຕ່.

³ ຕສຸ ໄຕ໋ ໄຕ່ ເຍີຍ ມ່ຽນ ອ໋ອຍ ຕສຸ ທໍ ກວັ່ງ. ນິ່ນ ບົວ ເຍີຍ ເຊີຍ ຮວ່ວນໆ ເຍີຍ ເຕສວີ໋ຍ, ບົງ ຢ່າ ມ່າຍ ດສຢ໊າມ ກົ໊ວະ ປວັ໊ງ ເດສ່ງ.

⁴ ລູ່ງ ຕສັ່ງ ເຍີຍ ໝ່ານ ໝວດ ອ໋ອຍ ຮູ້ ໝ່ວນ, ລູ່ງ ຢ່າ ອຈຸ່ນ ຈ໊ຽນ ຮນັ້ງ ອຈຸ່ນ ໂຊວ ນໍ. ເຫຮລີຍ ອ໋ອຍ ຢຽມ ວົ້ວ ລູ່ງ ດ໊ອດ ເອຈ່ຍ ຮນັ້ງ ອະຫງຸ່ນ ເຮມີຍ ເຍີຍ ນ່ອມ ໂປຢ້ ຢ່າ ຮນັ້ງ ງົ່ງ ຫຍໍ ປ໊ຽວ ຢຽມ ວົ້ວ ດຢັ໋ງ ຕສົວະ, ໂປຢ້ ນໍ.

⁵ ເຫວີ່ຍ ຕສຸ ເຢຍ ເຍີຍ ດສຸ ດ໊າວ ຢຽມ ວົ້ວ ລູ່ງ ຮົບ ເປ໊ວ. ໝັ່ງ ມ່າະ! ນ້າຍ ດສຸ ດ໊າວ ເອຈ່ຍ ຕ້າຍ ຕີ່ງ ເອ​ດົມ ເຍີຍ ຕສຸ໌ຍ, ຕົ້ງ ເຢຍ ຕີ່ງ ຕສຢັ໋ງ ປຸນ ຕສຸ ໝຽດ ວົ້ວ ເຕີ໋ຍ ມ່ຽນ.

⁶ ຕສ໊ຽວ ເຍີຍ ດສຸ ດ໊າວ ມ່າຍ ດສຢ໊າມ ກົ໊ວະ ປວັ໊ງ ເດສ່ງ, ຢ່າ ມ່າຍ ເຮມີຍ ກົ໊ວະ ປວັ໊ງ. ມ່າຍ ປະກີ ຢູ້ງ ຕອນ ເຖສົາ ຢູ້ງ ເຍີຍ ດສຢ໊າມ, ເຖສົາ ປະກີ ຢູ້ງ ໂກ໊ວ ເຍີຍ ຫຍຸດ ເຕສີ໊ຍ ເຍີຍ ເຮມີຍ. ເຫວີ່ຍ ຕສຸ ຕສ໊ຽວ ຢຽມ ໂບ​ຊາ​ລາ ມ່າຍ ຝົ່ງ ຫໍ່ ເຕສ່ຍ ເຍີຍ ເຈົ໊າ, ຢຽມ ເອ​ດົມ ເຕີ່ຍ ມ່າຍ ໄຕ໋ ໄຕ່ ເຍີຍ ສີ່ ໂຮລ ເຍີຍ.

⁷ ເຮ່ຍ ງົ່ງ ເຖສົາ ງົ່ງ ໂກ໊ວ ຕອນ, ເຖສົາ ຕົ້ມ ງົ່ງ ໂກ໊ວ ອ໋ອຍ ເຖສົາ ນິ່ນ ບົວ ຢຽດ ເອຈ່ຍ ຄີງ. ນິ່ນ ບົວ ເຍີຍ ເຕີ່ຍ-ປູງ ຢ່າ ມ່າຍ ດສຢ໊າມ ກົ໊ວະ ປວັ໊ງ, ເຮມີຍ ຢ່າ ສາມ ເປັຍ ເນຍ-ບູງ ດອນ ເດສ່ງ.

⁸ ເຫວີ່ຍ ຕສຸ ຕສ໊ຽວ ມ່າຍ ຈ໊າວ ວິນ ເຍີຍ ຮນອຍ, ເຫວີ່ຍ ສິ​ໂອນ ເຍີຍ ເຈົ໊າ ມ່າຍ ຈ໊າວ ຊ່ຽວ ເຍີຍ ຫຮຍັງ.

⁹ ເອ​ດົມ ເຍີຍ ໂດ໊ະ ອ໋ອຍ ທິ້ວ ເປ໋ນ ເດົາ ເຍີຍ ຕສູງ. ເນຍ-ບູງ ຢ່າ ທິ້ວ ເປ໋ນ ຮູ່ງ, ຕສຢັ້ງ ນອມ ເຕີ່ຍ-ປູງ ຕສ່ຽວ ເປ໋ນ ເຕສັຍ ຈ໊ຽນ ເຍີຍ ເດົາ-ໂຢ້ວ.

¹⁰ ໂຕ໌ວ ຕສຢັ້ງ ຮນອຍ ຕສຢັ້ງ ມ໌ວນ ຕສູ໊ງ ໄມ້ ໄຕ່, ໂຕ໌ວ-ສຽວ ຢຽດ ລິ໌ວ ຝາວ. ຕ່ອຍ ເຈ໋ຍ ຕ່ອຍ ຕສ່ຽວ ກວັ່ງ ຈ໊ຽນ ຮວາງໆ ວົ້ວ. ຢຽດ ລິ໌ວ ໄມ້ ມ່າຍ ມ່ຽນ ເຈ໋ຍ.

¹¹ ມປ່າ ເໜາະ ກູ໊ ລົງ ເຖສົາ ເໜາະ ມລົ່ມ ມິວ ອ໋ອຍ ຕຸ໊ ເປ໋ນ ນິ່ນ ບົວ ເຍີຍ ປ່ວນ. ຕົ້ມ ຈ໊າງ ເຖສົາ ເໜາະ ອາ ຢ່າ ອ໋ອຍ ຢຽມ ໜ່າຍ. ທິນ-ຮູ່ງ ອ໋ອຍ ແປງ ຮລາງ ເຈ໋ຍ ກູ້ ຫງວ່າຍ ເດາະ ປຸນ ວົ້ວ ເຕີ໋ຍ ຕ໋ອງ ຫລຸ່ນ. ນິ່ນ ອ໋ອຍ ຫລົ່ງ ຕີ່ງ ຕສະ ເຍີຍ ຮລາງ ປຸນ ວົ້ວ ເຕີ໋ຍ ຕ໋ອງ ເປ໋ນ ກວັ່ງ ຮວາງ ເຍີຍ ຕ໋ອງ.

¹² ຢຽມ ໜ່າຍ ໂຕສ໋ວ ໂຮລ ເຍີຍ ມ່ຽນ ອ໋ອຍ ທສວດ ບົ໋ວ ເຫ່ວ ວົ້ວ ເຕີ໋ຍ ເດົາ, “ໄມ້ ມ່າຍ ກົ໊ວະ ຢຽມ ໜ່າຍ.” ນິ່ນ ເຍີຍ ຢຽດ ຕສູ໊ງ ຈຽນ ໄມ້ ເປ໋ນ ຫາຍ ຫຍູ່ງ ມ່ຽນ.

¹³ ອຈິ໊ມ ອ໋ອຍ ບຢ໌ອງ ເປັຍ ນິ່ນ ເຍີຍ ຮູ່ງ ຕິ່ນ, ອຈິ໊ມ-ໂທສວ ອຈິ໊ມ-ໝ່ວນ ອ໋ອຍ ບຢ໌ອງ ນິ່ນ ເວີ່ຍ ວ້ວນ ເຍີຍ ຕ໋ອງ. ນ້າຍ ນອມ ຕ໋ອງ ອ໋ອຍ ເປ໋ນ ເຮ່ຍ ຈູ໊ ຢຽມ ເຍີຍ ຕ໋ອງ, ເປ໋ນ ເໜາະ ກູ໊ ລົງ ເຍີຍ ເປຢົ໊າ.

¹⁴ ເຕີ່ຍ-ປູງ-ຮວາງ ເຍີຍ ເຮ່ຍ ຕສ້ອຍ ອ໋ອຍ ປວັ້ງ ເຮ່ຍ ຈູ໊-ເປນ, ເຮ່ຍ ຢູ້ງ ຢ່າ ອ໋ອຍ ເຫ່ວ ຕ່ອຍ. ລູ່ງ ມ໌ວນ ຕສັ່ນ ເຍີຍ ເຮ່ຍ ກະນ້າຍ ຕີ້ງ ວົ້ວ, ແອ໋ງ ເຫວີ່ຍ ກັ້ນ ລໍ໌ ຕ໋ອງ ຮິດ.

¹⁵ ເໜາະ ກູ໊ ລົງ ອ໋ອຍ ຢຽມ ວົ້ວ ໂຕສ໋ວ ເລົ໌າ ເດົ່າ ເຈົ໋າ, ປົ່ວ ເຈົ໋າ ຕສຸ໋ນ ຕອນ-ຫລຸນ, ຢ່າ ປຸນ ຕອນ ຢຽມ ຕສຸ໊ນ ນິ່ນ ເຍີຍ ດ໊າດ-ເດ໊ຍ. ຕົ້ມ ຈ໊າງ ຢຽດ ຕ໋ອຍ ຢຽດ ຕ໋ອຍ ເຍີຍ ກັ໊ບ ຕສຸ໊ນ ຢຽມ ວົ້ວ.

¹⁶ ເມີ່ຍ ບົວ ອ໋ອຍ ຕສຸ ບ໊ຽນ ລໍ໌ ຕສ໊ຽວ ເຍີຍ ໂຊວ ໂຕະ ນ້າຍ ເຕີ໋ຍ ຫວ່າ. ນ້າຍ ເຕີ໋ຍ ກະນ້າຍ ໄມ້ ທສາ ຢຽດ ເຕົ້າ ໄຟ ຢຽດ ນອມ. ໄມ້ ມ່າຍ ຢຽດ ຫຍູ່ງ ໄມ້ ມ່າຍ ນິ່ນ ເຍີຍ ຕ໋ອຍ. ເຫວີ່ຍ ຕສຸ ຕສ໊ຽວ ເຍີຍ ດສຸ້ຍ ຮນັ້ງ ນ້າຍ ຫັດ, ນິ່ນ ເຍີຍ ສີງ ລີ່ງ ຢ່າ ອ໋ອຍ ຕໍ້ ນິ່ນ ບົວ ຕ້າຍ ຕສຸ໊ນ.

¹⁷ ນິ່ນ ພ້າຍ ປຸນ ນິ່ນ ບົວ ເຍີຍ ປ່ວນ. ນິ່ນ ກັ້ນ ເຍີຍ ປົ໌ວ ຫລົ່ງ ຮລາງ ເດາະ ປຸນ ອກອຍ. ນິ່ນ ບົວ ຢຽດ ລິ໌ວ ຕຸ໊ ດສິບ ເປ໋ນ ນິ່ນ ບົວ ເຍີຍ ປ່ວນ. ຕ່ອຍ ເຈ໋ຍ ຕ່ອຍ ຢ່າ ຕຸ໊ ຢຽມ ໜ່າຍ.