โฮ​เซ​ยา 1 - ฉบับอักษรลาว

¹ ອຸດ​ຊີ​ຢາ, ໂຢ​ທາມ, ອາ​ຫັດ ເຖສົາ ເຮ​ເຊ​ຄີ​ຢາ ໂຕສ໋ວ ຢູ​ດາ ຮູ່ງ ເຍີຍ ຕສຢັ້ງ ໂຫ່, ໂຢ​ອາດ ເຍີຍ ຕອນ, ເຢ​ເລ​ໂບ​ອຳ, ໂຕສ໋ວ ອິ​ສະ​ລາ​ເອນ ເຍີຍ ຮູ່ງ ກຸ໊ນ ເຍີຍ ຮນອຍ-ເຫຍັຍ, ເບ​ເອ​ລີ ເຍີຍ ຕອນ, ໂຮ​ເຊ​ຢາ, ຕສິ໊ບ ຕສ໊ຽວ ເຍີຍ ຫວ່າ.

ໂຮ​ເຊ​ຢາ ເຍີຍ ເອົ໊າ ເຖສົາ ຝຸຈ໊ວຍ

² ຕສ໊ຽວ ຫລົ່ງ ໂຮ​ເຊ​ຢາ ໂຕ່ວ ຕ້າວ ດສຸ່ນ ຫວ່າ, ຕສ໊ຽວ ກ໊ອງ ບົ໋ວ ນິ່ນ, “ເມີ່ຍ ອ໋ອຍ ຕສຸ ມີ່ງ ລໍ໌ ເຕົ້າ ໝ່າຍ ປ໊ວນ-ຊິນ ເຍີຍ ເຊັຍ ໂຕສ໋ວ ເອົ໊າ, ຢ່າ ຕຸ໊ ໝ່າຍ ຊິນ ມ່ຽນ ເຍີຍ ຝຸຈ໊ວຍ, ເຫວີ່ຍ ຕສຸ ນ້າຍ ນອມ ເຕີ່ຍ-ປູງ ມ່າຍ ຫຮຢຽນ ເຍີຍ ສີ່ ໂຮລ ໄຫ່ ຫລາຍ ນິ່ນ ບົວ ກວັ່ງ ຕສ໊ຽວ. ”

³ ເຫວີ່ຍ ນ້າຍ ໂຮ​ເຊ​ຢາ ມີ່ງ ຫລົ່ງ ດິບ​ລາ​ອິມ ເຍີຍ ເຊັຍ, ໂກ​ເມ. ໂກ​ເມ ຕສ່ຽວ ມ່າຍ ຈ໊ຽນ ຊິນ, ຢູ໌ງ ຕຸ໊ ເຕົ້າ ຕອນ ປຸນ ໂຮ​ເຊ​ຢາ.

⁴ ຕສ໊ຽວ ກ໊ອງ ບົ໋ວ ໂຮ​ເຊ​ຢາ, “ອ໋ອຍ ຕສຸ ເຖງ ນິ່ນ ທສວດ ບົ໋ວ ເຫ່ວ, ຢິ໊ດ​ເລ​ເອນ, ເຫວີ່ຍ ຕສຸ ແອ໋ງ ໄມ້ ເລົ່າ ເຢຍ ອ໋ອຍ ຕີ່ງ ເຢ​ຮູ ເຍີຍ ເຕສີ໊ຍ-ຟຸນ ເຍີຍ ຕສຸ໌ຍ, ຫລາຍ ເຢ​ຮູ ຢຽມ ຢິ໊ດ​ເລ​ເອນ ໄຕ໋ ມ່ຽນ, ປຸນ ດສຢ໊າມ ຫລ່ຽວ ທສວດ. ເຢຍ ຢ່າ ອ໋ອຍ ປຸນ ອິ​ສະ​ລາ​ເອນ ເຍີຍ ເຕສີ໊ຍ-ຟຸນ ເຍີຍ ກົ໊ວະ ຕສຸດ.

⁵ ເຖົາ ວົ້ວ ຮນອຍ ເຢຍ ອ໋ອຍ ຢຽມ ຢິ໊ດ​ເລ​ເອນ ຮ໌ອງ ວວດ ເນົ້າ ອິ​ສະ​ລາ​ເອນ ເຍີຍ ຈວັງ-ຕສິ໋ນ.”

⁶ ໂກ​ເມ ແອ໋ງ ມ່າຍ ຈ໊ຽນ ຊິນ, ຢູ໌ງ ຕຸ໊ ເຕົ້າ ເຊັຍ. ຕສ໊ຽວ ກ໊ອງ ບົ໋ວ ໂຮ​ເຊ​ຢາ, “ອ໋ອຍ ຕສຸ ເຖງ ນິ່ນ ທສວດ ບົ໋ວ ເຫ່ວ ໂລ​ລຸ​ຫະ​ມາ. ເຫວີ່ຍ ຕສຸ ຢຽມ ນ້າຍ ມີ່ງ ເຢຍ ໄມ້ ຄໍ້-ລ່ຽນ ອິ​ສະ​ລາ​ເອນ ເຍີຍ ເຕສີ໊ຍ-ຟຸນ, ຕສູ໊ງ ໄມ້ ກວັ່ງ ນິ່ນ ບົວ ເຍີຍ ຕສຸ໌ຍ.

⁷ ມປ່າ ເຢຍ ອ໋ອຍ ຄໍ້-ລ່ຽນ ຢູ​ດາ ເຍີຍ ເຕສີ໊ຍ-ຟຸນ, ຢ່າ ປຸນ ຕສ໊ຽວ, ນິ່ນ ບົວ ເຍີຍ ທິນ-ຮູ່ງ, ໂອຈ໋ວ ນິ່ນ ບົວ. ເຢຍ ໄມ້ ເຕສີ໌ຍ ຫລົ່ງ ຈວັງ-ຕສິ໋ນ ໄຟ ດສຸ ດ໊າວ ໄຟ ເບ໊າະ ຈ໋າ ເຍີຍ ເຈົ໊າ ໄຟ ມ໌າ ໄຟ ເກ້ ມ໌າ ແປງ ໂອຈ໋ວ ນິ່ນ ບົວ.”

⁸ ໂກ​ເມ ປຸນ ໂລ​ລຸ​ຫະ​ມາ ກວັ່ງ ລິ໌ວ ຫຍໍ, ນິ່ນ ແອ໋ງ ມ່າຍ ຈ໊ຽນ ຊິນ, ຢູ໌ງ ຕຸ໊ ເຕົ້າ ຕອນ.

⁹ ຕສ໊ຽວ ກ໊ອງ, “ອ໋ອຍ ຕສຸ ທສວດ ນິ່ນ ເຍີຍ ບົ໋ວ ເຫ່ວ ໂລ​ອຳ​ມີ ເຫວີ່ຍ ຕສຸ ເມີ່ຍ ບົວ ໄມ້ ໂຕສ໋ວ ເຢຍ ເຍີຍ ແປະ ຝີງ. ເຢຍ ຢ່າ ໄມ້ ໂຕສ໋ວ ເມີ່ຍ ບົວ ເຍີຍ ທິນ-ຮູ່ງ.

ອິ​ສະ​ລາ​ເອນ ແອ໋ງ ຕຸ໊ ເຖສີຍ ເຈ໌ຍ ຕ້າຍ ຮນັ້ງ ໂລ໌ ວົ້ວ ນໍ

¹⁰ “ມປ່າ ອິ​ສະ​ລາ​ເອນ ເຍີຍ ມ່ຽນ ໂສວ ອ໋ອຍ ຮນັ້ງ ຄ້ອຍ ເຍີຍ ຊາ-ຕສຽວ, ຮລາວ ໄມ້ ຕຸ໊ ຢ່າ ຊ້າວ ໄມ້ ຮີ່ງ. ຢຽມ ທິນ-ຮູ່ງ ກ໊ອງ ບົ໋ວ ເຈ໋ຍ ນິ່ນ ບົວ, ‘ເມີ່ຍ ບົວ ໄມ້ ເຕສີ໌ຍ ເຢຍ ເຍີຍ ແປະ ຝີງ,’ ຢຽມ ວົ້ວ ນອມ ຕ໋ອງ ທິນ-ຮູ່ງ ເຫ່ວ ນິ່ນ ບົວ, ‘ຕສຢັ້ງ ຈ໊ຽນ ເຍີຍ ທິນ-ຮູ່ງ ເຍີຍ ນ່າມ ໂຍ໌ວ.’

¹¹ ຢູ​ດາ ເຍີຍ ເຕສີ໊ຍ-ຟຸນ ເຖສົາ ອິ​ສະ​ລາ​ເອນ ເຍີຍ ເຕສີ໊ຍ-ຟຸນ ຢຽດ ຕສູ໊ງ ຕຸ໊ ກັ໊ບ ຕສຸ໊ນ ຕ້າຍ, ເຫວີ່ຍ ກັ້ນ ຫລຽບ ຢຽດ ເຕົ້າ ໂຕສ໋ວ ເປຢີ໊ຍ ເຕສີ໊ຍ. ເມີ່ຍ ບົວ ຕສ່ຽວ ຢຽມ ໜ່າຍ ນອມ ເຕີ່ຍ-ປູງ ຝາວ ມີ່ງ, ເຫວີ່ຍ ຕສຸ ຢິ໊ດ​ເລ​ເອນ ເຍີຍ ຮນອຍ ຕສະເກ້ງ ໂຮລ ໄຫ່ ອ໊ະ.