ธ้วด อี​ยิบ 8 - ฉบับอักษรลาว

¹ ຕສ໊ຽວ ແອ໋ງ ກ໊ອງ ບົ໋ວ ໂມ​ເຊ, “ເມີ່ຍ ອ໋ອຍ ຕສຸ ມີ່ງ ບົ໋ວ ຟາ​ໂລ ຮູ່ງ, ‘ ຕສ໊ຽວ ຮນັ້ງ ນ້າຍ ນໍ ກ໊ອງ, “ປູ໋ງ ເຢຍ ເຍີຍ ແປະ ຝີງ ເຫວີ່ຍ ປຸນ ນິ່ນ ບົວ ມີ່ງ ຕສັ່ງ ເຢຍ.

² ເມີ່ຍ ໄມ້ ຄັ້ງ ປູ໋ງ ນິ່ນ ບົວ ມີ່ງ ນໍ, ເຢຍ ອ໋ອຍ ປຸນ ແກ໊ງ ຟ້ານ ປວັ໊ງ ເດສ່ງ ເມີ່ຍ ເຍີຍ ເຕີ່ຍ-ປູງ.

³ ແກ໊ງ ຢ່າ ອ໋ອຍ ປວັ໊ງ ເດສ່ງ ໄນ​ອາ ດ້າຍ. ແກ໊ງ ຢ່າ ອ໋ອຍ ຝາວ ມີ່ງ ເປັຍ ເມີ່ຍ ເຍີຍ ຮູ່ງ ຕິ່ນ, ເມີ່ຍ ເຍີຍ ເກນ, ຝາວ ເມີ່ຍ ເຍີຍ ໂຖສວ, ຢ່າ ອ໋ອຍ ເປັຍ ເມີ່ຍ ເຍີຍ ຈຽນ ເຍີຍ ເປຢົ໊າ, ຝາວ ເມີ່ຍ ເຍີຍ ແປະ ຝີງ ເຍີຍ ຊິນ, ແອ໋ງ ເປັຍ ຕສິ໊ ອຈົ໊ວ ເຍີຍ ໂດສ໋ ເຖສົາ ໄຖສ ອຈົ໊ວ ເຍີຍ ປຸ້ນ.

⁴ ແກ໊ງ ຢ່າ ອ໋ອຍ ຝາວ ເມີ່ຍ ເຍີຍ ຊິນ, ເຖສົາ ເມີ່ຍ ເຍີຍ ແປະ ຝີງ ເຖສົາ ເມີ່ຍ ເຍີຍ ຕສວັ໋ງ ຈຽນ ເຍີຍ ຊິນ.”’”

⁵ ຕສ໊ຽວ ແອ໋ງ ກ໊ອງ ບົ໋ວ ໂມ​ເຊ, “ບົ໋ວ ອາ​ລົນ, ‘ເຕສ໊າະ ປຢ໊າ-ບຢ່າ ນັ້ນ ຈ໊ຽນ ຊູງ ເຈ໋ຍ ດ້າຍ, ໂດ໊ະ, ອຈ້າງ ກູ້ ຫງວ່າຍ ປຸນ ແກ໊ງ ທສວດ ຕ້າຍ ປວັ໊ງ ອີ​ຢິ໊ບ ເຕີ່ຍ-ປູງ ອ໊ະ.’”

⁶ ອາ​ລົນ ຊູງ ປົ໌ວ ເຈ໋ຍ ອີ​ຢິ໊ບ ເຕີ່ຍ-ປູງ ເຍີຍ ວວມ ກູ້ ຫງວ່າຍ. ແກ໊ງ ຕສ່ຽວ ທສວດ ຕ້າຍ ປວັ໊ງ ອີ​ຢິ໊ບ ເຕີ່ຍ-ປູງ ໝີ່ ອ໊ະ.

⁷ ມປ່າ ໂຕສ໋ວ ຫຮວາ-ຍິ໌ນ ເຍີຍ ມ່ຽນ ຫລົ່ງ ນິ່ນ ບົວ ເຍີຍ ຟາດ ຟີ່ ຮນັ້ງ ເຍີຍ ໂຕສ໋ວ, ປຸນ ແກ໊ງ ທສວດ ຕ້າຍ ຢຽມ ອີ​ຢິ໊ບ ເຕີ່ຍ-ປູງ.

⁸ ຟາ​ໂລ ຮູ່ງ ເຫ່ວ ໂມ​ເຊ ເຖສົາ ອາ​ລົນ ຕ້າຍ, ກ໊ອງ ບົ໋ວ ນິ່ນ ບົວ, “ໂທ້ ເມີ່ຍ ບົວ ເຕົ໋າ ເກົ໋າ ໂຈ້ວ ຕສ໊ຽວ ປຸນ ແກ໊ງ ເປຢົ໋າ ອກອຍ ເຢຍ ເຖສົາ ເຢຍ ເຍີຍ ແປະ ຝີງ. ເຢຍ ຕສ່ຽວ ປຸນ ເມີ່ຍ ເຍີຍ ແປະ ຝີງ ມີ່ງ ເຕສ່ຍ ປຸນ ຕສ໊ຽວ ອ໊ະ.”

⁹ ໂມ​ເຊ ກ໊ອງ ບົ໋ວ ຟາ​ໂລ ຮູ່ງ, “ວົ້ວ ຫຍູ່ງ, ເຊວີ່ຍ ເມີ່ຍ ຕີ່ງ ຕສຢັ້ງ ໂຫ່ ອ໋ອຍ ເຢຍ ຫາຍ ຕສັ່ນ ເຖງ ເມີ່ຍ ເຖສົາ ເມີ່ຍ ເຍີຍ ຈຽນ ເຖສົາ ເມີ່ຍ ເຍີຍ ແປະ ຝີງ ເຕົ໋າ ເກົ໋າ ໂທ້ ຕສ໊ຽວ ປຸນ ແກ໊ງ ເປຢົ໋າ, ເລີ່ຍ ເມີ່ຍ ບົວ ເຖສົາ ເມີ່ຍ ບົວ ເຍີຍ ເປຢົ໊າ, ປຸນ ແກ໊ງ ຂູງ ຢຽມ ວົ້ວ ໄນ​ອາ ດ້າຍ ຮນັ້ງ.”

¹⁰ ຟາ​ໂລ ກ໊ອງ, “ອຈັງ ຮນອຍ ໂທ້ ອ໊ະ.” ໂມ​ເຊ ເຕົາ, “ເຢຍ ຕສິ໋ວ ເມີ່ຍ ກ໊ອງ ເຍີຍ ຫວ່າ ເຕົ໋າ ເກົ໋າ, ເມີ່ຍ ຕສ່ຽວ ຮິ້ວ ຕຸ໊ ໄມ້ ມ່າຍ ຫາຍ ເຕົ້າ ຮນັ້ງ ຕສ໊ຽວ, ເຢຍ ບົວ ເຍີຍ ທິນ-ຮູ່ງ.

¹¹ ແກ໊ງ ອ໋ອຍ ເປຢົ໋າ ເມີ່ຍ ເຖສົາ ເມີ່ຍ ເຍີຍ ຈຽນ ເຖສົາ ເມີ່ຍ ເຍີຍ ແປະ ຝີງ, ເຖສົາ ເມີ່ຍ ບົວ ເຍີຍ ເປຢົ໊າ. ຂູງ ເຕສ່ງ ຢຽມ ວົ້ວ ໄນ​ອາ ດ້າຍ ວົ້ວ ເຕີ໋ຍ ຮນັ້ງ.”

¹² ໂມ​ເຊ ເຖສົາ ອາ​ລົນ ຢຽມ ຟາ​ໂລ ວົ້ວ ທສວດ ມີ່ງ ໝີ່ ອ໊ະ. ໂມ​ເຊ ເຫວີ່ຍ ທສວດ ຕ້າຍ ຫ່ອຍ ຟາ​ໂລ ນ້າຍ ເຕີ໋ຍ ແກ໊ງ ທຈະ ເຕົ໋າ ເກົ໋າ ໂທ້ ຕສ໊ຽວ ເຖງ.

¹³ ຕສ໊ຽວ ຕສ່ຽວ ຕສິ໋ວ ໂມ​ເຊ ໂທ້ ເຍີຍ ຫວ່າ ໂຕສ໋ວ. ຢຽມ ເປຢົ໊າ, ຢຽມ ເປຢົ໊າ-ເຮລນ, ຢຽມ ເດີ່ຍ ເຍີຍ ແກ໊ງ ໄຕ່ ເດສ່ງ.

¹⁴ ອີ​ຢິ໊ບ ມ່ຽນ ເດສົ໌າ ແກ໊ງ-ໄຕ່ ຕ້າຍ ດຸຍໆ ເຍີຍ. ຢຽດ ນອມ ເຕີ່ຍ-ປູງ ເຕສວີ໋ຍ ເດສ່ງ.

¹⁵ ມປ່າ ຟາ​ໂລ ຮູ່ງ ປວັດ ແກ໊ງ ໄຕ່ ເດສ່ງ, ນິ່ນ ເຍີຍ ໂຮຍ້ວ ແອ໋ງ ແຫງ່ງ ອ໊ະ. ນິ່ນ ໄມ້ ຄັ້ງ ໝວັງ ໂມ​ເຊ ເຖສົາ ອາ​ລົນ ເຍີຍ ຫວ່າ, ຮນັ້ງ ຕສ໊ຽວ ກ໊ອງ ນໍ.

ຕະຟາມ ຫຍູ່ງ ເຕສະ ໜ່ານ, ແກງ-ບູງ ຟ້ານ

¹⁶ ຕສ໊ຽວ ແອ໋ງ ກ໊ອງ ບົ໋ວ ໂມ​ເຊ, “ບົ໋ວ ອາ​ລົນ ‘ເຕສ໊າະ ປຢ໊າ-ບຢ່າ ເບ໊າະ ເນຍ-ບູງ. ເນຍ-ບູງ ຕສ່ຽວ ເປ໋ນ ແກງ-ບູງ ປວັ໊ງ ອີ​ຢິ໊ບ ເຕີ່ຍ-ປູງ.’”

¹⁷ ນິ່ນ ບົວ ອີ ເຕົ້າ ເອີຍ ຈ໊ຽນ ໂຕສ໋ວ. ອາ​ລົນ ຢ້າມ ເຈ໌ຍ ປຢ໊າ-ບຢ່າ ເບ໊າະ ເນຍ-ບູງ. ເນຍ-ບູງ ຕສ່ຽວ ເປ໋ນ ແກງ-ບູງ ຕ້າຍ ປວັ໊ງ ມ່ຽນ ເຍີຍ ຊິນ ເຖສົາ ແຊງ-ຄູ້ ເຍີຍ ຊິນ. ອີ​ຢິ໊ບ ເຕີ່ຍ-ປູງ ເຍີຍ ເນຍ-ບູງ ເປ໋ນ ແກງ-ບູງ ເດສ່ງ.

¹⁸ ໂຕສ໋ວ ຫຮວາ-ຍິ໌ນ ເຍີຍ ມ່ຽນ ອ໋ອຍ ຫລົ່ງ ນິ່ນ ບົວ ເຍີຍ ຟາດ ໂຕສ໋ວ ແກງ-ບູງ ຢ່າ ໂຕສ໋ວ ໄມ້ ທສວດ. ແກງ-ບູງ ຕ້າຍ ຟຢາວ ມ່ຽນ ເຍີຍ ຊິນ ເຖສົາ ແຊງ-ຄູ້ ເຍີຍ ຊິນ.

¹⁹ ໂຕສ໋ວ ຫຮວາ-ຍິ໌ນ ເຍີຍ ມ່ຽນ ກ໊ອງ ບົ໋ວ ຟາ​ໂລ, “ນ້າຍ ເຊ ທິນ-ຮູ່ງ ໂຕສ໋ວ ເຍີຍ ສີ່.” ມປ່າ ຟາ​ໂລ ຮູ່ງ ເຍີຍ ໂຮຍ້ວ ແຫງ່ງ ໄຫ່, ໄມ້ ຄັ້ງ ໝວັງ ນິ່ນ ບົວ ເຍີຍ ຫວ່າ, ຮນັ້ງ ຕສ໊ຽວ ກ໊ອງ ນໍ.

ຕະເຝີຍ ຫຍູ່ງ ເຕສະ ໜ່ານ, ມູ໌ງ ຟ້ານ

²⁰ ຕສ໊ຽວ ແອ໋ງ ກ໊ອງ ບົ໋ວ ໂມ​ເຊ, “ອຈັງ ດອມ ເຈ໌ຍ ຊິນ ດສ໊ຽວ ເຍີຍ ຕສົ໊ວ ຈ໊ຽນ ຟາ​ໂລ ຮູ່ງ ເອຈ່ຍ ວົ້ວ ດ້າຍ ເຮລນ ຕສ່ຽວ ກ໊ອງ ບົ໋ວ ນິ່ນ, ‘ ຕສ໊ຽວ ຮນັ້ງ ນ້າຍ ນໍ ກ໊ອງ, “ອ໋ອຍ ຕສຸ ປູ໋ງ ເຢຍ ເຍີຍ ແປະ ຝີງ ມີ່ງ, ເຫວີ່ຍ ປຸນ ນິ່ນ ບົວ ໄຮ່ ຕສັ່ງ ເຢຍ.

²¹ ເຊ ກ໊ອງ ເມີ່ຍ ໄມ້ ປູ໋ງ ເຢຍ ເຍີຍ ແປະ ຝີງ ມີ່ງ ນໍ, ເຢຍ ອ໋ອຍ ປຸນ ມູ໌ງ ຟ້ານ, ຟຢາວ ເຍີຍ ຟຢາວ, ປຢ້ອມ ເຍີຍ ປຢ້ອມ ເມີ່ຍ ເຖສົາ ເມີ່ຍ ເຍີຍ ຈຽນ ເຖສົາ ເມີ່ຍ ເຍີຍ ແປະ ຝີງ, ຢ່າ ເປັຍ ເມີ່ຍ ບົວ ເຍີຍ ເປຢົ໊າ ກະຍົ໌ວ. ອີ​ຢິ໊ບ ມ່ຽນ ເຍີຍ ເປຢົ໊າ, ລ່ຽມ ນິ່ນ ບົວ ຢຽມ ເຍີຍ ເດົາ, ມູ໌ງ ອ໋ອຍ ປວັ໊ງ ເດສ່ງ.

²² “‘“ຕົ້ງ ວົ້ວ ຮນອຍ ເຢຍ ອ໋ອຍ ເອກ໋ນ ທສວດ ໂກ​ເຊນ ເຕີ່ຍ-ປູງ, ເຢຍ ເຍີຍ ແປະ ຝີງ ຢຽມ ເຍີຍ ຕ໋ອງ, ໄມ້ ປຸນ ມ່າຍ ມູ໌ງ. ຮນັ້ງ ນ້າຍ ເມີ່ຍ ຕສ່ຽວ ຮິ້ວ ຕຸ໊ ເຢຍ, ຕສ໊ຽວ, ຢຽມ ນ້າຍ ນອມ ເຕີ່ຍ-ປູງ.

²³ ເຢຍ ຕສ່ຽວ ເອກ໋ນ ຈ໊ຽນ ເຢຍ ເຍີຍ ແປະ ຝີງ ເຖສົາ ເມີ່ຍ ເຍີຍ ແປະ ຝີງ. ນ້າຍ ເຕີ໋ຍ ບົວະ ຮ່ອງ ເຍີຍ ຈັ໋ງ-ໂຫ່ ອຈັງ ຮນອຍ ທສວດ ອ໊ະ.”’”

²⁴ ຕສ໊ຽວ ຕສ່ຽວ ຮນັ້ງ ນ້າຍ ໂຕສ໋ວ. ມູ໌ງ ຟ້ານ ງົ່ມໆ ເຍີຍ ເປັຍ ຟາ​ໂລ ເຍີຍ ຮູ່ງ ຕິ່ນ ເຖສົາ ນິ່ນ ເຍີຍ ຈຽນ ເຍີຍ ເປຢົ໊າ. ເຕີ່ຍ-ປູງ ຫາຍ ເດົາ ມ່າຍ ມູ໌ງ ປວັ໊ງ ເດສ່ງ. ຫລາຍ ນ້າຍ ເຕີ໋ຍ ມູ໌ງ ຟ້ານ, ຕສ່ຽວ ຫ່ອຍ ເຕີ່ຍ-ປູງ ຫວ່າຍ ເດສ່ງ ໝີ່ ອ໊ະ.

²⁵ ຟາ​ໂລ ຕສ່ຽວ ເຫ່ວ ໂມ​ເຊ ເຖສົາ ອາ​ລົນ ຕ້າຍ. ນິ່ນ ກ໊ອງ, “ກຸ໊ນ ຢຽມ ນ້າຍ ນອມ ເຕີ່ຍ-ປູງ ເຕສ່ຍ ປຸນ ເມີ່ຍ ເຍີຍ ທິນ-ຮູ່ງ ອ໊ະ.”

²⁶ ໂມ​ເຊ ກ໊ອງ, “ຮນັ້ງ ນ້າຍ ໂຕສ໋ວ ເຊ ໄມ້ ຫອບ. ເຢຍ ບົວ ຫລົ່ງ ເຕສ່ຍ ປຸນ ຕສ໊ຽວ, ເຢຍ ບົວ ເຍີຍ ທິນ-ຮູ່ງ, ວົ້ວ ເຕີ໋ຍ ແຊງ-ຄູ້, ອີ​ຢິ໊ບ ມ່ຽນ ໄຮ໌ ກ້ຳ ເດສ໊ຍ ເຍີຍ. ເຊ ກ໊ອງ ເຢຍ ບົວ ຢຽມ ນິ່ນ ບົວ ໝັ່ງ ຕຸ໊ ປວັດ ເຍີຍ ຕ໋ອງ ຫລົ່ງ ນິ່ນ ບົວ ກ້ຳ ເດສ໊ຍ ເຍີຍ ແຊງ-ຄູ້ ເຕສ່ຍ, ນິ່ນ ບົວ ໄມ້ ເຕສີ໌ຍ ອ໋ອຍ ເຕສ໊າະ ຫລະເປຢີ໊ຍ ຕສົງ ໄຕ່ ເຢຍ ບົວ ໄຟ?

²⁷ ເຢຍ ບົວ ອ໋ອຍ ຕສຸ ມີ່ງ ປົວ ຮນອຍ ເຍີຍ ເຈົ໊າ-ຕີ້ງ, ຢຽມ ວົ້ວ ເຕີ່ຍ-ປູງ-ຮວາງ ເຕສ່ຍ ປຸນ ຕສ໊ຽວ ເຢຍ ບົວ ເຍີຍ ທິນ-ຮູ່ງ, ຮນັ້ງ ນິ່ນ ພ້າຍ ເຢຍ ບົວ ໂຕສ໋ວ ວົ້ວ ນໍ.”

²⁸ ຟາ​ໂລ ກ໊ອງ, “ເຢຍ ປຸນ ເມີ່ຍ ບົວ ມີ່ງ ເຕີ່ຍ-ປູງ-ຮວາງ ວົ້ວ, ປຸນ ເມີ່ຍ ບົວ ເຕສ່ຍ ປຸນ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ມປ່າ ໄມ້ ຕູ໋ງ ມີ່ງ ໂກ. ຢ່າ ໂທ້ ເຫວີ່ຍ ເຢຍ ເຕົ໋າ ເກົ໋າ.”

²⁹ ໂມ​ເຊ ເຕົາ, “ເຢຍ ຢຽມ ນ້າຍ ທສວດ ມີ່ງ ຕສ່ຽວ ເຖງ ເມີ່ຍ ເຕົ໋າ ເກົ໋າ ໂທ້ ຕສ໊ຽວ. ອຈັງ ຮນອຍ ມູ໌ງ ຕສ່ຽວ ເປຢົ໋າ ເມີ່ຍ ເຖສົາ ເມີ່ຍ ເຍີຍ ຈຽນ ເຖສົາ ເມີ່ຍ ເຍີຍ ແປະ ຝີງ. ມປ່າ ນ້າຍ ດສຸ່ນ ຮນັ້ງ ຫາຍ ຕສູ໊ງ ໄມ້ ຕູ໋ງ ບ໊ຽນ ໂຮຍ້ວ ແອ໋ງ ຖຸຍ ຫວ່າ, ໄມ້ ປຸນ ແປະ ຝີງ ມີ່ງ ເຕສ່ຍ ປຸນ ຕສ໊ຽວ ໂອ່.”

³⁰ ໂມ​ເຊ ຕສ່ຽວ ມີ່ງ ອ໊ະ, ແອ໋ງ ເຕົ໋າ ເກົ໋າ ໂທ້ ຕສ໊ຽວ ເຖງ.

³¹ ຕສ໊ຽວ ຢ່າ ເອີຍ ໂມ​ເຊ ໂທ້ ເຍີຍ ຫວ່າ ໂຕສ໋ວ. ມູ໌ງ ເປຢົ໋າ ເດສ່ງ ຟາ​ໂລ ເຖສົາ ນິ່ນ ເຍີຍ ຈຽນ ເຖສົາ ນິ່ນ ເຍີຍ ແປະ ຝີງ. ໄມ້ ເຕສ່ງ ຢຽດ ນອມ ອ໊ະ.

³² ມປ່າ ນ້າຍ ດສຸ່ນ ຟາ​ໂລ ແອ໋ງ ແຫງ່ງ ຈ໊ຽນ ໂຮຍ້ວ, ໄມ້ ປຸນ ແປະ ຝີງ ມີ່ງ.