ธ้วด อี​ยิบ 22 - ฉบับอักษรลาว

ປຸ້ຍ ກະນ້າຍ ເຍີຍ ເລີ໌ຍ

¹ “ເຊ ກ໊ອງ ມ່າຍ ມ່ຽນ ໂຕສ໋ວ ຕສະ ໜິ່ມ ງົ່ງ ໄຟ ປະກີ ຢູ້ງ ຕໍ້ ມີ່ງ ໄຕ໋ ໄຟ ໝ່າຍ, ຢຽດ ເຕົ້າ ງົ່ງ ອ໋ອຍ ຕສຸ ປຸ້ຍ ປຢາ ເຕົ້າ, ຢຽດ ເຕົ້າ ປະກີ ຢູ້ງ ປຸ້ຍ ເປຢີຍ ເຕົ້າ.

² “ເຊ ກ໊ອງ ມ່ຽນ ປວັດ ຈັ໋ນ-ຕສະ ເວດ ຄວດ ເປັຍ ເປຢົ໊າ ຕສ່ຽວ ເບ໊າະ ຈັ໋ນ-ຕສະ ໄຕ່ ນໍ, ເບ໊າະ ຈັ໋ນ-ຕສະ ວົ້ວ ເຕົ້າ ໄມ້ ມ່າຍ ໄຕ໋ ມ່ຽນ ເຍີຍ ຕສຸ໌ຍ.

³ ມປ່າ ເຊ ກ໊ອງ ບະຮນອຍ ທສວດ ຕ້າຍ ນິ່ນ ເບ໊າະ ໄຕ່ ນໍ, ນິ່ນ ຕສ່ຽວ ມ່າຍ ໄຕ໋ ມ່ຽນ ເຍີຍ ຕສຸ໌ຍ. “ຈັ໋ນ-ຕສະ ຕສູ໊ງ ອ໋ອຍ ຕສຸ ປຸ້ຍ ນິ່ນ ໜິ່ມ ເຍີຍ ກະນ້າຍ. ໄມ້ ມ່າຍ ຫາຍ ຫຍູ່ງ ປຸ້ຍ ນໍ, ອ໋ອຍ ຕສຸ ໝ່າຍ ນິ່ນ ກັ້ນ ຕ້າຍ ປຸ້ຍ.

⁴ “ເຊ ກ໊ອງ ນິ່ນ ໜິ່ມ ຕ້າຍ ເຍີຍ ແຊງ-ຄູ້, ໄມ້ ກຸ໊ນ ງົ່ງ ໄຟ ລໍ່ ໄຟ ປະກີ ຢູ້ງ, ຖສໍ່ ຢຽມ ນິ່ນ ເຍີຍ ປົ໌ວ-ເດ໊ຍ, ໄມ້ ແກ້ງ ໝ່າຍ ໄມ້ ແກ້ງ ໄຕ໋, ຢຽດ ເຕົ້າ ອ໋ອຍ ຕສຸ ປຸ້ຍ ອີ ເຕົ້າ.

⁵ “ຫາຍ ເຕົ້າ ປູ໋ງ ແຊງ-ຄູ້ ຢຽມ ນິ່ນ ກັ້ນ ເຍີຍ ເດີ່ຍ ໄຟ ອະຫງຸ່ນ ຫຮວີງ ຫຍັ່ນ ເມ້ຍ, ແຊງ-ຄູ້ ຢ່າ ຊາວ ມີ່ງ ເປັຍ ກັ້ນ ເຕົ້າ ເຍີຍ ເດີ່ຍ ຫຍັ່ນ ກະນ້າຍ, ແຊງ-ຄູ້ ຕສ໊ຽວ ອ໋ອຍ ຕສຸ ເຕສ໊າະ ກັ້ນ ເຍີຍ ເດີ່ຍ ເກົ້າ ຫລົງ ເຈ໋ຍ ເຍີຍ ກະນ້າຍ ໄຟ ອະຫງຸ່ນ ຫຮວີງ ເກົ້າ ຫລົງ ເຈ໋ຍ ເຍີຍ ປ໊ຽວ ຕ້າຍ ທິບ.

⁶ “ຫາຍ ເຕົ້າ ຢຽມ ເດີ່ຍ ປົ໊ວ ໂຕ໌ວ, ໂຕ໌ວ ຢ່າ ລັ່ນ ອຈິ໊ມ-ເບຢາະ, ແອ໋ງ ລັ່ນ ຕສຸ ມ່ຽນ ເຍີຍ ເບຢົ້າ ດຸຍ ໄຟ ໄມ້ ແກ້ງ ກ໊າດ ເຍີຍ ເບຢົ້າ ໄຟ ປົ໊ວ ເດສ່ງ ຕສຢັ້ງ ດສົງ ເດີ່ຍ, ປົ໊ວ ໂຕ໌ວ ວົ້ວ ລ່ານ ມ່ຽນ ອ໋ອຍ ຕສຸ ທິບ ຈຸ້ນ ເດສ່ງ.

⁷ “ເຊ ກ໊ອງ ມ່າຍ ມ່ຽນ ຕໍ້ ຍ່ານ ໄຟ ຈ໋າຍ ເຍີຍ ກະນ້າຍ ປຸນ ເຕົ້າ ຈວັ່ງ ລ໌າງ ເຍີຍ ກໍ໋-ໂຢ໌ວ ເຖງ ຊຽວ, ວົ້ວ ເຕີ໋ຍ ກະນ້າຍ ຢ່າ ຕສຸ ຈັ໋ນ-ຕສະ ໜິ່ມ ໝີ່ ອ໊ະ, ເຕສ໊າະ ຕຸ໊ ຈັ໋ນ-ຕສະ ນໍ, ຈັ໋ນ-ຕສະ ກັ້ນ ອ໋ອຍ ຕສຸ ປຸ້ຍ. ຢຽດ ໂກ໊ວ ອ໋ອຍ ຕສຸ ປຸ້ຍ ອີ ໂກ໊ວ.

⁸ ເຕສ໊າະ ໄມ້ ຕຸ໊ ຈັ໋ນ-ຕສະ ນໍ, ອ໋ອຍ ຕສຸ ຕໍ້ ຊຽວ ກະນ້າຍ ວົ້ວ ເຕົ້າ ເປຢົ໊າ-ຕສ໊ຽວ ມີ່ງ ຕຸ໋ນ ສີ່ ມ່ຽນ ວົ້ວ ຕສ້າ ໝັ່ງ ກ໋າ, ເຕສີ໌ຍ ນິ່ນ ກັ້ນ ໜິ່ມ ໄຟ ໄມ້ ເຕສີ໌ຍ.

⁹ ຫາຍ ຕສັ່ນ ມ່າຍ ໂກ໋ ເຍີຍ ສີ່, ໄມ້ ກຸ໊ນ ເຊ ຫລາຍ ງົ່ງ, ໄຟ ລໍ່, ປະກີ ຢູ້ງ, ລຸຍ-ໂຫວ ໄຟ ຫາຍ ຫຍູ່ງ ກະນ້າຍ ຕີ໋ງ ລ່າຍ, ເຊ ກ໊ອງ ມ່າຍ ເຕົ້າ ກ໊ອງ, ‘ນ້າຍ ເຊ ເຢຍ ເຍີຍ,’ ອ໋ອຍ ຕສຸ ຕໍ້ ນິ່ນ ບົວ ອີ ເຕົ້າ ມີ່ງ ເຖົາ ຕຸ໋ນ ສີ່ ມ່ຽນ ວົ້ວ ຕຸ໋ນ. ຕີ່ງ ຫາຍ ເຕົ້າ ຕ່ອງ, ຕ່ອງ ວົ້ວ ເຕົ້າ ອ໋ອຍ ຕສຸ ປຸ້ຍ ອີ ໂກ໊ວ.

¹⁰ “ຫາຍ ເຕົ້າ ຕໍ້ ລໍ່ ໄຟ ງົ່ງ ໄຟ ປະກີ ຢູ້ງ ໄຟ ຫາຍ ຫຍູ່ງ ແຊງ-ຄູ້ ຢ່າ ຕຸ໊, ປຸນ ເຕົ້າ ຈວັ່ງ ລ໌າງ ເຍີຍ ກໍ໋-ໂຢ໌ວ ເຖງ ນິ່ນ ໂກ໋ວ, ເຊ ກ໊ອງ ແຊງ-ຄູ້ ໄຕ່ ໄຟ ຕສຸ ມຸນ, ໄຟ ຕສຸ ມ່ຽນ ທສ້າງ ມີ່ງ ຢ່າ ໄມ້ ມ່າຍ ຫາຍ ເຕົ້າ ປວັດ ນໍ,

¹¹ ເຖງ ໝັ່ງ ເຍີຍ ມ່ຽນ ອ໋ອຍ ຕສຸ ຕອງ ຈ໊ຽນ ຕສ໊ຽວ ໂຮ້ວ ຫວ່າ ກ໊ອງ, ໄມ້ ເຕສີ໌ຍ ນິ່ນ ໜິ່ມ ວົ້ວ ເຕົ້າ ເຍີຍ ກະນ້າຍ. ແຊງ-ຄູ້ ເຍີຍ ຕສ໊ຽວ ກັ້ນ ອ໋ອຍ ຕສຸ ແລ໌ງ ດ໊ອດ. ເຖງ ໂກ໋ວ ວົ້ວ ເຕົ້າ ໄມ້ ຕສຸ ປຸ້ຍ ອ໊ະ.

¹² ມປ່າ ເຊ ກ໊ອງ ເຖງ ໂກ໋ວ ເຍີຍ ມ່ຽນ ໂກ໋ວ ຈ໊ຽນ ເຍີຍ ຕສຢັ້ງ ໂຫ່ ຕສຸ ຈັ໋ນ-ຕສະ ໜິ່ມ ວົ້ວ ເຕົ້າ ແຊງ-ຄູ້ ນໍ, ໂກ໋ວ ເຍີຍ ມ່ຽນ ອ໋ອຍ ຕສຸ ທິບ ຈຸ້ນ.

¹³ ເຊ ກ໊ອງ ເຮ່ຍ ກະນ້າຍ ຕ້າຍ ຫງາດ ແຊງ-ຄູ້ ໄຕ່, ອ໋ອຍ ຕສຸ ຕໍ້ ເຮ່ຍ ກະນ້າຍ ຫຍັ່ນ ເຕສ່ງ ເຍີຍ ອໍ໊ ຕ້າຍ ປຸນ ແຊງ-ຄູ້ ຕສ໊ຽວ ໝັ່ງ. ໂກ໋ວ ເຍີຍ ມ່ຽນ ຕສ່ຽວ ໄມ້ ຕສຸ ທິບ ອ໊ະ.

¹⁴ “ກ໊ອງ ຮນັ້ງ ມ່າຍ ມ່ຽນ ກ໊າ ລ໌າງ ຕສັ່ງ ກໍ໋-ໂຢ໌ວ ເຍີຍ ແຊງ-ຄູ້ ມີ່ງ ຫລົ່ງ, ແຊງ-ຄູ້ ເຍີຍ ຕສ໊ຽວ ໄມ້ ປວັດ ເຍີຍ ຕສຢັ້ງ ໂຫ່ ວົ້ວ ເຕົ້າ ແຊງ-ຄູ້ ຕສຸ ມຸນ ໄຟ ໄຕ່ ນໍ, ກ໊າ ເຍີຍ ມ່ຽນ ອ໋ອຍ ຕສຸ ທິບ ຈຸ້ນ.

¹⁵ ເຊ ກ໊ອງ ແຊງ-ຄູ້ ເຍີຍ ຕສ໊ຽວ ເຖສົາ ຈ໊ຽນ ຢຽມ ນໍ, ກ໊າ ຫລົ່ງ ເຍີຍ ມ່ຽນ ໄມ້ ຕສຸ ທິບ. ເຊ ກ໊ອງ ເປ໋ນ ໂກ໊ວ ຕ້າຍ ເຍີຍ ແຊງ-ຄູ້, ແຊງ-ຄູ້ ຕສ໊ຽວ ຕຸ໊ ໂກ໊ວ ເຍີຍ ຍ່ານ ຕີ໊ ແຊງ-ຄູ້ ເຍີຍ ມອກ໊ອງ ຮນັ້ງ.

ໂຕສ໋ວ ຫອບ ເຍີຍ ເລີ໌ຍ

¹⁶ “ເຊ ກ໊ອງ ມ່າຍ ເຕົ້າ ເຊັຍ ໄມ້ ດສຢ່າວ ເຈ໋ຍ ຕອນ ຢ່າ ໄມ້ ແກ້ງ ມ່າຍ ຫາຍ ເຕົ້າ ກ໊ອງ ຕສຢັ້ງ ນິ່ນ ມປ່າ ມ່າຍ ເຕົ້າ ມຈັ່ງ ຕອນ ດົ໊ວ ນິ່ນ ເຖສົາ ເປວີ໋ຍ ນໍ, ວົ້ວ ເຕົ້າ ມຈັ່ງ ຕອນ ຕສູ໊ງ ອ໋ອຍ ຕສຸ ທສວດ ເລີ໌ຍ-ກີງ ຍ່ານ ຢ່າ ອ໋ອຍ ຕສຸ ຫລົ່ງ ວົ້ວ ເຕົ້າ ເຊັຍ ໂຕສ໋ວ ນິ່ນ ເຍີຍ ເອົ໊າ ອ໊ະ.

¹⁷ ກ໊ອງ ຮນັ້ງ ເຊັຍ ເຍີຍ ເຕຍ ໄມ້ ຄັ້ງ ປຸນ ວົ້ວ ເຕົ້າ ມຈັ່ງ ຕອນ ຫລົ່ງ, ມຈັ່ງ ຕອນ ຖສໍ່ ອ໋ອຍ ຕສຸ ທສວດ ບົວະ ຕົ້ງ ໄມ້ ເປວີ໋ຍ ເຈ໋ຍ ຕອນ ເຍີຍ ເຊັຍ ເຍີຍ ເລີ໌ຍ-ກີງ ຍ່ານ.

¹⁸ “ໂຕສ໋ວ ຟາດ ເຍີຍ ມເຊັຍ ຕອນ, ອ໋ອຍ ຕສຸ ໄຕ໋ ກວັ່ງ.

¹⁹ “ຫາຍ ເຕົ້າ ມ່ຽນ ຫຮຢຽນ ແຊງ-ຄູ້, ວົ້ວ ເຕົ້າ ອ໋ອຍ ຕສຸ ຕີ່ງ ຕສຸ໌ຍ ໄຕ໋ ໄຕ່.

²⁰ “ຫາຍ ເຕົ້າ ຕໍ້ ກະນ້າຍ ເຕສ່ຍ ປຸນ ກັ້ນ ເຕົ້າ ຕສ້ຽນ, ໄມ້ ເຕສີ໌ຍ ຂູງ ເຕສ່ຍ ປຸນ ຕສ໊ຽວ ຮນັ້ງ, ວົ້ວ ເຕົ້າ ຕສູ໊ງ ອ໋ອຍ ຕສຸ ໝຽດ ອ໊ະ.

²¹ “ໄມ້ ຕູ໋ງ ໂຕສ໋ວ ໂຕະ ຫ່ອຍ ເຖສົາ ເມີ່ຍ ບົວ ຢຽມ ເຍີຍ ກັ້ນ ຝີງ ມ່ຽນ, ເຫວີ່ຍ ຕສຸ ຕສິ້ນ ດ່າງ ເມີ່ຍ ບົວ ຢ່າ ຢຽມ ອີ​ຢິ໊ບ ເຕີ່ຍ-ປູງ ເປ໋ນ ກັ້ນ ຝີງ ມ່ຽນ.

²² “ໄມ້ ຕູ໋ງ ໂຕສ໋ວ ໂຕະ ເອົ໊າ-ກວ໊າ ເຖສົາ ກູ້ ຮັ່ນ ຝຸຈ໊ວຍ.

²³ ເຊ ກ໊ອງ ໂຕສ໋ວ ຫ່ອຍ ນິ່ນ ບົວ, ນິ່ນ ບົວ ເຫ່ວ ຈ໊ຽນ ໂທ້ ເຢຍ ເຖງ, ເຢຍ ດົ່ງ ຫາຍ ຕສູ໊ງ ອ໋ອຍ ໝວັງ ນິ່ນ ບົວ.

²⁴ ເຢຍ ຕສ່ຽວ ເຖຈຍ ເຈ໌ຍ! ໄຫ່, ປຸນ ເມີ່ຍ ບົວ ຕສຸ ດສຸ ດ໊າວ ໄຕ໋. ເມີ່ຍ ບົວ ເຍີຍ ເອົ໊າ ຕສ່ຽວ ເປ໋ນ ເອົ໊າ-ກວ໊າ, ເມີ່ຍ ບົວ ເຍີຍ ຝຸຈ໊ວຍ ຢ່າ ເປ໋ນ ກູ້ ຮັ່ນ ຝຸຈ໊ວຍ ໝີ່ ອ໊ະ.

²⁵ “ເຊ ກ໊ອງ ຢຽມ ເມີ່ຍ ບົວ ບຸດົ໋ງ ມ່າຍ ເຕົ້າ ເຢຍ ເຍີຍ ແປະ ຝີງ ຈົ່ມ ໄຫ່, ເຖງ ເມີ່ຍ ບົວ ກ໊າ ຍ່ານ, ໄມ້ ຕູ໋ງ ໂຕສ໋ວ ຮນັ້ງ ປູ໋ງ ແຕສ໊ະ ເຍີຍ ມ່ຽນ ເຫ່ວ ນິ່ນ ທສວດ ເຫລີ່ຍ ຕສິ້ນ.

²⁶ ເຊ ກ໊ອງ ເມີ່ຍ ຫລົ່ງ ຫາຍ ເຕົ້າ ເຍີຍ ຕົ້ມ ລຸຍ ໂຕສ໋ວ ຕ໋ອງ-ຕ້າວ ນໍ, ບະຮນອຍ ໄມ້ ແກ້ງ ມວດ ອ໋ອຍ ຕສຸ ຖຸຍ ດສ໋ວນ ປຸນ ນິ່ນ,

²⁷ ເຫວີ່ຍ ຕສຸ ນິ່ນ ຂູງ ມ່າຍ ນ້າຍ ດຸ ເຕີ໋ຍ ຕົ້ມ ລຸຍ-ດ໊າວ ປຸ໋ຍ ຊິນ ຮນັ້ງ. ນິ່ນ ໄມ້ ມ່າຍ ນໍ, ນິ່ນ ຫລົ່ງ ຫາຍ ຫຍູ່ງ ຫົ່ມ ຈ໊ຽນ ເປວີ໋ຍ ມອຈ້ອມ? ເຊ ກ໊ອງ ນິ່ນ ເຫ່ວ ຈ໊ຽນ ໂທ້ ເຢຍ ເຖງ, ເຢຍ ຕສ່ຽວ ໝວັງ ນິ່ນ ເຍີຍ ຫວ່າ, ເຫວີ່ຍ ຕສຸ ເຢຍ ຄໍ້-ລ່ຽນ ມ່ຽນ.

²⁸ “ໄມ້ ຕູ໋ງ ຄີ ທິນ-ຮູ່ງ. ຢ່າ ໄມ້ ຕູ໋ງ ຕສ໋ຽວ ໂກ໋ວ ແປະ ຝີງ ເຍີຍ ຈຽນ.

²⁹ “ໄມ້ ຕູ໋ງ ໄງ່, ພຢັດ ຮນອຍ ຕໍ້ ເມີ່ຍ ບົວ ເຍີຍ ລ່າງ ຕສິ, ອະຫງຸ່ນ ຕິ໊ວ ເຖສົາ ກະລັ້ນ ໂຢ້ວ ຝົ່ງ ຫໍ່ ປຸນ ເຢຍ. “ອ໋ອຍ ຕສຸ ຕໍ້ ເຕົ້າໆ ຕອນ-ຫລະເກົ໊າ ຕ້າຍ ປຸນ ເຢຍ.

³⁰ ເມີ່ຍ ບົວ ເຍີຍ ງົ່ງ, ຢູ້ງ ເຖສົາ ປະກີ ຢູ້ງ ຕອນ ເຍີຍ ຕ້າວ ທອຍ ຕອນ ຢ່າ ອ໋ອຍ ຕສຸ ຝູງ ປຸນ ເຢຍ. ປຸນ ຕອນ ເຖສົາ ມາ ຢຽມ ປວັ໊ງ ເສ່ຍ ຮນອຍ. ຫຮຢຽດ ຮນອຍ ວົ້ວ ຮນອຍ ອ໋ອຍ ຕສຸ ຝູງ ປຸນ ເຢຍ.

³¹ “ເມີ່ຍ ບົວ ໂຕສ໋ວ ເຢຍ ເຍີຍ ທສີງ-ເດສ່ງ ມ່ຽນ. ເຫວີ່ຍ ນ້າຍ ໄມ້ ຕູ໋ງ ຫຍັ່ນ ເຮ່ຍ ກະນ້າຍ ຫງາດ ເຍີຍ ແຊງ-ຄູ້ ອໍ໊. ອ໋ອຍ ຕສຸ ກວັ່ງ ປຸນ ຈູ໊ ຫຍັ່ນ.