ธ้วด อี​ยิบ 21 - ฉบับอักษรลาว

¹ “ເມີ່ຍ ອ໋ອຍ ຕສຸ ກ໊ອງ ນ້າຍ ເຕີ໋ຍ ເລີ໌ຍ ບົ໋ວ ອິ​ສະ​ລາ​ເອນ ມ່ຽນ.

ໂນ່ວ ເຍີຍ ເລີ໌ຍ

² “ເຊ ກ໊ອງ ເມີ່ຍ ມ໌າຍ ເຕົ້າ ຮິບ​ລູ ມ່ຽນ ໂຕສ໋ວ ໂນ່ວ, ນິ່ນ ອ໋ອຍ ຕສຸ ເຖງ ເມີ່ຍ ໂຕສ໋ວ ຈຸ໊ ຫຮຍັງ ກົງ. ເຖົາ ຕະທສຽດ ຫຮຍັງ ວົ້ວ ຫຮຍັງ ອ໋ອຍ ຕສຸ ປຸນ ນິ່ນ ທສວດ. ນິ່ນ ຢ່າ ໄມ້ ຕສຸ ທສວດ ຍ່ານ.

³ ເຊ ກ໊ອງ ນິ່ນ ຕ້າຍ ເຍີຍ ຕສຢັ້ງ ໂຫ່ ຕານ-ຊິນ ມ່ຽນ, ນິ່ນ ທສວດ ເຍີຍ ຕສຢັ້ງ ໂຫ່ ຢ່າ ປຸນ ນິ່ນ ຕານ-ຊິນ ທສວດ. ເຊ ກ໊ອງ ຕ້າຍ ເຍີຍ ຕສຢັ້ງ ໂຫ່ ຕໍ້ ຈ໊ຽນ ເອົ໊າ ຕ້າຍ, ທສວດ ເຍີຍ ຕສຢັ້ງ ໂຫ່ ຢ່າ ອ໋ອຍ ຕສຸ ປຸນ ເອົ໊າ ກັນ ຈ໊ຽນ ມີ່ງ.

⁴ ກ໊ອງ ຮນັ້ງ ນິ່ນ ເຍີຍ ຕສ໊ຽວ ລໍ໌ ເອົ໊າ ປຸນ ນິ່ນ ຫລົ່ງ, ນ້າຍ ເຕົ້າ ເອົ໊າ ຢູ໌ງ ຕຸ໊ ຕອນ ໄຟ ເຊັຍ, ວົ້ວ ເຕົ້າ ເອົ໊າ ເຖສົາ ນິ່ນ ເຍີຍ ຝຸຈ໊ວຍ ເປ໋ນ ນິ່ນ ເຍີຍ ຕສ໊ຽວ ເຍີຍ ໝີ່ ອ໊ະ. ຂູງ ວົ້ວ ເຕົ້າ ມຈັ່ງ ຕອນ ກັ້ນ ຕຸ໊ ທສວດ ຮນັ້ງ.

⁵ “ມປ່າ ເຊ ກ໊ອງ ວົ້ວ ເຕົ້າ ໂນ່ວ ກ໊ອງ, ‘ເຢຍ ຮນ້ຳ ເຢຍ ເຍີຍ ຕສ໊ຽວ ເຖສົາ ເຢຍ ເຍີຍ ເອົ໊າ-ເຈວີ໊ຍ. ເຢຍ ໄມ້ ອ໋ອຍ ທສວດ ໂຕສ໋ວ ປູ໋ງ ອກອຍ ເຍີຍ ມ່ຽນ,’

⁶ ນິ່ນ ເຍີຍ ຕສ໊ຽວ ອ໋ອຍ ຕສຸ ຕໍ້ ນິ່ນ ມີ່ງ ຕອງ ຈ໊ຽນ ເບ່ນ ສີ່ ມ່ຽນ ເຕສ໊າະ ໂນ່ວ ເຍີຍ ມນ່ອມ ປັ່ງ ແກ້ງ ໄຟ ແກ້ງ ໂຕສ່ວ, ຫລົ່ງ ເຕສວີຍ ເຕສວີຍ ທົງ ມີ່ງ. ນິ່ນ ຕສ່ຽວ ຢຽດ ເສີຍ ເຖງ ວົ້ວ ເຕົ້າ ຕສ໊ຽວ ໂຕສ໋ວ ໂນ່ວ.

⁷ “ເຊ ກ໊ອງ ມ່ຽນ ໝ່າຍ ກັ້ນ ເຍີຍ ເຊັຍ ເຖງ ມ່ຽນ ໂຕສ໋ວ ໂນ່ວ ເປີ໌ຍ, ວົ້ວ ເຕົ້າ ເຊັຍ ໄມ້ ຕຸ໊ ປູ໋ງ ອກອຍ ຮນັ້ງ ໂຕສ໋ວ ໂນ່ວ ເກົ໊າ ເຍີຍ ມ່ຽນ ນໍ.

⁸ ເຊ ກ໊ອງ ມ໌າຍ ນິ່ນ ຕ້າຍ ວົ້ວ ເຕົ້າ ຕສ໊ຽວ ອ໋ອຍ ຫລົ່ງ ໂຕສ໋ວ ກັ້ນ ເຍີຍ ເອົ໊າ, ອກະຮ້າ ໄຮ໌ ໄມ້ ປວັ໊ງ ໂຮຍ້ວ, ນິ່ນ ອ໋ອຍ ຕສຸ ປຸນ ມ່ຽນ ຕສົວະ ເຊັຍ ດສ໋ວນ. ນິ່ນ ໄມ້ ມ່າຍ ເລີ໌ຍ ໝ່າຍ ປຸນ ກັ້ນ ຝີງ ມ່ຽນ ເຫວີ່ຍ ຕສຸ ນິ່ນ ໂຕສ໋ວ ໄມ້ ຕສຽບ ຕສົ໊ວະ ປຸນ ວົ້ວ ເຕົ້າ ເຊັຍ ໝີ່ ອ໊ະ.

⁹ ເຊ ກ໊ອງ ວົ້ວ ເຕົ້າ ຕສ໊ຽວ ກິ໊ນ ວົ້ວ ເຕົ້າ ເຊັຍ ປຸນ ກັ້ນ ເຍີຍ ຕອນ ຫລົ່ງ ໂຕສ໋ວ ເອົ໊າ, ອ໋ອຍ ຕສຸ ຝຸນ ນິ່ນ ໂຕສ໋ວ ຮນັ້ງ ກັ້ນ ເຍີຍ ເຊັຍ ນໍ.

¹⁰ ເຊ ກ໊ອງ ນິ່ນ ແອ໋ງ ຫລົ່ງ ເອົ໊າ-ຕອນ, ໄມ້ ຕູ໋ງ ເຄວີຍ ຫຍັ່ນ ຮົບ ໄຟ ລຸຍ-ໂຫວ, ຢ່າ ໄມ້ ຕູ໋ງ ຕສ່ານ ນິ່ນ ເຍີຍ ເອົ໊າ-ໂຮລ.

¹¹ ເຊ ກ໊ອງ ນິ່ນ ເອີຍ ໄມ້ ຕຸ໊ ນ້າຍ ເຕີ໋ຍ ປົວ ຫຍູ່ງ ນໍ, ນິ່ນ ອ໋ອຍ ຕສຸ ປຸນ ນິ່ນ ເຍີຍ ເອົ໊າ-ໂຮລ ຕສຢັງ ໜ່າຍ ທສວດ. ເອົ໊າ ຢ່າ ໄມ້ ຕສຸ ທສວດ ຫາຍ ຫຍູ່ງ ຍ່ານ.

ໂຕສ໋ວ ໂຕະ ຫ່ອຍ ມ່ຽນ ເຍີຍ ເລີ໌ຍ

¹² “ຫາຍ ເຕົ້າ ເບ໊າະ ມ່ຽນ ຢ່າ ເບ໊າະ ໄຕ່, ວົ້ວ ເຕົ້າ ຕສູ໊ງ ອ໋ອຍ ຕສຸ ຕີ່ງ ຕສຸ໌ຍ ໄຕ໋ ໄຕ່.

¹³ ຫາຍ ເຕົ້າ ໄມ້ ເຕສີ໌ຍ ປ່າໆ ໄຕ໋ ມ່ຽນ, ນິ່ນ ທສະ-ໂປ່ວ ໄຕ໋, ເຊ ທິນ-ຮູ່ງ ຕີ່ງ ປຸນ ມ່ຽນ ຮນັ້ງ ນ້າຍ ນໍ ຕສຸ ໄຕ່, ເຢຍ ຕສ່ຽວ ຫລຽບ ນອມ ຕ໋ອງ ປຸນ ນິ່ນ ເປຢົ໋າ ມີ່ງ ຢຽມ ວົ້ວ.

¹⁴ ມປ່າ ຫາຍ ເຕົ້າ ເຈ໌ຍ ໂຮຍ້ວ ປ່າໆ ໄຕ໋ ມ່ຽນ ໄຕ່, ໄມ້ ກຸ໊ນ ນິ່ນ ເປຢົ໋າ ມີ່ງ ຕສ່ຽວ ເຕສ່ຍ-ຕ້ອງ, ຕສູ໊ງ ອ໋ອຍ ຕສຸ ເຕສ໊າະ ນິ່ນ ທໍ ມີ່ງ ຕີ່ງ ຕສຸ໌ຍ ໄຕ໋ ໄຕ່.

¹⁵ “ຫາຍ ເຕົ້າ ເບ໊າະ ນິ່ນ ເຍີຍ ເຕຍ ໄຟ ມາ ນໍ, ວົ້ວ ເຕົ້າ ຢ່າ ອ໋ອຍ ຕສຸ ຕີ່ງ ຕສຸ໌ຍ ໄຕ໋ ໄຕ່.

¹⁶ “ຫາຍ ເຕົ້າ ໜິ່ມ ມ່ຽນ ຕ້າຍ ໝ່າຍ ໄຟ ໜິ່ມ ຕ້າຍ ຖສໍ່ ຢຽມ ນິ່ນ ເຍີຍ ປົ໌ວ-ເດ໊ຍ ມ່າຍ ມ່ຽນ ປວັດ, ວົ້ວ ເຕົ້າ ອ໋ອຍ ຕສຸ ຕີ່ງ ຕສຸ໌ຍ ໄຕ໋ ໄຕ່ ອ໊ະ.

¹⁷ “ຫາຍ ເຕົ້າ ຕສ໋ຽວ ນິ່ນ ເຍີຍ ເຕຍ ໄຟ ມາ, ອ໋ອຍ ຕສຸ ເຕສ໊າະ ນິ່ນ ໄຕ໋ ກວັ່ງ.

¹⁸ “ເຊ ກ໊ອງ ມ່າຍ ມ່ຽນ ແດສງ ຈ໋າ, ມ່າຍ ເຕົ້າ ເຕສ໊າະ ຫລະເປຢີ໊ຍ ຕສົງ ໄຟ ຫລົ່ງ ປົ໌ວ-ຈ້ວນ ເດສວີຍ, ຕສຸ ມຸນ ວົ້ວ ເຕົ້າ ຢ່າ ໄມ້ ໄຕ່ ມປ່າ ເປວີ໋ຍ ຈ໊ຽນ ໂຖສວ,

¹⁹ ເຊ ກ໊ອງ ອກະຮ້າ ນິ່ນ ເຈ໌ຍ ຊິນ ບຢ່າ ຈ໊ຽນ ປຢ໊າ ທສວດ ກະເຫຍ່ຍ ແໝງ, ເບ໊າະ ນິ່ນ ວົ້ວ ເຕົ້າ ໄມ້ ຕສຸ ຕີ່ງ ຕສຸ໌ຍ. ມປ່າ ນິ່ນ ອ໋ອຍ ຕສຸ ທສວດ ເຕ໊ຍ ມຸນ ຕສິ້ນ ຢ່າ ຕສໍ່ ນິ່ນ ຫລົງ ຮນັ້ງ ໂລ໌ ວົ້ວ ນໍ.

²⁰ “ເຊ ກ໊ອງ ມ່ຽນ ຫລົ່ງ ປຢ໊າ ເບ໊າະ ນິ່ນ ເຍີຍ ໂນ່ວ ເກົ໊າ ໄຟ ໂນ່ວ ເປີ໌ຍ, ໂນ່ວ ຕສ່ຽວ ລ່ຽມ ເຕສີ້ຍ ໄຕ່ ນໍ, ວົ້ວ ເຕົ້າ ຕສ໊ຽວ ອ໋ອຍ ຕສຸ ຕີ່ງ ຕສຸ໌ຍ.

²¹ ມປ່າ ເບ໊າະ ລິ໌ວ ອີ ປົວ ຮນອຍ ຖສີງ ຕ້າຍ ໄຕ່, ເບ໊າະ ນິ່ນ ວົ້ວ ເຕົ້າ ໄມ້ ຕສຸ ຕີ່ງ ຕສຸ໌ຍ ເຫວີ່ຍ ຕສຸ ນິ່ນ ຕສູ໊ງ ດ໊ອດ ມ໌າຍ ໂນ່ວ ເຍີຍ ຍ່ານ ໝີ່ ອ໊ະ.

²² “ເຊ ກ໊ອງ ມ່າຍ ອີ ເຕົ້າ ມ່ຽນ ເບ໊າະ ຈ໋າ, ທສະ-ໂປ່ວ ເບ໊າະ ຕສຸ ມ່າຍ ຈ໊ຽນ ຊິນ ເຍີຍ ມເຊັຍ ຕອນ ຕສ່ຽວ ຫ່ອຍ ນິ່ນ ຫວ່າຍ ຊິນ, ມປ່າ ມເຊັຍ ຕອນ ກັ້ນ ໄມ້ ເປ໋ນ ຫາຍ ຫຍູ່ງ, ອ໋ອຍ ຕສຸ ປາດ ເບ໊າະ ເຍີຍ ມ່ຽນ ຕສິ໋ວ ວົ້ວ ເຕົ້າ ມເຊັຍ ຕອນ ເຍີຍ ໂອກ໋ ກ໊ອງ ອ໋ອຍ ຫລົ່ງ ບຸເຕສ໋ຍ ຢ່າ ຕສິ໋ວ ຕຸ໋ນ ສີ່ ມ່ຽນ ພ້າຍ ບຸເຕສ໋ຍ.

²³ ເຊ ກ໊ອງ ວົ້ວ ເຕົ້າ ມເຊັຍ ຕອນ ຕສຸ ຫາຍ ເດົາ ມຸນ, ອ໋ອຍ ຕສຸ ຮນັ້ງ ນ້າຍ ນໍ ເບ່ນ. ແໝ່ງ ຈ໊າວ ແໝ່ງ,

²⁴ ມຕສີງ ຈ໊າວ ມຕສີງ, ຍ່າ ຈ໊າວ ຍ່າ, ປົ໌ວ ຈ໊າວ ປົ໌ວ, ເຕສົ໋າ ຈ໊າວ ເຕສົ໋າ,

²⁵ ໂຕ໌ວ ປົ໊ວ ແອ໋ງ ເຕສ໊າະ ໂຕ໌ວ ປົ໊ວ ຈ໊າວ, ຮັ່ນ ຈ໊າວ ຮັ່ນ, ດົ໊ບ ຝາວ ດສຢ໊າມ ຈ໊າວ ດົ໊ບ ຝາວ ດສຢ໊າມ.

²⁶ “ຫາຍ ເຕົ້າ ເບ໊າະ ນິ່ນ ເຍີຍ ໂນ່ວ ເກົ໊າ ໄຟ ໂນ່ວ ເປີ໌ຍ ເຍີຍ ຢຽດ ປູງ ມຕສີງ ແມ່ງ ນໍ, ອ໋ອຍ ຕສຸ ປູ໋ງ ວົ້ວ ເຕົ້າ ໂນ່ວ ທສວດ ໂຕສ໋ວ ປູ໋ງ ອກອຍ ເຍີຍ ມ່ຽນ ເຫວີ່ຍ ຈ໊າວ ນິ່ນ ເຍີຍ ມຕສີງ ແມ່ງ.

²⁷ ຫາຍ ເຕົ້າ ເບ໊າະ ນິ່ນ ເຍີຍ ໂນ່ວ ເກົ໊າ ໄຟ ໂນ່ວ ເປີ໌ຍ ເຍີຍ ຍ່າ ດຸ໊ດ ຢຽດ ນອມ, ຢ່າ ອ໋ອຍ ຕສຸ ປູ໋ງ ວົ້ວ ເຕົ້າ ໂນ່ວ ທສວດ ໂຕສ໋ວ ປູ໋ງ ອກອຍ ເຍີຍ ມ່ຽນ ເຫວີ່ຍ ຈ໊າວ ນິ່ນ ເຍີຍ ຍ່າ.

ໂຕສ໋ວ ຕສ໊ຽວ ເຍີຍ ເລີ໌ຍ

²⁸ “ເຊ ກ໊ອງ ມ່າຍ ເຕົ້າ ງົ່ງ ໂກ໊ວ ເຖສວ ເຕົ້າ ມຈັ່ງ ຕອນ ໄຟ ມເຊັຍ ຕອນ ໄຕ່ ນໍ, ອ໋ອຍ ຕສຸ ຫລົ່ງ ຫລະເປຢີ໊ຍ ຕສົງ ວົ້ວ ເຕົ້າ ງົ່ງ ໄຕ່, ຢ່າ ໄມ້ ຕູ໋ງ ຫຍັ່ນ ງົ່ງ ເຍີຍ ອໍ໊. ງົ່ງ ຕສ໊ຽວ ຢ່າ ໄມ້ ຝຸນ ມ່າຍ ຕສຸ໌ຍ ອ໊ະ.

²⁹ ມປ່າ ເຊ ກ໊ອງ ວົ້ວ ເຕົ້າ ງົ່ງ ເຖສວ ເຈ໋ຍ ມ່ຽນ, ມ່ຽນ ບົ໋ວ ເຈ໋ຍ ງົ່ງ ຕສ໊ຽວ, ຕສ໊ຽວ ຢ່າ ໄມ້ ຫວວນ, ວົ້ວ ເຕົ້າ ງົ່ງ ແອ໋ງ ເຖສວ ມຈັ່ງ ຕອນ ໄຟ ມເຊັຍ ຕອນ ໄຕ່ ນໍ, ອ໋ອຍ ຕສຸ ເຕສ໊າະ ຫລະເປຢີ໊ຍ ຕສົງ ວົ້ວ ເຕົ້າ ງົ່ງ ໄຕ່. ຢ່າ ອ໋ອຍ ຕສຸ ຕີ່ງ ງົ່ງ ຕສ໊ຽວ ເຍີຍ ຕສຸ໌ຍ ຕສຸ ໄຕ໋ ໄຕ່.

³⁰ ເຊ ກ໊ອງ ມ່ຽນ ເຫ່ວ ທສວດ ຕສົວະ ແໝ່ງ ຍ່ານ ບຸເຕສ໋ຍ, ອ໋ອຍ ຕສຸ ຕສິ໋ວ ຕີ່ງ ຕ້າຍ ເຍີຍ ທສວດ ເຫວີ່ຍ ຕສົວະ ນິ່ນ ເຍີຍ ແໝ່ງ.

³¹ ເຊ ກ໊ອງ ງົ່ງ ເຖສວ ເຊັຍ ໄຟ ຕອນ, ອ໋ອຍ ຕສຸ ຕສິ໋ວ ນ້າຍ ເຕີ໋ຍ ເລີ໌ຍ ເບ່ນ.

³² ເຊ ກ໊ອງ ງົ່ງ ເຖສວ ມ່ຽນ ເຍີຍ ໂນ່ວ ເກົ໊າ ໄຟ ໂນ່ວ ເປີ໌ຍ ໄຕ່ ນໍ, ງົ່ງ ຕສ໊ຽວ ອ໋ອຍ ຕສຸ ທສວດ ເປ໊ດ ລູ໌ງ ຍ່ານ ປຸນ ໂນ່ວ ເຍີຍ ຕສ໊ຽວ ຢ່າ ອ໋ອຍ ຕສຸ ເຕສ໊າະ ຫລະເປຢີ໊ຍ ຕສົງ ວົ້ວ ເຕົ້າ ງົ່ງ ໂກ໊ວ ໄຕ່.

³³ “ຫາຍ ເຕົ້າ ຄອຍ ອກອຍ ຄວດ ໄຟ ເວດ ຄວດ ຕ້າຍ ຢ່າ ໄມ້ ກົ໊ມ, ງົ່ງ ໄຟ ລໍ່ ຕສ່ຽວ ດ໊ອດ ຄວດ ໄຕ່,

³⁴ ຄວດ ເຍີຍ ຕສ໊ຽວ ອ໋ອຍ ຕສຸ ທິບ ແຊງ-ຄູ້ ເຍີຍ ຈ໋າ-ຕສິ້ນ. ໄຕ່ ວົ້ວ ເຕົ້າ ແຊງ-ຄູ້ ຢ່າ ເປ໋ນ ຄວດ-ຕສ໊ຽວ ເຍີຍ ໝີ່ ອ໊ະ.

³⁵ “ເຊ ກ໊ອງ ມ່າຍ ເຕົ້າ ມ່ຽນ ເຍີຍ ງົ່ງ ເຖສວ ກັ້ນ ເຕົ້າ ມ່ຽນ ເຍີຍ ງົ່ງ ໄຕ່, ອ໋ອຍ ຕສຸ ໝ່າຍ ນັ່ງ ວົ້ວ ເຕົ້າ ງົ່ງ ຕ້າຍ, ເຕສ໊າະ ຍ່ານ ຕສິ໋ວ ຈ໋າ-ຕສິ້ນ ແປ້ງ ປຸນ ອກອຍ. ໄຕ່ ວົ້ວ ເຕົ້າ ງົ່ງ ເຍີຍ ອໍ໊ ຢ່າ ປຸນ ອກອຍ.

³⁶ ເຊ ກ໊ອງ ຮິ້ວ ຕຸ໊ ນ້າຍ ເຕົ້າ ງົ່ງ ເຖສວ ເຈ໋ຍ ມ່ຽນ ໄຟ ງົ່ງ, ງົ່ງ ຕສ໊ຽວ ຢ່າ ໄມ້ ຫວວນ, ງົ່ງ ຕສ໊ຽວ ອ໋ອຍ ຕສຸ ທິບ ງົ່ງ ຈ໊າວ ງົ່ງ. ໄຕ່ ວົ້ວ ເຕົ້າ ງົ່ງ ເປ໋ນ ນິ່ນ ກັ້ນ ເຍີຍ ໝີ່ ອ໊ະ.